പഠിക്കണം, സമയത്തെ കരവലയത്തിലൊതുക്കാൻ

ഉന്നത വിജയം നേടിയ ഒരുപാടു പേരെ നമുക്ക്​ ചുറ്റും കാണാൻ കഴിയും. അവരെ നിരീക്ഷിച്ചാൽ പൊതുവായി കാണുന്ന ഒരു കാര്യം, പ്രഭാതങ്ങളെ ആ ദിവസ​ത്തേക്കുള്ള തയാറെടുപ്പിനായി അവർ ഫലപ്രദമായി വിനിയോഗിക്കുന്നു എന്നതാണ്​. അന്നന്ന്​ ചെയ്തുതീർക്കേണ്ട കാര്യങ്ങളെ കുറിച്ചും അതിന്‍റെ സമയക്രമത്തെ കുറിച്ചും കൃത്യമായ കുറിപ്പുകൾ അവർ തയാറാക്കും

പരീക്ഷയുടെ പടിവാതിൽക്കൽ നിൽക്കുന്ന കൂട്ടുകാരെ കേന്ദ്രീകരിച്ചാണ് ഈ കുറിപ്പും. പഠിക്കാനുള്ള വഴികളും തന്ത്രങ്ങളും നാം മനസ്സിലാക്കിക്കഴിഞ്ഞു. ഇനി പഠനം സുസാധ്യമാക്കുന്ന ജീവിതക്രമം തീരുമാനിക്കാം. നമുക്കെല്ലാവർക്കുമുള്ളത്​ 24 മണിക്കൂറാണ്​. നമ്മെപ്പോലെ ആൽബർട്ട്​ ഐൻസ്റ്റൈനും 24 മണിക്കൂർ മാത്രമേ ഒരു ദിവസത്തിൽ ഉണ്ടായിരുന്നുള്ളൂ. അദ്ദേഹം തനിക്ക്​ ലഭിച്ച സമയം കൃത്യമായി വിനിയോഗിച്ച്​ ആപേക്ഷിക സിദ്ധാന്തം കണ്ടെത്തി ലോകത്തെ വിസ്മയിപ്പിക്കുകയുണ്ടായി. നാമാകട്ടെ, ലോകം ശ്രദ്ധിക്കുന്ന ഏറ്റവും ചെറിയ ഒരു മൗലിക സംഭാവന പോലും നൽകാൻ അശക്തരായി നിൽക്കുന്നു.

പ്രതിഭയിലെ വിടവ്​ മാത്രമല്ല; ഒരാൾ തന്‍റെ സമയത്തെ എങ്ങനെ വിനിയോഗിച്ചു എന്നതിന്‍റെ കൂടി തെളിവാണ​ത്​. ക്ഷണികമായ ഈ ലോകത്ത്​ നാം നമ്മുടെ സമയം എങ്ങനെ ചെലവഴിച്ചു എന്ന്​ ആലോചിച്ചുനോക്കുന്നത്​ നന്നാകും. വർഷങ്ങളോളം കാര്യമായി ഒന്നും ചെയ്യാതെ ടി.വി കണ്ടും മൊബൈൽ നോക്കിയും ഉറങ്ങിയും സമയം കളയുന്ന ഒട്ടേറെ പേരുണ്ട്​. അമേരിക്ക​ൻ ചെറുകഥയിലെ റിപ്​ വാൻ വിംഗ്​ൾ 20 വർഷമാണ്​ ഉറങ്ങിപ്പോയത്​. അങ്ങനെ ജീവിതം ഉറങ്ങിത്തീർക്കാൻ ആരെക്കൊണ്ടും സാധിക്കും. സദാ വിനോദങ്ങളിൽ മുഴുകിയോ കിട്ടുന്ന സമയത്തെല്ലാം മറ്റുള്ളവരുമായി സല്ലപിച്ചോ സമയം കൊല്ലുന്നവരുമുണ്ട്​.

ഇങ്ങനെയുള്ള സംസാരങ്ങൾ ഒട്ടും സൃഷ്ടിപരമാകണമെന്നില്ല. ഒരു ദിവസത്തിന്‍റെ ആയുസ്സ്​ പോലുമില്ലാത്ത കാര്യങ്ങളാകും അത്​ ബാക്കിവെക്കുക. ‘‘അന്ന്​ ഞാൻ വായിച്ചിരുന്നേൽ, അന്ന്​ ഞാൻ പഠിച്ചിരുന്നേൽ ഇന്ന്​ ഈ അവസ്ഥ ഉണ്ടാകുമായിരുന്നില്ല’’ എന്നു​ പറഞ്ഞ്,​ പാഴായ സമയത്തെ ഓർത്ത്​​ വിലപിക്കുന്നവരെ ഏറെ കണ്ടിട്ടുണ്ട്​.

