ക​ലാ​മ​ണ്ഡ​ലം വി​ക​സ​ന​ത്തി​ന് യ​തീം​ഖാ​ന​യു​ടെ ഭൂ​മി പി​ടി​ച്ചു​പ​റി​ക്കു​മ്പോ​ൾ

വ​സ്തു​ക്ക​ളോ ഭൂ​മി​യോ കെ​ട്ടി​ട​ങ്ങ​ളോ സ​മു​ദാ​യ​ത്തി​ന്റെ ആ​വ​ശ്യ​ങ്ങ​ൾ​ക്കോ അ​നാ​ഥ​ക​ൾ, അ​ഗ​തി​ക​ൾ, വി​ധ​വ​ക​ൾ തു​ട​ങ്ങി​യ പ്ര​ത്യേ​ക പ​രി​ഗ​ണ​ന ആ​വ​ശ്യ​മു​ള്ള സ​മൂ​ഹ​ത്തി​ന്റെ ഉ​ന്ന​മ​ന​ത്തി​നോ പ്ര​യോ​ജ​നം ല​ഭി​ക്കും​വി​ധ​ത്തി​ൽ ദൈ​വ​പ്രീ​തി കാം​ക്ഷി​ച്ച് വി​ട്ടു​ന​ൽ​കു​ന്ന​തി​നാ​ണ് വ​ഖ​ഫ് എ​ന്നു പ​റ​യു​ന്ന​ത്.

കി​ണ​ർ, ജ​ലാ​ശ​യ​ങ്ങ​ൾ, ഫ​ല​വൃ​ക്ഷ​ങ്ങ​ൾ, വാ​ഹ​ന​ങ്ങ​ൾ എ​ന്നി​വ​യെ​ല്ലാം ഇ​പ്ര​കാ​രം വ​ഖ​ഫ് ചെ​യ്യാ​റു​ണ്ട്. ദാ​താ​വി​ന്റെ കാ​ല​ശേ​ഷ​വും നി​ല​നി​ൽ​ക്കു​ന്ന ദാ​ന​മാ​യി അ​വ പ്ര​തി​ഫ​ല​മേ​കും എ​ന്നാ​ണ് ഇ​സ്‍ലാ​മി​ക വി​ശ്വാ​സം. ലോ​ക​ത്തി​ന്റെ എ​ല്ലാ ഭാ​ഗ​ങ്ങ​ളി​ലും ഇ​ത്ത​ര​ത്തി​ൽ സ്വ​ത്തു​വ​ക​ക​ൾ വ​ഖ​ഫ് ചെ​യ്യ​പ്പെ​ട്ടി​ട്ടു​ണ്ട്.

ഇ​ന്ത്യ​യി​ലെ ഒ​ട്ട​ന​വ​ധി സാ​ധു​സ​ഹാ​യ പ്ര​വ​ർ​ത്ത​ന​ങ്ങ​ളു​ടെ​യും മ​ത-​ജീ​വ​കാ​രു​ണ്യ-​സാം​സ്കാ​രി​ക-​വി​ദ്യാ​ഭ്യാ​സ സ്ഥാ​പ​ന​ങ്ങ​ളു​ടെ​യും ന​ട​ത്തി​പ്പ് വ​ഖ​ഫ് സ്വ​ത്തു​ക്ക​ളെ ആ​ശ്ര​യി​ച്ചാ​ണ്. വ​ഖ​ഫ് സ്വ​ത്തു​ക്ക​ൾ വി​ൽ​പ​ന ന​ട​ത്താ​നോ ദാ​നം​ചെ​യ്യാ​നോ കൈ​മാ​റ്റം ചെ​യ്യാ​നോ പ​ണ​യ​പ്പെ​ടു​ത്താ​നോ പാ​ടി​ല്ല എ​ന്നാ​ണ് രാ​ജ്യ​ത്തെ വ​ഖ​ഫ് നി​യ​മ​ത്തി​ലെ 104 എ ​വ​കു​പ്പ് അ​നു​ശാ​സി​ക്കു​ന്ന​ത്.

