Begin typing your search above and press return to search.
exit_to_app
exit_to_app
Homechevron_rightOpinionchevron_rightEditorialchevron_rightത​ല്ലി​യും ത​ലോ​ടി​യും...

ത​ല്ലി​യും ത​ലോ​ടി​യും ഒ​രു സം​വ​ര​ണ വി​ധി

text_fields
bookmark_border
ത​ല്ലി​യും ത​ലോ​ടി​യും ഒ​രു സം​വ​ര​ണ വി​ധി
cancel




സ​മൂ​ഹ​ത്തി​ൽ ജാ​തീ​യ​വും ച​രി​ത്ര​പ​ര​വു​മാ​യ കാ​ര​ണ​ങ്ങ​ളാ​ൽ പി​ന്നാ​ക്കം ​പോ​യ​വ​രെ​യും വി​വേ​ച​നം നേ​രി​ടു​ന്ന​വ​രെ​യും മു​ഖ്യ​ധാ​ര​യി​ലെ​ത്തി​ക്കാ​നും അ​തു​വ​ഴി സ​മ​ത്വം ഉ​റ​പ്പു​വ​രു​ത്താ​നു​മു​ള്ള ഭ​ര​ണ​ഘ​ട​നാ​പ​ദ്ധ​തി​യാ​ണ്​ സം​വ​ര​ണം. എ​ന്നാ​ൽ, ഭ​ര​ണ​ഘ​ട​ന​യെ​യും സം​വ​ര​ണ​തത്ത്വങ്ങ​ളെ​യും ഉയർത്തിപ്പിടി​ക്കു​ക എ​ന്ന ല​ക്ഷ്യ​ത്തോ​ടെ​യ​ല്ല പ​ല​പ്പോ​ഴും സ​മൂ​ഹ​ത്തി​ൽ സം​വ​ര​ണ​ച​ർ​ച്ച​ക​ൾ ന​ട​ക്കാ​റു​ള്ള​ത്. മ​റി​ച്ച്, സം​വ​ര​ണ​വി​രു​ദ്ധ​ ആ​ശ​യ​ങ്ങ​ളും സ​മ​ര​ങ്ങ​ളും പ​ല​രൂ​പ​ത്തി​ൽ സ​മൂ​ഹ​ത്തി​ൽ ഉ​യ​ർ​ന്നു​വരുമ്പോഴാ​ണ്​ ഇ​ത്ത​രം ച​ർ​ച്ച​ക​ൾ​ക്ക്​ ജ​ന​ശ്ര​ദ്ധ​യും മാ​ധ്യ​മ​പി​ന്തു​ണ​യും ല​ഭി​ക്കു​ക. ഭ​ര​ണ​ഘ​ട​നാ​പ​ര​മാ​യ ഒ​രു അ​വ​കാ​ശം എ​ന്ന​തി​നേ​ക്കാ​ൾ, ആ​രോ​ വെ​ച്ചു​നീ​ട്ടി​യ ഔ​ദാ​ര്യ​മോ ആ​നു​കൂ​ല്യ​മോ എ​ന്ന നി​ല​യി​ലാ​യി​രി​ക്കും ഈ ​സ​ന്ദ​ർ​ഭ​ങ്ങ​ളി​ലെ​ല്ലം സം​വ​ര​ണം എ​ന്ന ആ​ശ​യം അ​വ​ത​രി​പ്പി​ക്ക​പ്പെ​ടാ​റു​ള്ള​ത്. ഇ​തു​പോ​ലു​ള്ള 