ആത്മഹത്യചെയ്യാൻ റെയിൽ പാളത്തിൽ കിടന്ന്​ യുവാവ്​; രക്ഷകരായത്​ ഇവർ

ന്യൂഡൽഹി: ആത്മഹത്യചെയ്യാൻ റെയിൽവേ ​പാളത്തിൽ കിടന്ന യുവാവിനെ രക്ഷപ്പെടുത്തിയത്​ ലോക്കോ പൈലറ്റിന്‍റെ ജാഗ്രത. യുവാവ്​ ആത്മഹത്യചെയ്യാനായി റെയിൽവേ പാളത്തിൽ കിടക്കുന്നത്​ ശ്രദ്ധയിൽപ്പെട്ടതോടെ ലോക്കോ പൈലറ്റ്​ എമർജൻസി ബ്രേക്ക്​ ഉപയോഗിക്കുകയായിരുന്നു. ഇതോടെ യുവാവിന്​ തൊട്ടുമുമ്പിലെത്തി ട്രെയിൻ നിന്നു. മുംബൈയിലെ ശിവദി സ്​റ്റേഷൻ പരിസരത്താണ്​ സംഭവം.

സംഭവത്തിന്‍റെ സി.സി.ടി.വി ദൃശ്യങ്ങൾ റെയിൽവേ മന്ത്രാലയം ട്വിറ്ററിൽ പങ്കുവെച്ചു. ട്രെയിൻ നിർത്തിയ​തിന്​ പിന്നാലെ റെയിൽവേ പൊലീസ്​ ഉദ്യോഗസ്ഥരെത്തി യുവാവിനെ പാളത്തിൽനിന്ന്​ എഴുന്നേൽപ്പിച്ച്​ നടത്തിക്കൊണ്ടുവരുന്നത്​ വിഡിയോയിൽ കാണാം.

ട്രെയിൻ വരുന്നതിന്​ തൊട്ടുമുമ്പ്​ യുവാവ്​ റെയിൽവേ പാളത്തിലെത്തി കിടക്കുകയായിരുന്നു. ഇതോടെ ലോക്കോ പൈലറ്റ്​ എമർജൻസി ബ്രേക്ക്​ പ്രയോഗിച്ചു. യുവാവിന്‍റെ തൊട്ടരികിൽ ട്രെയിൻ നിൽക്കുന്നതും വിഡിയോയിൽ കാണാം. രാവിലെ 11.45ന്‍റേതാണ്​ ദൃശ്യങ്ങൾ. നിരവധി പേരാണ്​ വിഡിയോ വൈറലായതോടെ ലോക്കോപൈലറ്റിനെ അഭിനന്ദിച്ച്​ രംഗത്തെത്തിയത്​.