നി​യ​മം ഇ​പ്ര​കാ​രം ക​ർ​ശ​ന​മാ​ണെ​ങ്കി​ലും വ​ഖ​ഫ് സ്വ​ത്തു​ക്ക​ളി​ലെ കൈ​യേ​റ്റം നാ​ടെ​ങ്ങും വ്യാ​പ​ക​മാ​ണ്. സാ​ധു​ജ​ന പ​രി​പാ​ല​ന​ത്തി​ന് ഉ​ത​കേ​ണ്ട കോ​ടി​ക​ൾ മൂ​ല്യ​മു​ള്ള വ​ഖ​ഫ് സ്വ​ത്തു​ക്ക​ളാ​ണ് സ്വ​കാ​ര്യ വ്യ​ക്തി​ക​ളു​ടെ​യും ഗ്രൂ​പ്പു​ക​ളു​ടെ​യും കൈ​ക​ളി​ലെ​ത്തു​ന്ന​ത്.

സ​ർ​ക്കാ​ർ സം​വി​ധാ​നം​ത​ന്നെ ഇ​തി​ന് സൗ​ക​ര്യം​ചെ​യ്യു​മ്പോ​ൾ കൈ​യേ​റ്റ​ക്കാ​ർ​ക്ക് കാ​ര്യ​ങ്ങ​ൾ എ​ളു​പ്പ​മാ​കു​ന്നു. കേ​ര​ള​ത്തി​നു പു​റ​ത്ത് വ​ഖ​ഫ് സ്വ​ത്തു​ക്ക​ൾ കൈ​യേ​റാ​ൻ മാ​ഫി​യ​ത​ന്നെ പ്ര​വ​ർ​ത്തി​ക്കു​ന്നു​ണ്ട്. ഇ​ന്ത്യ​യു​ടെ ഐ.​ടി ത​ല​സ്ഥാ​നം എ​ന്ന് പെ​രു​മ നേ​ടി​യെ​ടു​ത്ത സൈ​ബ​രാ​ബാ​ദി​ൽ ലോ​കോ​ത്ത​ര ഐ.​ടി ക​മ്പ​നി​ക​ളെ ക്ഷ​ണി​ച്ചു​കൊ​ണ്ടു​വ​ന്ന സ​ർ​ക്കാ​ർ അ​വ​ർ​ക്ക് കെ​ട്ടി​ട​ങ്ങ​ൾ പ​ണി​യാ​ൻ ഇ​ടം ന​ൽ​കി​യ​ത് വ​ഖ​ഫ് ഭൂ​മി​ക​ളി​ലാ​ണ്.

വ​ഖ​ഫ് ഭൂ​മി കൈ​യേ​റ്റം ചെ​യ്യ​പ്പെ​ടു​ന്നു​വെ​ന്ന കാ​ര്യം മു​സ്‍ലിം സം​ഘ​ട​ന​ക​ൾ മാ​ത്രം ഉ​യ​ർ​ത്തി​ക്കൊ​ണ്ടു​വ​രു​ന്ന ആ​കു​ല​ത​യ​ല്ല. രാ​ജ്യ​ത്തെ ഏ​റ്റ​വും സ​മ്പ​ന്ന​നാ​യ വ്യ​ക്തി​യു​ടെ വീ​ട് നി​ല​കൊ​ള്ളു​ന്ന​ത് വ​ഖ​ഫ് ഭൂ​മി​യി​ലാ​ണെ​ന്നും ത​ങ്ങ​ൾ​ക്ക് അ​ധി​കാ​രം ല​ഭി​ച്ചാ​ൽ അ​ത് പി​ടി​ച്ചെ​ടു​ത്ത് വ​ഖ​ഫ് ബോ​ർ​ഡി​നെ ഏ​ൽ​പി​ക്കു​മെ​ന്നും പ്ര​ഖ്യാ​പി​ച്ച​ത് ഡ​ൽ​ഹി മു​ഖ്യ​മ​​ന്ത്രി അ​ര​വി​ന്ദ് കെ​ജ്രി​വാ​ളാ​ണ്.

