ഏത്​ നവ​കേരളത്തിലേക്കാണ്​ നമ്മൾ?

കാട് കട്ടവന്‍റെ നാട്ടിൽ
ചോറ് കട്ടവൻ മരിക്കും
കൂറ് കെട്ടവൻ ഭരിച്ചാൽ
ഊര് കട്ടവൻ മുടിക്കും
-​വേടൻ

കേരളത്തിലെ പിണറായി വിജയൻ നേതൃത്വം നൽകുന്ന ഇടതു ജനാധിപത്യമുന്നണി സർക്കാർ തുടർച്ചയായ രണ്ടാമൂഴത്തിൽ നാലുവർഷം പൂർത്തിയാക്കുകയാണ്​ ഇന്ന്​. സംസ്ഥാനത്ത്​ ആദ്യമായി ഭരണത്തുടർച്ച നേടിയ ഇടതുമുന്നണി സർക്കാർ ഒമ്പതു വർഷം കടന്ന്​ പത്തിലേക്ക്​ പാദമൂന്നുന്നത്​ ഭരണം മൂന്നാംവട്ടവും തുടരുമെന്ന ആത്മവിശ്വാസവുമായാണ്​. അതിന്‍റെ ആഘോഷങ്ങൾ കഴിഞ്ഞ ഏ​പ്രിൽ 23 മുതൽ കേരളത്തിന്‍റെ വടക്കുനിന്ന് തെക്കോട്ട് ജില്ലാ ആസ്ഥാനങ്ങളിൽ മുഖ്യമന്ത്രിയുടെ നേതൃത്വത്തിൽ കെ​ങ്കേമമായിതന്നെ നടന്നുവരുന്നുണ്ട്​. സമഗ്രവും സർവതലസ്പർശിയുമായ വികസനത്തിന്‍റെയും സമത്വവും സാഹോദര്യവും അന്വർഥമാക്കുന്ന സാമൂഹികപുരോഗതിയുടെയും സന്ദേശമാണ് ഈ സന്ദർഭത്തിൽ കേരളം ലോകത്തിന് മുന്നിൽ ഉയർത്തിപ്പിടിക്കുന്നതെന്നാണ്​ മുഖ്യമന്ത്രി പിണറായി വിജയൻ നാലാം വാർഷികാഘോഷത്തിന്​ ആമുഖം കുറിച്ചത്​.

ഒമ്പതു വർഷം പൂർത്തിയാക്കിയ സർക്കാറിന്​ ആശംസകൾ നേർന്നു കൊണ്ടുതന്നെ നവകേരളം യാഥാർഥ്യമാകേണ്ടത്​ അവകാശവാദങ്ങളിലല്ല, ജനങ്ങൾക്ക്​ അനുഭവിക്കാവും വിധം പ്രയോഗതലത്തിലായിരിക്കണമെന്ന്​ ആഘോഷം തുടങ്ങുമ്പോൾ ‘മാധ്യമം’ ചൂണ്ടിക്കാണിച്ചിരുന്നു. കേന്ദ്രസർക്കാറിന്‍റെ ഞെക്കിഞെരുക്കലിൽ അനുഭവിക്കുന്ന പ്രയാസങ്ങ​ളെ മറികടക്കാൻ സർക്കാർ നടത്തുന്ന തീവ്രശ്രമങ്ങളെ കാണാതിരുന്നുകൂടാ. അതേസമയം കേന്ദ്രത്തെ പഴിക്കാനില്ലാത്ത, സംസ്ഥാനത്തിന്‍റെ മാത്രം വരുതിയിലുള്ള ആഭ്യന്തരവിഷയങ്ങളിൽ ‘സമത്വവും സാഹോദര്യവും അന്വർഥമാക്കുന്ന നവകേരളത്തെ’ അട്ടിമറിക്കുന്ന ദുരന്തത്തിലേക്ക്​ വീഴാതെ സൂക്ഷിക്കാൻ ഇടതുസർക്കാറിന്​ ബാധ്യതയുണ്ട്​. എന്നാൽ, കേന്ദ്രത്തിന്‍റെ ജന​ദ്രോഹനയത്തിനൊപ്പം അതിനെതിരെ ഒച്ചവെക്കുന്ന സംസ്ഥാനഭരണത്തിന്‍റെ അരുതായ്മകൾകൂടി ഇരട്ടിശിക്ഷയായി അനുഭവിക്കേണ്ട ദുര്യോഗമാണിപ്പോൾ കേരളജനതക്ക്​. അതിനു കൂടുതൽ ഇരയാകുന്നതോ, സമൂഹത്തിലെ അടിത്തട്ടിലുള്ളവരും. ഇടതുഭരണത്തിൽ ഏറ്റവും കൂടുതൽ വിമർശനവിധേയമായതാണ്​ മുഖ്യമന്ത്രി നേരിട്ട് കൈയാളുന്ന പൊലീസ്​ വകുപ്പ്​. അവർ കൂടുതലും കൈവെച്ചത്​ ദുർബല, അടിയാള ജീവിതങ്ങൾക്ക് മേലാണ്​ എന്നത്​ കേരളത്തിലെ ഇടതു തുടർഭരണത്തിന്‍റെ വിധിവിപര്യയമാണ്​. കഴിഞ്ഞ മൂന്നാഴ്ചക്കുള്ളിൽ അരി​കടിഞ്ഞ ജീവിതങ്ങൾക്ക്​ നേരിടേണ്ടിവന്ന ദുരനുഭവങ്ങൾ അതിന്‍റെ മുന്തിയ ഉദാഹരണങ്ങളാണ്​.

ജനപ്രിയ റാപ്​ ഗായകൻ വേടൻ എന്ന ഹിരൺദാസ്​ മുരളിയെ ആറുഗ്രാം കഞ്ചാവുമായി പൊലീസും ​പിറകെ പുലിപ്പല്ല് കൈവശം വെച്ചതിന് ഏഴുവർഷംവരെ ശിക്ഷ ലഭിക്കാവുന്ന കഠിനവകുപ്പുകൾ ചുമത്തി വനം വകുപ്പും അറസ്റ്റു ചെയ്തതാണ്​ ഒന്ന്​. അത്യസാധാരണ കോലാഹലങ്ങളോടെയായിരുന്നു സ്​റ്റേഷൻ ജാമ്യത്തിൽ വിടാവുന്ന കേസിലെ അറസ്റ്റ്​. പുലിപ്പല്ല് കണ്ടെടുത്തതോ​ടെ കൂടുതൽ അന്വേഷണത്തിനൊന്നും മിനക്കെടാതെ വനംവകുപ്പും അറസ്റ്റിന് പാഞ്ഞെത്തി. വേടൻ കോടതിയിൽ നിരപരാധിത്വം ​തെളിയിക്കട്ടെ എന്നായി ഇടതു സർക്കാറിന്‍റെ വനം മന്ത്രി. സർക്കാർ വാർഷികാഘോഷത്തിന് പറഞ്ഞുറപ്പിച്ച വേടന്‍റെ റാപ്​ സംഗീതപരിപാടി റദ്ദാക്കി മറ്റൊരു മന്ത്രി ഔദ്യോഗികനയവും ഉറപ്പിച്ചു. എന്നാൽ ‘സമത്വപൂർണ നവകേരള’ത്തിന് ശ്രമിക്കുന്ന ഇടതിന്‍റെ സ്വന്തം നാട്ടിൽ വേടന്‍റെ ധിറുതിപിടിച്ച അറസ്റ്റ്​ ഇരട്ടനീതിയുടെ തെളിവാണെന്ന് അകംപുറം വിമർശനമുയർന്നു. പൊലീസ്​ തിടുക്കത്തെ കോടതി കുടഞ്ഞു. അതോടെ സർക്കാർ മലക്കംമറിഞ്ഞു. പടിയടച്ചു പുറത്തിട്ട വേടന്​ സർക്കാർതന്നെ സ്​റ്റേജുകൾ നൽകി പ്രായശ്ചിത്തം ചെയ്തു.