ബസ്​ പുറപ്പെട്ടപ്പോൾ അതിൽ കയറിയില്ലെന്ന്​ മാത്രമല്ല, പിന്നെയും പിന്നെയും വന്ന ബസുകളിലും കയറാൻ കൂട്ടാക്കാതെ, വഴിവക്കിലിരുന്ന്,​ കാഴ്ചകൾ കണ്ടും രസിച്ചും ചെറിയ കുന്നായ്മകളും പരദൂഷണങ്ങളും പറഞ്ഞും​ സമയം കളയുകയായിരുന്നു അവർ. ഈ പരീക്ഷക്കാലത്ത്​ ഇത്തരത്തിലെ വെറും വർത്തമാനങ്ങൾക്ക്​ സമയം കളയരുത്​ ഒരാളും.

ഒരു വിദ്യാർഥിയെ സംബന്ധിച്ചിടത്തോളം അതിരാവിലെ എഴുന്നേൽക്കുക എന്നത്​ ഏറെ പ്രധാനമാണ്​. പഠനാവധി കാലത്ത്​ വിശേഷിച്ചും. അതിരാവിലെ എഴുന്നേറ്റ്​ പ്രാർഥനയും പ്രഭാതകൃത്യങ്ങളും വ്യായാമവുമെല്ലാം നിർവഹിച്ച്​ തെളിഞ്ഞ മനസ്സോടെ വായനയിലേക്ക്​ കടക്കുക. ഒരുപാട്​ സമയം രാവിലെ ലഭിക്കും. ശാന്തസുന്ദരമായ പ്രഭാതത്തിൽ ചെയ്യുന്ന കാര്യങ്ങളുടെ തെളിമ മറ്റൊരു സമയത്തിനും ലഭിക്കില്ല എന്നത്​ പല വിജയികളുടെയും അനുഭവസാക്ഷ്യമാണ്​.

തുടർച്ചയായി രണ്ടോ മൂന്നോ മണിക്കൂറിലധികം ഒരു കാര്യത്തിൽ താൽപര്യവും ജിജ്ഞാസയും നിലനിർത്താൻ ഒരു മനുഷ്യന്​ സാധിക്കില്ല എന്നാണ്​ പഠനങ്ങൾ പറയുന്നത്​. അത്​ വിദ്യാർഥികൾക്കും ബാധകമാണല്ലോ. അതിനാൽ പഠനത്തിനിടയിലുള്ള ഇടവേളകളിൽ എന്തെങ്കിലും വിനോദങ്ങളിൽ ഏ​ർപ്പെടുക, ഒരൽപം നടക്കുക, അല്ലെങ്കിൽ വീട്ടുകാരോട്​ സംസാരിക്കുക, പാട്ട്​ കേൾക്കുക... അങ്ങനെ തുടങ്ങി നമുക്ക്​ ഇഷ്ടമുള്ള കാര്യങ്ങളിൽ ഒരൽപനേരം വ്യാപൃതരാകാവുന്നതാണ്​. വീണ്ടും വായനയിലേക്ക്​ കടന്ന്​ ഏതാനും മണിക്കൂറുകൾ കഴിഞ്ഞാൽ ഊണിന് സമയമായി.​ ശേഷം ഒരൽപം മയക്കം വേണമെന്ന്​ ചിന്തിക്കുന്നവരുണ്ട്​. ഉറങ്ങിയാലും ഇല്ലെങ്കിലും ഒരൽപ നേരം വിശ്രമം ആകാവുന്നതാണ്​. പിന്നീടുള്ള സമയം ആ ദിവസം വായിച്ച ഭാഗങ്ങളിലൂടെ ഒന്നുകൂടി കണ്ണോടിക്കാൻ ഉപയോഗപ്പെടുത്തുക.

സായാഹ്നവേളയിൽ പഠനം വേണ്ട എന്ന്​ വെക്കുക. കായിക വിനോദങ്ങൾക്കും വ്യായാമങ്ങൾക്കും സമയം കണ്ടെത്തണം. ശരീരം സുസ്ഥിതി പ്രാപിച്ചാലേ മനസ്സും പൂർണതയുള്ളതാകൂ. ഓഫിസുകളിൽ ഇത്തരം കായിക വിനോദങ്ങൾക്ക്​ അവസരം ഇല്ലാത്തതിന്‍റെ പ്രശ്നങ്ങൾ ഞങ്ങൾ ഉദ്യോഗസ്ഥന്മാരിൽ ഉണ്ടാവാറുണ്ട്​. അതുകൊണ്ടാണ്​ ചില ഓഫിസുകളിൽ ജിമ്മുകളും മറ്റും സജ്ജമാക്കിയത്​. ദൗർഭാഗ്യവശാൽ എനിക്ക്​ അത്​ ഉപയോഗപ്പെടുത്താനും സാധിക്കുന്നില്ല.

