ഹണി ബാജറിനോടാണോടാ കളി-സിംഹക്കൂട്ടത്തെ തുരത്തി ഇത്തിരിക്കുഞ്ഞന്മാർ

വലിപ്പം കുറവാണെന്ന്​ കരുതി ഹണി ബാജറിനോട്​ കളിക്കാൻ നിൽക്കേണ്ടയെന്ന്​ എല്ലാ മൃഗങ്ങൾക്കുമറിയാം. ഭൂമിയിൽ ഒന്നിനെയും പേടിയില്ലാത്ത മൃഗമായിട്ടാണ്​ തുരപ്പൻ കരടി എന്നറിയപ്പെടുന്ന ഹണി ബാജർ വിശേഷിപ്പിക്കപ്പെടുന്നത്​. താടിയെല്ലിൻെറയും പല്ലുകളുടെയും ബലംകൊണ്ടും തൊലിക്കട്ടി കൊണ്ടും ഇവ ഗിന്നസ്​ ബുക്കിൽ വരെ ഇടംപിടിച്ചിട്ടുണ്ട്​.

രണ്ട്​ ഹണി ബാജർമാർ ഒരു സിംഹക്കൂട്ടത്തെ തുരത്തുന്ന വിഡിയോ സമൂഹ മാധ്യമങ്ങളിൽ വൈറലാകുകയാണ്​. ഇന്ത്യൻ ഫോറസ്​റ്റ്​ സർവിസ്​ ഉദ്യോഗസ്​ഥനായ സുശാന്ത നന്ദ ട്വിറ്ററിൽ പോസ്​റ്റ്​ ചെയ്​ത വിഡിയോയിൽ പത്തോളം സിംഹങ്ങളോട്​ എതിരിട്ട്​ നിൽക്കുന്ന രണ്ട്​ ബാജർമാരാണുള്ളത്​. പതിനായിരത്തോളം പേരാണ്​ ഇതുവരെ വിഡിയോ കണ്ടിരിക്കുന്നത്​.

കൂട്ടമായി ആക്രമിക്കുന്നതിൽ പേരുകേട്ട സിംഹങ്ങളോടും കഴുതപ്പുലികളോടും വരെ പിടിച്ചുനിൽക്കാൻ ഹണി ബാജർമാർക്ക്​ കഴിയും. ഇവറ്റകളിലൊന്നിനെ സിംഹം പിടികൂടിയിട്ടു പോലും പിടി വിടുവിക്കുന്നതും സിംഹങ്ങൾക്കുനേരെ വീറോടെ അടുക്കുന്നതും വിഡിയോയിൽകാണാം. അബ്​ദുൽ അസീസ്​ ആദം എന്നയാൾ കിഴക്കൻ സാംബിയയിലെ ലുവാൻഗ്വ ദേശീയ ഗെയിം പാർക്കിൽ നിന്ന്​ പകർത്തിയ ദൃശ്യങ്ങളാണിത്​. അദ്ദേഹമത്​ ഫേസ്​ബുക്കിൽ പങ്കുവെക്കുകയായിരുന്നു.

'ശക്​തിക്കും ശൂരത്വത്തിനും പരുക്കൻ സ്വഭാവത്തിനും പേരുകേട്ടതാണ്​ ഹണി ബാജർ. വളരെ വലിപ്പം കൂടിയ മൃഗങ്ങളെ പോലും നിർഭയം ആക്രമിക്കുന്നതിൽ പ്രസിദ്ധരാണവർ' -എന്ന കുറിപ്പും സുശാന്ത നന്ദ വിഡിയോക്കൊപ്പം നൽകിയിട്ടുണ്ട്​. 'ധീരതക്കും സ്വയംപ്രതിരോധ കഴിവുകൾക്കും മുന്നിൽ വലിപ്പം ഒന്നുമല്ല' എന്നാണ്​ വിഡിയോയോട്​ ഒരാൾ പ്രതികരിച്ചിരിക്കുന്നത്​. ആഫ്രിക്ക, സൗദി അറേബ്യ, ഇറാൻ എന്നിവിടങ്ങളിലാണ്​ ഹണി ബാജറിനെ അധികമായി കണ്ടുവരുന്നത്​.