ചെങ്ങന്നൂരിൽ ബി.ജെ.പി സ്ഥാനാർഥി മത്സരിക്കും

തിരുവനന്തപുരം: ചെങ്ങന്നൂർ ഉപതെരഞ്ഞെടുപ്പിൽ ബി.ജെ.പി സ്ഥാനാർഥി മത്സരിക്കാൻ എൻ.ഡി.എ നേതൃയോഗത്തിൽ തീരുമാനം. ബി.ജെ.പി യോഗം ചേർന്ന്​ സ്ഥാനാർഥിയെ ഉടൻ തീരുമാനിക്കുമെന്ന് തീരുമാനങ്ങൾ വിശദീകരിച്ച കൺവീനർ കുമ്മനം രാജശേഖരൻ വാർത്തസമ്മേളനത്തിൽ അറിയിച്ചു. ദേശീയ ജനാധിപത്യ സഖ്യത്തിന് ആഴത്തിൽ വേരുകളുള്ള മണ്ഡലമാണ് ചെങ്ങന്നൂർ. വിജയം ഉറപ്പാണെന്നും അതിനായി കർമപദ്ധതിക്ക് രൂപംനൽകിയതായും അദ്ദേഹം അറിയിച്ചു. 

കേരളം ഭരിക്കുന്നത്​ അഴിമതിക്കാരെയും മാഫിയകളെയും സംരക്ഷിക്കുന്ന സർക്കാറാണെന്ന്​ യോഗം വിലയിരുത്തിയതായി കുമ്മനം പറഞ്ഞു. തിങ്കളാഴ്ച ആലപ്പുഴയിൽ എൻ.ഡി.എ ജില്ല നേതൃയോഗം ചേരും. തുടർന്ന് എല്ലാ ഘടകകക്ഷികളും ചെങ്ങന്നൂർ നിയോജകമണ്ഡലം നേതൃയോഗം വിളിക്കും. മാർച്ച് നാലിന് എൻ.ഡി.എയുടെ നിയോജകമണ്ഡലം യോഗം ചെങ്ങന്നൂരിൽ നടത്താനും യോഗം തീരുമാനിച്ചു.  അഡ്വ. പി.എസ്​. ശ്രീധരൻപിള്ള തന്നെയാകും ചെങ്ങന്നൂരിൽ ബി.ജെ.പി സ്ഥാനാർഥിയാകുകയെന്നാണ്​ വിവരം.