Begin typing your search above and press return to search.
exit_to_app
exit_to_app
Homechevron_rightOpinionchevron_rightEditorialchevron_rightഅ​ഫ്സ്പ:...

അ​ഫ്സ്പ: പു​ന​രാ​ലോ​ച​ന​യു​ടെ ശു​ഭ​സൂ​ച​ന​ക​ൾ

text_fields
bookmark_border
അ​ഫ്സ്പ: പു​ന​രാ​ലോ​ച​ന​യു​ടെ ശു​ഭ​സൂ​ച​ന​ക​ൾ
cancel

സാ​യു​ധ​സേ​ന പ്ര​ത്യേ​കാ​ധി​കാ​ര നി​യ​മം ('അ​ഫ്സ്പ') വ​ട​ക്കു​കി​ഴ​ക്ക​ൻ മേ​ഖ​ല​യി​ൽ പി​ൻ​വ​ലി​ക്കാ​നു​ള്ള ശ്ര​മ​ങ്ങ​ൾ സ്വാ​ഗ​തം​ചെ​യ്യ​പ്പെ​ടേ​ണ്ട​താ​ണ്. സ്ഥി​തി​ഗ​തി​ക​ൾ മെ​ച്ച​പ്പെ​ടു​ത്താ​ൻ സ​ർ​ക്കാ​ർ ചെ​യ്തു​വ​രു​ന്ന നീ​ക്ക​ങ്ങ​ൾ ഫ​ല​വ​ത്താ​വു​ക​യാ​ണെ​ങ്കി​ൽ ഈ ​പ്ര​ദേ​ശ​ങ്ങ​ൾ പൂ​ർ​ണ​മാ​യി​ത്ത​ന്നെ അ​ഫ്സ്പ​യി​ൽ​നി​ന്ന് മു​ക്ത​മാ​ക്കാ​നാ​വും എ​ന്ന് പ്ര​ധാ​ന​മ​ന്ത്രി ന​രേ​ന്ദ്ര മോ​ദി സൂ​ചി​പ്പി​ച്ചു​ക​ഴി​ഞ്ഞു. അ​സ്വ​സ്ഥ പ്ര​ദേ​ശ​മെ​ന്ന് വി​ജ്ഞാ​പ​നം ചെ​യ്ത ഇ​ട​ങ്ങ​ളി​ൽ സാ​യു​ധ​സേ​ന​ക്ക് ക​ടി​ഞ്ഞാ​ണി​ല്ലാ​ത്ത അ​ധി​കാ​രം ന​ൽ​കു​ന്ന അ​ഫ്സ്പ വ​ൻ​തോ​തി​ൽ ദു​രു​പ​യോ​ഗ​ത്തി​നും പൗ​രാ​വ​കാ​ശ-​മ​നു​ഷ്യാ​വ​കാ​ശ ലം​ഘ​ന​ങ്ങ​ൾ​ക്കും ഇ​ടം​ന​ൽ​കി​യി​ട്ടു​ണ്ട്. ഇ​ത് ഏ​റെ വി​മ​ർ​ശ​ന​ങ്ങ​ൾ​ക്കി​ട​യാ​ക്കി​യി​ട്ടു​മു​ണ്ട്. 'നി​യ​മാ​തീ​ത നി​യ​മ'​മെ​ന്ന് വി​ശേ​ഷി​പ്പി​ക്ക​പ്പെ​ടു​ന്ന അ​ഫ്സ്പ പി​ൻ​വ​ലി​ക്കാ​ൻ പ​ല​കു​റി ശ്ര​മ​ങ്ങ​ൾ ന​ട​ന്നി​ട്ടു​ണ്ടെ​ങ്കി​ലും സൈ​നി​ക​വി​ഭാ​ഗ​ങ്ങ​ളി​ലെ ലോ​ബി​ക​ളും രാ​ഷ്ട്രീ​യ​നേ​തൃ​ത്വ​ങ്ങ​ളു​ടെ നി​ക്ഷി​പ്ത താ​ൽ​പ​ര്യ​ങ്ങ​ളും ത​ട​സ്സം​നി​ന്ന​താ​യി​ട്ടാ​ണ് റി​പ്പോ​ർ​ട്ടു​ക​ൾ പ​റ​യു​ന്ന​ത്. നാ​ലു​മാ​സം മു​മ്പ് നാ​ഗാ​ലാ​ൻ​ഡി​ലെ മോ​ൺ ജി​ല്ല​യി​ൽ സൈ​ന്യം വെ​ടി​വെ​ച്ച് 15 സാ​ധാ​ര​ണ​ക്കാ​ർ മ​രി​ച്ച സം​ഭ​വം വ​ൻ പ്ര​തി​ഷേ​ധം ക്ഷ​ണി​ച്ചു​വ​രു​ത്തി. ആ​ളു​മാ​റി​പ്പോ​യ​താ​ണെ​ന്ന​ത്രെ കൂ​ട്ട​ക്കൊ​ല​ക്ക് അ​ധി​കൃ​ത​രു​ടെ വി​ശ​ദീ​ക​ര​ണം. അ​ഫ്സ്പ​യു​ടെ ച​രി​ത്ര​ത്തി​ൽ ഇ​ത് ഒ​റ്റ​പ്പെ​ട്ട സം​ഭ​വ​മ​ല്ല. വി​ഘ​ട​ന​വാ​ദ​ത്തി​നും ഭീ​ക​ര​വാ​ദ​ത്തി​നു​മെ​തി​രെ എ​ന്ന് പ​റ​ഞ്ഞ് 64 വ​ർ​ഷം മു​മ്പ് നി​ല​വി​ൽ​വ​ന്ന​ശേ​ഷം അ​ത്ത​രം കു​റ്റ​വാ​ളി​ക​ളെ​ക്കാ​ൾ കൂ​ടു​ത​ൽ സി​വി​ലി​യ​ന്മാ​ർ ഈ ​നി​യ​മ​ത്തി​നി​ര​യാ​യി​ട്ടു​ണ്ടെ​ന്ന് പ​ഠ​ന​ങ്ങ​ൾ കാ​ണി​ക്കു​ന്നു. അ​തി​ക്രൂ​ര​മാ​യ പീ​ഡ​ന​ങ്ങ​ളു​ടെ ക​ഥ​ക​ളും പു​റ​ത്തു​വ​ന്നി​ട്ടു​ണ്ട്. നാ​ഗാ കു​ന്നു​ക​ളി​ലെ വി​ഘ​ട​ന​പ്ര​വ​ർ​ത്ത​ന​ങ്ങ​ൾ ത​ട​യാ​ൻ വേ​ണ്ടി വ​ള​രെ പ​രി​മി​ത​കാ​ല​ത്തേ​ക്കെ​ന്ന നി​ല​ക്ക് പാ​സാ​ക്കി​യ അ​ഫ്സ്പ പി​ന്നീ​ട് ആ​റ​ര​പ്പ​തി​റ്റാ​ണ്ടു​കാ​ലം തു​ട​രു​ന്ന​തും അ​രു​ണാ​ച​ൽ​പ്ര​ദേ​ശ്, അ​സം, മ​ണി​പ്പൂ​ർ, മേ​ഘാ​ല​യ, മി​സോ​റം, ത്രി​പു​ര തു​ട​ങ്ങി മ​റ്റു വ​ട​ക്കു​കി​ഴ​ക്ക​ൻ സ്ഥ​ല​ങ്ങ​ളി​ലേ​ക്കും ജ​മ്മു-​ക​ശ്മീ​ർ, പ​ഞ്ചാ​ബ് എ​ന്നി​വി​ട​ങ്ങ​ളി​ലേ​ക്കും വ്യാ​പി​പ്പി​ക്കു​ന്ന​തു​മാ​ണ് രാ​ജ്യം ക​ണ്ട​ത്. തോ​ന്നി​യ​പോ​ലെ അ​റ​സ്റ്റ്, മ​ർ​ദ​നം, ബ​ലാ​ത്സം​ഗം, കൊ​ല, വാ​റ​ന്റി​ല്ലാ​തെ വീ​ടു​ക​ളി​ൽ തി​ര​ച്ചി​ൽ, സ്വ​ത്ത് ന​ശി​പ്പി​ക്ക​ൽ എ​ന്നി​ങ്ങ​നെ അ​സം​ഖ്യം കു​റ്റ​ങ്ങ​ൾ സൈ​നി​ക​ർ ന​ട​ത്തി​യ​താ​യി റി​പ്പോ​ർ​ട്ടു​ക​ൾ വ​ന്നി​ട്ടും നി​യ​മ​ത്തി​ന്റെ പ​രി​ര​ക്ഷ കാ​ര​ണം മ​ഹാ​ഭൂ​രി​പ​ക്ഷ​വും ശി​ക്ഷാ​ന​ട​പ​ടി​ക​ളി​ൽ​നി​ന്ന് ഒ​ഴി​വാ​ക്ക​പ്പെ​ട്ടു. രാ​ഷ്ട്രീ​യ കൂ​ടി​യാ​ലോ​ച​ന​യി​ലൂ​ടെ ജ​നാ​ധി​പ​ത്യ​പ​ര​മാ​യി പ്ര​ശ്നം പ​രി​ഹ​രി​ക്കു​ന്ന​തി​നു പ​ക​രം ജ​ന​വി​രു​ദ്ധ​മാ​യി സ​ർ​ക്കാ​ർ സൈ​നി​ക​ബ​ല​ത്തെ ആ​ശ്ര​യി​ക്കു​ന്ന അ​വ​സ്ഥ​യാ​ണ് ഇ​ത് സൃ​ഷ്ടി​ച്ച​ത്.

പ​ഞ്ചാ​ബി​ൽ 1994ൽ ​അ​ഫ്സ്പ പി​ൻ​വ​ലി​ച്ചെ​ങ്കി​ലും മ​റ്റി​ട​ങ്ങ​ളി​ൽ തു​ട​ർ​ന്നു. ക​ശ്മീ​രി​ൽ പ്ര​ശ്നം വ​ഷ​ളാ​ക്കു​ക​യാ​ണ് ഈ ​നി​യ​മം ചെ​യ്ത​ത്. അ​ഫ്സ്പ പ്രാ​ബ​ല്യ​ത്തി​ൽ വ​രു​ത്താ​ൻ പാ​ക​ത്തി​ൽ 'അ​സ്വ​സ്ഥ പ്ര​ദേ​ശ' വി​ജ്ഞാ​പ​നം ഭ​ര​ണ​കൂ​ടം പു​റ​ത്തു​വി​ട്ടാ​ൽ അ​ത് കോ​ട​തി​യി​ൽ ചോ​ദ്യം​ചെ​യ്യാ​ൻ പാ​ടി​ല്ലെ​ന്നാ​ണ് വ്യ​വ​സ്ഥ. അ​മി​താ​ധി​കാ​ര​ത്തി​ന്റെ മ​റ്റൊ​രു വ​ശ​മാ​ണ്, സി​വി​ലി​യ​ന്മാ​രെ കൊ​ന്നാ​ൽ​പോ​ലും കേ​ന്ദ്ര സ​ർ​ക്കാ​റി​ന്റെ രേ​ഖാ​മൂ​ല​മു​ള്ള അ​നു​മ​തി​യി​ല്ലാ​തെ സൈ​ന്യ​ത്തി​ലെ കു​റ്റ​വാ​ളി​ക​ൾ​ക്കെ​തി​രെ ഒ​രു ന​ട​പ​ടി​യും പാ​ടി​ല്ല എ​ന്ന​ത്. അ​ഫ്സ്പ​യു​ടെ 4എ ​വ​കു​പ്പ്, ഭ​ര​ണ​ഘ​ട​ന ന​ൽ​കു​ന്ന ജീ​വി​ക്കാ​നു​ള്ള അ​വ​കാ​ശം ലം​ഘി​ക്കു​ന്നു. സ്വാ​ത​ന്ത്ര്യം, സു​ര​ക്ഷ എ​ന്നീ ഭ​ര​ണ​ഘ​ട​ന ന​ൽ​കി​യ പൗ​രാ​വ​കാ​ശ​ങ്ങ​ളു​ടെ നി​ഷേ​ധ​മാ​ണ് അ​ഫ്സ്പ​യു​ടെ 