'ജോലി ചോദിക്കാൻ യുവാക്കൾക്ക്​ ​പേടി, കാരണം നൽകുന്നത്​ കേരളത്തിലെ ബി.ജെ.പി സ്​ഥാനാർഥിത്വം​' -ട്രോളുമായി പ്രശാന്ത്​ ഭൂഷൺ

ന്യൂഡൽഹി: കേരളത്തിലെ നിയമസഭ തെരഞ്ഞെടുപ്പിൽ ബി.ജെ.പിയുടെ സ്​ഥാനാർഥി പ്രഖ്യാപനത്തെ ട്രോളി മുതിർന്ന അഭിഭാഷകൻ പ്രശാന്ത്​ ഭൂഷൺ. കാർട്ടൂൺ പ​ങ്കുവെച്ചാണ്​ പ്രശാന്ത്​ ഭൂഷന്‍റെ ട്വീറ്റ്​.

'തൊഴിൽ രഹിതരായ യുവജനങ്ങൾക്കിപ്പോൾ മുന്നോട്ടുവന്ന് ജോലി ആവശ്യപ്പെടാൻ ഭയമാണ്​. തൊഴിലിന്​ പകരം കേരളത്തിൽ മത്സരിക്കാൻ ബി.ജെ.പി ടിക്കറ്റാകും നൽകുക' -പ്രശാന്ത്​ ഭൂഷൺ ട്വിറ്ററിൽ കുറിച്ചു.

എം.ബി.എ ഡിഗ്രി കൈയിൽ പിടിച്ച്​ ജോലി ആവശ്യപ്പെടുന്ന ചെറുപ്പക്കാരന്​ തെരഞ്ഞെടുപ്പ്​ ടിക്കറ്റ്​ കൈയിലേക്ക്​ നൽകുന്ന കാർട്ടുണാണ്​ പ്രശാന്ത്​ ഭൂഷൺ പങ്കുവെച്ചത്​.

രാജ്യത്തെ മറ്റു സംസ്​ഥാനങ്ങളിൽ ബി.ജെ.പി ശക്തിയാർജിക്കുന്നതും കേരളത്തിൽ ബി.ജെ.പി ടിക്കറ്റിൽ മത്സരിക്കാൻ പോലും ആളെകിട്ടാത്തതും സമൂഹമാധ്യമങ്ങളിലടക്കം വൻ ചർച്ചയായിരുന്നു.

മാനന്തവാടിയിൽ ബി.ജെ.പി സ്​ഥാനാർഥിയായി പ്രഖ്യാപിച്ച മണികണ്​ഠൻ പിൻമാറിയ വാർത്ത വ​ലിയ ചർച്ചയായിരുന്നു. താൻ അറിയാതെയായിരുന്നു ബി.ജെ.പിയുടെ പ്രഖ്യാപനമെന്നും ബി.ജെ.പി അനുഭാവിയല്ലെന്നും അതിനാൽ ബി.ജെ.പിയുടെ തീരുമാനം സന്തോഷത്തോടെ നിരസിക്കുന്നുവെന്നും മണികണ്​ഠൻ വ്യക്തമാക്കിയിരുന്നു.