സിസ്റ്റം പിഴച്ചത്​ ആരുടെ പരാജയമാണ്​?

വികസിത നവകേരളത്തെക്കുറിച്ച അതിരുവിട്ട അവകാശവാദങ്ങളുടെ പുരപ്പുറത്തുകയറി മനുഷ്യപ്പറ്റും സത്യസന്ധതയുമുള്ള ഒരു ഭിഷഗ്വരൻ ഉറക്കെ നിലവിളിക്കുന്നു, നമ്മുടെ ആതുരസേവനമേഖല ഐ.സി.യുവിലാണെന്ന്​​. പൊതുജനാരോഗ്യ സംവിധാനങ്ങൾക്ക്​ നീക്കിവെച്ച ആയിരം കോടികളെക്കുറിച്ച്​ വകുപ്പു​മന്ത്രി നൂറുനാവിൽ സംസാരിക്കുമ്പോൾ അവരുടെ മൂക്കിൻതുമ്പത്ത്​ തലസ്ഥാനനഗരിയിലെ മികവിന്‍റെ കേന്ദ്രമായി പുകൾപെറ്റ സർക്കാർ മെഡിക്കൽകോളജിൽ ശസ്ത്രക്രിയ ഉപകരണങ്ങൾക്കുവേണ്ടി ഇനി ജനത്തോട്​ ഇരക്കാനാവില്ലെന്ന്​ സാമൂഹികപ്രതിബദ്ധതയുള്ള ആ വകുപ്പുമേധാവി കരഞ്ഞുപറയുന്നു.

ഗുരുതര രോഗം ബാധിച്ച്​ അവശരായി ചികിത്സക്കുവേണ്ടി കടം വാങ്ങിയും ഉള്ളത്​ ഈടു നൽകി വായ്പയെടുത്തും ഓടിയെത്തുന്ന രോഗികൾ, ബന്ധുക്കൾ ഉപേക്ഷിച്ച അനാഥർ, ഭിക്ഷയെടുത്തും ലോട്ടറി ടിക്കറ്റ്​ വിറ്റും അഷ്ടിക്കു വക​കണ്ടെത്തുന്നവർ, ഉപജീവനമാർഗം ഉപേക്ഷിച്ച്​ ആഴ്ചകളോളം അവർക്കു കൂട്ടിരിക്കാനെത്തുന്ന പാവ​പ്പെട്ട ബന്ധുക്കൾ, കൂടെ നിൽക്കാൻ ബന്ധുക്കളെ കിട്ടാതെ കൂലിക്ക്​ ആളെ വെക്കുന്നവർ എന്നിങ്ങനെ ദാരിദ്ര്യത്തിന്‍റെയും ദൈന്യതയുടെയും കണ്ണീർക്കാഴ്ചകൾ ഒരു ഭാഗത്ത്​. മറുഭാഗത്തോ, ചികിത്സിക്കാൻ സർവഥാ സന്നദ്ധരായ ഡോക്ടർമാർക്കു മുന്നിൽ അനങ്ങാപ്പാറയായി നിൽക്കുന്ന ബ്യൂറോക്രസി. ശസ്ത്രക്രിയ മുടങ്ങു​മെന്നറിയുമ്പോഴും മാസങ്ങൾ പിന്നിട്ട ഉപകരണങ്ങൾക്കുള്ള അപേക്ഷകൾ കുരുക്കഴിക്കാനാവാത്ത ചുവപ്പുനാടയിൽ കെട്ടിക്കുടുക്കുന്ന ഉദ്യോഗസ്ഥലോബി, മന്ത്രിയാപ്പീസിൽ വരെ പറഞ്ഞിട്ടും ചുടലയിൽ ചെന്നു വിളിച്ചാലുള്ള നിസ്സംഗത, ശസ്ത്രക്രിയക്കു വരുന്ന രോഗികളിൽനിന്നും ബന്ധുക്കളിൽനിന്നും പിരിവെടുത്ത്​ ഉപകരണം വാങ്ങേണ്ടി വരുന്ന ദുഃസ്ഥിതി, അങ്ങനെ ഇരന്നുവാങ്ങിയതുകൊണ്ട്​ നടത്തുന്ന ശസ്​ത്രക്രിയകളുടെ എണ്ണം എടുത്തുകാട്ടി സ്വന്തം വീഴ്ചക്കു മറപിടിക്കുന്ന അധികൃതർ. ഈ ദുരവസ്ഥയുടെ ഇടയിൽ പെട്ടുപോയ നിസ്സഹായരായ സത്യസന്ധരുടെ ഹൃദയം നുറുങ്ങിയ വേദനയാണ്​ ​തിരുവനന്തപുരം മെഡിക്കൽകോളജ്​ യൂറോളജി വിഭാഗം മേധാവി ഡോ. ഹാരിസ്​ ചിറയ്ക്കലിന്‍റെ പൊട്ടിത്തെറിയായി കലാശിച്ചത്​.

