തളർന്നുപോകരുത്​ ഈ അപായ തരംഗത്തിലും

വാക്​സിനുകളുടെ വരവോടെ കോവിഡ്​ വിരുദ്ധ പോരാട്ടം പാതി പിന്നിട്ടുവെന്ന പൊതുവിശ്വാസത്തെ അട്ടിമറിച്ച് വീണ്ടും നീരാളിക്കൈകളാൽ വരിഞ്ഞുമുറുക്കുകയാണ്​ നൂറ്റാണ്ടി​െൻറ മഹാമാരി. വികസിതമെന്നോ വികസ്വരമെന്നോ വ്യത്യാസമില്ലാതെ ലോകരാഷ്​ട്രങ്ങളെ എമ്പാടും മുൾമുനയിൽ നിർത്തുന്നു ഈ ആഗോള അടിയന്തരാവസ്​ഥ. എന്നാൽ, ഇന്ത്യയിലെ സാഹചര്യം ആഗോള അവസ്​ഥയെക്കാൾ ഏറെ മടങ്ങ്​ ഗുരുതരവുമാണ്​. ജനിതക മാറ്റം സംഭവിച്ച വൈറസ്​ വകഭേദങ്ങൾ രാജ്യമൊട്ടുക്ക്​. ലോകത്ത്​ റിപ്പോ

ർട്ട്​ ചെയ്യപ്പെടുന്ന കോവിഡ്​ കേസുകളിൽ അഞ്ചിലൊന്ന്​ ഇന്ത്യയിൽ നിന്നാണ്​. കഴിഞ്ഞ 24 മണിക്കൂറിനിടെ മാത്രം 2,00,739 ​പുതിയ രോഗബാധിതരെ കണ്ടെത്തിയിരിക്കുന്നു. ആദ്യതരംഗത്തിൽ പ്രായമായവരും കടുത്ത രോഗങ്ങളുള്ളവരുമാണ്​ ഇരകളായിരുന്നതെങ്കിൽ ഇക്കുറി യുവജനങ്ങളെ വൻതോതിൽ ബാധിക്കുന്നുവെന്നാണ്​ രാജ്യ തലസ്​ഥാനമുൾപ്പെടെ വിവിധ സംസ്​ഥാനങ്ങളിൽനിന്നുള്ള റിപ്പോർട്ട്. പ്രതിരോധ മരുന്നു കുപ്പികൾ കാലിയായിരിക്കുന്നു. രോഗ മൂർധന്യത്തിൽ നിൽക്കുന്ന വയോധികരെപ്പോലും പ്രവേശിപ്പിക്കാൻ ഇടമില്ലാത്ത വിധം ആശുപത്രികൾ നിറഞ്ഞുകവിഞ്ഞിരിക്കുന്നു. ഓക്​സിജൻ സിലിണ്ടറുകൾക്ക്​ കടുത്ത ക്ഷാമം നേരിടുന്നു, എന്തിനേറെ, മരണപ്പെട്ടവരെ സംസ്​കരിക്കാൻ ശ്​മശാനങ്ങളിൽപ്പോലും സ്​ഥലം തികയാതെയായിരിക്കുന്നു. ​രോഗബാധിതനായ പിതാവുമായി മഹാരാഷ്​ട്രയിലെ നിരവധി ആശുപത്രികളിൽ കയറിയിറങ്ങിയിട്ടും ഒരു കിടക്ക കിട്ടാതെ അയൽസംസ്​ഥാനമായ തെലങ്കാനയിലേക്ക്​ ചികിത്സ തേടിപ്പോവുകയും അവിടെയും രക്ഷയില്ലാതെ 'ഒന്നുകിൽ ചികിത്സ നൽകൂ, അല്ലെങ്കിൽ പിതാവിനെ കൊന്നു തരൂ' എന്നു കേണുപറയുന്ന യുവാവ്​ ഇന്ത്യ ഇന്ന്​ അഭിമുഖീകരിക്കുന്ന സാഹചര്യത്തി​െൻറ നേർചിത്രമാണ്​.