'ഔ​ദാ​ര്യ​ങ്ങ​ളി'​ലൂ​ടെ സം​വ​ര​ണേ​ത​ര വി​ഭാ​ഗ​ങ്ങ​ൾ​ക്ക്​ അ​വ​സ​രം ന​ഷ്ട​പ്പെ​ടു​ന്നു​വെ​ന്നും അ​തു​വ​ഴി വി​ദ്യാ​ഭ്യാ​സ, തൊ​ഴി​ൽ മേ​ഖ​ല​യി​ൽ 'മെ​റി​റ്റി'​ൽ കാ​ര്യ​മാ​യ ഇ​ടി​വ്​ സം​ഭ​വി​ക്കു​ന്നു​വെ​ന്ന വാ​ദ​മൊ​ക്കെ ക​ട​ന്നു​വ​രു​ന്ന​തും സ​മൂ​ഹ​ത്തി​ന്‍റെ ​പൊ​തു​ബോ​ധ​ത്തി​ൽ അ​തി​ന്​ വ​ലി​യ സ്വീ​കാ​ര്യ​ത ല​ഭി​ക്കു​ന്ന​തു​മൊ​ക്കെ ഇ​ത്ത​രം ച​ർ​ച്ച​ക​ളു​ടെ പ​ശ്ചാ​ത്ത​ല​ത്തി​ൽ​കൂ​ടി​യാ​ണ്. മാ​ർ​ക്ക്​ കു​റ​ഞ്ഞ പി​ന്നാ​ക്ക​ക്കാ​ര​ന്​ ഉ​ന്ന​ത വി​ദ്യാ​ഭ്യാ​സ​ത്തി​നും ​സ​ർ​ക്കാ​ർ തൊ​ഴി​ലി​നു​മെ​ല്ലാം അ​വ​സ​രം ല​ഭി​ക്കു​ന്ന​തും അ​തു​കാ​ര​ണം മു​ന്നാ​ക്ക​ക്കാ​ര​ൻ പു​റന്ത​ള്ള​പ്പെ​ടു​ന്ന​തു​മെ​ല്ലാം മു​ഖ്യ​ധാ​ര സാ​ഹി​ത്യ, സി​നി​മ​യു​ടെ ആ​ഖ്യാ​ന​ങ്ങ​ളാ​യി മാ​റു​ന്ന​തി​ന്‍റെ പി​ന്നി​ലും മ​റ്റൊ​ന്ന​ല്ല. സം​വ​ര​ണ​ത്തി​നെ​തി​രാ​യ ഈ ​മെ​റി​റ്റ് വാ​ദ​ത്തെ ഒ​ര​ള​വി​ൽ തു​റ​ന്നു​കാ​ണി​ച്ചി​രി​ക്കു​ക​യാ​ണ്​ രാ​ജ്യ​ത്തെ പ​ര​മോ​ന്ന​ത നീ​തി​പീ​ഠം. ബി​രു​ദ, ബി​രു​ദാ​ന​ന്ത​ര മെ​ഡി​ക്ക​ൽ കോ​ഴ്​​സു​ക​ളു​ടെ 'നീ​റ്റ്​' അ​ഖി​ലേ​ന്ത്യ ​​േക്വാ​ട്ട​യി​ൽ 27 ശ​ത​മാ​നം പി​ന്നാ​ക്ക​ക്കാ​ർ​ക്ക്​ സം​വ​ര​ണം ചെ​യ്ത കേ​ന്ദ്ര ന​ട​പ​ടി​യെ ശ​രി​വെ​ച്ച വി​ധി​ന്യാ​യ​ത്തി​ലാ​ണ്​ സം​വ​ര​ണ​വി​രു​ദ്ധ​ർ​ക്ക്​ സു​പ്രീം​കോ​ട​തി അ​ക്ക​മി​ട്ട്​ മ​റു​പ​ടി ന​ൽ​കി​യി​രി​ക്കു​ന്ന​ത്.

