​പാവങ്ങളുടെ ചോരപ്പണം കുതിരക്കച്ചവടത്തിന്? വടക്കാഞ്ചേരിയിലേത് ചുവപ്പൻ അഴിമതിയുടെ വികൃതമുഖം -സന്ദീപ് വാര്യർ

പാലക്കാട്: വടക്കാഞ്ചേരി ബ്ലോക്ക് പഞ്ചായത്ത് ഭരണം പിടിക്കാൻ ലീഗ് സ്വതന്ത്രന് സി.പി.എം 50 ലക്ഷം രൂപ ഓഫർ ചെയ്തുവെന്ന വിവാദത്തിൽ പ്രതികരണവുമായി കോൺഗ്രസ് നേതാവ് സന്ദീപ് വാര്യർ. ​ജനാധിപത്യ വിശ്വാസികളെയും സാധാരണക്കാരെയും ഒരുപോലെ ഞെട്ടിക്കുന്ന വാർത്തകളാണ് വടക്കാഞ്ചേരിയിൽ നിന്ന് പുറത്തുവരുന്നത്. ഒരു ബ്ലോക്ക് പഞ്ചായത്ത് ഭരണം പിടിക്കാൻ ലീഗ് സ്വതന്ത്രന് 50 ലക്ഷം രൂപ വാഗ്ദാനം ചെയ്ത സി.പി.എം നേതാക്കളുടെ ശബ്ദരേഖ, ആ പാർട്ടി എത്രത്തോളം രാഷ്ട്രീയ ജീർണ്ണതയിൽ എത്തിനിൽക്കുന്നു എന്നതിന്റെ തെളിവാണെന്നും അദ്ദേഹം ഫേസ്ബുക് കുറിപ്പിൽ പറഞ്ഞു.

‘പാവപ്പെട്ടവന്റെ വിയർപ്പിന്റെ വിഹിതം മോഷ്ടിച്ചവർ, ആ പണം കൊണ്ട് ജനവിധിയെ അട്ടിമറിക്കാൻ തുനിഞ്ഞിറങ്ങുന്നത് കേരളത്തിന് അപമാനമാണ്. ഒരു ബ്ലോക്ക് പഞ്ചായത്ത് ഭരണം നിലനിർത്താൻ പോലും കോടികൾ എറിയുന്ന സി.പി.എം, അധികാരക്കൊതിക്കായി ഏത് അഴുക്കുചാലിലും വീഴാൻ തയ്യാറാണെന്ന് തെളിയിച്ചിരിക്കുകയാണ്. ജനാധിപത്യത്തെ വെറും കമ്പോളച്ചരക്കാക്കി മാറ്റുന്ന ഈ 'ഗുണ്ടാ-മാഫിയ' രാഷ്ട്രീയത്തിന് മുന്നിൽ ജനങ്ങൾ ഉത്തരം നൽകുക തന്നെ ചെയ്യും’ -സന്ദീപ് പറഞ്ഞു.

കുറിപ്പിന്റെ പൂർണരൂപം:

ജനാധിപത്യത്തെ ലേലം വിളിക്കുന്ന സി.പി.എം; വടക്കാഞ്ചേരിയിൽ വെളിവാകുന്നത് ചുവപ്പൻ അഴിമതിയുടെ വികൃതമുഖം

​ജനാധിപത്യ വിശ്വാസികളെയും സാധാരണക്കാരെയും ഒരുപോലെ ഞെട്ടിക്കുന്ന വാർത്തകളാണ് വടക്കാഞ്ചേരിയിൽ നിന്ന് പുറത്തുവരുന്നത്. ഒരു ബ്ലോക്ക് പഞ്ചായത്ത് ഭരണം പിടിക്കാൻ ലീഗ് സ്വതന്ത്രന് 50 ലക്ഷം രൂപ വാഗ്ദാനം ചെയ്ത സി.പി.എം നേതാക്കളുടെ ശബ്ദരേഖ, ആ പാർട്ടി എത്രത്തോളം രാഷ്ട്രീയ ജീർണ്ണതയിൽ എത്തിനിൽക്കുന്നു എന്നതിന്റെ തെളിവാണ്.

​പാവങ്ങളുടെ ചോരപ്പണം കുതിരക്കച്ചവടത്തിന്?

കരുവന്നൂർ സഹകരണ ബാങ്ക് കൊള്ളയടിച്ച് സാധാരണക്കാരന്റെ ജീവിതം തെരുവിലാക്കിയ അതേ സി.പി.എം നേതാക്കളാണ് ഈ കുതിരക്കച്ചവടത്തിന് പിന്നിലെന്നത് വിഷയത്തിന്റെ ഗൗരവം വർദ്ധിപ്പിക്കുന്നു. പാവപ്പെട്ടവന്റെ വിയർപ്പിന്റെ വിഹിതം മോഷ്ടിച്ചവർ, ആ പണം കൊണ്ട് ജനവിധിയെ അട്ടിമറിക്കാൻ തുനിഞ്ഞിറങ്ങുന്നത് കേരളത്തിന് അപമാനമാണ്.

​അധികാരത്തിനായി എന്ത് നികൃഷ്ടതയും.

ഒരു ബ്ലോക്ക് പഞ്ചായത്ത് ഭരണം നിലനിർത്താൻ പോലും കോടികൾ എറിയുന്ന സി.പി.എം, അധികാരക്കൊതിക്കായി ഏത് അഴുക്കുചാലിലും വീഴാൻ തയ്യാറാണെന്ന് തെളിയിച്ചിരിക്കുകയാണ്. ജനാധിപത്യത്തെ വെറും കമ്പോളച്ചരക്കാക്കി മാറ്റുന്ന ഈ 'ഗുണ്ടാ-മാഫിയ' രാഷ്ട്രീയത്തിന് മുന്നിൽ ജനങ്ങൾ ഉത്തരം നൽകുക തന്നെ ചെയ്യും.

​അഴിമതിപ്പണം കൊണ്ട് ജനവിധിയെ വിലയ്ക്കെടുക്കാമെന്ന സി.പി.എമ്മിന്റെ അഹങ്കാരം കേരളത്തിലെ ബോധമുള്ള ജനത അറബിക്കടലിൽ തള്ളും. രാഷ്ട്രീയ ധാർമ്മികതയുടെ തരിമ്പുപോലും അവശേഷിപ്പിക്കാത്ത ഇത്തരം നികൃഷ്ട നീക്കങ്ങൾക്കെതിരെ ശക്തമായ പ്രതിഷേധം ഉയരേണ്ടതുണ്ട്.