ബംഗ്ലാദേശ് ട്വന്‍റി20 ടീം നായകൻ മഹ്​മുദുല്ല ടെസ്റ്റിൽ നിന്ന്​ വിരമിച്ചു

ധാക്ക: ബംഗ്ലാദേശ്​ ഓൾറൗണ്ടർ മഹ്​മുദുല്ല റിയാദ്​ ടെസ്റ്റ്​ ക്രിക്കറ്റിൽ നിന്ന്​ വിരമിച്ചു. ബംഗ്ലാദേശ്​ ക്രിക്കറ്റ്​ ബോർഡ്​ ബുധനാഴ്ച ഇക്കാര്യം സ്​ഥിരീകരിച്ചു. താരത്തിന്‍റെ 12 വർഷം നീണ്ടുനിന്ന ടെസ്റ്റ്​ കരിയറിനാണ്​ ഇതോടെ അന്ത്യമായത്​.

പാകിസ്​താനെതിരായ രണ്ടുമത്സരങ്ങളടങ്ങിയ ടെസ്റ്റ്​ പരമ്പരക്ക്​ വെള്ളിയാഴ്ച ചിറ്റഗോങ്ങിൽ തുടക്കമാകാനിരിക്കേയാണ്​ വിരമിക്കൽ പ്രഖ്യാപനം. ബംഗ്ലാദേശ്​ ട്വന്‍റി20 ടീം നായകൻ കൂടിയായ മഹ്​മുദുല്ലയെ ടീമിൽ ഉൾപെടുത്തിയിരുന്നില്ല.

അരങ്ങേറ്റത്തിലും വിടവാങ്ങൽ ടെസ്റ്റിലും കളിയിലെ താരമായാണ്​ മഹ്​മുദുല്ല പാഡ്​ അഴിച്ചത്​. ഹരാരെയിൽ ജൂലൈയിൽ സിംബാബ്​വെക്കെതിരായ ടെസ്റ്റിൽ പുറത്താകാതെ 150 റൺസ്​ സ്​കോർ ചെയ്​ത മഹ്​മുദുല്ല ടീമിനെ ജയത്തിലേക്ക്​ നയിച്ചിരുന്നു.

പരിമിത ഓവർ ക്രിക്കറ്റിൽ തുടർന്നും കളിക്കുമെന്ന്​ താരം വ്യക്തമാക്കി. 50 ടെസ്റ്റുകളിൽ നിന്നായി 35കാരൻ 33.49 ശരാശരിയിൽ 2914 റൺസ്​ സ്​കോർ ചെയ്​തിട്ടുണ്ട്​. 43 വിക്കറ്റുകളും വീഴ്​ത്തി.