കഴിഞ്ഞ വർഷം രോഗവ്യാപനം തുടങ്ങിയ ഘട്ടത്തിൽ ഒരു മുന്നൊരുക്കവുമില്ലാതെ ലോക്​ഡൗൺ പ്രഖ്യാപിക്കുക​യും രാജ്യത്തെ ജനങ്ങളുടെ ജീവിതം കോവിഡിനേക്കാൾ ദുരിതപൂർണമാക്കി മാറ്റുകയും ചെയ്​ത ഇന്ത്യൻ ഭരണകൂടത്തിന്​ ഇനിയെന്തു ചെയ്യണമെന്ന്​ തെല്ലും​ നിശ്ചയമില്ലാത്ത അവസ്​ഥയാണ്​. പാവപ്പെട്ട ജനതയെക്കൊണ്ട്​ പാത്രം കൊട്ടിച്ചതും വിളക്ക്​ കത്തിപ്പിച്ചതുമെല്ലാം കോവിഡ്​ വിരുദ്ധ പോരാട്ടത്തിലെ നാഴികക്കല്ലുകളായി എണ്ണുന്ന ഭരണാധികാരിയും ശിങ്കിടിയും രാജ്യമൊട്ടുക്ക്​ ചികിത്സ കിട്ടാതെ മരിച്ചുവീഴുന്ന മനുഷ്യരെക്കുറിച്ച്​ ആലോചിക്കാൻ മെനക്കെടാതെ പശ്ചിമബംഗാൾ സംസ്​ഥാനത്തി​​െൻറ ഭരണം ഏതുവിധേനയും പിടിച്ചെടുക്കാനുള്ള നിതാന്ത പരിശ്രമത്തിലാണ്​.

ലോകത്ത്​ ഏറ്റവുമധികം വാക്​സിൻ ഉൽ​പാദിപ്പിക്കുന്ന രാജ്യമെന്നും വിവിധ രാജ്യങ്ങൾക്ക്​ വാക്​സിൻ നൽകുന്ന രാജ്യമെന്നുമുള്ള ഖ്യാതിക്കൊപ്പം ഏറ്റവുമധികം വാക്​സിൻ ക്ഷാമം നേരിടുന്ന രാജ്യവും ഇന്ത്യ തന്നെ. ഊതിപ്പെരുപ്പിച്ച കണക്കുകളും പബ്ലിക്​ റിലേഷൻ സാഹിത്യങ്ങളും ആവോളം ലഭ്യമാണെങ്കിലും മുൻനിര കോവിഡ്​ പോരാളികൾക്കുപോലും രണ്ടു ഡോസ്​ ലഭ്യമാക്കാൻ ഭരണകൂടത്തിന്​ കഴിഞ്ഞിട്ടില്ല. രോഗപ്രതിരോധ പ്രവർത്തനത്തിന്​ നിസ്​തുലമായ പങ്കുവഹിക്കുന്ന ശുചീകരണ തൊഴിലാളികൾ ഉൾപ്പെടെ വലിയ ഒരു സമൂഹം ഇപ്പോഴും വാക്​സിനേഷൻ ലഭിക്കാതെ പുറത്താണ്​.

ക്ഷാമം പരിഹരിക്കാനെന്ന പേരിൽ ലോകത്ത്​ പ്രചാരത്തിലുള്ള വാക്​സിനുകൾക്കെല്ലാം അതിവേഗ അനുമതി നൽകാനുള്ള തീരുമാനം ആശാസ്യമാണെന്നു​ പറയാനാവില്ല. മറ്റു രാജ്യങ്ങളിൽ പ്രയോഗശേഷം ഫലസിദ്ധിയെക്കുറിച്ച്​ സംശയനിഴലിലായ വാക്​സിനുകളും ഈ മറവിൽ ഇന്ത്യൻവിപണിയിലേക്ക്​ കടന്നുകൂടിയേക്കുമെന്നത്​ രോഗത്തോളം വലിയ ആശങ്ക തന്നെയാണ്​.

