സെഞ്ച്വറി വീരൻ സ്​മിത്ത്​, അർധ സെഞ്ച്വറിയുമായി വാർണറും ഫിഞ്ചും മാര്‍നസും ഒപ്പം മാക്​സ്​വെൽ വെടിക്കെട്ടും ; ഓസീസ്​ 389/4

സിഡ്​നി: തുടർച്ചയായ രണ്ടാം മത്സരത്തിലും ഇന്ത്യൻ ബൗളർമാർ പരാജയമായപ്പോൾ, സ്​കോർബോർഡിൽ മൂന്നൂറ്​​ കടത്തി കങ്കാരുപ്പട. സിഡ്​നി രണ്ടാം ഏകദിനത്തിൽ തുടർച്ചയായ രണ്ടാം സെഞ്ച്വറിയുമായി സ്​റ്റീവ്​ സ്​മിത്തും അർധ സെഞ്ച്വറിയുമായി ഓപണർമാരായ വാർണറും ഫിഞ്ചും പിന്നാലെ മാര്‍നസ് ലബ്യുഷെയ്നും കരുത്തറിയിച്ചപ്പോഴാണ്​ ആസ്​ട്രേലിയ മുന്നൂറ്​ കടന്നത്​. അവസാനത്തിൽ മാക്​സ്​വെല്ലിൻെറ വെടിക്കെട്ടും ചേർന്നപ്പോൾ ആസ്​ട്രേലിയ നാലു വിക്കറ്റ്​ നഷ്​ടത്തിൽ 389 റൺസെടുത്തു. സ്​കോർ: ആസ്​ട്രേലിയ: 389/4 (50 ഓവർ).

രണ്ടാം മത്സരത്തിലും ടോസ്​ നേടി ബാറ്റിങ്ങ്​​ തെരഞ്ഞെടുത്ത ആസ്​ട്രേലിയ മികച്ച തുടക്കമാണ്​ കണ്ടെത്തിയത്​. ആദ്യ വിക്കറ്റിൽ തന്നെ ഫിഞ്ചും വാർണറും 142 റൺസിൻെറ കൂട്ടുകെട്ടുയർത്തി. ഈ പാട്​ണർഷിപ്പ്​ പൊളിക്കുന്നത്​ മുഹമ്മദ്​ ഷമിയാണ്​. 60 റൺസുമായി നിന്ന ഫിഞ്ചിനെ ഷമി കോഹ്​ലിയുടെ കൈകളിലെത്തിക്കുകയായിരുന്നു. പിന്നാലെ 83 റൺസുമായി സെഞ്ച്വറിയിലേക്ക്​ കണ്ണുനട്ടിരുന്ന വാർണറെ അയ്യർ റണ്ണിങ്ങിനിടെ എറിഞ്ഞു വീഴ്​ത്തി.

എങ്കിലും മത്സരത്തിലേക്ക്​ തിരിച്ചുവരാൻ ഇന്ത്യക്കായില്ല. മുൻ ക്യാപ്​റ്റൻ സ്​മിത്ത്​ മനോഹരമായി ടീമിനെ നയിച്ചു. മാർനസ്​ ലബ്യൂഷെയ്​നിനെ കൂട്ടുപിടിച്ചാണ്​ സ്​മിത്ത്​ കളിപിടിച്ചത്​. 14 ഫോറും രണ്ടു സിക്​സും പറത്തിയ സ്​മിത്ത്​ 104 റൺസെടുത്താണ്​ പുറത്താവുന്നത്​. അപ്പോഴേക്കും സ്​കോർബോർഡിൽ 192 റൺസ്​ എത്തിയിരുന്നു. ഹാർദിക്​ പാണ്ഡ്യയാണ്​ സ്​മിത്തിനെ പുറത്താക്കിയത്​. ലബ്യൂഷെയ്​നും (70) മാക്​സ്​വെല്ലുമാണ്​ അവസാനത്തിൽ അടിച്ചത്​. ലബ്യൂഷെയ്​ൻ ബുംറയുടെ പന്തിൽ പുറത്തായെങ്കിലും മാക്​സ്​വെൽ അടി നിർത്തിയില്ല. ട്വൻറി20 മാതൃകയിൽ അടിച്ച മാക്​സ്​വെൽ വെറും 29 പന്തിൽ 63 റൺസെടുത്തു.

രണ്ടാം ഏകദിനവും ഓസ്‌ട്രേലിയ ജയിച്ചാല്‍ ഇന്ത്യക്ക്​ പരമ്പര നഷ്ടമാവും. കഴിഞ്ഞതവണ ബാറ്റിങ്ങിലും ബൗളിങ്ങിലും സമഗ്രാധിപത്യം ഓസ്‌ട്രേലിയ കാഴ്ച്ചവെച്ചിരുന്നു.