1983 ജൂൺ 25: കപിലി​െൻറ ചെകുത്താൻമാരുടെ വിസ്​മയ നേട്ടത്തിന്​ 38 വർഷം VIDEO

ലണ്ടനിൽ സെൻറ്​ ജോൺസ് പാർക്കിലെ ലോർഡ്​സ്​ മൈതാനിയിലന്ന് മൂവർണ നിറമുള്ള പതാകകൾ പാറിപ്പറക്കുകയാണ്​. 30000 വരുന്ന കാണികൾ ആവേശത്താലും ഉന്മാദത്താലും ആ പതാകയെ മാറോട് ചേർക്കുകയായിരുന്നു. തങ്ങളെ അടിമകളാക്കി വെച്ച ഒരു രാഷ്ട്രത്തി​െൻറ തലസ്ഥാന നഗരിയിൽ വർഷങ്ങൾക്കിപ്പുറം ലോകചാമ്പ്യൻമാരായി കരുത്ത് തെളിയിച്ച് കൊണ്ട് ഹിമാലയത്തിനും മഹാസമുദ്രത്തിനുമിടയിൽ സ്ഥിതി ചെയ്യുന്ന ആ രാഷ്ട്രം മറുപടി നൽകുകയായിരുന്നു. കോടാനുകോടി വരുന്ന ജനതക്ക്​ ആവേശമായിരുന്നു അത്​. ആ ലോകകിരീടം ഇന്ത്യയിലേക്കെത്തിക്കാൻ അതിനു തിരിനാളമായ് നിന്നത് കപിലിന്റെ ചെകുത്താന്മാരായിരുന്നു. ഹാട്രിക് ലോകകപ്പ് നേടി കരുത്ത് കാട്ടാമെന്ന ആത്മവിശ്വാസത്തിലെത്തിയ കരീബിയൻ പടയെ അവിശ്വസനീയമാം വിധം കശാപ്പ്​ ചെയ്​തായിരുന്നു ആ നേട്ടം.

1983 - ജൂൺ 25 .. 8 വർഷങ്ങൾക്ക് മുമ്പ് ആ ദിവസത്തിനു മറ്റൊരു പ്രത്യേകതയുണ്ടായിരുന്നു. ഒരു രാഷ്ട്രത്തെ മുഴുവൻ ഇരുട്ടറയിലാക്കി ലോകത്തെ ഏറ്റവും വലിയ ജനാധിപത്യ രാജ്യത്തെ തുറുങ്കിലാക്കിയ ദിവസം, അടിയന്തരാവസ്ഥ. ആ ദിവസത്തെക്കുറിച്ചുള്ള വേവലാതികൾ മറക്കാൻ വർഷങ്ങൾക്കിപ്പുറം മറ്റൊരു ജൂൺ 25 തന്നെ വേണ്ടിവന്നു ഇന്ത്യൻ ജനതക്ക്​. കപിലി​െൻറ ചെകുത്താന്മാർ ലോർഡ്​സിൽ മണ്ണിൽ തീർത്ത വിസ്​മയം കോടിക്കണക്കിന്​ വരുന്ന ഇന്ത്യൻ ജനതക്ക്​ പുതുസന്തോഷം വിതറി.
കപിലിനും സംഘത്തിനും കാര്യങ്ങൾ എളുപ്പമായിരുന്നില്ല. ഗ്രൂപ്പ് സ്റ്റേജ് മുതൽ കടുത്ത മത്സരം തന്നെ നേരിട്ടു. കരുത്തരായ വിൻഡീസും ഓസീസും അണിനിരക്കുന്ന ഗ്രൂപ്പിലായിരുന്നു ഇന്ത്യ. ഒരു ഗ്രൂപ്പിൽ നിന്നും രണ്ട് ടീമേ സെമിഫൈനലിലേക്ക് യോഗ്യത നേടൂ. അത് കംഗാരുക്കളും കരീബിയക്കാരുമാകുമെന്ന്​ മാധ്യമങ്ങൾ നേരത്തെ ഉറപ്പിച്ചിരുന്നു. പക്ഷേ ഇന്ത്യ- വിൻഡീസ്​ ആദ്യ മത്സരത്തോടെ കഥകളും വിശ്വാസങ്ങളും മാറിമറിഞ്ഞു. സെമിഫൈനലിലേക്ക് യോഗ്യത നേടിയത് ഇന്ത്യയും കരീബിയൻ പടയുമായിരുന്നു.

സെമിഫൈനലിൽ ഇന്ത്യക്കായി കാത്തിരുന്നത് ക്രിക്കറ്റി​െൻറ ബീജം വിരിയിപ്പിച്ച ഇംഗ്ലീഷുകാരായിരുന്നു. ഒരു ഡൂ ഓർ ഡൈ സിറ്റുവേഷൻ. പക്ഷേ കപിലും സംഘവും ആ സാഹചര്യത്തെ അതി സാമർഥ്യത്തോടെ തന്നെ തരണം ചെയ്​തു. നല്ല ആധിപത്യത്തോടെ തന്നെ.. ഇംഗ്ലീഷുകാർ ഉയർത്തിയ 213 എന്ന സ്കോർ നാലുവിക്കറ്റ്​ നഷ്​ടത്തിൽ ഇന്ത്യ മറികടന്നു. ബോബ്​ വില്ലിസും ഇയാൻ ബോതമും അടങ്ങുന്ന പേസ്​ പടയും ഇംഗ്ലീഷ്​ കാണികളും എതിരെ അണിനിരന്നിട്ടും അനായാസകരമായിരുന്നു ഇന്ത്യൻ വിജയം.