ആ​ കോലാഹലം വിട്ടുമാറും മുമ്പേ മോഷണക്കുറ്റം ആരോപിച്ച്​ ഒരു ദലിത്​ യുവതിയെ ​പൊലീസ്​ പിടികൂടി 20 മണിക്കൂർ നേരം സ്​റ്റേഷനിലിരുത്തി മൃഗീയമായി പീഡിപ്പിച്ച വാർത്ത പുറത്തുവന്നിരിക്കുന്നു. ജോലിക്കു നിന്ന വീട്ടിൽനിന്ന് മാല കാണാതായതിനെതുടർന്ന്​ വീട്ടുകാർ നൽകിയ പരാതിയിൽ ബിന്ദു എന്ന ദലിത്​ യുവതിയാണ്​ പേരൂർക്കട പൊലീസ്​ സ്​റ്റേഷനിൽ മനുഷ്യത്വരഹിതമായ പീഡനത്തിനിരയായത്​. നിർബന്ധിച്ച് മോഷണക്കുറ്റം സമ്മതിപ്പിച്ച്​ കേസെടുത്തു. വീട്ടിൽനിന്ന് കൊണ്ടുവന്ന ഭക്ഷണം വിലക്കി. ദാഹജലം ചോദിച്ചപ്പോൾ ശുചിമുറിയിൽ ​പോകാൻ പറഞ്ഞു. മാല കണ്ടെടുത്തതായി വീട്ടുകാർ അറിയിച്ചപ്പോൾ അടുത്തെങ്ങും കണ്ടുപോകരുതെന്ന് വിരട്ടി പൊലീസ്​ വിട്ടയച്ചു. മാനസികമായി തകർന്ന് പരാതിയുമായി മുഖ്യമന്ത്രിയുടെ ഓഫിസിൽ വക്കീലിനെയും കൂട്ടി ചെന്നപ്പോൾ പരാതി വായിച്ചുപോലും നോക്കാതെ പൊലീസിനെ ന്യായീകരിക്കുന്ന സമീപനമാണ്​ ഉണ്ടാ​യതെന്നാണ്​ ബിന്ദുവിന്‍റെ പരിഭവം. മുൻ സംഭവത്തിലെന്നപോലെ വിഷയം വിവാദ​മായതോടെ സ്​റ്റേഷനിലെ എസ്​.ഐയെ സസ്പെൻഡ്​ ചെയ്ത്​ മുഖം രക്ഷിക്കാൻ നോക്കുകയാണ്​ സർക്കാർ. ബിന്ദു ഓഫിസിൽ വന്നപ്പോൾ കേസ്​ ഗൗരവത്തിലെടുത്ത് അന്വേഷണത്തിന്​ നിർദേശം നൽകിയെന്ന്​ മുഖ്യമന്ത്രിയുടെ പൊളിറ്റിക്കൽ സെക്രട്ടറി പി. ശശി വിശദീകരണം നൽകി.

അരി മോഷ്ടിച്ച് എന്നാരോപിച്ച്​ അട്ടപ്പാടിയിലെ ആദിവാസി മധുവിനെ ആൾക്കൂട്ടക്കൊലക്കിരയാക്കിയത്​​ 2018 ഫെബ്രുവരി 22നാണ്. പരിഷ്കൃത സമൂഹത്തിന് ചേരാത്ത കിരാതവൃത്തിയെന്നാണ്​ അന്ന്​ മുഖ്യമന്ത്രി അതിനെ വിശേഷിപ്പിച്ചത്​. അഞ്ചുവർഷം കഴിഞ്ഞ്​ കോഴിക്കോട്​ മെഡിക്കൽ കോളജ്​ വളപ്പിൽ ഭാര്യക്ക് കൂട്ടിരിക്കാൻ വന്ന ആദിവാസി യുവാവിനെ മൊബൈലും പണവും മോഷ്ടിച്ച ആരോപണം ചുമത്തി ജനം കിരാതവൃത്തി ആവർത്തിച്ചു. അന്നും നീതി തേടി ​​ചെന്ന ആദിവാസിജന്മത്തെ ശപിക്കുകയായിരുന്നു പൊലീസ്​. നവോത്ഥാന കേരളം പിന്നെയും മുന്നോട്ടുപോയി നവകേരളത്തിലേക്ക്​ മൂന്നാമൂഴം തേടുമ്പോഴും അധഃകൃതജീവിതങ്ങളോടുള്ള മനുഷ്യത്വരഹിതസമീപനം തരിമ്പും മാറിയിട്ടില്ല. ആദിവാസി, ദലിത്​ പിന്നാക്ക വിഭാഗങ്ങളുടെ സങ്കടങ്ങളോടുപോലും കനിയാത്ത ധാർഷ്ട്യത്തിന്‍റെ അധികാരസംവിധാനവുമായി ഇടതുസർക്കാർ ഏതു നവകേരളത്തിലേക്കാണാ​വോ നയിക്കുന്നത്​?