'വരുന്നിടത്തുവെച്ച്​ കാണാം' -കോവിഡ്​ രോഗികൾക്കുവേണ്ടി ഡാൻസ്​ ചെയ്ത്​ ആരോഗ്യ പ്രവർത്തകർ

വഡോദര: കോവിഡ്​ രോഗികളെ സാന്ത്വനപ്പെടുത്തുന്നതിന്​ അവർക്കുമുന്നിൽ ഡാൻസ്​ ചെയ്യുന്ന ആരോഗ്യപ്രവർത്തകരുടെ വിഡിയോ സമൂഹമാധ്യമങ്ങളിൽ വൈറലാകുന്നു. ഗുജറാത്ത്​ വഡോദരയിലെ പാരുൾ സേവാശ്രം ഹോസ്​പിറ്റലിൽ നിന്നുള്ള ദൃശ്യം മുംബൈയിലെ പ്രമുഖ ഫോ​ട്ടോഗ്രാഫർ വിറൽ ഭയാനിയാണ്​ ഇൻസ്​റ്റ്​ഗ്രാമിൽ പങ്കുവെച്ചത്​.

1990ലെ ഹിറ്റ്​ ഗാനമായ ​'സോച്​നാ ക്യാ ജോ ഭി ഹോഗാ ദേഖാ ജായേഗാ' എന്ന പാട്ടിനൊപ്പിച്ചാണ്​ ആരോഗ്യപ്രവർത്തകർ നൃത്തം വെക്കുന്നത്​. 'ആലോചിക്കാൻ എന്തിരിക്കുന്നു, എന്തും വരുന്നിടത്തുവെച്ച്​ കാണാം' എന്നർഥം വരുന്ന പാട്ട്​ സണ്ണി ഡിയോൾ നായകനായ 'ഖയാൽ' എന്ന സിനിമയിലേതാണ്​. ബാപ്പി ലാഹിരി സംഗീതം നൽകിയ പാട്ട്​ കുമാർ സാനു, ഷബ്ബിർ കുമാർ, ആശ ഭോസ്​ലെ എന്നിവർ ചേർന്നാണ്​ ആലപിച്ചിരിക്കുന്നത്​.

പിപിഇ കിറ്റ്​ ധരിച്ച്​ നൃത്തം ചെയ്യുന്ന ആരോഗ്യപ്രവർത്തകരുടെ ചുവടുകൾക്കൊപ്പിച്ച്​ കൈയടിക്കുന്ന രോഗികളെയും വിഡിയോയിൽ കാണാം. ചിലരാക​ട്ടെ, ഈ ഡാൻസ്​ മൊബൈലിൽ പകർത്തുന്നുമുണ്ട്​. ബോളിവുഡ്​ നടൻ ടൈഗർ ഷ്രോഫ്​ അടക്കം നിരവധി പേരാണ് രോഗികളിൽ ആത്​മവിശ്വാസം പകരാനുള്ള​ ആരോഗ്യപ്രവർത്തകരുടെ പ്രവൃത്തിയെ അഭിനന്ദിച്ച്​ രംഗത്തെത്തിയത്​.