അഫ്​ഗാനികൾക്കു​ വേണ്ടത്​ ഒരിറ്റ്​ സമാധാനമാണ്​

യൂറോപ്യൻ മാധ്യമപ്രവർത്തകർ നൽകുന്ന വിശേഷങ്ങളും നിഗമനങ്ങളുമാണ്​ അഫ്​ഗാനിസ്​താ​െൻറ വർത്തമാനങ്ങളായി ലോകം കേൾക്കുന്നത്. അവിടത്തെ ജനങ്ങളുടെ വീക്ഷണവും പ്രതീക്ഷകളും മുൻവിധികളും പക്ഷംചേരാതെ പറയുന്നതിൽ അവർ പരാജയപ്പെടുകയും ചെയ്യുന്നു. അത്തരമൊരു ഘട്ടത്തിൽ മേഖലയുടെ മനസ്സറിയുന്ന മാധ്യമപ്രവർത്തകരുടെ ശബ്​ദത്തിന്​ മു​െമ്പന്നത്തേക്കാളേറെ പ്രസക്​തിയുണ്ട്​. റേഡിയോ ​​ ഫ്രീ യൂറോപ്​/ റേഡിയോ ലിബർട്ടിയുടെ പഷ്​തൂൺ ഭാഷാ വിഭാഗമായ 'റേഡിയോ മശാലി'​െൻറ മാനേജിങ്​ എഡിറ്റർ ദാവൂദ്​ ഘട്ടക് അഫ്​ഗാനിലെ രാഷ്​ട്രീയ മാറ്റങ്ങളെക്കുറിച്ച്​ 'മാധ്യമ'വുമായി സംസാരിക്കുന്നു. ഭീകരവാദത്തിനെതിരായ അഭിപ്രായ രൂപവത്​കരണത്തിൽ നിർണായക പങ്കുവഹിക്കുന്ന മാധ്യമമാണ്​ റേഡിയോ മശാൽ. പാക്​, അഫ്​ഗാൻ രാഷ്​ട്രീയത്തെ സൂക്ഷ്​മമായി നിരീക്ഷിക്കുന്ന ഘട്ടക് നൽകിയ അഭിമുഖത്തി​െൻറ പ്രധാന ഭാഗങ്ങൾ.

താലിബാ​െൻറ തിരിച്ചുവരവിനെ താങ്കൾ എങ്ങനെയാണ്​ വിലയിരുത്തുന്നത്​?

താലിബാ​െൻറ മുന്നേറ്റം ലോകത്തെ മാത്രമല്ല, അവരെത്തന്നെ അമ്പരപ്പിച്ചിട്ടുണ്ട്​. അധികാരം കൈക്കലാക്കിയെന്നിരിക്കിലും അതിനെ സ്​ഥാപിച്ചെടുക്കാനുള്ള പെടാപ്പാടിലാണ്​ അവരിപ്പോൾ. പുറമേ നിന്നുള്ളതിനേക്കാൾ വെല്ലുവിളികൾ നേരിടാനുള്ളത്​ താലിബാന്​ ഉള്ളിൽ നിന്നുതന്നെയാണ്. അധികാരം പങ്കുവെക്കുന്ന കാര്യത്തിൽ അവർ എങ്ങനെ തീർപ്പിലെത്തുമെന്ന്​ കാത്തിരുന്നു​തന്നെ കാണേണ്ടിവരും.

അതിശക്​തരായ അധിനിവേശ സേനയുടെ സാന്നിധ്യത്തിനിടയിലും ഭരണം പിടിച്ച താലിബാ​െൻറ അടുത്ത നീക്കമെന്താവും? അവർക്ക്​ എവിടെനിന്നാണ്​ പിൻബലം ലഭിക്കുന്നത്​?

കരുത്ത്​ തെളിയിക്കുന്നതിൽ തന്നെയാവും അവർ ശ്രദ്ധയൂന്നുക. യുദ്ധകാല അനുനയവും അച്ചടക്കവും തുടർന്നാൽ പുറംശക്​തികൾക്കൊന്നുംതന്നെ അവരെ പുറന്തള്ളാൻ കഴിയില്ല. ഇത്​ അവ​രുടെ യഥാർഥ പരീക്ഷണ ഘട്ടമാണ്​. അവർക്കു​ പിന്നിൽ ആരുമില്ല. നിങ്ങൾ പാകിസ്​താനെയാണ്​ ഉദ്ദേശിച്ചതെങ്കിൽ എന്തെങ്കിലും തരത്തിലെ സൈനിക സഹായം പാകിസ്​താൻ നൽകുന്നുണ്ടെന്ന്​ ഞാൻ കരുതുന്നില്ല.

