മോദിക്കും രാഹുലിനും മറുപടിയുമായി മുഖ്യമന്ത്രി

തിരുവനന്തപുരം: കേരളവുമായി ബന്ധപ്പെട്ട പ്രധാനമന്ത്രി നരേന്ദ്ര മോദിയുടെയും കോൺഗ്രസ്​ അധ്യക്ഷൻ രാഹുൽ ഗാന്ധിയുടെയും വിമർശനങ്ങൾക്ക്​ മറുപടിയുമായി നിയമസഭയിൽ മുഖ്യമന്ത്രി പിണറായി വിജയൻ. ഗവർണറുടെ നയപ്രഖ്യാപനത്തിന്​ മേലുള്ള നന്ദിപ്രമേയ ചർച്ചയിൽ മറുപടി പറയവെയാണ്​ ഇരുവരുടെയും വാദങ്ങളെ പിണറായി വിജയൻ ഖണ്ഡിച്ചത്​​.

ലോക്​സഭ തെരഞ്ഞെടുപ്പിൽ യു.ഡി.എഫ്​ വിജയിക്കുമെന്ന്​ പ്രതിപക്ഷ നേതാവ്​ പറഞ്ഞപ്പോൾ മുഖ്യമന്ത്രിയുടെ മറുപടി ഇതായിരുന്നു; ‘മതനിരപേക്ഷ ചിന്താഗതിക്കാർ 20 മണ്ഡലങ്ങളിലും എൽ.ഡി.എഫിനെ ജയിപ്പിക്കാൻ ശ്രമം തുടങ്ങിയിട്ടുണ്ട്​, അതോർത്ത്​ നിങ്ങൾ വിഷമിക്കേണ്ട’.

കേരളത്തി​​​െൻറ നവോത്ഥാനമൂല്യങ്ങളാണ്​ ശബരിമല വിഷയവുമായി ബന്ധപ്പെട്ട്​ ആക്രമിക്കപ്പെട്ടത്​. അതിന്​ നേതൃത്വം കൊടുത്തത്​ സംഘ്​പരിവാറാണെന്ന്​ മുഖ്യമന്ത്രി പറഞ്ഞു. സുപ്രീംകോടതി വിധി നടപ്പാക്കാൻ ബാധ്യസ്​ഥപ്പെട്ട സ്​ഥാനത്തിരിക്കുന്ന പ്രധാനമന്ത്രിയുടെ ഭാഗത്ത്​ നിന്നുണ്ടാകാൻ പാടില്ലാത്ത പ്രസ്​താവനയാണുണ്ടായത്​. കേരളത്തിനെ മൊത്തം അപമാനിക്കുന്ന പ്രസ്​താവന കമ്യൂണിസ്​റ്റുകാർക്കെതിരെയാണല്ലോ എന്നു കരുതി നിങ്ങൾ പ്രതികരിക്കാതെയിരുന്നെന്നും പ്രതിപക്ഷത്തോട്​ മുഖ്യമന്ത്രി പറഞ്ഞു.

രാഹുൽ ഗാന്ധി ആരോഗ്യ, വിദ്യാഭ്യാസ രംഗങ്ങളെക്കുറിച്ച്​ അബദ്ധമാണ്​ പറഞ്ഞത്​. പ്രസംഗം പരിഭാഷപ്പെടുത്തിയ സതീശനെങ്കിലും ഇത്​ ശരിയല്ലെന്ന്​ പറഞ്ഞുകൊടുക്കാമായിരുന്നില്ലേ? മൂന്നോ നാലോ സംസ്​ഥാനങ്ങളിൽ ബി.ജെ.പിക്കെതിരെ മത്സരിക്കാൻ നിങ്ങൾക്ക്​ കഴിയും. മറ്റ്​ സംസ്​ഥാനങ്ങളിൽ ​പ്രാദേശിക കക്ഷികൾ പ്രധാനമാണ്​. ബി.ജെ.പി തകരു​േമ്പാൾ ഞങ്ങളാണ്​ മുന്നിൽ എന്ന്​ കോൺഗ്രസ്​ ധരിക്കരുത്​. പ്രാദേശിക കക്ഷികൾ കൂടി ഒപ്പം വരണം. അതിന്​ തെരഞ്ഞെടുപ്പ്​ കഴിയും വരെ കാക്കണം. കേരളത്തിൽ എൽ.ഡി.എഫ്​ ജയിച്ചാൽ കർണാടകത്തിലെപോലെ നിങ്ങൾക്ക്​ ആശങ്ക വേണ്ടിവരില്ലെന്നും മുഖ്യമന്ത്രി കൂട്ടിച്ചേർത്തു.