ഇന്ത്യ-ഇംഗ്ലണ്ട്​ ട്വന്‍റി 20: ലോകത്തെ ഏറ്റവും വലിയ ക്രിക്കറ്റ്​ സ്​റ്റേഡിയത്തിൽ കാണികളെ​ത്തിയേക്കും

മുംബൈ: ലോകത്തെ ഏറ്റവും വലിയ ക്രിക്കറ്റ്​ സ്​റ്റേഡിയമായ അഹ്​മദാബാദിലെ മൊ​ട്ടേരയിലൂടെ ഇന്ത്യൻ ഗാലറികളിലേക്കും കാണികൾ തിരികെയെത്തുന്നു. കോവിഡ്​ കാലത്ത്​ അടച്ചുപൂട്ടിയ സ്​റ്റേഡിയങ്ങളിൽ അധികം വൈകാതെ നിയന്ത്രണങ്ങളോടെ പ്രവേശനം നൽകാനാണ്​ നീക്കം. ​മൊ​ട്ടേര സ്​റ്റേഡിയം വേദിയാവുന്ന ഇന്ത്യ-ഇംഗ്ലണ്ട്​ പരമ്പരയിലെ ട്വൻറി20 മത്സരങ്ങ​ളോടെയാവും കാണികളുടെ തിരിച്ചുവരവ്​. മാർച്ച്​ 12 മുതലാണ്​ ട്വൻറി20 മത്സരങ്ങൾ. സർക്കാറി​‍െൻറ അനുമതിക്കുശേഷം അന്തിമ തീരുമാനം എടുക്കുമെന്ന്​ ബി.സി.സി.ഐ ഉദ്യോഗസ്ഥൻ അറിയിച്ചു.

ഒരുലക്ഷം പേർക്ക്​ ഇരിപ്പിട സൗകര്യമുള്ള മൊ​ട്ടേരയിൽ സ്​റ്റേഡിയം ശേഷിയുടെ 50 ശതമാനം പേർക്ക്​ പ്രവേശനാനുമതി നൽകാനാണ്​ നീക്കം. കോവിഡ്​ പശ്ചാത്തലത്തിൽ കർശന നിയന്ത്രണങ്ങളോടെയാവും കാണികളെ തിരികെയെത്തിക്കുക.

ഫെബ്രുവരിയിൽ ചെന്നൈയിൽ ആരംഭിക്കുന്ന ടെസ്​റ്റ്​ പരമ്പരയിൽ കാണികൾക്ക്​ പ്രവേശനമുണ്ടാവില്ലെന്ന്​ ബി.സി.സി.ഐ നേരത്തേ അറിയിച്ചിരുന്നു. ആദ്യ രണ്ടു​ ടെസ്​റ്റിനുശേഷം, മൂന്നും നാലും മത്സരങ്ങൾക്ക്​ അഹ്​മദാബാദാണ്​ വേദി. പിന്നാലെ, മാർച്ച്​ 12 മുതൽ 20 വരെയായി അഞ്ച്​ ട്വൻറി20 മത്സരങ്ങൾ. മൂന്ന്​ ഏകദിന മത്സരങ്ങൾക്ക്​ പുണെ വേദിയാവും.

2020ൽ അമേരിക്കൻ പ്രസിഡന്‍റ്​ ​ഡോണൾഡ്​ ട്രംപ്​ ഇന്ത്യ സന്ദർശിച്ചപ്പോൾ വേദിയൊരുക്കിയത്​ മൊ​േട്ടര സ്​റ്റേഡിയത്തിലായിരുന്നു.