ഇൻഡ്യ മുന്നണി: സി.പി.എം പറഞ്ഞത് ഏകോപനസമിതി അംഗമാകാൻ ബുദ്ധിമുട്ടാണെന്നു മാത്രം -കെ.സി. വേണുഗോപാൽ

ന്യൂഡൽഹി: ബി.ജെ.പി സർക്കാറിനെ താഴെയിറക്കുക എന്ന വിശാല ആശയത്തോട് യോജിക്കാവുന്ന പാർട്ടികളുടെ മുന്നണിയാണ് ഇൻഡ്യയെന്നും സഖ്യത്തിൽ ഏകാധിപത്യ മനോഭാവമില്ലെന്നും എ.ഐ​.സി.സി ജനറൽ സെക്രട്ടറി കെ.സി. വേണുഗോപാൽ.

ഏകോപനസമിതിയിൽ അംഗമാകാൻ ബുദ്ധിമുട്ടാണെന്നു മാത്രമാണ് സി.പി.എം പറഞ്ഞത്. പാർട്ടി നിലപാടെടുക്കാൻ അവർക്ക് സ്വാതന്ത്ര്യമുണ്ട്. അതൊന്നും ഇൻഡ്യ മുന്നണിയുടെ മുന്നോട്ടുപോക്കിനെ ബാധിക്കുന്ന പ്രശ്നമല്ല. മുന്നണിയിൽ ഭിന്നതയില്ല. വ്യത്യസ്തമായി ചിന്തിക്കുന്ന പാർട്ടികൾ, സംസ്ഥാനങ്ങളിൽ പോരടിക്കുന്ന പാർട്ടികൾ എന്നിവരെല്ലാം ചേരുന്നതാണ് ഈ മുന്നണി. ഇത് രൂപവത്കരിച്ചതുകൊണ്ട് എല്ലാ പാർട്ടികളും അവരുടെ ആശയങ്ങൾ മടക്കിവെച്ച് ഒറ്റ മുന്നണിക്കീഴിൽ വരണമെന്ന് ആരും പറഞ്ഞിട്ടില്ല. അങ്ങനെ നടക്കുകയുമില്ലെന്നും കെ.സി. വേണുഗോപാൽ പറഞ്ഞു.

ഏകോപനസമിതിയിലേക്ക്​ അംഗത്തെ അയക്കേണ്ടതില്ലെന്ന സി.പി.എം പോളിറ്റ്​ബ്യൂറോ തീരുമാനം സംബന്ധിച്ച ചോദ്യത്തിന്​ പ്രതികരിക്കുകയായിരുന്നു അ​​ദ്ദേഹം.

തീരുമാനങ്ങൾ എടുക്കാൻ മുന്നണിയിൽ നേതാക്കൾ ഉണ്ടാകുമ്പോൾ അതിനുള്ളിൽ മറ്റൊരു സംഘടനാസംവിധാനം വേണ്ടതില്ലെന്ന്​ ചൂണ്ടിക്കാട്ടിയാണ്​ സമിതിയിലേക്ക്​ ആളെ അയക്കേണ്ടതില്ലെന്ന പോളിറ്റ് ബ്യൂറോ തീരുമാനം. എന്നാൽ, മുന്നണി വിപുലീകരിക്കുന്നതിനും ജനങ്ങളിലെ വലിയൊരുവിഭാഗത്തെ ആകര്‍ഷിക്കുന്നതിനുമുള്ള ശ്രമങ്ങള്‍ നടത്തുന്നതിനും വേണ്ടി പ്രവര്‍ത്തിക്കുമെന്നും സി.പി.എം വ്യക്​തമാക്കിയിരുന്നു.