വൈദ്യചികിത്സ ഉപകരണങ്ങൾക്കു വേണ്ടി ഔദ്യോഗികസംവിധാനങ്ങളിൽ കയറിയിറങ്ങി ചെരിപ്പു തേഞ്ഞ വകുപ്പുമേധാവി ഒരാളല്ല എന്നും അധികൃതരുടെ പിടിപ്പുകേടിന്​ പാവപ്പെട്ട രോഗികൾ പണപ്പിരിവിലൂടെ പി​ഴയൊടുക്കേണ്ടി വരുന്നത്​ ഉത്തർപ്ര​​ദേശിലെ യോഗി ആദിത്യനാഥ്​ ഭരണത്തിലല്ല, സുന്ദര സുരഭില നവകേരളത്തിന്‍റെ രണ്ടാം എഡിഷന്‍റെ പൂർത്തീകരണത്തിലേക്കു നീങ്ങുന്ന ഇടതു ജനാധിപത്യമുന്നണി സർക്കാറിനു കീഴിലാണ്​ എന്നു തിരിച്ചറിയണം.

തിരുവനന്തപുരത്തുനിന്നു ഡോ. ഹാരിസ്​ വിസിൽ ബ്ലോവറായി അനാവരണം ചെയ്തത്​ നമ്മുടെ സർക്കാർ ​മെഡിക്കൽകോളജുകളുടെയും അതിന്‍റെ തലപ്പത്തുള്ള ആരോഗ്യവകുപ്പിന്‍റെയും രോഗാതുരതയാണ്​. ഉത്തർപ്രദേശിൽ കുഞ്ഞുങ്ങൾ ശ്വാസമെടുക്കാനാവാ​തെ മരണത്തിലേക്കു പിടയുന്നതു കാണാനാവാതെ സ്വയംസേവനത്തിന്​ സന്നദ്ധനായതിന്​ ​കഫീൽഖാൻ എന്ന ​ശിശുരോഗവിദഗ്​ധന്​ ഒടുക്കേണ്ടി വന്ന പിഴ അദ്ദേഹത്തിന്‍റെ സർവിസ്​ മാത്രമല്ല, സ്വസ്ഥമായ ജീവിതംതന്നെയാണ്​. എന്തിന്​ ഓവർസ്മാർട്ടാവുന്നു എന്നായിരുന്നു സഹപ്രവർത്തകരുടെ ഗുണദോഷം.

ഇവിടെ അടിയന്തരാവശ്യങ്ങളുമായി വകുപ്പുമേധാവികളെ കാണുമ്പോൾ ഡോ. ഹാരിസ്​ നേരിട്ട ചോദ്യവും ഉള്ളതുമായി ഒത്തൊപ്പിച്ചു പോയാൽ പോരേ എന്നാണ്​. അതിനു മനഃസാക്ഷിയെ വഴക്കിയെടുക്കാനാവാതെയാണ്​ അദ്ദേഹം സമൂഹമാധ്യമത്തിൽ വെളിപ്പെടുത്തലുമായി വരുന്നത്​. അന്നുവരെ ചോദ്യങ്ങൾക്കൊന്നും മറുപടി തരാതിരുന്നവർ പക്ഷേ, തുറന്നുപറച്ചിലോടെ സടകുട​ഞ്ഞെണീറ്റു, പറഞ്ഞതിലെ അനൗചിത്യത്തിനു നേരെ വിരൽ ചൂണ്ടി. സമൂഹമാധ്യമ പോസ്റ്റ്​ പിൻവലിക്കാൻ തിടുക്കം കൂട്ടി. ഭരണമുന്നണിയുടെ അനുഭാവത്തണലുള്ളതുകൊണ്ടു കഫീൽഖാ​ന്‍റെ ദുരനുഭവങ്ങളിലേക്ക്​ കടക്കാതെ ഡോക്ടർ രക്ഷപ്പെട്ടേക്കാം.