ഏവരും ആവശ്യപ്പെടുന്നതുപോലെ എല്ലാവരെയും ഉൾക്കൊണ്ടുള്ള ഒരു സർക്കാർ രൂപവത്​കരിക്കാൻ താലിബാൻ തയാറാകുമോ? അതോ, അരാജകത്വവും ചോരക്കളികളും തുടരുമോ? പ്രത്യേകിച്ച്​ നിരവധി പേരുടെ ജീവനെടുത്ത കാബൂൾ വിമാനത്താവള സ്​ഫോടനത്തി​െൻറ പശ്ചാത്തലത്തിൽ?

ഇസ്​ലാമിക്​ സ്​റ്റേറ്റ്​ ഖുറാസാൻ (ഐ.എസ്​-കെ)യുടെ സാന്നിധ്യം രാജ്യത്തുണ്ടെന്നതിനാൽ ഇത്തരം അരക്ഷിതാവസ്​ഥയും അതിക്രമങ്ങളും വരുംനാളുകളിലും തുടരാനാണ്​ സാധ്യത. ഹാമിദ്​ കർസായി, അബ്​ദുല്ല അബ്​ദുല്ല തുടങ്ങിയ കുറച്ച്​ നേതാക്കളെ സർക്കാറിൽ ഉൾക്കൊള്ളിക്കാൻ സാധ്യതയുണ്ട്. എന്നുവെച്ച്​ പ്രധാന സ്​ഥാനങ്ങളൊന്നുമായിരിക്കില്ല, നാമമാത്ര പദവികളാണ്​ അവർക്ക്​ നൽകപ്പെടുക.

താലിബാൻ ശരിക്കും മാറിയിട്ടുണ്ടോ​? അവരുടെ ഭരണരീതിയിൽ എന്തെങ്കിലും മാറ്റമുണ്ടാകുമെന്ന് കരുതുന്നുണ്ടോ?

മാറ്റങ്ങളില്ലാതില്ല. അവരിപ്പോൾ സ്​ത്രീകളെ തല്ലുന്നില്ല. പുരുഷൻമാരെ പ്രാർഥന നിർവഹിക്കാനും നീണ്ട താടി വെക്കുവാനും നിർബന്ധിക്കുന്നുമില്ല. സ്വതന്ത്ര മാധ്യമങ്ങളുടെ പ്രാധാന്യം ഊന്നിപ്പറയുന്നുണ്ട്​. പക്ഷേ, അധികാരം പൂർണമായി സ്​ഥാപിച്ചശേഷവും ഇതൊക്കെ തുടരുമോ എന്നതാണ്​ വലിയ ചോദ്യം. എനിക്ക്​ അക്കാര്യത്തിൽ പ്രത്യാശയില്ല.

താലിബാ​െൻറ രണ്ടാം വരവിനെ അഫ്​ഗാനിലെ ജനസാമാന്യം എങ്ങനെയാണ്​ കാണുന്നത്​? ആഗോള മാധ്യമങ്ങൾ പങ്കുവെക്കുന്നത്​ അവിടത്തെ നേരവസ്​ഥകൾ തന്നെയാണോ?

അവർ ഒരൽപം സമാധാനത്തിനു​ വേണ്ടി എന്തുമാത്രം ആഗ്രഹിക്കുന്നുവെന്നറിയാമോ? നാലു​ പതിറ്റാണ്ടായി തുടരുന്ന യുദ്ധങ്ങൾക്കിടയിലാണ്​ അവരുടെ ജീവിതം. ജോലി, സുരക്ഷ, സമാധാനത്തോടെയുള്ള ജീവിതം... ശരാശരി അഫ്​ഗാനികളുടെ മനസ്സിൽ അതു മാത്രമാണ്​. മറ്റെന്തിനേക്കാളും അവർ പ്രാധാന്യം നൽകുന്നത്​ അതിനെല്ലാമാണ്​.