ഭരണഘടനയുടെ അന്തസ്സത്ത കാത്ത കോടതിവിധി

കഴിഞ്ഞ ദിവസം, 1949 നവംബർ 26ന്​ കോൺസ്​റ്റിറ്റ്യുവൻറ്​ അസംബ്ലി ഇന്ത്യൻ ഭരണഘടന അംഗീകരിച്ചതി​​െൻറ എഴുപതാം വാർഷികം രാജ്യം ആചരിക്കെ ഭരണഘടനയുടെ അന്തസ്സത്തയും ചൈതന്യവും വാനോളം ഉയർത്തിപ്പിടിക്കുന്ന ഒരുവിധി പരമോന്നത കോടതിയു ടെ ഭാഗത്തുനിന്നുണ്ടായത്​ ഒര​ുവേള യാദൃച്ഛികമെന്ന്​ തോന്നാമെങ്കിലും ഇന്നത്തെ സാഹചര്യത്തിൽ തീർത്തും അഭിമാനക രവും ആശ്വാസകരവുമായിരിക്കുന്നുവെന്ന്​ ഉറക്കെ പറയാതെ വയ്യ. നരേന്ദ്ര മോദിയുടെ നേതൃത്വത്തിൽ തീവ്രഹിന്ദുത്വ സം ഘം രാജ്യത്തി​​െൻറ അധികാരം കൈയടക്കിയതിൽപിന്നെ സ്വീകരിച്ച ഓരോ നടപടിയും ഭരണഘടനയെ നോക്കുകുത്തിയാക്കു​ന്നതോ കടന്നാക്രമിക്കുന്നതോ ആയിരുന്നുവെന്ന്​ ചൂണ്ടിക്കാട്ടാൻ പ്രേരിപ്പിക്കുന്ന വിധത്തിലായിരുന്നു സംഭവങ്ങളുടെ ഗ തി.

ഭരണഘടനയുടെ അടിത്തറകളായ ജനാധിപത്യത്തോടും മതനിരപേക്ഷതയോടും സർക്കാറിന്​ ഒട്ടുമേ പ്രതിബദ്ധതയി​ല്ലെന്ന്​ വിളിച്ചോതുന്ന നിയമനിർമാണങ്ങളാണ്​ നടത്തിക്കൊണ്ടിരുന്നത്​. ഇക്കൊല്ലം തീവ്രഹിന്ദുത്വ സർക്കാറിന്​ ഭരണത്തി​​െൻറ രണ്ടാമൂഴം പൂർവാധികം ഭൂരിപക്ഷത്തോടെ പിടിച്ചെടുക്കാനും പ്രതിപക്ഷത്തെ നിർവീര്യമാക്കാനും കഴിഞ്ഞതിൽപിന്നെ ഭരണഘടനയുടെതന്നെ 370ാം വകുപ്പ്​ റദ്ദാക്കി ജമ്മു-കശ്​മീരിലെ പൗരസ്വാതന്ത്ര്യങ്ങൾ നിഷേധിച്ച്​ കേന്ദ്രഭരണ പ്രദേശമായി പ്രഖ്യാപിക്കുന്ന രാഷ്​ട്രപതിയുടെ വിളംബരത്തിലൂടെ ആയിരുന്നു തുടക്കം. ഇതു ചോദ്യംചെയ്യുന്ന ഹരജികൾ ഇപ്പോഴും സുപ്രീംകോടതിയുടെ പരിഗണനയിലിരിക്കുകയാണ്​, ആയിരക്കണക്കിന്​ രാഷ്​ട്രീയ സാമൂഹിക പ്രവർത്തകർ തടങ്കൽപാളയത്തിൽ അനിശ്ചിതമായി തുടരുകയും ചെയ്യുന്നു. ഒരു പ്രത്യേക മതസമുദായത്തിന്​ പൗരത്വം നിഷേധിക്കുന്ന ബിൽ പാർലമ​െൻറിൽ അവതരിപ്പിക്കാൻ പോവുകയാണെന്ന്​ ആഭ്യന്തര മന്ത്രി പ്രഖ്യാപിക്കുന്നു.

