നാട്ടിൽ പാലും തേനും ഒഴുക്കുമെന്ന്​ കേട്ടപ്പോൾ ഇത്ര കരുതിയില്ല -ബ്രിട്ടനിലെ പാലരുവി കാണാം

'ഞാൻ ജയിച്ചാൽ ഈ നാട്ടിലുടെ പാലും തേനും ഒഴുക്കും' -നാട്ടിൽ വികസനം കൊണ്ടുവരുമെന്ന്​ പറയാൻ പണ്ട്​ തെരഞ്ഞെടുപ്പ്​ കാലത്ത്​ കേരളത്തിൽ സ്​ഥാനാർഥികൾ നടത്തിയിരുന്ന വാഗ്​ദാനമാണിത്​. 'പാലരുവി' എന്ന്​ മലയാളികൾ പാട്ടിലൊക്കെ കേട്ടിട്ടുമുണ്ട്​. ഇത്തരം വാഗ്​ദാനങ്ങളും പാട്ടുമൊക്കെ ബ്രിട്ടനിൽ ഉ​​ണ്ടോയെന്ന്​ അറിയില്ല. പക്ഷേ, അവിടെ നാട്ടിലൂടെ പാൽ ഒഴുകി.

When a milk tanker overturns in the river #llanwrda #wales #milk pic.twitter.com/vnyhr5FXBi

— May 🏴󠁧󠁢󠁷󠁬󠁳󠁿 (@MayLewis19) April 14, 2021

പടിഞ്ഞാറൻ ​വെയിൽസിലെ കർമാർതൻഷെയറി​ലുള്ള കൊച്ചുഗ്രാമമായ ലാൻവർഡയിലെ ഡുലൈസ് നദിയാണ് കുറച്ചു നേരത്തേക്ക്​ അവിടെ അക്ഷരാർഥത്തിൽ പാൽപ്പുഴയായി ഒഴുകിയത്. നദിക്കരയിലൂടെ പോയ ഒരു പാൽ ടാങ്കർ മറിഞ്ഞതാണ്​ കാരണം. പിന്നെ പാലൊഴുകുന്നത്​ പോലെയാണ്​ നദിയിലൂടെ വെള്ളമൊഴുകിയത്​. ഈ ഒഴുക്കിൽ ഒരു പാൽ വെള്ളച്ചാട്ടവും ഉണ്ടായി.

28,000 ലിറ്റർ പാൽ നദിയിലൂടെ ഒഴുകിയെന്നാണ്​ ബി.ബി.സി റിപ്പോർട്ട്​ ചെയ്​തത്​. നിരവധി പേരാണ് ഇതിന്‍റെ വിഡിയോ സാമൂഹിക മാധ്യമങ്ങളിൽ പങ്കുവച്ചത്. വിഡിയോകൾക്ക്​ താഴെ രസകരമായ കമന്‍റുകളും എത്തുന്നുണ്ട്​. അതേസമയം, നദിയിലെ ജീവികൾക്ക്​ ഇത്​ ദോഷം ചെയ്​തുകാണുമെന്ന വാദം പരിസ്​ഥിതി പ്രവർത്തകരും ഉയർത്തുന്നുണ്ട്​.