വിഴിഞ്ഞത്ത്​ സമാധാനം കടലെടുക്കരുത്​

വിഴിഞ്ഞത്ത്​ കേരള സർക്കാറിന്‍റെ സഹകരണത്തോടെ പൊതു-സ്വകാര്യ പങ്കാളിത്ത പദ്ധതിയായി അദാനി പോർട്​സ്​ നടത്തുന്ന തുറമുഖനിർമാണത്തിനെതിരെ പ്രദേശത്തെ ജനങ്ങൾ നടത്തിവരുന്ന സമരം കഴിഞ്ഞ ദിവസം അക്രമാസക്തമായി. ശനിയാഴ്​ചത്തെ സംഘർഷത്തെ തുടർന്ന്​ കസ്റ്റഡിയിലെടുത്ത അഞ്ചുപേരെ വിട്ടയക്കണമെന്നും വൈദികരടക്കമുള്ള പ്രക്ഷോഭക്കാർക്കെതിരായ കള്ളക്കേസ്​ പിൻവലിക്കണമെന്നും ആവശ്യപ്പെട്ട്​ ഞായറാഴ്ച സമരക്കാർ ​പൊലീസ്​ സ്​റ്റേഷൻ ഉപരോധിച്ചു. അത്​ വൈകീട്ട്​ സംഘർഷത്തിൽ കലാശിച്ചു. ആ​ക്രമികൾ പൊലീസ് ​​സ്​റ്റേഷനിൽ അതിക്രമിച്ചുകയറി ​പൊലീസ്​ ജീപ്പുകൾ തകർക്കുകയും പൊലീസിനെ ആക്രമിക്കുകയും ചെയ്തു. ആൾക്കൂട്ടത്തെ പിരിച്ചുവിടാൻ ലാത്തിച്ചാർജും കണ്ണീർവാതകവും പ്രയോഗിക്കേണ്ടിവന്നു. 35 പൊലീസുകാർക്കും സമരക്കാരിൽ ചിലർക്കും പരിക്കുണ്ട്​. 105 ദിവസം പിന്നിട്ട സമരത്തിൽനിന്നു പിറകോട്ടില്ല എന്ന വാശിയിലാണ്​ തുറമുഖവിരുദ്ധ പ്രതിഷേധക്കാർ. മറുഭാഗത്ത്​ സർക്കാറാവട്ടെ, സമരങ്ങളും നിയമവ്യവഹാരങ്ങളുംമൂലം മുടന്തിനീങ്ങിയ തുറമുഖനിർമാണം അതിവേഗം പൂർത്തിയാക്കുന്ന കാര്യത്തിൽ വിട്ടുവീഴ്ചക്കൊരുക്കമില്ല എന്ന ദൃഢനിശ്ചയത്തിലും. ഇതോടൊപ്പം പ്രതിഷേധസമരം കൂടുതൽ കടുത്തതോടെ അദാനിയുടെ തുറമുഖപദ്ധതിയെ അനുകൂലിക്കുന്ന സി.പി.എമ്മും ബി.ജെ.പിയും 'ഐക്യമുന്നണി'യായി സമരക്കാർക്കെതിരെ പോർമുഖം തുറക്കുകകൂടി ചെയ്തതോടെ സ്ഥിതിഗതികൾ കൈവിട്ടുപോകുന്ന നിലയായി. അതാണ്​ ഞായറാഴ്ച വിഴിഞ്ഞത്തെ അനിഷ്ടസംഭവങ്ങളിലേക്കു നയിച്ചത്​.