ഈ ​ഭൂ​മി അ​ന്യാ​ധീ​ന​പ്പെ​ട്ട​തു സം​ബ​ന്ധി​ച്ച് കേ​സ് ഇ​പ്പോ​ഴും കോ​ട​തി​യി​ലു​ണ്ട്. ഡ​ൽ​ഹി​യി​ൽ പ​ള്ളി​ക​ളും മ​ദ്റ​സ​ക​ളും ഖ​ബ​ർ​സ്ഥാ​നു​ക​ളും ദ​ർ​ഗ​ക​ളും ഉ​ൾ​പ്പെ​ടെ 123 വ​ഖ​ഫ് സ്വ​ത്തു​ക്ക​ൾ ഏ​റ്റെ​ടു​ക്കാ​നു​ള്ള കേ​ന്ദ്ര സ​ർ​ക്കാ​ർ നീ​ക്ക​ത്തി​നെ​തി​രെ വ​ഖ​ഫ് ബോ​ർ​ഡ് സു​പ്രീം​കോ​ട​തി​യെ സ​മീ​പി​ച്ചി​രി​ക്ക​യാ​ണ്.

സി.​പി.​എം ഭ​ര​ണ​കാ​ല​ത്ത് പ​ശ്ചി​മ ബം​ഗാ​ളി​ൽ കോ​ടി​ക്ക​ണ​ക്കി​ന് രൂ​പ​യു​ടെ വ​ഖ​ഫ് സ്വ​ത്തു​ക്ക​ളാ​ണ് കൈ​യേ​റ​പ്പെ​ട്ട​ത്. ഇ​ന്ത്യ​യി​ലെ ഏ​റ്റ​വും വ​ലി​യ വ​ഖ​ഫ് കൈ​യേ​റ്റം ന​ട​ത്തു​ന്ന​ത് സ​ർ​ക്കാ​റാ​ണെ​ന്ന് രാ​ജ്യ​​ത്തെ മു​സ്‍ലിം​ക​ളു​ടെ സാ​മൂ​ഹി​ക-​സാ​മ്പ​ത്തി​ക അ​വ​സ്ഥ​ക​ളെ​ക്കു​റി​ച്ച് പ​ഠ​നം ന​ട​ത്തി​യ ജ​സ്റ്റി​സ് ര​ജീ​ന്ദ​ർ സ​ച്ചാ​ർ സ​മി​തി ചൂ​ണ്ടി​ക്കാ​ട്ടി​യി​രു​ന്നു.

വ​ഖ​ഫ് കൈ​യേ​റ്റ​ങ്ങ​ൾ ഒ​ഴി​പ്പി​ച്ചും ആ ​സ്വ​ത്തു​ക​ൾ തി​രി​ച്ചെ​ടു​ത്തും അ​വ​യു​ടെ യ​ഥാ​ർ​ഥ ഗു​ണ​ഭോ​ക്താ​ക്ക​ൾ​ക്ക് പ്ര​യോ​ജ​നം ല​ഭ്യ​മാ​ക്ക​ണ​മെ​ന്നും സ​മി​തി ശി​പാ​ർ​ശ ചെ​യ്ത​താ​ണ്. വ​ഖ​ഫ് സ്വ​ത്തു​ക്ക​ൾ യ​ഥാ​വി​ധി ഉ​പ​യോ​ഗി​ച്ച് യ​ഥാ​ർ​ഥ അ​വ​കാ​ശി​ക​ളി​ലേ​ക്ക് അ​തി​ന്റെ പ്ര​യോ​ജ​നം ന​ൽ​കി​വ​രു​ന്ന സം​സ്ഥാ​ന​മാ​യി അ​റി​യ​പ്പെ​ട്ടി​രു​ന്ന കേ​ര​ള​ത്തി​ലും വ​ഖ​ഫ് സ്വ​ത്തു​ക്ക​ൾ കൈ​യേ​റ്റം ചെ​യ്യ​പ്പെ​ടു​ന്ന വി​വ​രം അ​തി​ന്റെ ചു​മ​ത​ല​യു​ള്ള മ​ന്ത്രി​ത​ന്നെ നി​യ​മ​സ​ഭ​യി​ൽ വ്യ​ക്ത​മാ​ക്കി​യി​രി​ക്കു​ന്നു.

