മുന്നറിയിപ്പുകൾക്ക്​ പുല്ലുവില; ഓടുന്ന ട്രെയിനിൽനിന്ന്​ രണ്ട്​ സ്​ത്രീകൾ ചാടിയിറങ്ങി, പിന്നെ സംഭവിച്ചത്​... - വിഡിയോ

കൊൽക്കത്ത: ഓടുന്ന ട്രെയിനിൽനിന്ന്​ ചാടിയിറങ്ങിയ രണ്ട്​ സ്​ത്രീകളിൽ ഒരാൾ പ്ലാറ്റ്​​ഫോമിനിടയിൽ കുടുങ്ങി. ഓടിയെത്തിയ ആർ.പി.എഫ്​ ഉദ്യോഗസ്​ഥൻ ഉടനടി ഇവരെ പ്ലാറ്റ്​ഫോമിലേക്ക്​ വലിച്ചുകയറ്റിയതിനാൽ വലിയൊരു ദുരന്തമാണ്​ ഒഴിവായത്​. ഇതിന്‍റെ വിഡിയോ റെയിൽവേ ട്വിറ്ററിൽ പങ്കുവെച്ചു.

പശ്ചിമ ബംഗാളിലെ പുരുലിയ സ്​റ്റേഷനിലാണ്​ സംഭവം. ഓടുന്ന എക്‌സ്പ്രസ് ട്രെയിനിൽ നിന്ന് ഇറങ്ങാൻ ശ്രമിക്കുന്നതിനിടെ സ്​ത്രീയുടെ ബാലൻസ്​ നഷ്ടപ്പെടുകയായിരുന്നു.

സന്ത്രാഗച്ചി-ആനന്ദ് വിഹാർ എക്സ്പ്രസിന്‍റെ വേഗത കൂടുമ്പോൾ രണ്ട് സ്ത്രീകൾ അതിൽ നിന്ന് ചാടുന്നത് വിഡിയോയിൽ കാണാം. അവരിൽ ഒരാൾ പ്ലാറ്റ്‌ഫോമിൽ കൃത്യമായി ഇറങ്ങുമ്പോൾ, മറ്റൊരാൾ ബാലൻസ് നഷ്‌ടപ്പെടുകയും ട്രെയിനിനും പ്ലാറ്റ്‌ഫോമും ഇടയിൽ കുടുങ്ങുകയുമായിരുന്നു.

ഉടൻ തന്നെ ആർ.പി.എഫ്​ സബ് ഇൻസ്പെക്ടർ ബബ്​ലു കുമാർ ഓടിവന്ന് അവരെ കൃത്യസമയത്ത് പ്ലാറ്റ്ഫോമിലേക്ക് വലിച്ചിഴച്ചു. സ്ത്രീയെ രക്ഷിക്കാൻ ട്രെയിനിൽനിന്ന്​ ചാടാൻ ശ്രമിക്കുന്ന യാത്രക്കാരനെയും സഹായിക്കാൻ ഓടിയെത്തുന്നവരെയും വിഡിയോയിൽ കാണാം.

ഈ വിഡിയോയിൽ തന്നെ, ഓടുന്ന ട്രെയിനിലേക്ക്​ ആളുകൾ ചാടിക്കയറുന്നത്​ ദൃശ്യമാണ്​. ട്രെയിൻ പുറപ്പെട്ട ശേഷം കയറുന്നതിനും ഇറങ്ങുന്നതിനുമെതിരായ ആവർത്തിച്ചുള്ള മുന്നറിയിപ്പുകൾ ആളുകൾ അവഗണിക്കുന്നതാണ്​ ഇത്തരം സംഭവങ്ങൾ ആവർത്തിക്കാൻ കാരണമെന്ന്​ അധികൃതർ പറയുന്നു.

#Lifesavingact

On 29.11.21 SI/Bablu Kumar of RPF Post Purulia saved the life of a lady passenger while she was trying to de-board & almost come in the gap between train & platform in running train no 22857 at Purulia station.@RPF_INDIA @sanjay_chander @zscrrpfser@ADRARAIL pic.twitter.com/qC5eHeDu45

— RPF Adra Division (@rpfserada) November 30, 2021