ഏകദേശം 4000 ചതുരശ്ര മൈൽ അറേബ്യൻ സമുദ്രത്തിൽ വ്യാപിച്ചുകിടക്കുന്ന വിഴിഞ്ഞം കടൽപ്രദേശം 200ൽപരം മത്സ്യങ്ങൾ, അറു​പതോളം അപൂർവം വളർത്തുമത്സ്യങ്ങൾ, അപൂർവ ഇനം ആമകൾ തുടങ്ങി കടൽ ജീവജാലങ്ങളുടെ കലവറയാണ്​. 12 അതുല്യ പവിഴപ്പുറ്റുനിരകൾ നിറഞ്ഞ വിഴിഞ്ഞം 'കടലിനടിയി​ലെ കൊടുംവനം' എന്നാണ്​ അറിയപ്പെടുന്നത്​. ഇന്ത്യയിലെതന്നെ 'പ്രജനന തുറമുഖം' ആണിത്​. ഇവിടെനിന്നാണ് കേരള തീരത്തേക്കും ബംഗാൾ ഉൾക്കടലിലേക്കും ഇന്ത്യ മഹാസമുദ്രത്തിന്റെ ഒരു ഭാഗത്തേക്കും ലക്ഷദ്വീപ് കടലിലേക്കും വേണ്ട മത്സ്യങ്ങൾ വളർന്നു ചേക്കേറുന്നത്. ഈ വമ്പിച്ച മത്സ്യവിഭവത്തിനു നിമിത്തമായ കടലിന്‍റെ സവിശേഷതതന്നെയാണ്​ അദാനി ഗ്രൂപ്പിന്‍റെ കണ്ണും ഇവിടെ പതിയാൻ കാരണം. 18-20 മീറ്റർ പ്രകൃത്യാ ആഴമുള്ള ഈ ഭാഗത്ത്​ അഡീഷനൽ ഡ്രഡ്ജിങ്​ കൂടാതെ ഭീമൻ കാർഗോ വാഹനശേഷിയുള്ള ബൾക്​ ഷിപ്പുകൾക്ക്​ നങ്കൂരമടിക്കാൻ കഴിയും. ലോകത്തെ ഏറ്റവും തിരക്കുപിടിച്ച ഷിപ്പിങ്​ ചാനലുകളിലൊന്നായ മലാക്ക കടലിടുക്കിലേക്കുള്ള അന്താരാഷ്ട്രപാതയോട്​ വെറും 10 നോട്ടിക്കൽ മൈൽ ദൂരം മാത്രമേ വിഴിഞ്ഞത്തേക്കുള്ളൂ. ഇവിടെ 238 ഹെക്ടർ സ്ഥലമാണ്​ അദാനിക്കു​ കൈമാറുന്നത്​.

വിഴിഞ്ഞം തുറമുഖത്ത്​ നടത്തുന്ന ഏതൊരു ഡ്രഡ്ജിങ്ങും അടിത്തട്ട് കോരലും പുലിമുട്ട് നിർമാണവും കടലിന്റെ സന്തുലനാവസ്ഥ തകർക്കുമെന്നു കണ്ടാണ്​ നേരത്തേ പദ്ധതി ഉപേക്ഷിച്ചത്​. ഇപ്പോൾ വീണ്ടും തുടക്കമിട്ടപ്പോൾ പുലിമുട്ടിൽ ഇരുവശത്തും സംഭവിച്ച ഗുരുതര മാറ്റങ്ങൾ അന്നത്തെ ആശങ്ക ശരിവെക്കുന്നു. വിഴിഞ്ഞം ഫിഷിങ് ഹാർബർ ഉപയോഗശൂന്യമായി. മത്സ്യത്തൊഴിലാളികൾക്ക്​ മത്സ്യബന്ധനത്തിന് വള്ളമിറക്കാനോ വലകെട്ടാ​നോ മീൻ ഉണക്കാനോ കഴിയാതെ വന്നു. മത്സ്യലഭ്യത വളരെ കുറഞ്ഞതിനാൽ വിഴിഞ്ഞം, വലിയതുറ, ചെറിയതുറ, ബീമാപള്ളി, കോവളം, ശംഖുംമുഖം തുടങ്ങിയ പ്രദേശങ്ങളിലെ മത്സ്യത്തൊഴിലാളികൾ കടക്കെണിയിലായി. അങ്ങനെ ഇരിക്കപ്പൊറുതിയില്ലാതായപ്പോഴാണ്​ പ്രദേശത്തുകാർ സമരത്തിനിറങ്ങിയത്​. ലത്തീൻ കത്തോലിക്കാ വിഭാഗത്തിന്​ സ്വാധീനമുള്ള മേഖലയായതിനാൽ ചർച്ച്​ നേതൃത്വം സ്വാഭാവികമായും സമരത്തിന്‍റെ മുൻകൈയായി മാറി. വികസനമായിക്കോട്ടെ, അതു തങ്ങളുടെ ഉപജീവനമാർഗം മുട്ടിക്കരുത്​ എന്നാണ്​ മത്സ്യത്തൊഴിലാളികളും നാട്ടുകാരും വിളിച്ചുപറയുന്നത്​. ഗവൺമെന്‍റുമായി നടത്തിയ ചർച്ചകൾ പരാജയപ്പെട്ടതും അത്തരത്തിലുള്ള ഉറപ്പ്​ നൽകാൻ കഴിയുന്നില്ല എന്നതിനാലാണ്​.