എ​ന്നാ​ൽ, വ​ഖ​ഫ് ഭൂ​മി​യി​ൽ ക​ണ്ണും​ന​ട്ടി​രി​ക്കു​ന്ന കൈ​യേ​റ്റ മാ​ഫി​യ​ക്ക് ഒ​ത്താ​ശ​ക​ൾ ചെ​യ്തു​കൊ​ടു​ക്കു​ന്ന​തും സ​ർ​ക്കാ​ർ​ത​ല​ത്തി​ൽ​ത​ന്നെ​യാ​ണ്. ഫാ​റൂ​ഖ് കോ​ള​ജി​നാ​യി വ​ഖ​ഫ് ചെ​യ്ത എ​റ​ണാ​കു​ള​ത്തെ 404 ഏ​ക്ക​ർ ഭൂ​മി സ്വ​കാ​ര്യ കു​ത്ത​ക ക​മ്പ​നി​ക്കും വ്യ​ക്തി​ക​ൾ​ക്കും പ​തി​ച്ചു​ന​ൽ​കാ​ൻ ന​ട​ന്ന ശ്ര​മം ഇ​തി​ൽ ഒ​ടു​വി​ല​ത്തേ​തു മാ​ത്രം. തൃ​ശൂ​രി​ലും ക​ണ്ണൂ​രി​ലും സ​മാ​ന​മാ​യ സം​ഭ​വ​ങ്ങ​ൾ അ​ര​ങ്ങേ​റു​ന്നു.

അ​നാ​ഥ​ക​ളു​ടെ സ്വ​ത്തി​ൽ അ​റി​വ് വി​ള​യു​മോ?

തൃ​ശൂ​ർ ചെ​റു​തു​രു​ത്തി നൂ​റു​ൽ ഹു​ദ യ​തീം​ഖാ​ന​ക്കാ​യി സ്ഥാ​പ​ക​രി​ലൊ​രാ​ളാ​യ പു​തു​ശ്ശേ​രി കോ​യാ​മു ഹാ​ജി വ​ഖ​ഫ് ചെ​യ്ത ഭൂ​മി​യി​ൽ ക​ണ്ണും​ന​ട്ടി​രി​ക്ക​യാ​ണ് കേ​ര​ള ക​ലാ​മ​ണ്ഡ​ലം ക​ൽ​പി​ത സ​ർ​വ​ക​ലാ​ശാ​ല. ഇ​വി​ടെ​യു​ള്ള 7.94 ഏ​ക്ക​ർ വ​ഖ​ഫ് ഭൂ​മി​യി​ൽ 2.94 ഏ​ക്ക​ർ സ്ഥ​ലം കാ​മ്പ​സ് വി​ക​സ​ന​ത്തി​ന് ഏ​റ്റെ​ടു​ക്കാ​ൻ മ​ന്ത്രി​ത​ല​ത്തി​ൽ ന​ട​ന്ന യോ​ഗ​മാ​ണ് തീ​രു​മാ​ന​മെ​ടു​ത്ത​ത്.

സ്ഥ​ലം എം.​എ​ൽ.​എ​യും ദേ​വ​സ്വം മ​ന്ത്രി​യു​മാ​യ കെ. ​രാ​ധാ​കൃ​ഷ്ണ​ൻ, സാം​സ്കാ​രി​ക​മ​ന്ത്രി സ​ജി ചെ​റി​യാ​ൻ, വ​ഖ​ഫ് മ​ന്ത്രി വി. ​അ​ബ്ദു​റ​ഹ്മാ​ൻ എ​ന്നി​വ​രാ​ണ് ഈ ​യോ​ഗ​ത്തി​ൽ പ​ങ്കെ​ടു​ത്ത​ത്. നൂ​റു​ൽ ഹു​ദ യ​തീം​ഖാ​ന ക​മ്മി​റ്റി​യു​മാ​യി സം​സാ​രി​ച്ചി​രു​ന്നു​വെ​ന്നും ഭൂ​മി വി​ട്ടു​ന​ൽ​കു​ന്ന​തി​ൽ അ​വ​ർ​ക്ക് വി​യോ​ജി​പ്പി​ല്ലെ​ന്നു​മാ​ണ് മ​ന്ത്രി രാ​ധാ​കൃ​ഷ്ണ​ൻ യോ​ഗ​ത്തി​ൽ പ​റ​ഞ്ഞ​ത്.