എന്തായാലും ​അദ്ദേഹം വെളിപ്പെടുത്തിയ ഗുരുതരവിഷയങ്ങളിൽനിന്ന്​ തലയൂരാൻ പിണറായി വിജയൻ സർക്കാറിനു പൊടുന്നനെ കഴിയില്ല. വൈദ്യവിദ്യാഭ്യാസ സ്ഥാപനങ്ങളിൽ മികവിൽ 24 ാം സ്ഥാനത്തുള്ള തിരുവനന്തപുരം മെഡി.കോളജ് അപൂർവരോഗചികിത്സയിൽ മികവു പുലർത്തിയ രാജ്യത്തെ 11 സ്ഥാപനങ്ങളിൽ ഒന്നാണ്​. ആ സ്ഥാപനത്തെയാണ്​ മൂത്രാശയക്കല്ല്​ പൊടിക്കാനുള്ള പ്രോബ്​ ഇല്ലാത്തതിനാൽ ശസ്ത്രക്രിയ മുടങ്ങുന്ന, മസ്തിഷ്ക മരണം സംഭവിച്ച വ്യക്തിയുടെ വൃക്ക ഏറ്റുവാങ്ങാൻ ആളില്ലാത്തതിനാൽ ആശുപത്രി ഇടനാഴിയിൽ ആംബുലൻസ്​ ഡ്രൈവർക്ക്​ കാത്തിരിക്കേണ്ടി വരുന്ന അപഖ്യാതിയിലെത്തിച്ചിരിക്കുന്നത്​.

അതിഗുരുതര വിഷയമായി ആരോഗ്യമന്ത്രിയുടെ ആപ്പീസിൽ അറിയിച്ചിട്ടും ‘ശ്രദ്ധയിൽ​ പെട്ടില്ല’ എന്ന ചട്ടപ്പടി മറുപടിയായിരുന്നു മന്ത്രിയുടെ ആദ്യപ്രതികരണം. എന്നാൽ, ഇപ്പോൾ മന്ത്രിപറയുന്നു, എല്ലാം സിസ്റ്റത്തിന്‍റെ പ്രശ്നമാണ്​ എന്ന്​. എങ്കിൽ സിസ്റ്റത്തിന്‍റെ കുഴപ്പത്തിന്​ ഉത്തരവാദി ആരാണ്​, അതിനെ നിയന്ത്രിക്കുന്ന വകുപ്പുമന്ത്രിയും സർക്കാറുമല്ലാ​തെ? തലസ്ഥാനത്തെ മെഡിക്കൽ കോളജിൽ ആറുമാസ​ത്തിലേറെ ശസ്ത്രക്രിയ വൈകുന്നതും അത്യാവശ്യ ഉപകരണങ്ങൾക്ക്​ അനുമതികിട്ടാതെ വകുപ്പുമേധാവിയുടെ ചെരിപ്പുതേയുന്നതും മന്ത്രിയാപ്പീസിന്‍റെ കൂടി തോൽവിയല്ലെങ്കിൽ പിന്നെയെന്താണ്​?

പദ്ധതിവിഹിതം വെട്ടിക്കുറക്കുന്നതും ഭരണാനുമതി നൽകിയ കോടികൾ ആവശ്യത്തിനു ബന്ധപ്പെട്ടവരിലെത്താൻ വൈകുന്നതും സർക്കാറിന്‍റെ പിടിപ്പുകേടല്ലേ? ഉള്ള സൗകര്യങ്ങളും സംവിധാനങ്ങളും ചുവപ്പുനാടയിൽ കുരുക്കിയിടുന്ന ഉദ്യോഗസ്ഥമിടുക്കിനു വളംവെക്കുന്നത്​ മന്ത്രിയുടെ വകുപ്പല്ലേ? അതൊന്നും ശരിയാക്കാനാവില്ലെങ്കിൽ പിന്നെ സിസ്റ്റം അതേപടി തുടരുമെന്നാണോ? എങ്കിൽപിന്നെ മാറ്റത്തിനു മറുവഴി തേടേണ്ടത്​ ജനങ്ങളാണ്​.