കോവിഡിലെ രാഷ്​ട്രീയം

ജനക്ഷേമത്തിന്​​ പ്രഥമ പരിഗണന നൽകി അവരുടെ താൽപര്യങ്ങൾ കണക്കിലെടുത്തു ചുമതലകൾ നിറവേറ്റുന്ന ഭരണപക്ഷവും ഇക്കാര്യത്തിൽ ക്രിയാത്മകമായി സർക്കാറിനോട്​ സഹകരിക്കുന്നതോടൊപ്പം വീഴ്​ചകളും പാളിച്ചകളും വിമർശനാത്മകമായി ചൂണ്ടിക്കാട്ടുന്ന പ്രതിപക്ഷവും എന്നതാണ്​ ആരോഗ്യകരമായ ജനാധിപത്യത്തി​​െൻറ  അന്തസ്സത്ത എന്ന്​ മനസ്സിലാക്കാത്തവരല്ല ജനാധിപത്യ ഇന്ത്യയിലെ രണ്ടുപക്ഷവും. പക്ഷേ, പലവിധ കാരണങ്ങളാൽ തൽക്കാലത്തെ രാഷ്​ട്രീയ താൽപര്യങ്ങൾക്കതീതമായി ചിന്തിക്കാനും പ്രവർത്തിക്കാനും രാജ്യത്തെ ഭരണ-പ്രതിപക്ഷ പാർട്ടികൾക്ക്​ കഴിയാറില്ല. കേന്ദ്രമോ സംസ്​ഥാനങ്ങളോ ഭരിക്കുന്ന രാഷ്​ട്രീയ പാർട്ടികൾക്കും പ്രതിപക്ഷത്തിരിക്കുന്നവർക്കും എന്തിലും ഏതിലും ദേശീയ താൽപര്യങ്ങൾക്കതീതമായി പാർട്ടി താൽപര്യങ്ങളാണുള്ളതെന്ന്​ ജനങ്ങൾ കരു​തേണ്ടിവരുന്ന സാഹചര്യമാണ്​ ഇവിടെ നിലനിൽക്കുന്നത്​. സമീപകാലത്ത്​ ഈ തെറ്റായ പ്രവണത ശക്തിപ്പെടുകയേ ചെയ്​തിട്ടുള്ളൂ. ഭൂമുഖത്താകെ കൊടിയ നാശം വിതച്ചുകൊണ്ട്​ മുന്നോട്ടു കുതിക്കുന്ന കോവിഡ്​-19 എന്ന മഹാമാരിയെ പ്രതിരോധിക്കുന്നതിൽപോലും ഇന്ത്യ മഹാരാജ്യം ഒറ്റക്കെട്ടല്ല, പ്രത്യുത തങ്ങളുടെ മികവും മേന്മയും കൊണ്ടാണ്​ കോവിഡിനെ നേരിടുന്നതിൽ നേടിയ വിജയമെന്ന്​ സ്​ഥാപിക്കാൻ പാടുപെടുന്ന ഭരണപക്ഷത്തെയും, സർക്കാറുകൾ തികഞ്ഞ പരാജയമാണെന്ന്​ വരുത്തിത്തീർക്കാൻ ശ്രമിക്കുന്ന പ്രതിപക്ഷത്തെയുമാണ്​ കാണാനാവുന്നത്​. ഈ  മാരകവ്യാധിയുടെ പ്രത്യാഘാതം ആരോഗ്യമേഖലയിലൊതുങ്ങുന്നില്ലെന്നും സാമ്പത്തിക മേഖലയിൽ അത്​ മൂലമുണ്ടായിക്കഴിഞ്ഞതും ഭാവിയിൽ ഉണ്ടാവാൻ പോകുന്നതുമായ വിനാശകരമായ ഫലങ്ങളെ അതിജീവിക്കാൻ ആഗോളതലത്തിൽ ആസൂത്രിത പദ്ധതികൾ വേണ്ടിവരുമെന്നും വിദഗ്​ധർ നിരന്തരം ചൂണ്ടിക്കാണിച്ചുകൊണ്ടിരിക്കുന്നു.