എ​ന്നാ​ൽ, യ​തീം​ഖാ​ന ക​മ്മി​റ്റി​യു​മാ​യോ വ​ഖ​ഫ് ബോ​ർ​ഡു​മാ​യോ ച​ർ​ച്ച​ന​ട​ത്താ​തെ ഏ​ക​പ​ക്ഷീ​യ​മാ​യാ​യി​രു​ന്നു ന​ട​പ​ടി. ക​ലാ​മ​ണ്ഡ​ല​ത്തോ​ട് ചേ​ർ​ന്ന് അ​വ​രു​ടെ​ത​ന്നെ 50 ഏ​ക്ക​റോ​ളം സ്ഥ​ലം കാ​ടു​മൂ​ടി​ക്കി​ട​ക്കു​മ്പോ​ഴാ​ണ് അ​നാ​ഥ​മ​ക്ക​ളു​ടെ ഭൂ​മി​യി​ലേ​ക്ക് അ​ധി​കാ​രി​ക​ൾ അ​ധി​നി​വേ​ശം ന​ട​ത്താ​നൊ​രു​ങ്ങു​ന്ന​ത്.

മ​ന്ത്രി​മാ​ർ യോ​ഗം ചേ​ർ​ന്ന് ഏ​ക​പ​ക്ഷീ​യ​മാ​യി ഇ​ങ്ങ​നെ​യൊ​രു തീ​രു​മാ​ന​മെ​ടു​ത്ത​ത് പ​ത്ര​വാ​ർ​ത്ത​ക​ളി​ലൂ​ടെ​യാ​ണ് യ​തീം​ഖാ​ന അ​ധി​കൃ​ത​ർ അ​റി​യു​ന്ന​ത്. തു​ട​ർ​ന്ന് ക​ഴി​ഞ്ഞ ജ​നു​വ​രി 27ന് ​ക​ലാ​മ​ണ്ഡ​ലം സ​ർ​വ​ക​ലാ​ശാ​ല​യു​ടേ​താ​യി യ​തീം​ഖാ​ന സെ​ക്ര​ട്ട​റി​ക്ക് ഇ​തു​സം​ബ​ന്ധി​ച്ച് ക​ത്ത് ല​ഭി​ച്ചു.

ജ​നു​വ​രി 25ന് ​സ​ർ​വ​ക​ലാ​ശാ​ല ര​ജി​സ്ട്രാ​ർ അ​യ​ച്ച ക​ത്തി​ൽ കാ​മ്പ​സ് വി​പു​ലീ​ക​ര​ണ​ത്തി​ന് പ്രാ​ദേ​ശി​ക സ്ഥ​ല​ങ്ങ​ൾ പ​രി​ശോ​ധി​ച്ച​തി​ൽ യ​തീം​ഖാ​ന​യു​ടെ ഉ​ട​മ​സ്ഥ​ത​യി​ലു​ള്ള റ​ബ​ർ എ​സ്റ്റേ​റ്റ് ഏ​റ്റ​വും അ​നു​യോ​ജ്യ​മാ​ണെ​ന്ന് ക​ലാ​മ​ണ്ഡ​ലം ഭ​ര​ണ​സ​മി​തി​യും വൈ​സ് ചാ​ൻ​സ​ല​റും വി​ല​യി​രു​ത്തി​യി​ട്ടു​ണ്ടെ​ന്ന് വ്യ​ക്ത​മാ​ക്കു​ന്നു.

