'ആ പണം ഞങ്ങൾ മുഖ്യമന്ത്രിയുടെ ദുരിതാശ്വാസനിധിയിലേക്ക്​ നൽകും'; കേന്ദ്രത്തിന്‍റെ വാക്​സിൻ നയത്തിനെതിരെ കേരളം പ്രതിഷേധിക്കുന്നത്​ ഇങ്ങനെ....

കോഴിക്കോട്​: കേന്ദ്രസർക്കാറിന്‍റെ വാക്​സിൻ നയത്തിനെതിരെ സമൂഹമാധ്യമങ്ങളിൽ പ്രതിഷേധം. കേന്ദ്രസർക്കാർ കോവിഡ്​ വാക്​സിൻ വിതരണനയം മാറ്റിയതോടെ കേരളം നൽകുന്ന സൗജന്യ വാക്​സിന്‍റെ തുക മുഖ്യമന്ത്രിയുടെ ദുരിതാശ്വാസ നിധിയിലേക്ക്​ നൽകണമെന്ന പ്രചാരണമാണ്​ സമൂഹമാധ്യമങ്ങളിൽ നിറയുന്നത്​. ​'ഐ സ്റ്റാൻഡ്​ വിത്ത്​ കേരള' എന്ന ഹാഷ്​ടാഗിലാണ്​ പ്രചാരണം.

'എനിക്ക് ലഭിക്കുന്ന സൗജന്യ വാക്സി​ന്‍റെ തുക മുഖ്യമന്ത്രിയുടെ ദുരിതാശ്വാസ നിധിയിലേക്ക് ഞാൻ നൽകും' എന്ന വാചകങ്ങളുള്ള കുറിപ്പുകളാണ്​ ഫേസ്​ബുക്കിൽ നിറയുന്നത്​. നിരവധി പേരാണ്​ തുക നൽകിയതി​ന്‍റെ തെളിവടക്കം പോസ്​റ്റ്​ ചെയ്യുന്നത്​. വാക്​സിൻ ചാലഞ്ച്​ എന്ന രീതിയിൽ സുഹൃത്തുക്കളെയും പരിചയക്കാരെയും ടാഗ്​ ചെയ്യുന്നുമുണ്ട്​.

കുടുംബാംഗങ്ങൾക്ക്​ കുത്തിവെച്ചതും കുത്തിവെക്കാനുള്ളതുമായ വാക്​സി​െൻറ തുകയും അയക്കുന്നവരുണ്ട്​. നേരത്തേ വാക്​സിനെടുത്തവർ ഇപ്പോൾ കേന്ദ്രം നിശ്​ചയിച്ച തുകയായ 400 രൂപ വീതം ദുരിതാശ്വാസ നിധിയിലേക്ക്​ സംഭാവന ചെയ്​തും മാതൃകയാവുകയാണ്​. ചിലർ രണ്ടിരട്ടി തുക നൽകാമെന്ന്​ ഉറപ്പ്​ നൽകുന്നു. ഗൾഫടക്കം വിദേശരാജ്യങ്ങളിൽ വെച്ച്​ സൗജന്യ വാക്​സിനെടുത്തവരും തുക കൈമാറുന്നുണ്ട്​.

നേരത്തെ കോവിഡ്​ വാക്​സിൻ പൊതുവിപണിയിൽ വിൽക്കാൻ മരുന്ന്​ കമ്പനികൾക്ക്​ കേന്ദ്രസർക്കാർ അനുമതി നൽകിയിരുന്നു. ഇതിന്​ പിന്നാലെ കോവിഷീൽഡ്​ വാക്​സിന്‍റെ വില സിറം ഇൻസ്റ്റിറ്റ്യൂട്ട്​ നിശ്​ചയിച്ചു. കേന്ദ്ര-സംസ്ഥാന സർക്കാറുകൾക്ക്​ വ്യത്യസ്​ത വിലക്കാണ്​ കോവിഷീൽഡ്​ വാക്​സിൻ വിൽക്കുന്നത്​.