നാനാത്വത്തിൽ ഏകത്വം എന്ന ഇന്ത്യയുടെ മൗലികമായ ബഹുസ്വര ഭാവംതന്നെ അട്ടിമറിക്കുന്ന ഏകസിവിൽ കോഡും നിയമനിർമാണത്തി​​െൻറ മൂശയിൽ രൂപംകൊ ള്ളുന്നു. ഇതിനിടെയാണ്​ ഇലക്​ഷൻ കമീഷ​ൻ, ഗവർണർ പദവി, റിസർവ്​ ബാങ്ക്​ മുതലായ സുപ്രധാന ഭരണഘടന സ്​ഥാപനങ്ങളെ മുച്ചൂടും കാവിവത്​കരിക്കാനുള്ള സഫലയത്​നങ്ങൾ നടന്നത്​. ഒപ്പം ജുഡീഷ്യറിപോലും സമ്മർദത്തിനടിപ്പെടുകയോ സ്വാധീനിക്കപ്പെടുകയോ ചെയ്യുന്നു എന്ന മുന്നറിയിപ്പും പ്രശസ്​തരായ ഭരണഘടനാ വിദഗ്​ധരുടെ ഭാഗത്തുനിന്നുണ്ടായി. ബാബരി മസ്​ജിദ്​ ഭൂമിത്തർക്കത്തിലെ സുപ്രീംകോടത​ി വിധി അതിനെ സാധൂകരിക്കുകയും ചെയ്​തു. വസ്​തുതകളേക്കാൾ വിശ്വാസത്തിന്​ പരിഗണന നൽകിയ അന്തിമവിധി ഒ​ട്ടേറെ സങ്കീർണ നിയമപ്രശ്​നങ്ങൾക്ക്​ വഴിവെക്കുമെന്ന ആശങ്കയാണ്​ നിയമവിദഗ്​ധർ പങ്കുവെക്കുന്നത്​.

അതിനിടെയാണ്​ മഹാരാഷ്​ട്രയിൽ ശിവസേനയോടൊപ്പം നിയമസഭ തെരഞ്ഞെടുപ്പിനെ നേരിട്ട ബി.ജെ.പി ബഹുഭൂരിപക്ഷത്തോടെ ജയിച്ച്​ അധികാരത്തിൽ തുടരുമെന്ന്​ പ്രതീക്ഷിച്ചിരിക്കെ മുഖ്യമന്ത്രിപദത്തെച്ചൊല്ലി ശിവസേന പിണങ്ങിപ്പിരിയുന്നതും അനുരഞ്​ജന ശ്രമങ്ങളെ മുഴുവൻ നിഷ്​ഫലമാക്കി പ്രതിപക്ഷത്തോടൊപ്പം ചേർന്ന്​ മന്ത്രിസഭയുണ്ടാക്കാൻ ഇറങ്ങിത്തിരിക്കുന്നതും. ഓർക്കാപ്പുറത്തെ തിരിച്ചടിയിൽ സമചിത്തത നഷ്​ടപ്പെട്ട മോദി-അമിത്​ ഷാ ടീമി​​െൻറ നിർദേശപ്രകാരമായിരുന്നു മഹാരാഷ്​ട്ര മുഖ്യമന്ത്രി ദേവേന്ദ്ര ഫഡ്​നാവിസി​​െൻറ ചടുലനീക്കങ്ങൾ. അജിത്​ പവാറി​​െൻറ ​േനതൃത്വത്തിൽ എൻ.സി.പിയെ പിളർത്തി മന്ത്രിസഭ രൂപവത്​കരിക്കാനുള്ള ഗൂഢാലോചനയുടെ ഭാഗമായി ഗവർണർ ഭഗത്​സിങ്​ കോശിയാരി പിന്നീട്​ കളിച്ചതൊക്കെ കൂരിരുട്ടിലെ കളികളാണ്​.