ആരോഗ്യ പ്രവർത്തകരും നയവിദഗ്​ധരും മാധ്യമങ്ങളുമെല്ലാം ചേർന്ന്​ നിരന്തര ബോധവത്​കരണത്തിലൂടെ സാധ്യമാക്കിയ ജാഗ്രത രാഷ്​ട്രീയറാലികൾക്കു വേണ്ടിയും ആഘോഷ-ആചാരങ്ങൾക്കുവേണ്ടിയും കാറ്റിൽ പറത്തിയതാണ്​ രണ്ടാം തരംഗം ഇത്രമേൽ തീവ്രമാവാൻ കാരണമെന്നത്​ കാണാതിരുന്നു കൂടാ. അസമിലെ ആരോഗ്യമന്ത്രി തെരഞ്ഞെടുപ്പ്​ പ്രചാരണ യോഗത്തിൽ പ്രസംഗിക്കവെ സംസ്​ഥാനത്തെ ജനങ്ങൾ മാസ്​ക്​ ധരിക്കേണ്ടതില്ല എന്ന്​ പരസ്യമായി നിർദേശം നൽകിയ സംഭവം പോലുമുണ്ടായി. ലോക്​ഡൗണിനും കോവിഡ്​ വ്യാപനത്തിനും മുമ്പ്​ നടന്ന തബ്​ലീഗ്​ സമ്മേളനത്തി​െൻറ പേരിൽ കോവിഡി​െൻറ പാപഭാരം രാജ്യത്തെ മുസ്​ലിം സമുദായത്തി​െൻറ തലയിൽ കെട്ടിവെച്ച്​ വേട്ടയാടാൻ മത്സരിച്ച ഭരണകൂടവും മാധ്യമങ്ങളും ലക്ഷക്കണക്കിനാളുകൾ സംഗമിക്കുന്ന മറ്റു സമ്മേളനങ്ങളിലൊന്നും അപകട സാധ്യത ദർശിക്കുന്നുമില്ല.

ഭരണകൂടത്തിന്​ വീഴ്​ച പറ്റിയാലും ജാഗ്രത കൈവിടില്ലെന്ന്​ പൗരജനങ്ങൾ അടിയന്തര തീരുമാനമെടുക്കേണ്ട സമയമാണിത്​. ഉത്തരവാദിത്ത ബോധമുള്ള ജനങ്ങളുടെ കൂട്ടായ്​മ വലിയ പങ്കുവഹിക്കേണ്ട സമയം. ഇനിയൊരു ലോക്​ഡൗണിലേക്ക്​ നീങ്ങില്ല എന്ന്​ അധികാരികൾ ആവർത്തിക്കുന്നുണ്ടെങ്കിലും അതിനു സമാനമായ കർശന നടപടികളിലേക്ക്​ നീങ്ങാൻ വരും ദിവസങ്ങളിൽ നിർബന്ധിതമാകുമെന്നുതന്നെയാണ്​ നിലവിലെ സൂചനകൾ. വിവിധ സംസ്​ഥാനങ്ങളിൽ രാത്രികാല കർഫ്യൂ നിലവിൽ വന്നു കഴിഞ്ഞു. കഴിഞ്ഞ ലോക്​ഡൗൺ മൂലം തന്നെ ആകെ തകർന്നടിഞ്ഞ സമ്പദ്​വ്യവസ്​ഥയും സാധാരണ ജനങ്ങളുടെ ജീവിതവും കൂടുതൽ പ്രശ്​നസങ്കീർണമാകുമെന്ന്​ സാരം. എന്തു തന്നെയായാലും മറ്റുള്ള പാർട്ടികളോ സംഘങ്ങളോ സമൂഹങ്ങളോ നിയമം ലംഘിച്ചത്​ നമുക്ക്​ ജാഗ്രത കൈവിടാനുള്ള കാരണമല്ല. പോയ വർഷം പാലിച്ചതി​െൻറ ഇരട്ടി സൂക്ഷ്​മത നിലനിർത്തിയാൽ മാത്രമേ പാതി പിന്നിട്ടു എന്ന്​ ആശ്വസിച്ച പോരാട്ടം ഇനിയും മുന്നോട്ടു കൊണ്ടുപോകാൻ സാധിക്കൂ.