കായിക വിനോദങ്ങൾക്കുശേഷം കുളിയും കഴിഞ്ഞ്​ പ്രാർഥനക്കുശേഷം രാത്രിഭക്ഷണം വരെയുള്ള സമയം​, ഏറെ ഗുണകരമായ വേളയാണ്​​​. ഒരു നിമിഷവും പാഴാക്കാതെ ഈ സമയം ഉപയോഗപ്പെടുത്തുക. ഭക്ഷണശേഷമുള്ള സമയം, ആ ദിവസത്തെ പഠനത്തെ കൂട്ടിയോജിപ്പിക്കാനുള്ള അവസരമാണ്​​. ആ ദിവസം പഠിച്ചവയെല്ലാം ഒന്ന്​ ഓർത്തെടുക്കാൻ ശ്രമിക്കുക. മനസ്സിൽ വരാത്തവ ഏതൊക്കെയെന്ന്​ കണ്ടെത്തി പരിഹരിച്ചു​വേണം ആ പ്രക്രിയ അവസാനിപ്പിക്കാൻ. അധികം വൈകാതെ ഉറങ്ങാൻ ശ്രമിക്കുക. ശാന്തമായ മനസ്സോടെ ശയനവിരിപ്പിലേക്ക്​ പ്രവേശിക്കുക.

ഇതൊരു നിയതമായ തത്ത്വമൊന്നുമല്ല. പരീക്ഷിക്കാൻ എളുപ്പമായ ഒരു വഴിയെന്നു​ മാത്രം. പകൽ മുഴുവൻ ഉറങ്ങി, രാത്രി മാത്രം പഠിച്ച്​ പരീക്ഷയെഴുതി ഉന്നത വിജയം നേടിയവരുമുണ്ട്​ എന്‍റെ പരിചയത്തിൽ. അങ്ങനെ സിവിൽ സർവിസും സ്വന്തമാക്കി​ കേരളത്തിന്‍റെ ചീഫ്​ സെക്രട്ടറിയായ ശേഷം സാംസ്കാരിക രംഗത്ത്​ തിളക്കത്തോടെ തുടരുകയും ചെയ്യുന്ന വ്യക്തിത്വങ്ങളെ ഓർത്താണ്​ ഞാനിത്​ പയുന്നത്​.

പുതുമയാർന്ന മനസ്സോടെ ഉണരാൻ ശ്രമിക്കുക. കഴിവതും ക്ഷുദ്രചിന്തകളിൽനിന്നും നെഗറ്റിവ്​ വർത്തമാനങ്ങളിൽനിന്നും മാറിനിൽക്കാൻ ശ്രമിക്കുക​, പരീക്ഷക്കാലത്ത്​ വിശേഷിച്ചും. മാർച്ച്​ മാസത്തെ പരീക്ഷയിൽ അവസാനിക്കേണ്ടതല്ല ഈ ചിട്ടകൾ. വർഷങ്ങൾ കഴിഞ്ഞ്​ നമ്മെ ഏറ്റവും മികച്ച അവസ്ഥയിൽ എത്തിക്കാൻ സമയം ശാസ്ത്രീയമായി ക്രമീകരിക്കുന്ന ഈ രീതി ഉപകരിക്കും. ഉന്നത വിജയം നേടിയ ഒരുപാടു പേരെ നമുക്ക്​ ചുറ്റും കാണാൻ കഴിയും.

അവരെ നിരീക്ഷിച്ചാൽ പൊതുവായി കാണുന്ന ഒരു കാര്യം, പ്രഭാതങ്ങളെ ആ ദിവസ​ത്തേക്കുള്ള തയാറെടുപ്പിനായി അവർ ഫലപ്രദമായി വിനിയോഗിക്കുന്നു എന്നതാണ്​. അന്നന്ന്​ ചെയ്തുതീർക്കേണ്ട കാര്യങ്ങളെ കുറിച്ചും അതിന്‍റെ സമയക്രമത്തെ കുറിച്ചും കൃത്യമായ കുറിപ്പുകൾ അവർ തയാറാക്കും. സന്തുലിതമായ, ആസൂത്രണത്തോടെയുള്ള ഒരു ജീവിതക്രമം രൂപപ്പെടുത്തിയെടുക്കുക എന്നത്​ വിജയത്തിന്‍റെ മുന്നുപാധിയാണ്​ എന്നാണ്​ പറഞ്ഞുവന്നതിന്‍റെ ചുരുക്കം.

ലോകപ്രശസ്ത യൂറോപ്യൻ സംഗീതജ്ഞൻ മൊസാർട്ടിന്‍റെ വാക്കുകൾ ഇങ്ങനെ: നിരവധി കാര്യങ്ങൾ എളുപ്പം ചെയ്തുതീർക്കാനുള്ള വഴി എന്തെന്നാൽ ഒരു സമയം ഒരു കാര്യം മാത്രം ചെയ്യുക എന്നതാണ്​.