4സി ​വ​കു​പ്പ്. നി​യ​മാ​നു​സൃ​ത പ​രി​ഹാ​രം തേ​ടാ​ൻ പൗ​ര​ന്മാ​ർ​ക്കു​ള്ള അ​വ​കാ​ശ​ത്തെ നി​രാ​ക​രി​ക്കു​ന്ന​താ​ണ് 6ാം വ​കു​പ്പ്. ആ​ധു​നി​ക ജ​നാ​ധി​പ​ത്യ​സ​മൂ​ഹ​ത്തി​ന് നി​ര​ക്കാ​ത്ത കൊ​ടും​വ്യ​വ​സ്ഥ​ക​ൾ ദു​രു​പ​യോ​ഗം ചെ​യ്യാ​ൻ സാ​ധ്യ​ത​യു​ണ്ടെ​ന്ന് അ​ഫ്സ്പ നി​യ​മ​നി​ർ​മാ​ണ​ത്തി​ന്റെ ഘ​ട്ട​ത്തി​ൽ എം.​പി​മാ​രും മ​നു​ഷ്യാ​വ​കാ​ശ പ്ര​സ്ഥാ​ന​ങ്ങ​ളും ആ​വ​ർ​ത്തി​ച്ച് മു​ന്ന​റി​യി​പ്പ് ന​ൽ​കി​യി​രു​ന്ന​താ​ണ്. ക​ഴി​ഞ്ഞ ആ​റ​ര​പ്പ​തി​റ്റാ​ണ്ടു​കാ​ലം ആ ​മു​ന്ന​റി​യി​പ്പു​ക​ൾ പു​ല​രു​ന്ന​ത് നാ​ട് ക​ണ്ടു. വ്യാ​ജ ഏ​റ്റു​മു​ട്ട​ൽ കൊ​ല​ക​ൾ, പൗ​ര​ന്മാ​രെ ത​ട്ടി​ക്കൊ​ണ്ടു​പോ​യി 'അ​പ്ര​ത്യ​ക്ഷ​രാ​ക്ക​ൽ', 'അ​ർ​ധ​വി​ധ​വ​ക​ൾ' തു​ട​ങ്ങി​യ പ​ദാ​വ​ലി​ക​ൾ​കൂ​ടി ഭ​ര​ണ​കൂ​ട ഭീ​ക​ര​ത​യു​ടെ പ​ട്ടി​ക​യി​ലേ​ക്കു വ​ന്നു. മ​ണി​പ്പൂ​രി​ലെ നി​യ​മ​ബാ​ഹ്യ കൊ​ല​ക​ൾ​ക്കി​ര​യാ​യ​വ​രു​ടെ കു​ടും​ബ​ങ്ങ​ളു​ടെ സം​ഘ​ട​ന (ഇ.​ഇ.​വി.​എ​ഫ്.​എ.​എം -Extrajudicial Execution Victim Families Association Manipur) സു​പ്രീം​കോ​ട​തി​ക്ക് സ​മ​ർ​പ്പി​ച്ച പ​രാ​തി​യി​ൽ സൈ​നി​ക​ർ കൊ​ന്ന 1528 പേ​രു​ടെ കാ​ര്യം ചൂ​ണ്ടി​ക്കാ​ട്ടി​യി​രു​ന്നു. സു​പ്രീം​കോ​ട​തി നി​യോ​ഗി​ച്ച അ​ന്വേ​ഷ​ണ ക​മീ​ഷ​ൻ ഇ​ര​ക​ളി​ൽ ആ​ർ​ക്കും കു​റ്റ​കൃ​ത്യ​ങ്ങ​ളു​ടെ ച​രി​ത്ര​മി​ല്ലെ​ന്ന് ക​ണ്ടെ​ത്തു​ക​യും ചെ​യ്തു. അ​ഫ്സ്പ​യു​ടെ ഭീ​ക​ര​ത​യി​ലേ​ക്ക് ചെ​റി​യ സൂ​ച​ന മാ​ത്ര​മാ​ണ് ഇ​ത്.