വികസനപദ്ധതികൾക്കെതിരായ സമരത്തി​ൽ ഭരണകൂടങ്ങളും കോർ​പറേറ്റുകളും അടുത്ത കാലത്തായി കണ്ടുപിടിച്ച സൂത്രംതന്നെ ഇവിടെയും അവതരിച്ചു-സമരത്തിനെതിരായി കൂട്ടായ്മയൊരുക്കുക. വിഴിഞ്ഞത്ത്​ അത്​ കേന്ദ്രത്തിലെ ഭരണകക്ഷിയായ ബി.ജെ.പിയും അവരുടെ സാമ്പത്തിക, വികസനനയങ്ങളെ അടിമുടി എതിർക്കുന്ന സംസ്ഥാനം ഭരിക്കുന്ന സി.പി.എമ്മും ചേർന്ന മുന്നണിയായി എന്നതാണ്​ കൗതുകകരം. പിന്നെ സമരക്കാരെ ബ്രാൻഡ്​ ചെയ്യുന്ന അഭ്യാസമായി. ഗെയിൽ, നാഷനൽ ഹൈവേ സമരത്തിലെന്നപോലെ ഇവിടെ തീവ്ര/ഭീകരവാദി ചാപ്പയടി നടന്നില്ല (അത്​ എരഞ്ഞിമാവ്​ മുതൽ ആവിക്കലും കോതിയും വരെയുള്ള പ്രത്യേക സമുദായത്തിനു സംവരണം ചെയ്യപ്പെട്ടതാണ്). വിഴിഞ്ഞത്ത്​ സമരത്തിനിറങ്ങിയ ബഹുഭൂരിഭാഗത്തിന്‍റെ മതം നോക്കി ലത്തീൻ അതിരൂപത ആർച്ച് ബിഷപ്പിനെ വരെ പ്രതിപ്പട്ടികയിൽ ചേർക്കുകയാണ്​. സമരത്തിനെതിരെ വംശീയമായ ആക്രമണവും ഭീഷണിയുമായി സംഘ്​പരിവാർ​​ നേതാക്കളും രംഗത്തെത്തി. അങ്ങനെ സമരത്തിന്​ സമാധാനപരിഹാരം കണ്ടെത്താനുള്ള വഴികൾ കൊട്ടിയടക്കുന്ന രീതിയാണ്​ നിർഭാഗ്യവശാൽ വിഴിഞ്ഞത്ത്​ കണ്ടത്​. അതിൽ സർക്കാർ കൃത്യമായി ഒരു പക്ഷം പിടിക്കുന്ന നിലയുമായി.

വിവേകപൂർവമായ പരിഹാരത്തിന്​ മുൻകൈയെടുക്കേണ്ടത്​ ഭരണകൂടമാണ്​. അന്നം മുട്ടിപ്പോവുന്ന ​വെ​പ്രാളത്തിലാണ്​ പാവപ്പെട്ട മത്സ്യത്തൊഴിലാളികളും സാധാരണക്കാരും സമരത്തിനിറങ്ങിയത്​ എന്നു മനസ്സിലാക്കി, അവരോട് അനുതപിച്ചും കുത്തകകൾ കുഴിതോണ്ടുന്നത്​ നിരാലംബ ജീവിതങ്ങളുടേതാണെന്നു തിരിച്ചറിഞ്ഞ്​ വികസനയജ്ഞത്തി​ൽ വിദ്രോഹങ്ങളുടെ ആഴം കുറക്കാൻ ആവതു ശ്രമിച്ചുമുള്ള പരിഹാ​രമാണ്​ സർക്കാറിൽനിന്നു പ്രതീക്ഷിക്കുന്നത്​. ആയുധം പ്രയോഗിച്ചും കേസിൽ കുടുക്കിയും നഷ്ടപരിഹാരം ചുമത്തിയും പ്രദേശവാസികളെ തമ്മിലടിപ്പിച്ചും കുത്തകകൾക്കു വികസനമു​ന്നേറ്റമാവാം. എന്നാൽ, ആ വിദ്രോഹക്കാരുടെ ഒത്താശക്കാരാകരുതല്ലോ ഇടതു ജനാധിപത്യ സർക്കാർ.