അ​തി​നാ​ൽ സ്ഥ​ലം ക​ലാ​മ​ണ്ഡ​ല​ത്തി​ന് കൈ​മാ​റു​ന്ന​തി​ന് ന​ട​പ​ടി ഉ​ണ്ടാ​ക​ണ​മെ​ന്നാ​ണ് ക​ത്തി​ൽ ആ​വ​ശ്യ​പ്പെ​ട്ട​ത്. വ​ഖ​ഫ് ബോ​ർ​ഡു​മാ​യി യ​തീം​ഖാ​ന അ​ധി​കൃ​ത​ർ ബ​ന്ധ​പ്പെ​ട്ട​പ്പോ​ൾ അ​വ​ർ​പോ​ലും ഈ ​വി​വ​രം അ​റി​ഞ്ഞി​രു​ന്നി​ല്ല.

ഇ​തി​നി​ട​യി​ൽ റ​വ​ന്യൂ ഉ​ദ്യോ​ഗ​സ്ഥ​ർ ചി​ല രേ​ഖ​ക​ൾ കൊ​ണ്ടു​പോ​യ​താ​യി ക​മ്മി​റ്റി​ക്ക് വി​വ​രം ല​ഭി​ച്ചു. യ​തീം​ഖാ​ന​യു​ടെ പ്ര​സി​ഡ​ന്റ് പാ​ണ​ക്കാ​ട് സാ​ദി​ഖ​ലി ത​ങ്ങ​ളു​മാ​യി വി​ഷ​യം ച​ർ​ച്ച​ചെ​യ്ത ക​മ്മി​റ്റി ഭൂ​മി ഏ​റ്റെ​ടു​ക്ക​ലി​ൽ തു​ട​ർ​ന​ട​പ​ടി​യു​ണ്ടാ​വു​ക​യാ​ണെ​ങ്കി​ൽ നി​യ​മ​പ​ര​മാ​യി നേ​രി​ടു​മെ​ന്ന് പ്ര​ഖ്യാ​പി​ച്ചു​ക​ഴി​ഞ്ഞു.

വ​ഖ​ഫ് സ്വ​ത്തു​ക്ക​ളു​മാ​യി ബ​ന്ധ​പ്പെ​ട്ട ചി​ല വി​ഷ​യ​ങ്ങ​ളി​ൽ ബോ​ർ​ഡു​മാ​യി​പോ​ലും ആ​ലോ​ചി​ക്കാ​തെ സ​ർ​ക്കാ​ർ​ത​ല​ത്തി​ൽ തീ​രു​മാ​ന​ങ്ങ​ളു​ണ്ടാ​കു​മ്പോ​ൾ മ​റ്റു​ചി​ല വി​ഷ​യ​ങ്ങ​ളി​ൽ ബോ​ർ​ഡ് കാ​ര്യ​ക്ഷ​മ​മാ​യി ഇ​ട​പെ​ടു​ന്നി​ല്ലെ​ന്നും ആ​ക്ഷേ​പ​മു​ണ്ട്.

ബോ​ർ​ഡി​ലെ ഭൂ​രി​ഭാ​ഗം അം​ഗ​ങ്ങ​ളും സ​ർ​ക്കാ​ർ അ​നു​കൂ​ലി​ക​ളാ​ണെ​ന്ന​തി​നാ​ൽ മ​റ്റ് അം​ഗ​ങ്ങ​ളു​ടെ വി​യോ​ജി​പ്പു​ക​ളും ത​ട​സ്സ​വാ​ദ​ങ്ങ​ളും പ​രി​ഗ​ണി​ക്കാ​റു​മി​ല്ല. എ​റ​ണാ​കു​ള​ത്ത് ചെ​റാ​യി ബീ​ച്ചി​ൽ ഫാ​റൂ​ഖ് കോ​ള​ജി​നാ​യി വ​ഖ​ഫ് ചെ​യ്ത 404.76 ഏ​ക്ക​ർ ഭൂ​മി​യി​ലെ കൈ​യേ​റ്റ​ങ്ങ​ൾ​ക്ക് ഔ​ദ്യോ​ഗി​ക അം​ഗീ​കാ​രം ന​ൽ​കാ​നു​ള്ള നീ​ക്കം ഇ​ങ്ങ​നെ രൂ​പ​പ്പെ​ട്ട​താ​ണ്. അ​തേ​ക്കു​റി​ച്ച് നാ​ളെ.