അക്ഷരങ്ങൾ മാറ്റിയെഴുതിയാൽ കൊറോണ വൈറസ്​ ഇല്ലാതാകുമെന്ന്​ പരസ്യം; ചിരിയടക്കാനാവാതെ നെറ്റിസൺസ്​

ഹൈദരാബാദ്​: ലോകം പഠിച്ചപണി പതിനെട്ടും നോക്കിയിട്ടും ​കൊറോണ വൈറസിനെ ഇതുവരെ പിടിച്ചുകെട്ടാനായിട്ടില്ല. മാത്രമല്ല, ഒാരോ ദിവസവും വൈറസി​െൻറ വ്യാപനം വർധിച്ച്​ കൊണ്ടിരിക്കുകയുമാണ്​. മാസ്​കും മരുന്നുമെല്ലാം കോവിഡിന്​ മുന്നിൽ നിഷ്​പ്രഭമാകുന്ന കാഴ്​ചയാണ്​ എവിടെയും കാണുന്നത്​.

എന്നാൽ, കോവിഡി​െൻറയും ​കെ​ാറോണയുടെയും അക്ഷരങ്ങൾ മാറ്റിയെഴുതിയാൽ വൈറസ്​ ഭൂമുഖത്തുനിന്ന്​ തന്നെ ഇല്ലാതാകുമെന്ന വിചിത്ര വാദവുമായി വന്നിരിക്കുകയാണ്​ ആ​ന്ധ്രപ്രദേശിലെ അനന്തപുരം​ സ്വദേശി ആനന്ദ്​ റാവു. ഇതുമായി ബന്ധപ്പെട്ട്​ ഇദ്ദേഹം പുറത്തിറക്കിയ പരസ്യം സമൂഹമാധ്യമങ്ങളിൽ വൈറലാണ്​.

'CARONAA, COVVIYD^19 എന്നിങ്ങനെ അക്ഷരങ്ങൾ മാറ്റിയെഴുതി വീടി​െൻറ വാതിലിലോ പൊതുസ്​ഥലങ്ങളിലേ ബാനർ തൂക്കിയാൽ കൊറോണ അനന്തപുരത്തുനിന്ന്​ മാത്രമല്ല, ഭൂമിയിൽനിന്ന്​ തന്നെ അപ്രത്യക്ഷമാകും. സംഖ്യാജ്യോതിഷം അനുസരിച്ച് ഇത് ദിവ്യശക്തിയായതിനാൽ ഇക്കാര്യം ഉറപ്പിക്കാം​' -എന്നാണ്​ പരസ്യത്തിലുള്ളത്​.

Coronavirusസംഖ്യാശാസ​്ത്രപ്രകാരം പരസ്യത്തിൽ ഇദ്ദേഹത്തി​െൻറ പേരും വ്യത്യസ്​തമായാണ്​ എഴുതിയിരിക്കുന്നത്​. ആനന്ദ്​ എന്നതിൽ ഒരു Nഉം Dയും കൂടുതലുണ്ട്​. കൂടാതെ ഇദ്ദേഹം ജുഡീഷ്യൽ ഡിപ്പാർട്ട്‌മെൻറിലെ സ്റ്റെനോഗ്രാഫറാണെന്നും അതിൽ വ്യക്​തമാക്കുന്നു. കൂടുതൽ സഹായത്തിനായി ​തന്നെ ബന്ധപ്പെടാനുള്ള വിവരങ്ങളും പങ്കുവെച്ചിട്ടുണ്ട്​.

കുറഞ്ഞസമയത്തിനുള്ളിൽ തന്നെ ഇൗ പരസ്യം സമൂഹമാധ്യമങ്ങളിൽ വൈറലായി. പലർക്കും ബാനർ ​കണ്ട്​ ചിരിയടക്കാനായില്ല. ഈ ദിവസങ്ങളിലും നിങ്ങൾക്ക് തമാശകൾ കണ്ടെത്താനാകും എന്ന്​ പറഞ്ഞാണ്​ ഒരാൾ ഇൗ ചിത്രം പങ്കുവെച്ചത്​. 'പേര് തെറ്റായി വായിക്കുമ്പോൾ അസ്തിത്വപരമായ പ്രതിസന്ധി വന്ന്​ കൊറോണ​ വൈറസ്​ ഇല്ലാതാകുമെന്ന്​' ഒരാൾ തമാശയോടെ പ്രതികരിച്ചു.