കേരളത്തിൽ കക്ഷിരാഷ്​ട്രീയ പരിഗണനകളോ സാമുദായികഭേദങ്ങളോ ഇല്ലാതെ ഒറ്റക്കെട്ടായി കോവിഡിനെ പ്രതിരോധിക്കാനും മഹാമാരി കട​െന്നത്തിയ ആദ്യ സംസ്​ഥാനമാണെങ്കിലും പരമാവധി കുറഞ്ഞ മരണനിരക്കും കൂടിയ രോഗശമന നിരക്കുമായി രാജ്യത്തിന്​ മൊത്തം മാതൃകയാവാനും സാധിച്ചതി​​െൻറ ക്രെഡിറ്റ്​ സർക്കാറിനോ ഭരണപക്ഷത്തിനോ മാത്രം അവകാശപ്പെട്ടതല്ല. ഏതാണ്ടെല്ലാ പാർട്ടികൾക്കും ചെറുതോ വലുതോ ആയ സംഘടനകൾക്കും ജനകീയ കൂട്ടായ്​മകൾക്കും അതിൽ പങ്കുണ്ടെന്നത്​ അനിഷേധ്യമാണ്​. ഈ സത്യം അംഗീകരിക്കാതിരുന്നാൽ സംഭവിക്കാൻ പോവുന്നത്​, ഒന്നാമതായി ലക്ഷക്കണക്കിന്​ പ്രവാസികളും മറുനാടൻ മലയാളികളും സംസ്​ഥാനത്ത്​ തിരിച്ചെത്താൻ പോവുന്ന സന്ദിഗ്​ധ സാഹചര്യത്തിൽ അനിവാര്യമായ ഐക്യത്തിനും സഹകരണത്തിനും സാരമായ ഭംഗവും തിരിച്ചടിയും നേരിടുമെന്നതാണ്​. സ്​ഥിതിഗതികൾ കൈവിട്ടുപോയശേഷം പരസ്​പരം ചേരിതിരിഞ്ഞ്​ മാധ്യമങ്ങളിലൂടെയും വേദികളിലൂടെയും അത്യുച്ചത്തിൽ കലഹിച്ചതുകൊണ്ട്​ ഒരു ഫലവും ഉണ്ടാവാൻ പോവുന്നില്ല. വരാനിരിക്കുന്ന തെരഞ്ഞെടുപ്പുകളിൽ അത്തരമൊരു സ്​ഥിതിവിശേഷം തങ്ങൾക്ക്​ നേട്ടമുണ്ടാക്കുമെന്ന്​ ആരെങ്കിലും കരുതുന്നുവെങ്കിൽ അവർ മനപ്പായസമുണ്ണുകയാണ്​. യാഥാർഥ്യത്തി​​െൻറ പിൻബലമില്ലാത്ത അവകാശവാദങ്ങൾക്കും വാചകമടിക്കും പ്രബുദ്ധകേരളത്തി​​െൻറ പിന്തുണ ലഭിക്കുമെന്നാരും സ്വപ്​നം കാണേണ്ടതില്ല. കൂടുതൽ ഗൗരവതരവും പ്രധാനവുമാണ്​ കോവിഡാനന്തര കേരളത്തി​​െൻറ പുനർനിർമാണം. തദ്​സംബന്ധമായി ചില പദ്ധതികളെപ്പറ്റി സർക്കാർ ആലോചിച്ചുവരുന്നതായും അതി​​െൻറ സമഗ്രവും സുതാര്യവുമായ രൂപം താമസിയാതെ ജനസമക്ഷം വരുമെന്നുമാണ്​ ആധികാരികമായ വിവരം. ഇൗ ദിശയിലുള്ള വിചാരങ്ങളിലും തദനുസൃത പരിപാടികളിലും മുഖ്യ പ്രതിപക്ഷമടക്കം എല്ലാ ജനകീയ കൂട്ടായ്​മകളെയും പങ്കാളികളാക്കാനുള്ള വിശാലവീക്ഷണവും ദീർഘദൃഷ്​ടിയും ബന്ധപ്പെട്ടവർക്കുണ്ടാവണം.

