Top
Begin typing your search above and press return to search.
keyboard_arrow_down
Login
exit_to_app
exit_to_app
Homechevron_rightOpinionchevron_rightEditorialchevron_rightരാഷ്​​ട്രനിർമാണമെന്നാൽ ...

രാഷ്​​ട്രനിർമാണമെന്നാൽ കെട്ടിടം പണിയലല്ല

text_fields
bookmark_border
Nation building is not about building
cancel



പാർലമെൻറിനുവേണ്ടി പുതിയൊരു ​കെട്ടിടം പണിയുന്ന പദ്ധതിയുമായി മുന്നോട്ടുപോവുകയാണ്​ കേന്ദ്രസർക്കാർ. നിർമാണക്കരാർ 'ടാറ്റ പ്രോജക്​ടിന്​' നൽകാൻ കഴിഞ്ഞദിവസം തീരുമാനമായി. 2022ൽ, സ്വതന്ത്ര ഇന്ത്യക്ക്​ 75 വയസ്സു തികയു​​​േമ്പാൾ ലോക്​സഭയും രാജ്യസഭയും പുതിയ മന്ദിരത്തിൽ യോഗം ചേരുമെന്നാണ്​ പ്രതീക്ഷിക്കുന്നത്​. 861 കോടി 90 ലക്ഷം രൂപക്കാണ്​ നിർമാണക്കരാർ. ഇപ്പോഴുള്ള വൃത്താകാരത്തിലുള്ള കെട്ടിടത്തിനു പകരം, ത്രികോണാകൃതിയിൽ മൂന്നു​ നിലയുള്ളതായിരിക്കും പുതിയത്​. കൊളോണിയൽ കാലഘട്ടത്തിൽ പണിത ഇപ്പോഴത്തെ കെട്ടിടത്തിന്​ കേടുപാടുകൾ വന്നുതുടങ്ങിയെന്നും ആവശ്യങ്ങൾക്ക്​ അത്​ അപര്യാപ്​തമാ​ണെന്നും ലോക്​സഭ സ്​പീക്കർമാർ അടുത്തകാലത്തായി ആവശ്യപ്പെട്ടുവരുന്നുണ്ട്​. ഏറ്റവും പുതിയ സാ​ങ്കേതികവിദ്യകളുൾക്കൊള്ളുന്ന ഒരു ആധുനികമന്ദിരം വേണമെന്നുകൂടി അവർ ഊന്നിപ്പറയുന്നു.

ഇതെല്ലാം ന്യായമാണെന്ന്​ അംഗീകരിക്കു​േമ്പാൾതന്നെ, നമ്മുടെ ദേശീയ മുൻഗണനകളെ മുഴുവൻ മാറ്റിയെഴുതേണ്ട സ്​ഥിതിയാണ്​ കോവിഡ്​ മഹാമാരിയോടെ ഉണ്ടായിരിക്കുന്നതെന്ന്​ ചൂണ്ടിക്കാട്ടാതെ വയ്യ. മോടിയും ആധുനികസൗകര്യവും വിസ്​താരവുമുള്ള വലിയ കെട്ടിടം ഭാവനയിൽ വന്നകാലത്ത്​ ഇന്ത്യയുടെ സമ്പദ്​ഘടന നല്ല വളർച്ചയിലായിരുന്നു. അന്ന്​ അത്തരം പരിപാടികൾക്ക്​ ന്യായീകരണവുമുണ്ടായിരുന്നു.

