മുസ്​ലിം ലീഗ് നേതൃയോഗത്തിൽ മുതിർന്ന നേതാക്കൾ തമ്മിൽ വാക്പോര്

കോഴിക്കോട്​: ബുധാഴ്ച ലീഗ് ഹൗസിൽ ചേർന്ന മുസ്​ലിം ലീഗ് സംസ്ഥാന ഭാരവാഹികളുടെയും എം.പി-എൽ.എ.മാരുടെയും യോഗത്തിൽ നേതാക്കൾ തമ്മിൽ വാക്പോര്. ന്യൂനപക്ഷവിരുദ്ധ നയങ്ങളുമായി മുന്നോട്ട് പോവുന്ന ബി.ജെ.പി സർക്കാറി‍​​െൻറ നിലപാടുകളെ പ്രതിരോധിക്കുന്നതിൽ പാർലമ​​െൻറ്​ അംഗങ്ങൾ തീർത്തും പരാജയമാണെന്ന് ഒരു വിഭാഗം നേതാക്കൾ യോഗത്തിൽ തുറന്നടിച്ചു. ലീഗ് സംസ്ഥാന ഭാരവാഹികളായ കെ.എം.ഷാജി, കെ.എസ്.ഹംസ എന്നിവരാണ് എം.പിമാരെ കടന്നാക്രമിച്ചത്.

കഴിഞ്ഞ ആഴ്ച കോഴിക്കോട്ട്​ ചേർന്ന പൊളിറ്റിക്കൽ അഫയേഴ്സ് കമ്മിറ്റിയിലെ തീരുമാനങ്ങളും തർക്കത്തിനു കാരണമായി. ഭരണഘടന സാധുതയില്ലാതെ പാർട്ടി ദേശീയ ഭാരവാഹികളെ മാറ്റി പ്രതിഷ്ഠിച്ചതും പുതിയ ഭാരവാഹികളെ പ്രഖ്യാപിച്ചതും യോഗത്തിൽ ചൂടേറിയ തർക്കങ്ങൾക്കു കാരണമായി. ദേശീയ പ്രസിഡൻറിനെ നോക്കുകുത്തിയാക്കി സംസ്ഥാന പ്രസിഡൻറാണ് ദേശീയ ഭാരവാഹികളെ പ്രഖ്യാപിച്ചത്.

അസം-കാശ്മീർ സംഭവ വികാസങ്ങളുടെ പശ്ചാത്തലത്തിൽ ഗാന്ധിജയന്തി ദിനത്തിൽ മുസ്​ലിം ലീഗ് കോഴിക്കോട്ട് ഫാഷിസ്​റ്റ്​വിരുദ്ധ റാലി സംഘടിപ്പിക്കാൻ യോഗം തീരുമാനിച്ചു. ‘ഭയരഹിത ഇന്ത്യ എല്ലാവർക്കും ഉള്ള ഇന്ത്യ’ മുദ്രാവാക്യവുമായി മുസ്​ലിം ലീഗ് ആരംഭിക്കുന്ന ദേശിയ കാമ്പയി‍​​െൻറ ഭാഗമായാണ് റാലി.

മുസ്​ലിം ലീഗ് പോഷക സംഘടനയായ ദുബൈ കെ.എം.സി.സി സെൻട്രൽ കമ്മിറ്റിയിലെ വിഭാഗീയത പരിഹരിക്കുന്നതിനായി പാണക്കാട് സാദിഖലി തങ്ങൾ, പി.കെ. കുഞ്ഞാലിക്കുട്ടി എന്നിവരടങ്ങുന്ന ഉപസമിതിയെ ചുമതലപ്പെടുത്തി.

ലീഗ് സംസ്ഥാന പ്രസിഡൻറ്​ ഹൈദരലി ശിഹാബ് തങ്ങൾ യോഗത്തിൽ അധ്യക്ഷത വഹിച്ചു. സംസ്ഥാന ജനറൽ സെക്രട്ടറി കെ.പി.എ. മജീദ് സ്വാഗതം പറഞ്ഞു. ദേശീയഭാരവാഹികളായ പി.കെ. കുഞ്ഞാലിക്കുട്ടി, ഇ.ടി. മുഹമ്മദ് ബഷീർ, പി.വി. അബ്​ദുൽ വഹാബ്, സംസ്ഥാന ഭാരവാഹിയായ എം.സി. മായിൻഹാജി, വി.കെ. അബ്​ദുൽ ഖാദർ. അബ്​ദുറഹ്​മാൻ കല്ലായി, വി.കെ. ഇബ്രാഹിം കുഞ്ഞ്, എം.കെ. മുനീർ തുടങ്ങിയവർ പങ്കെടുത്തു. മഞ്ചേശ്വരം ഉപതെരഞ്ഞെടുപ്പിന്​ നേതൃത്വം നൽകാൻ ഒമ്പത് എം.എൽ.എമാരെ ചുമതലപ്പെടുത്തി.