ലോർഡ്​സിലായിരുന്നു ഫൈനൽ. മത്സരത്തിന്​ അരങ്ങൊരുങ്ങി. കരീബിയൻ പടക്ക് ടോസി​െൻറ ആനൂകൂല്യം ലഭിച്ചതോടെ വിജയം ഇന്ത്യക്ക്​ അകലെയാണെന്ന്​ തോന്നിച്ചു. മാർഷലിന്റെ നേത്യത്തതിലുള്ള ഉഗ്രപ്രതാപികളായ ബൗളിങ്ങ് നിരയെ ആദ്യം നേരിടുക എന്നത് ബുദ്ധിമുട്ടായ കാര്യമാണ്​. പ്രവചനങ്ങൾ അച്ചട്ടായി. ഇന്ത്യ 183 നു പുറത്ത്. വിവിയൻ റിച്ചാഡ്​സ്​ അടക്കമുള്ള ബാറ്റിങ്ങ് നിരയ്ക്ക് തൊട്ട് കൂട്ടാനുള്ള റൺസ് പോലുമില്ലായിരുന്നു. പക്ഷേ പൊരുതാൻ ഇന്ത്യ തയ്യാറായിരുന്നു. കാരണം ബാറ്റിങ്ങിലും ബൗളിങ്ങിലും കളിക്കാർക്ക്​ ഉത്തേജനം നൽകുന്നതിലും വിട്ടുവീഴ്​ചകളൊന്നും ചെയ്യാത്ത ഒരു നായകൻ ഇന്ത്യൻ ടീമിനുണ്ടായിരുന്നു. " കപിൽ ദേവ്"

"team if this is not a winning total it's definitely a fighting total"
കപിൽ തന്റെ കളിക്കാർക്കായ് നൽകിയ വാക്കുകളാണിവ. ആ വാക്കുകൾ നൽകിയ ഊർജം അവരെ ഉന്നതിയിലെത്തിച്ചിരുന്നു. ഏതൊരു കൊലകൊമ്പനുമായും കോർക്കാനുള്ള ഇഛാശക്തി നൽകിയിരുന്നു. ഉജ്ജ്വലമായി പൊരുതിയ കപിലും സംഘവും വിൻഡീസിനെ മലർത്തിയടിച്ചു.വിൻഡീസ് ലക്ഷ്യത്തിൽനിന്നും 43 റൺസിനു അകലെ ആൾഔട്ട്​. പതിനൊന്നാമനായ ഹോൾഡിങ്ങിന്റെ വിക്കറ്റ് വിഴുമ്പോഴേക്കും ഓടിക്കൂടിയ കാണികൾ ഗ്രൗണ്ട് കയ്യടിക്കിയിരുന്നു. ആഘോഷം ലണ്ടനിൽനിന്നും ഇന്ത്യയൊന്നാകെ അപ്പോഴേക്കും പടർന്നിരുന്നു. കയ്യിൽ കിട്ടിയ സ്​റ്റംപുമായ് ടീമംഗങ്ങളോടൊപ്പം കപിലും ഓടി. മനസ്സാന്നിധ്യം കൊണ്ട് തന്റെ ശിഷ്യന്മാർക്ക് ഊർജ്ജം നൽകിയ "ദി എവർഗ്രീൻ നായകൻ-- കപിൽ ദേവ്". അന്ന് തുടങ്ങിയതായിരുന്നു കപിലും സംഘവും ഇന്ത്യൻ മനസ്സുകളിലേക്കുള്ള യാത്ര.

28 വർഷങ്ങൾക്കിപ്പുറം ധോണിയും സംഘവും കിരീടനേട്ടം രണ്ടായ് ഉയർത്തി. ക്രിക്കറ്റ്​ ഇന്ത്യയിൽ മതവും കച്ചവടവും വിനോദവുമെല്ലാമായി മാറി. ക്രിക്കറ്റിനോട് അടുത്ത കാലം മുതൽ കേൾക്കാൻ കൊതിച്ചതും അറിയാൻ കൊതിച്ചതും ആ പതിനൊന്ന് പേരെക്കുറിച്ചായിരുന്നു. റൂമിലെ ഭിത്തിയിൽ പശചേർത്ത്​ ഒട്ടിച്ചതൊക്കെയും അവരുടെ ചിത്രങ്ങളായിരുന്നു. കാലങ്ങൾ കഴിഞ്ഞാലും മാറില്ല. മറക്കില്ല അവരുടെ ഇതിഹാസനേട്ടങ്ങൾ.. മനസ്സി​െൻറയും ക്രിക്കറ്റി​െൻറയും ചരിത്ര പുസ്​തകങ്ങളിൽ 1983 ഒരു അത്​ഭുത വർഷമാണ്​.