അർധരാത്രിതന്നെ രാഷ്​ട്രപതി ഭരണം പിൻവലിച്ചതോടൊപ്പം ദേവേന്ദ്ര ഫഡ്​നാവിസിന്​ മുഖ്യമന്ത്രിയായും കാലുമാറിയെത്തിയ അജിത്​ പവാറിന്​ ഉപമുഖ്യമന്ത്രിയായും ഗവർണർ പ്രതിജ്​ഞ ചൊല്ലിക്കൊടുത്തപ്പോൾ ജസ്​റ്റിസ്​ സാവന്തി​​െൻറ വാക്കുകളിൽ ‘നവംബർ 22ന്​ രാത്രിയിലും 23ന്​ പുലർച്ചയുമായി നടന്ന സംഭവങ്ങളാകെ രാഷ്​ട്രീയമായ തെമ്മാടിത്തവും സാമൂഹികമായ തോന്ന്യവാസവും’ ആയിരുന്നു. പ്രമാദമായ ബൊമ്മെ കേസിൽ രാജ്ഭവനിലല്ല, നിയമസഭാ ഹാളിലാണ്​ ഭൂരിപക്ഷം തെളിയിക്കേണ്ടതെന്ന പരമോന്നത കോടതിവിധി പുറപ്പെടുവിച്ച ന്യായാധിപനാണ്​ ജസ്​റ്റിസ്​ സാവന്ത്​ എന്നോർക്കണം. സ്വാഭാവികമായും മഹാരാഷ്​ട്ര ഗവർണറുടെ തീരുമാനം സുപ്രീംകോടതിയിൽ ചോദ്യം ചെയ്യപ്പെട്ടപ്പോൾ ബി.ജെ.പിയുടെ എല്ലാ അവകാശവാദങ്ങളും തള്ളിയ മൂന്നംഗ ബെഞ്ച്​, ബുധനാഴ്​ച വൈകീട്ട്​ അഞ്ചുമണിക്ക്​ മുമ്പായി നിയമസഭ വിളിച്ചുചേർത്ത്​ ഫഡ്​നാവിസ്​ ഭൂരിപക്ഷം തെളിയിക്കണമെന്നും വോ​​ട്ടെടുപ്പ്​ പരസ്യമായിരിക്കണമെന്നും അത്​ ടെലിവിഷനിൽ സംപ്രേഷണം ചെയ്യണമെന്നും സഭ പ്രോ​ ടെം സ്​പീക്കറുടെ അധ്യക്ഷതയിലാവണമെന്നും അസന്ദിഗ്​ധമായി ഉത്തരവിട്ടതോടെ കുതിരക്കച്ചവടത്തി​​െൻറ സമസ്​ത സാധ്യതകളും അടയുകയായിരുന്നു.

കർണാടകയിലും അതിനുമുമ്പ്​ ഗോവയിലും വിനീതവിധേയരായ ഗവർണർമാരെ ഉപയോഗിച്ച്​ മോദി-അമിത് ​ഷാ ടീം നടത്തിയ അരുതായ്​മകളുടെ ആവർത്തനത്തിനാണ്​ ഇതുവഴി സുപ്രീംകോടതി തടയിട്ടത്​. അത്യാപദ്​​ഘട്ടങ്ങളിൽ മാത്രം പ്രയോഗിക്കാവുന്ന ഭരണഘടനാ വകുപ്പുകളെ കേന്ദ്രസർക്കാറി​​െൻറ അവിഹിതനീക്കങ്ങളുടെ ചട്ടുകമായി ഉപയോഗിക്കുന്ന ഗവർണർമാർക്കും മറ്റു ഭരണഘടനാ സ്​ഥാപന മേധാവികൾക്കും ശക്തമായ താക്കീത​ു​കൂടിയാണ്​ മഹാരാഷ്​ട്രക്കാര്യത്തിൽ സുപ്രീംകോടതിയുടെ സമയോചിത ഇടപെടൽ. ഫഡ്​നാവിസും അജിത്​ പവാറും രാജിവെച്ചതോടെ സർക്കാർ രൂപവത്​കരിക്കാനുള്ള ബി.ജെ.പിയുടെ പൂതി തൽക്കാലം തടസ്സപ്പെ​ട്ടെങ്കിലും ഭരണഘടനയുടെ അന്തസ്സത്തയോട്​ തെല്ലും കൂറോ പ്രതിബദ്ധതയോ ഇല്ലാത്തവരുടെ ഭാവിനീക്കങ്ങൾ പ്രവചനാതീതമാണ്​. ഭരണഘടന രക്ഷകരുടെയും പ്രബുദ്ധ ജനതയുടെയും ജാഗ്രത മാത്രമാണ്​ കുത്സിത കുതന്ത്രങ്ങൾക്കെതിരെയുള്ള ഗാരൻറി.