വജ്രത്തിന്റെ പായ്ക്കറ്റ് കളഞ്ഞുപോയതറിഞ്ഞ് ആൾക്കൂട്ടം സൂറത്തിൽ എത്തി; എന്നിട്ട്?

വഡോദര: ഗുജറാത്തിലെ ഒരു വിഡിയോ ആണിപ്പോൾ സമൂഹമാധ്യമ​ങ്ങളിൽ പ്രചരിക്കുന്നത്. സൂറത് നഗരത്തിലെ വരക്ച ഭാഗത്താണ് ആളുകൾ തടിച്ചു കൂടിനിൽക്കുന്നത്. വജ്രത്തിന്റെ പ്രധാന വ്യാപാര കേന്ദ്രമാണിത്. ഈ പ്രദേശത്ത് വജ്രമുണ്ടെന്നറിഞ്ഞാണ് ആളുകൾ എത്തിയിരിക്കുന്നത്.

ഞായറാഴ്ചയാണ് സംഭവം നടന്നത്. ഈ പ്രദേശത്തെ റോഡിൽ ഒരു വ്യാപാരിയുടെ കൈയിൽ നിന്ന് കോടികളുടെ മൂല്യമുള്ള വജ്രത്തിന്റെ പായ്ക്കറ്റ് കളഞ്ഞുപോയി എന്നാണ് വാർത്തകൾ പ്രചരിച്ചത്. കേട്ടയുടൻ ആളുകൾ സംഭവസ്ഥലത്തേക്ക് കുതിക്കുകയായിരുന്നു. തുടർന്ന് ആളുകൾ വജ്രത്തിനായി തിരച്ചിൽ നടത്തുകയായിരുന്നു.

എന്നാൽ കുറെ​യേറെ നേരം പരതിയിട്ടും അവർക്ക് വജ്രമൊന്നും കിട്ടിയില്ല. അവസാനം സാരികളിലും മറ്റ് ഇമിറ്റേഷൻ ജ്വല്ലറികൾക്കും ഉപയോഗിക്കുന്ന തരം തിളക്കമുള്ള തരം കല്ലുകളാണ് ആൾക്കൂട്ടത്തിന് ലഭിച്ചത്. തൽകാലം അതിൽ ആശ്വസിക്കുകയാണ് ആളുകൾ.