ഇപ്പോൾ ഈ സത്യം ഓർമിപ്പിക്കാൻ കാരണം, അതിഥി തൊഴിലാളികളുടെ മടക്കയാത്ര സംബന്ധിച്ച്​ ഒടുവിൽ പൊട്ടിപ്പുറപ്പെട്ട ഭരണപക്ഷ-പ്രതിപക്ഷ തർക്കങ്ങൾ മൂർച്ഛിക്കുന്നതാണ്​. ബിഹാർ, ഝാർഖണ്ഡ്​,  ഒഡിഷ തുടങ്ങിയ സംസ്​ഥാനങ്ങളിൽനിന്നുള്ള തൊഴിലാളികളെ കേരളത്തി​​െൻറ വിവിധഭാഗങ്ങളിൽനിന്ന്​ അവരുടെ ആവശ്യപ്രകാരം സ്വദേശങ്ങളിലേക്ക്​ തിരിച്ചയക്കാനുള്ള ട്രെയിനുകൾ കേന്ദ്ര സർക്കാർ അനുവദിച്ചത്​ തീർച്ചയായും നല്ല കാര്യമാണ്​, സ്വാഗതാർഹവുമാണ്​. എന്നാൽ, കഷ്​ടപ്പാടും ദുരിതങ്ങളും അനുഭവിക്കുന്ന ഈ തൊഴിലാളികൾക്ക്​ സൗജന്യ തീവണ്ടിയാത്ര അനുവദിക്കുക എന്ന ധാർമിക ബാധ്യത ഏറ്റെടുക്കാൻ വിസമ്മതിക്കുന്ന കേന്ദ്ര സർക്കാർ അക്കാര്യം ബന്ധപ്പെട്ട സംസ്​ഥാന സർക്കാറുകൾക്ക്​ വിട്ടുകൊടുക്കുകയാണ്​ ചെയ്​തിരിക്കുന്നത്​. കേരള സർക്കാറാക​ട്ടെ യാത്രക്കാരായ തൊഴിലാളികൾതന്നെ തങ്ങളുടെ യാത്രക്കൂലി വഹിക്കണമെന്ന നിലപാടും സ്വീകരിച്ചിരിക്കുന്നു. സാമ്പത്തിക ഞെരുക്കമാവാം തീരുമാനത്തിന്​ ഹേതു. ഈ ഘട്ടത്തിലാണ്​ എ.ഐ.സി.സി പ്രസിഡൻറ്​ സോണിയ ഗാന്ധി കേന്ദ്രം തൊഴിലാളികളുടെ വണ്ടിക്കൂലി വഹിക്കാൻ തയാറ​​ല്ലെങ്കിൽ സംസ്​ഥാനങ്ങളിലെ കോൺഗ്രസ്​ ഘടകങ്ങൾ അതേറ്റെടുക്കണമെന്നാവശ്യപ്പെട്ടത്​. ആലപ്പുഴയിൽനിന്ന്​ ബിഹാറിലേക്ക്​ പുറപ്പെടുന്ന അന്തർ സംസ്​ഥാന തൊഴിലാളികളുടെ ​വണ്ടിക്കൂലിയിനത്തിൽ 10 ലക്ഷം രൂപ നൽകാമെന്ന ഡി.സി.സി പ്രസിഡൻറി​​െൻറ വാഗ്​ദാനം സർക്കാർ അനുമതിയില്ലാതെ സ്വീകരിക്കാനാവില്ലെന്ന ജില്ല കലക്​ടറുടെ പ്രതികരണത്തോടെ  കേരളത്തിൽ രാഷ്​ട്രീയ വിവാദങ്ങൾക്ക്​ തിരികൊളുത്തിയിരിക്കുന്നു. മറ്റുചില ജില്ലകളിലും ഇങ്ങനെ വാഗ്​ദാനം നൽകിയെങ്കിലും നിരാകരിക്കപ്പെട്ടു. കഴിഞ്ഞദിവസം മുഖ്യമന്ത്രി പിണറായി വിജയ​ൻ വാർത്തസമ്മേളനത്തിൽ കോൺഗ്രസി​​െൻറ വാഗ്​ദാനത്തെ ഒരൽപം പരിഹാസ സ്വരത്തിൽ പരാമർശിച്ചത്​ വിവാദം കൊഴുപ്പിക്കാനും വഴിയൊരുക്കി. സംസ്​ഥാന സർക്കാർ നേരിടുന്ന ഗുരുതര സാമ്പത്തിക പ്രതിസന്ധി ആരെയും ബോധ്യപ്പെടുത്തേണ്ടതല്ല. അത്തരമൊരു ഘട്ടത്തിൽ പതിനായിരക്കണക്കിൽ അതിഥി തൊഴിലാളികളെ തിരിച്ചയക്കാനുള്ള ചെലവുകൂടി താങ്ങാനാവില്ല എന്നാണ്​ തീരുമാനമെങ്കിൽ അത്​ തുറന്നുപറയാൻ എന്തിന്​ മടിക്കണം, ആരെ പേടിക്കണം? സാഹചര്യത്തി​​െൻറ ഇടുക്കം മനസ്സിലാക്കി ആരെങ്കിലും ആ ഭാരം ഏറ്റെടുക്കാൻ തയാറാണെങ്കിൽ അതി​​െൻറ പഴുത്​ അടച്ചുകളയുന്നതെന്തിന്​? പ്രതിപക്ഷം മുതലെടുക്കുമെന്ന ആശങ്ക ന്യായം തന്നെയാവാം. പക്ഷേ, പാവപ്പെട്ട തൊഴിലാളികളുടെ പ്രാഥമിക താൽപര്യമല്ലേ തൊഴിലാളി വർഗത്തിനായി നിലകൊള്ളുന്നു എന്നവകാശപ്പെടുന്ന ഒരു സർക്കാറിന്​ പ്രധാനമായിരിക്കേണ്ടത്​!