ഫ​ല​ത്തി​ൽ, അ​മി​താ​ധി​കാ​ര​പ്ര​യോ​ഗ​ത്തി​നും നീ​തി​ന്യാ​യ​നി​യ​മ​ങ്ങ​ളെ മ​റി​ക​ട​ക്കു​ന്ന​തി​നും ഭ​ര​ണ​കൂ​ടം സ്വ​യം അ​ണി​ഞ്ഞ ജ​ന​വി​രു​ദ്ധ ആ​യു​ധ​മാ​ണ് അ​ഫ്സ്പ. നാ​ഗാ​ലാ​ൻ​ഡ്, മ​ണി​പ്പൂ​ർ, അ​സം എ​ന്നീ സം​സ്ഥാ​ന​ങ്ങ​ളി​ലെ കു​റെ പ്ര​ദേ​ശ​ങ്ങ​ൾ ഇ​പ്പോ​ൾ അ​തി​​ന്റെ വ​രു​തി​യി​ൽ​നി​ന്ന് മു​ക്ത​മാ​ക്ക​പ്പെ​ട്ടു എ​ന്ന​ത് ആ​ശ്വാ​സ​ക​ര​മാ​ണ്. ക​ശ്മീ​ർ മേ​ഖ​ല അ​ട​ക്കം മ​റ്റു സ്ഥ​ല​ങ്ങ​ൾ​കൂ​ടി ഈ ​നി​യ​മ​ത്തി​ൽ​നി​ന്ന് ഒ​ഴി​വാ​ക്ക​പ്പെ​ടു​ക​യാ​ണ് വേ​ണ്ട​ത്. ഭാ​ഗി​ക​മാ​യ​ല്ല, പൂ​ർ​ണ​മാ​യി​ത്ത​ന്നെ നി​യ​മം പി​ൻ​വ​ലി​ക്കു​മ്പോ​ഴാ​ണ് ജ​ന​ങ്ങ​ളോ​ടു​ള്ള നീ​തി​യാ​വു​ക. പ്ര​ശ്ന​ങ്ങ​ൾ പ​രി​ഹ​രി​ക്കാ​ൻ ജ​നാ​ധി​പ​ത്യ​പ​ര​മാ​യ കൂ​ടി​യാ​ലോ​ച​ന​ക​ളും ത​ദ്ദേ​ശീ​യ​രെ ഉ​ൾ​പ്പെ​ടു​ത്തി​യു​ള്ള ആ​ശ​യ​വി​നി​മ​യ​ങ്ങ​ളും വേ​ണം. രാ​ജ്യ​സു​ര​ക്ഷ ഉ​റ​പ്പു​വ​രു​ത്തി​ക്കൊ​ണ്ടു​ത​ന്നെ പൗ​ര​ന്മാ​രു​ടെ ജീ​വ​നും മ​റ്റ് അ​വ​കാ​ശ​ങ്ങ​ളും​കൂ​ടി പ​രി​ര​ക്ഷി​ക്ക​പ്പെ​ട​ണം. ഇ​തു​വ​രെ ഉ​യ​ർ​ന്ന പ​രാ​തി​ക​ൾ അ​ന്വേ​ഷി​ക്കാ​ൻ ജു​ഡീ​ഷ്യ​ൽ ക​മീ​ഷ​നെ നി​യോ​ഗി​ക്കു​ന്ന​ത് ജ​ന​വി​ശ്വാ​സം വീ​ണ്ടെ​ടു​ക്കാ​നും സ​ഹാ​യ​ക​മാ​കും. ഏ​തു​നി​ല​ക്കും, സ്വ​ന്തം ജ​ന​ങ്ങ​ൾ​ക്കെ​തി​രെ സൈ​നി​ക​ബ​ലം​കൊ​ണ്ട് സം​സാ​രി​ക്കു​ന്ന മോ​ശം അ​വ​സ്ഥ ഉ​ണ്ടാ​കാ​തി​രി​ക്ക​ണം. അ​ഫ്സ്പ എ​ന്ന നി​യ​മം പാ​ടേ പി​ൻ​വ​ലി​ക്കാ​ൻ സ​ർ​ക്കാ​ർ ത​യാ​റാ​കു​മെ​ന്ന് ആ​ശി​ക്കു​ക.

Show Full Article
TAGS:Madhyamam editorial AFSPA 
News Summary - Madhyamam editorial about withdrawal of AFSPA
Next Story