'നടരാജൻ പതിനഞ്ച്​ റൺസ്​ കുറച്ചു തന്നു; അവനാണ്​ ശരിക്കും മാൻ ഓഫ് ദി മാച്ച്​'

ഏകദിന പരമ്പര തോറ്റതിന്​ ട്വൻറി20യിൽ ആസ്​ട്രേലിയക്ക്​ തിരിച്ചടി കൊടുത്തിരിക്കുകയാണ്​ ഇന്ത്യ. രണ്ടാം മത്സരത്തിൽ ലോകേഷ്​ രാഹുലും വിരാട്​ കോഹ്​ലിയും ഹാദിക്​ പാണ്ഡ്യയും വെടിക്കെറ്റ്​ തീർത്തതോടെയാണ്​ ഇന്ത്യ പരമ്പര പിടിച്ചത്​. അവസാന ഓവറിൽ രണ്ടു സിക്​സറുകളുമായി ഇന്ത്യയെ ജയിപ്പിച്ച പാണ്ഡ്യ മാൻ ഓഫ്​ ദി മാച്ചും ആയി.

എന്നാൽ, ആസ്​ട്രേലിയയെ 200 കടത്താൻ അനുവദിക്കാതെ തളച്ച നടരാജ​നാണ്​ ശരിക്കും ഹീറോയെന്നാണ്​ പാണ്ഡ്യ പറയുന്നത്​." നടരാജൻ പ്രത്യേക അഭിനന്ദനം അർഹിക്കുന്നു. അവനാണ് മാൻ ഓഫ് ദി മാച്ചിന് അർഹൻ. കാരണം ഇവിടെ ബൗളർമാർ വളരെയധികം ബുദ്ധിമുട്ടിയിരുന്നു, എന്നാൽ അവൻ മികച്ച പ്രകടനമാണ് കാഴ്ച്ചവെച്ചത്. അവൻ ഞങ്ങളുടെ വിജയലക്ഷ്യം പത്തോ പതിനഞ്ചോ റൺസ് കുറച്ചുതന്നു " ഹാർദിക് പാണ്ഡ്യ പറഞ്ഞു.

" സ്കോർബോർഡ് വീക്ഷിച്ചുകൊണ്ട് കളിക്കാനാണ് ഞാൻ ഇഷ്ട്ടപെടുന്നത് അതുകൊണ്ട് ഏത് ബൗളറെ ലക്ഷ്യം വെയ്ക്കണമെന്ന് എനിക്കറിയാൻ സാധിക്കും. ഇത്തരം സാഹചര്യങ്ങൾ ഞാൻ മുമ്പും നേരിട്ടിട്ടുണ്ട്. എ​െൻറ പ്രകടനം എപ്പോഴും ആത്മവിശ്വാസത്തെ ആശ്രയിച്ചാണ്" - പാണ്ഡ്യ പറഞ്ഞു.

ആസ്‌ട്രേലിയക്കെതിരായ ട്വൻറി20 പരമ്പരയിലെ രണ്ടാം മത്സരത്തിൽ നാലോവറിൽ 20 റൺസ് മാത്രം വഴങ്ങിയ നടരാജൻ രണ്ടു വിക്കറ്റുകളും നേടിയിരുന്നു നേടിയിരുന്നു.