കൊമ്പുകുലുക്കി കുതിച്ചെത്തിയ 'ബുൾ എൽകി'ൽ നിന്ന്​ രക്ഷപ്പെട്ടത്​ തലനാരിഴക്ക്​; വൈറലായി വിഡിയോ

മാൻ വർഗത്തിലുള്ളതാണെങ്കിലും ഒരു കൂറ്റൻ കാട്ടുപോത്തിനോളം വരും 'ബുൾ എൽക്​'. ആക്രമിക്കാനായി കലിപൂണ്ട്​ കുതിച്ചെത്തുന്ന ഒരു 'ബുൾ എൽകിന്‍റെ' ശൗര്യം കണ്ടാൽ ആരുടെയും പാതി ജീവൻ അപ്പോൾ തന്നെ പോകും. ഫോ​േട്ടാ എടുക്കാൻ വാഹത്തിൽ നിന്നിറങ്ങിയ ടൂറിസ്റ്റ്​ നേരെ ഒരു 'ബുൾ എൽക്​' കുതിച്ചെത്തുന്നതിന്‍റെയും തലനാരിഴക്ക്​ ടൂറിസ്റ്റ്​ രക്ഷ​പ്പെടുന്നതിന്‍റെയും വിഡിയോ ശര വേഗത്തിലാണ്​ സാമൂഹിക മാധ്യമങ്ങളിൽ വ്യാപിക്കുന്നത്​.

അമേരിക്കയിലെ യെല്ലോ സ്​റ്റോൺ നാഷനൽ പാർക്കിലാണ്​ സംഭവം. 'ബുൾ എൽക്​' കൂട്ടം മേയുന്നതിന്​ അടുത്തുകൂടെ വാഹനങ്ങൾ കടന്നു പോകുന്നുണ്ടായിരുന്നു. അവിടെ വാഹനം നിർത്തിയ ഒരു സഞ്ചാരി​ ഫോ​േട്ടാ എടുക്കുന്നതിനിടെയാണ്​ അപകടമുണ്ടായത്​.

'ബുൾ എൽക്​' കൂട്ടത്തിന്​ അടുത്തേക്ക്​ പോകാനൊരുങ്ങുകയായിരുന്നു സഞ്ചാരി​. അൽപം അകലെ നിൽക്കുകയായിരുന്ന മറ്റൊരു ബുൾ എൽക്​ ഇതു കണ്ട്​ കുതിച്ചെത്തുകയായിരുന്നു. ബുൾ എൽക്​ കൂട്ടത്തെ സഞ്ചാരി​ ആക്രമിക്കുകയാണെന്ന്​ കരുതിയാകണം ആ ജീവി പാഞ്ഞെത്തിയത്​. കുതിച്ചെത്തിയ ബുൾ എൽകിനെ കണ്ട്​ സഞ്ചാരി​ ഒാടി മാറി. അതിനിടെ അയാൾ റോഡിൽ വീഴുന്നുണ്ടെങ്കിലും അപ്പോൾ ആ ജീവി ആക്രമിക്കുന്നില്ല. എൽക്​ കൂട്ടത്തിനടുത്തേക്ക്​ പോകുന്നതിൽ നിന്നും അയാൾ പിന്തിരിഞ്ഞതോടെ ആ ജീവി ആക്രമണത്തിൽ നിന്നും പിൻമാറുകയും ചെയ്​തു.

സ്വന്തം കൂട്ടത്തെ രക്ഷിക്കാനുള്ള ശ്രമമാണ്​ ആ എൽക്​ ചെയ്​തതെന്നും വർഗ സ്​നേഹത്തിന്‍റെ മാതൃകയാണതെന്നുമൊക്കെയാണ്​ സാമൂഹിക മാധ്യമങ്ങളിൽ ഈ വിഡിയോക്കൊപ്പം പലരും കമന്‍റ്​ ചെയ്യുന്നത്​. എൽകിന്‍റെ ആക്രമണത്തിൽ നിന്ന്​ ഒഴിഞ്ഞു മാറുന്നതിനിടയിലും സ്വന്തം മൊബൈൽ ഫോൺ നഷ്​ട​​പ്പെടാതിരിക്കാൻ സഞ്ചാരി സൂക്ഷിക്കുന്നുണ്ടെന്നും സഞ്ചാരിക്കൊപ്പമുള്ളവർ ആക്രമണത്തിന്‍റെ ദൃശ്യങ്ങൾ പകർത്താനാണ്​ ശ്രമിക്കുന്നതെന്നും പരിഹാസ രൂപേണ ചിലർ കമന്‍റ്​ ചെയ്യുന്നുണ്ട്​.

നാലടിയോളം ഉയരത്തിൽ കൊമ്പുകൾ വളരുന്ന മാൻ വർഗമാണ്​ 'ബുൾ എൽക്​'. കൊമ്പുകൾ വളർന്നാൽ, അതടക്കം ഒമ്പതടിയോളം ഉയരം ഇവക്കുണ്ടാകാറുണ്ട്​.