'ഫ്ലൈറ്റ്'​ കാത്തിരുന്നവരുടെ 'ഫൈറ്റ്​' കാണാം- ലണ്ടൻ വിമാനത്താവളത്തിൽ അടിയോടടി; മൂന്നുപേർക്ക്​ ഗുരുതര പരിക്ക്

ലണ്ടൻ: ബസ്​സ്റ്റാൻഡിലെയും റെയിൽവേ സ്റ്റേഷനിലെയുമൊക്കെ തല്ല്​ നമുക്കത്ര പുത്തരിയല്ലല്ലോ. അപ്പോൾ പിന്നെ വിമാനത്താവളത്തിലെ കൂട്ടത്തല്ലിന്​ കൗതുകം കുടും. ലണ്ടനിലെ ലൂട്ടൺ വിമാനത്താവളത്തിൽ നടന്ന യാത്രക്കാരുടെ കൂട്ടത്തല്ലിന്‍റെ വിഡിയോ ഇപ്പോൾ സമൂഹമാധ്യമങ്ങളിൽ വൈറലാകയാണ്​.

വെള്ളിയാഴ്ച രാവിലെ എട്ടുമണിയോടെ നടന്ന സംഭവത്തിന്‍റെ വിഡിയോ കഴിഞ്ഞ ദിവസമാണ്​ സമൂഹ മാധ്യമങ്ങളിൽ പ്രചരിച്ചത്​. അടിപിടിയിൽ മൂന്നുപേർക്ക്​ ഗുരുതര പരിക്കേറ്റു. 17 പേരെ ബെഡ്ഫോർഡ്​ഷെയർ പൊലീസ്​ അറസ്റ്റ്​ ചെയ്​തു. വിമാനത്താവളത്തിലെ നിർഗമന ടെർമിനലിലെ ഡ്യൂട്ടി ഫ്രീ സ്ഥാപനങ്ങളുടെ മുന്നിലാണ് യാത്രക്കാർ തമ്മിലടിച്ചത്.

യാത്രക്കാരിൽ ചിലർ സംഘം ചേർന്ന് പരസ്പരം ആക്രമിക്കുന്ന ദൃശ്യങ്ങളാണ് വിഡിയോയിലുള്ളത്. ചിലർ കൈയിലുണ്ടായിരുന്ന ബാഗുകളും പെട്ടികളും കൊണ്ട്​ എതിരാളികളെ അടിക്കുന്നതും എറിയുന്നതും കാണാമായിരുന്നു. പരസ്​പരം ചവിട്ടുകയും അടിക്കുകയും ചെയ്​തു. സംഘർഷം രൂക്ഷമായതോടെ അവിടെയുണ്ടായിരുന്ന മറ്റുയാത്രക്കാർ ഓടിമാറുന്നതും ചിലർ അക്രമം നിർത്താൻ ആവശ്യപ്പെടുന്നതും ചിലർ പേടിച്ച്​ നിലവിളിക്കുന്നതുമൊക്കെ ദൃശ്യങ്ങളിലുണ്ട്.

രണ്ടുപേർ അടിയേറ്റ്​ ബോധരഹിതരായി വീഴുന്നതും ഡ്യൂട്ടി ഫ്രീ ഷോപ്പിലെ ജീവനക്കാരി കട അടക്കുന്നതുമൊക്കെ കാണാം. അതേസമയം, എന്താണ് സംഘർഷത്തിലേക്ക് നയിച്ചതെന്ന കാര്യത്തിൽ വ്യക്തതയില്ല. ഇതേക്കുറിച്ച് അന്വേഷിച്ചുവരികയാണെന്ന്​ബെഡ്ഫോർഡ്​ഷെയർ പൊലീസ്​ പ്രതികരിച്ചു. നാലുപേർക്ക്​ പരിക്കേറ്റു. ഇതിൽ മൂന്നുപേരുടെ പരിക്ക്​ ഗുരുതരമാണ്​. അറസ്റ്റിലായവരെ പിന്നീട്​ ജാമ്യത്തിൽ വിട്ടു.

വിമാനത്താവളത്തിൽ യാത്രക്കാർ തമ്മിൽ ഏറ്റുമുട്ടിയത്​ അങ്ങേയറ്റം ഞെട്ടലുണ്ടാക്കിയ സംഭവമാണെന്നും ദുഃഖകരമാണെന്നും ലൂട്ടൺ വിമാനത്താവളത്തിന്‍റെ ഔദ്യോഗിക വക്താവ് മാധ്യമങ്ങളോട് പറഞ്ഞു. സംഘർഷത്തിൽ വിഷമം അനുഭവിച്ച യാത്രക്കാരോട്​ മാപ്പ്​ ചോദിക്കുന്നു.ഇത്തരം സംഘർഷങ്ങൾ ഒരിക്കലും അംഗീകരിക്കാനാകില്ല. പൊലീസിന്‍റെ അന്വേഷണവുമായി വിമാനത്താവള അധികൃതർ സഹകരിക്കുമെന്നും അദ്ദേഹം വ്യക്തമാക്കി.