എന്നാൽ, ഇന്ന്​ അതല്ല സ്​ഥിതി. മൊത്തം ആഭ്യന്തരോൽ​പാദനം കഴിഞ്ഞ പാദത്തിൽ 24 ശതമാനം ഇടിഞ്ഞത്​ നമ്മുടെ എല്ലാ ചെലവുകളും പുനഃപരിശോധിക്കാൻ നമ്മെ നിർബന്ധിക്കുന്നുണ്ട്​. സാമ്പത്തികമാന്ദ്യത്തിലേക്ക്​ പതിക്കുന്ന ഒരു രാജ്യത്തി​െൻറ ആദ്യ മുൻഗണനയല്ല പാർലമെൻറിന്​ വിശാലമായ പുതിയ കെട്ടിടം. കെട്ടിടമാറ്റത്തിന്​ പറയാവുന്ന ന്യായമായ ഒരു കാരണമുണ്ട്​. ഇപ്പോഴത്തേതിൽ ഇരിപ്പിടം പോരാതെ വന്നേക്കും എന്നതാണത്​. ലോക്​സഭ ഹാളിൽ ഇ​പ്പോൾ പരമാവധി 550 സീറ്റാണ്​ സൗകര്യപ്പെടുത്താവുന്നത്​. 2021ലെ സെൻസസിനു ശേഷം സമ്മതിദായകരുടെ എണ്ണത്തിലെ വർധനക്ക്​ അനുസരിച്ച്​ 2026 ലെ ലോക്​സഭയിൽ അതിലേറെ അംഗങ്ങളുണ്ടാകാം. ഇപ്പോൾ പണിയാൻ പോകുന്നതിൽ ഇരുസഭകൾക്കും കൂടി 1400 ഇരിപ്പിടങ്ങൾ ഉണ്ടായിരിക്കും. പക്ഷേ, ഇരിപ്പിടങ്ങളുടെ കുറവാണ്​ പ്രശ്​നമെങ്കിൽ, 2026 ൽ വരാൻ സാധ്യതയുള്ള കുറവ്​ നികത്താൻ 2022ൽ തന്നെ തിടുക്കത്തിൽ നിർമാണം പൂർത്തിയാക്കേണ്ടതില്ലല്ലോ. തന്നെയുമല്ല, പാർലമെൻറ്​ മന്ദിരത്തിനു പുറമെ ഡൽഹിയിലെ ഒരുപാട്​ സർക്കാർ കെട്ടിടങ്ങൾ ഒഴിവാക്കാനും പകരം 20,000 കോടി രൂപ ചെലവിൽ പുതിയ ​കെട്ടിടങ്ങൾ (പ്രധാനമന്ത്രി വസതിയടക്കം) പണിയാനും സർക്കാറിന്​ ഉദ്ദേശ്യമുണ്ട്​. അത്യാവശ്യമല്ലെന്ന നിലക്ക്​ ഇപ്പോൾ ഇതെല്ലാം ഉപേക്ഷിക്കുന്നതാണ്​ ഉചിതം.

സാമ്പത്തിക ഞെരുക്കത്തിൽനിന്ന്​ കരകയറാനും നാട്ടിലെ ജനങ്ങൾക്ക്​ തൊഴിലും ജീവനോപാധികളും ലഭ്യമാക്കാനും അവരെ പട്ടിണിയിൽനിന്ന്​ മോചിപ്പിക്കാനും അടിയന്തര നടപടികളെപ്പറ്റി ആലോചിക്കേണ്ട സമയം ഇതാണ്​. പണം ജനങ്ങളിലേക്ക്​ നേരി​ട്ടെത്തിക്കേണ്ടത്​ അത്യാവശ്യമായിരിക്കുന്നു. പക്ഷേ, അതിനൊന്നും സർക്കാറി​െൻറ പക്കൽ പണമില്ല. എന്തിനേറെ, എം.പിമാരുടെയും മന്ത്രിമാരുടെയും വേതനം വരെ കുറക്കേണ്ട സ്​ഥിതിയാണ്. സംസ്​ഥാനങ്ങൾക്ക്​ ജി.എസ്​.ടി നഷ്​ടപരിഹാരം കൊടുക്കാൻ കേന്ദ്രത്തി​െൻറ കൈയിൽ പണമില്ല. ആരോഗ്യമേഖലയിൽ മുതലിറക്കാൻ പണമില്ലാത്തത്​ കോവിഡ്​ പ്രതിരോധത്തെ ബാധിച്ചിരിക്കുന്നു. രാജ്യംതന്നെ കടച്ചുഴിയിലാണ്​. കർഷകരും യുവജനങ്ങളും ഗ്രാമീണരും ദുരിതത്തിലാണ്​. വലിയൊരു വിഭാഗത്തിന്​ പട്ടിണി നിത്യയാഥാർഥ്യമായിക്കഴിഞ്ഞു. അവർക്കൊന്നും കൊടുക്കാൻ കൈവശമില്ലെന്നു പറയുന്ന പണം പാർലമെൻറ്​ മന്ദിരമുണ്ടാക്കാൻ എങ്ങനെ ഉണ്ടാകുന്നു? കോവിഡ്​ പ്രതിസന്ധിയിൽ തകർന്ന അനേകം വ്യവസായങ്ങൾക്കോ, ഉള്ള ജോലി നഷ്​ടപ്പെട്ട 50 ലക്ഷം പേർക്കോ, പണ്ടേക്കുപണ്ടേ ക​ടക്കെണിയിലായ ശേഷം ഇപ്പോൾ പാടേ തളരുന്ന കാർഷികമേഖലക്കോ പുനരുജ്​ജീവന ഫണ്ടിന്​ വകയില്ലാത്ത സർക്കാർ 21 മാസംകൊണ്ട്​ അടിയന്തരമായി കെട്ടിടം പണിത്​ 862 കോടി ചെലവാക്കുന്നതിലെ ന്യായം എന്താണ്​? 2024ലേക്ക്​ 20,000 കോടി ചെലവിടാൻ പോകുന്നതി​െൻറ ന്യായം എന്താണ്​?

