വാക്​സിൻ കുത്തിവെക്കരുതെന്ന്​ പ്രചരിപ്പിച്ച യൂട്യൂബർ അറസ്റ്റിൽ

ഹൈദരാബാദ്​: കോവിഡ്​ വാക്​സിനെതിരെ വ്യാജ പ്രചാരണം നടത്തിയതിന്​ യൂട്യൂബറെ ഹൈദരാബാദ്​ പൊലീസ്​ കസ്റ്റഡിയിലെടുത്തു. ദുബൈയിൽ നിന്നും രാജീവ്​ ഗാന്ധി അന്താരാഷ്​ട്ര വിമാനത്താവളത്തിലെത്തിയ ഉടനെയായിരുന്നു അബൂ ഫൈസൽ എന്നയാളെ അറസ്റ്റ്​ ചെയ്​തത്​. സാമുദായിക സ്വഭാവമുള്ള വിഡിയോകളാണ്​​ അബൂ ഫൈസൽ യൂട്യൂബിൽ അപ്​ലോഡ്​ ചെയ്യുന്നതെന്നാണ്​ പൊലീസ്​ പറയുന്നത്​.

അബൂ ഫൈസൽ ധമാക്ക എന്ന പേരിലുള്ള ചാനലിൽ വാർത്താ സംഭവങ്ങളെ അടിസ്ഥാനമാക്കിയാണ്​ വിഡിയോകൾ ചെയ്യുന്നത്​. ബർകാസ്​ സ്വദേശിയായ ഇയാൾക്കെതിരെ കഴിഞ്ഞ വർഷം മെയ്​ മാസത്തിലായിരുന്നു പൊലീസ്​ കേസെടുത്തത്​. അപ്പോൾ ദുബൈയിൽ ആയിരുന്ന അബൂ ഫൈസലിനെ നാട്ടിൽ എത്തിയ ഉടനെ കസ്റ്റഡിയിലെടുക്കുകയും ചെയ്​തു.

വീഡിയോയിൽ, കൊറോണ വൈറസിനെക്കുറിച്ച് ഫൈസൽ അശാസ്ത്രീയമായ അവകാശവാദങ്ങൾ ഉന്നയിക്കുകയും കൊറോണ വൈറസ് വാക്സിൻ എടുക്കരുതെന്ന് മുസ്‌ലിംകളോട് ആവശ്യപ്പെടുകയും ചെയ്തിട്ടുണ്ട്​. വാക്സിനുകൾ ജനസംഖ്യാ നിയന്ത്രണത്തിനുള്ള മാർഗമാണെന്നും യൂട്യൂബർ അവകാശപ്പെട്ടിരുന്നു. കൂടാതെ 'പശു സംരക്ഷണവുമായി ബന്ധമുള്ള ഗ്രൂപ്പുകൾ' വഴി അതുമായി ബന്ധപ്പെട്ട വിവരങ്ങൾ ലഭിച്ചതായും യൂട്യൂബർ അവകാശപ്പെട്ടു.

ബോംബെ ഹൈക്കോടതിയിൽ ഹരജി നൽകിയതിനെ തുടർന്നാണ് വീഡിയോ പിൻവലിച്ചത്​. ഇമ്രാൻ ഖാൻ എന്നയാളാണ്​ ഹരജി നൽകിയത്​. അബൂ ഫൈസലി​െൻറ വിഡിയോകൾ സമൂഹ മാധ്യമങ്ങളിൽ വിദ്വേഷം പരത്തുന്നതാണെന്നും അദ്ദേഹം കോടതിയോട്​ പറഞ്ഞു. എല്ലാ സോഷ്യൽ മീഡിയ പ്ലാറ്റ്‌ഫോമുകളിൽ നിന്നും യൂട്യൂബറിനെ എന്നന്നേക്കുമായി നീക്കംചെയ്യാൻ അഭ്യർത്ഥിച്ചതായും ടൈംസ് ഓഫ് ഇന്ത്യ റിപ്പോർട്ട് ചെയ്യുന്നു.