മൃഗശാലയിൽ സിംഹത്തിന്​ മുന്നിൽ കുടുങ്ങി യുവാവ്; സാഹസിക രക്ഷപ്പെടുത്തൽ -വി​ഡ​ിയോ

ഹൈദരാബാദ്​: ഹൈദരാബാദിലെ നെഹ്​റു സുവോളജിക്കൽ പാർക്കിൽ സിംഹത്തിന്‍റെ മുന്നിൽ അക​െപ്പട്ട 31കാരനെ രക്ഷപ്പെടുത്തി. ആഫ്രിക്കൻ സിംഹത്തിന്‍റെ മുമ്പിലാണ്​ യുവാവ്​ അകപ്പെട്ടത്​. ചൊവ്വാഴ്ച വൈകിട്ടാണ്​ സംഭവം.

മൃഗശാലയിൽ വലിയ പാറക്കല്ലുകൾ കൊണ്ടുതീർത്ത മതിൽക്കെട്ടിനകത്താണ്​ സിംഹത്തെ പാർപ്പിച്ചിരിക്കുന്നത്. ജീവനക്കാർക്കല്ലാതെ മറ്റാർക്കും അവിടേക്ക്​ പ്രവേശനമില്ല. എന്നാൽ ചൊവ്വാഴ്ച വൈകി​ട്ടോടെ 31കാരൻ ജീവനക്കാരുടെ കണ്ണുവെട്ടിച്ച്​ സിംഹത്തിന്‍റെ ഗുഹയുടെ സമീപമെത്തുകയായിരുന്നു. ജി. സായ്​കുമാർ എന്ന യുവാവാണ്​ സിംഹത്തിന്​ മുന്നിൽ അകപ്പെട്ടത്​.

പാറക്കല്ലിൽ പിടിച്ചിരുന്ന യുവാവിന്‍റെ താഴെ സിംഹവും തമ്പടിച്ചു. അടിതെറ്റിയാൽ സിംഹത്തിന്‍റെ മുന്നിലേക്കാകും യുവാവിന്‍റെ വീഴ്​ച. സംഭവം ശ്രദ്ധയിൽപ്പെട്ട മറ്റുള്ളവർ ജീവനക്കാരെ വിവരം അറിയിച്ചു. ഇതോടെ സിംഹത്തിന്‍റെ ശ്രദ്ധമാറ്റി യുവാവിനെ രക്ഷപ്പെടുത്താനായി ജീവനക്കാരുടെ ശ്രമം.

യുവാവിനെ ജീവനക്കാർ രക്ഷപ്പെടുത്തുന്ന വിഡിയോ പുറത്തുവന്നു. സായ്​കുമാറിന്​ സമീപത്തുനിന്ന്​ സിംഹത്തെ അകറ്റാനായി മറ്റുള്ളവർ ശബ്​ദമുണ്ടാക്കുന്നതു​ം വിഡിയോയിൽ കാണാം. സിംഹത്തിന്‍റെ ശ്രദ്ധ തിരിച്ചശേഷമാണ്​ യുവാവിനെ ജീവനക്കാർ രക്ഷപ്പെടുത്തിയത്​. രക്ഷപ്പെടുത്തുന്നതിനിടെ സായ്​കുമാറ​ിന്‍റെ​ സമീപത്തേക്ക്​ സിംഹം അലറിയടുക്കുന്നതും വിഡിയോയിലുണ്ട്​.

സംഭവത്തിൽ മൃഗശാല അധികൃതർ പൊലീസിൽ പരാതി നൽകി. യുവാവിനെ പൊലീസിന്​ കൈമാറുകയും ചെയ്​തു. സിംഹത്തിന്‍റെ ഗുഹക്ക്​ സമീപ​ത്തെ പാറക്കല്ല​ിലേക്ക്​ യുവാവ്​ ചാടിക്കയറുകയായിരുന്നെന്നും മൃഗശാല അധികൃതർ പൊലീസിനെ അറിയിച്ചു.