ജനാധിപത്യമെന്നാൽ പാർലമെൻറ്​ കെട്ടിടങ്ങളല്ല. പാർലമെൻറിൽ ജനങ്ങളും അവരുടെ പ്രശ്​നങ്ങളും എങ്ങനെ കൈകാര്യം ചെയ്യപ്പെടുന്നു എന്നതാണ്​ അതി​​െൻറ മർമം. കോവിഡ്​ പ്രതിസന്ധിയും പണ​െഞരുക്കവും കെട്ടിട നിർമാണത്തിന്​ തടസ്സമല്ലെന്ന്​ നിലപാടെടുത്ത സർക്കാർ തന്നെയാണ്​, കോവിഡ്​ എന്ന കാരണം പറഞ്ഞ്​ ജനപ്രതിനിധികളുടെ പരമപ്രധാനമായ അവകാശങ്ങളിലൊന്നായ ചോദ്യോത്തരവേള ഒഴിവാക്കിയത്​. സർക്കാറി​െൻറ പ്രവർത്തനം ജനക്ഷേമപരമോ ജനാധിപത്യപരമോ അല്ലെന്നതിനാൽ ഒരു മന്ത്രിതന്നെ രാജിവെച്ചൊഴിഞ്ഞിരിക്കുന്നു. ജനജീവിതത്തെ സാരമായി ബാധിക്കുന്ന നിയമങ്ങൾ മതിയായ ചർച്ചകൂടാതെ ചു​ട്ടെടുക്കുന്നു.

പാർല​മെൻററി സംവിധാനത്തി​െൻറ അവശ്യഘടകമായ ​പ്രതിപക്ഷത്തിന്​ അർഹമായ പരിഗണന കൊടുക്കുന്നില്ല. ജി.ഡി.പി തകർച്ച, ചൈനയുടെ കടന്നുകയറ്റം, കോവിഡ്​ പ്രതിരോധം, ജി.എസ്​.ടി വീഴ്​ച, കർഷകദുരിതം, നാട്ടിൽ പടരുന്ന വർഗീയ ജ്വരം തുടങ്ങി പാർലമെൻറ്​ ചർച്ച​ചെയ്യേണ്ട ജനകീയ പ്രശ്​നങ്ങൾ തൊടുകപോലും ചെയ്യാതെ സമ്മേളനങ്ങൾ നടക്കുന്നു. ജനങ്ങളുടെ പ്രശ്​നങ്ങൾ പറയാനും അറിയേണ്ടത്​ ചോദിക്കാനും മുമ്പുണ്ടായിരുന്ന മാർഗങ്ങൾ ഒന്നൊന്നായി അടയ്​ക്കുന്നു. പാർലമെൻറി​െൻറ കെട്ടിടമല്ല ഇപ്പോൾ ദ്രവിച്ചു തകരുന്നത്​; അതി​െൻറ പ്രവർത്തനമാണ്​. നന്നാക്കിയെടുക്കേണ്ടത്​ അതാണ്​. ഇപ്പോൾ സമ്പദ്​ഘടനയെ കരകയറ്റുന്നതിനും മഹാമാരിയെ അതിജയിക്കുന്നതിനുമാകണം മുൻഗണന. അതിനുപകരം കെട്ടിടം പണിയുന്നത്​ ജനങ്ങളെയും ജനാധിപത്യത്തെയും പരിഹസിക്കലാണ്​.

Show Full Article
TAGS:editorial madhyamam nation nationalism 
Next Story