ജില്ല പഞ്ചായത്ത്​: തർക്കം പരിഹരിക്കാനാവാതെ യു.ഡി.എഫ്​

കോട്ടയം: ജില്ല പഞ്ചായത്ത്​ പ്രസിഡൻറ്​ സ്ഥാനത്തെച്ചൊല്ലിയുള്ള കേരള കോണ്‍ഗ്രസിലെ തര്‍ക്കം പരിഹരിക്കാനാവാതെ യു.ഡി.എഫ്​ നേതൃത്വം നെ​ട്ടോട്ടത്തിൽ.​ ജോസ് കെ. മാണിയെ അനുനയിപ്പിക്കാന്‍ കൺവീനർ ബെന്നി ബഹ​നാനും തിരുവഞ്ചൂര്‍ രാധാകൃഷ്ണനും പാലായിലെ വസതിയിൽ വെള്ളിയാഴ്​ച രാത്രി നടത്തിയ ചർച്ചയും പരാജയപ്പെട്ടു. ഘടകകക്ഷികളുടെ തമ്മിലടി ചർച്ചചെയ്യാൻ ചേർന്ന കോട്ടയം ഡി.സി.സിയുടെ അടിയന്തര യോഗവും തീരുമാനത്തിലെത്തിയില്ല. തർക്കം സംസ്ഥാനതലത്തിൽ പരിഹരിക്ക​ണമെന്നാണ്​ ഡി.സി.സിയുടെ ആവശ്യം. പ്രസിഡൻറ്​ സ്ഥാനം വിട്ടുനല്‍കില്ലെന്ന്​ ജോസ് കെ. മാണിയും ധാരണ പാലിക്കണമെന്ന് ജോസഫും കടുത്ത നിലപാടെടുത്ത സാഹചര്യത്തിലായിരുന്നു യു.ഡി.എഫ് നേതൃത്വം വീണ്ടും ചർച്ച നടത്തിയത്​. 

ജോസഫി​​​െൻറ അന്ത്യശാസനം തള്ളിയ ജോസ്​ വിഭാഗം ശനിയാഴ്​ച രൂക്ഷവിമർശനവുമായി രംഗത്തുവന്നത്​ അനുനയ നീക്കങ്ങൾക്കും തിരിച്ചടിയായി. നിർണായക ഘട്ടത്തിലെല്ലാം അന്ത്യശാസന ഭാഷയും മുന്നണിമാറ്റ ഭീഷണിയും ജോസഫ്​ ഉയർത്താറുണ്ടെന്നും രാഷ്​ട്രീയ ചാഞ്ചാട്ടം ശീലമാക്കിയ ജോസഫ്​ ഇല്ലാത്ത കരാർ ഉണ്ടെന്ന്​ വരുത്തി പദവി സ്വന്തമാക്കാൻ​ ശ്രമിക്കുകയാണെന്നുമായിരുന്നു ജോസ്​ വിഭാഗത്തി​​​െൻറ ആരോപണം. 
മുന്നണിബന്ധം ഉലഞ്ഞാലും പ്രസിഡൻറ്​ പദവി വിട്ടുകൊടുക്കി​െല്ലന്ന മുന്നറിയിപ്പ​ും ജോസ്​ ആവർത്തിച്ചു. ​പ്രസിഡൻറ്​ സ്ഥാനം ഒഴിഞ്ഞാൽ നിയമസഭ തെരഞ്ഞെടുപ്പിലടക്കം കൂടുതല്‍ പരിഗണന നല്‍കാമെന്ന ഉറപ്പും ജോസ്​പക്ഷം തള്ളി. 

ജില്ല പഞ്ചായത്തില്‍ കെ.എം. മാണിയുമായി ഉണ്ടാക്കിയ ധാരണ മാത്രമേ ഉള്ളൂവെന്നും അതില്‍നിന്ന്​ പിന്നോട്ടില്ലെന്നും ജോസ് ​ചർച്ചയിൽ വ്യക്തമാക്കി. ചർച്ചക്കിടെ ജോസഫിനെ അനുനയിപ്പിക്കാൻ ഫോണിലൂടെ ശ്രമിച്ചെങ്കിലും വഴങ്ങിയില്ല. ജോസ് വിഭാഗം രാജി​െവച്ചില്ലെങ്കില്‍ കടുത്ത നടപടികളിലേക്ക് കടക്കുമെന്ന നിലപാട് ജോസഫ് ശനിയാഴ്​ചയും ആവർത്തിച്ചു. തമ്മിലടിച്ച്​ ഇരുപക്ഷവും മുന്നണിയിൽ തുടരുന്നതിലെ ആശങ്കയും യു.ഡി.എഫ്​ തള്ളുന്നില്ല. തദ്ദേശ തെരഞ്ഞെടുപ്പ്​ വരാനിരിക്കെ ഇത്​ തളർത്തുമെന്നും നേതൃത്വം ചൂണ്ടിക്കാട്ടുന്നു. അതിനിടെ ജോസഫിന് പിന്തുണയുമായി കെ. മുരളീധരൻ രംഗത്തെത്തിയത്​ യു.ഡി.എഫിനെ വെട്ടിലാക്കി. തർക്കം ഏതറ്റംവരെ പോകുമെന്ന വിലയിരുത്തലിലാണ്​ ഇടതുമുന്നണി. ചാക്കിട്ട് പിടിക്കാന്‍ ശ്രമിക്കില്ലെന്നും നയവ്യക്തതയും കെട്ടുറപ്പുമുള്ള മുന്നണിയാണ് ഇടതുപക്ഷമെന്നും കോടിയേരി ബാലകൃഷ്ണന്‍ ശനിയാഴ്​ച വ്യക്തമാക്കി.