ബ്രേക്ക്​ നഷ്​ടപ്പെട്ട ട്രക്ക്​ റിവേഴ്​സ്​ ഗിയറിൽ ഓടിച്ചത്​ മൂന്ന്​ കിലോമീറ്റർ; ഡ്രൈവർക്ക്​ കൈയ്യടിയുമായി​ സോഷ്യൽ മീഡിയ

മുംബൈ: ബ്രേക്ക്​ നഷ്​ടപ്പെട്ടതിനെ തുടർന്ന്​ അപകടം ഒഴിവാക്കാൻ മൂന്ന്​ കിലോമീറ്ററിലധികം ദൂരം റിവേഴ്​സ്​ ഗിയറിൽ വണ്ടിയോടിച്ച ട്രക്ക്​ ഡ്രൈവറുടെ വിഡിയോ സാമൂഹിക മാധ്യമങ്ങളിൽ വൈറൽ. മഹാരാഷ്​ട്രയിലെ ജൽന-സില്ലോഡ്​ റോഡിലാണ്​ സംഭവമെന്നാണ്​ റിപ്പോർട്ട്​.

റിവേഴ്​സ്​ ഗിയറിൽ പിറകോട്ട്​ പോകുന്ന ട്രക്ക്​ ഡ്രൈവറെ സഹായിക്കാനായി ചില ​ൈബക്കുകാരും കൂടെ പോകുന്നത്​ വിഡിയോയിൽ കാണാം​. എതിർ ദിശയിൽ നിന്ന്​ വരുന്ന വാഹനങ്ങൾക്ക്​ അപായ സൂചന നൽകുകയാണ്​ ബൈക്കുകാർ ചെയ്യ​ുന്നത്​.

ഒഴിഞ്ഞു കിടക്കുന്ന ഒരു പാടശേഖരത്തിൽ എത്തുന്ന വരേ ഡ്രൈവർ വണ്ടി പിറ​കോ​ട്ടോടിച്ചു. പരുപരുപ്പാർന്ന പാടത്തിലേക്ക്​ ഇറക്കിയതോടെ വാഹനത്തി​െൻറ വേഗത നിയന്ത്രിച്ച്​ നിർത്താൻ ഡ്രൈവർക്ക്​ സാധിച്ചു.

ഡ്രൈവറുടെ മനസ്സാന്നിധ്യവും ബൈക്ക്​ യാത്രികരുടെ സമയോചിതമായ ഇടപെടലും വൻ അപകടം ഒഴിവാക്കി. ജനുവരിയിൽ സോഷ്യൽ മീഡിയയിൽ ആദ്യം പ്രത്യക്ഷപ്പെട്ട വിഡിയോ ഇപ്പോൾ വീണ്ടും ശ്രദ്ധിക്കപ്പെടുകയാണ്​. 13 ലക്ഷത്തിലധികം തവണയാണ്​ വിഡിയോ ആളുകൾ കണ്ടത്​.

ഇത്തരമൊരു അവസ്​ഥ നിങ്ങൾക്കും വരികയാണെങ്കിൽ ഒരിക്കലും പരിഭ്രാന്തരാകരുത്​. ആദ്യം ആക്​സിലേറ്ററിൽ നിന്ന്​ കാൽ എടുത്ത്​മാറ്റി ഹസാഡ്​ ലൈറ്റ്​ തെളിക്കണം. ശേഷം താഴ്​ന്ന ഗിയറിലേക്ക്​ മാറ്റി വണ്ടിയുടെ വേഗത കുറക്കണം. വണ്ടി തെന്നി മറിയാൻ സാധ്യതയുള്ളതിനാൽ ഒരിക്കലും എൻജിൻ ഓഫാക്കാൻ ശ്രമിക്കരുത്​. ശ്രദ്ധയോടെ എമർജൻസി ബ്രേക്ക്​ അമർത്താൻ ശ്രമിക്കുക. വണ്ടി നിയന്ത്രണവിധേയമാക്കി നിർത്താൻ സാധിക്കുന്ന ഒരു സ്​ഥലം കണ്ടെത്തുകയാണ്​ വേണ്ടത്​.