ക​ഴി​ഞ്ഞ ജൂ​ലൈ​യി​ലാ​ണ്​ ഒ.​ബി.​സി സം​വ​ര​ണം 27 ശ​ത​മാ​ന​മാ​ക്കി​യു​ള്ള കേ​ന്ദ്ര ആ​രോ​ഗ്യ മ​ന്ത്രാ​ല​യ​ത്തി​ന്‍റെ വി​ജ്ഞാ​പ​നം പു​റ​ത്തു​വ​ന്ന​ത്. ഇ​തി​നെ​തി​രെ ഏ​താ​നും ഡോ​ക്ട​ർ​മാർ സു​പ്രീം​കോ​ട​തി​യെ സ​മീ​പി​ച്ചു. ഹ​ര​ജി​ക്കാ​രു​ടെ വാ​ദ​ങ്ങ​ളി​ലൊ​ന്ന്​ മേ​ൽ​പ​റ​ഞ്ഞ 'മെ​റി​റ്റ്​' ത​ന്നെ​യാ​യി​രു​ന്നു. എ​ന്നാ​ൽ, പ​രീ​ക്ഷ​യി​ലെ ​െമ​റി​റ്റും സം​വ​ര​ണ​വും ര​ണ്ടാ​യി​ത​ന്നെ കാ​ണ​ണ​​മെ​ന്ന്​ ജ​സ്റ്റി​സു​മാ​രാ​യ ഡി.​വൈ ച​ന്ദ്ര​ചൂ​ഡ്, എ.​എ​സ്​ ബൊ​പ്പ​ണ്ണ എ​ന്നി​വ​ര​ട​ങ്ങി​യ ബെ​ഞ്ച്​ നി​രീ​ക്ഷിച്ചു. സാ​മൂ​ഹി​ക, സാ​മ്പ​ത്തി​ക, സാം​സ്കാ​രി​കവ​ശ​ങ്ങ​ൾ പ്ര​തി​ഫ​ലി​പ്പി​ക്കാ​ത്ത മ​ത്സ​ര​പ​രീ​ക്ഷ​ക​ൾ​ക്ക്​ ഒ​രാ​ളു​ടെ 'യോ​ഗ്യ​ത' പൂ​ർ​ണ​മാ​യി എ​ങ്ങ​നെ നി​ർ​ണ​യി​ക്കാ​നാ​കു​മെ​ന്ന അ​തി​പ്ര​ധാ​ന​മാ​യൊ​രു ചോ​ദ്യം ഉ​ന്ന​യി​ച്ച​ശേ​ഷ​മാ​ണ്​ ഹ​ര​ജി​ക്കാ​രു​ടെ വാ​ദം ത​ള്ളി സു​പ്രീം​കോ​ട​തി കേ​ന്ദ്ര വി​ജ്ഞാ​പ​ന​ത്തി​ന്​ അം​ഗീ​കാ​രം ന​ൽ​കി​യി​രി​ക്കു​ന്ന​ത്. മ​റ്റൊ​ര​ർ​ഥ​ത്തി​ൽ, മ​ത്സ​രപ്പ​രീ​ക്ഷ​യി​ലെ മാ​ർക്കി​ന്‍റെ അ​ടി​സ്ഥാ​ന​ത്തി​ൽമാ​ത്രം തി​ട്ട​പ്പെ​ടു​ത്താ​വു​ന്ന​ത​ല്ല യോ​ഗ്യ​താ​മാ​ന​ദ​ണ്ഡ​ങ്ങ​ൾ എ​ന്ന സം​വ​ര​ണ​വാ​ദി​ക​ളു​ടെ നി​ല​പാ​ടി​ന്​ പ​ര​മോ​ന്ന​ത നീ​തിപീ​ഠം അ​ടി​വ​ര​യി​ട്ടി​രി​ക്കു​ന്നു. സാ​മൂ​ഹി​ക​മാ​യി പി​ന്നാ​ക്കം നി​ൽ​ക്ക​ുന്ന ഒ​രു വി​ഭാ​ഗ​ത്തി​ൽ ക്രീ​മി​ലെ​യ​ർ വി​ഭാ​ഗ​ത്തി​ന്‍റെ മി​ക​ച്ച ജീ​വി​ത സാ​ഹ​ച​ര്യം ചൂ​ണ്ടി​ക്കാ​ട്ടി ​മൊ​ത്തം വി​ഭാ​ഗ​ത്തി​ന്‍റെ​യും സം​വ​ര​ണം നി​ഷേ​ധി​ക്കണ​മെ​ന്ന വാ​ദ​ത്തെ​യും കോ​ട​തി ത​ള്ളി​ക്ക​ള​ഞ്ഞി​ട്ടു​ണ്ട്. ഒ​ര​ള​വി​ൽ, സം​വ​ര​ണ​വി​രു​ദ്ധ​ർ കാ​ല​ങ്ങ​ളാ​യി ഉ​ന്ന​യി​ച്ചു​കൊ​ണ്ടി​രി​ക്കു​ന്ന ചി​ല വി​ക​ല​ ന്യാ​യ​ങ്ങ​ളെ​യാ​ണ്​ കോ​ട​തി വേ​ണ്ട​വി​ധം കൈ​കാ​ര്യം ചെ​യ്തി​രി​ക്കു​ന്ന​ത്. ആ ​അ​ർ​ഥ​ത്തി​ൽ, ഭ​ര​ണ​ഘ​ട​ന​യു​ടെ അ​ന്ത​സ്സി​നെ​യും അ​തു​വ​ഴി ജ​നാ​ധി​പ​ത്യ​മൂ​ല്യ​ങ്ങ​ളെ​ത്ത​ന്നെ​യും ഉ​യ​ർ​ത്തി​പ്പി​ടി​ക്കു​ന്നു ഈ ​വി​ധിന്യാ​യ​മെ​ന്ന്​ നി​സ്സം​ശ​യം പ​റ​യാം.

എ​ന്നാ​ൽ, വി​ധി​ക്ക്​ ഒ​രു മ​റു​വ​ശം ​കൂ​ടി​യു​ണ്ട്. അ​ത്​ പ​രോ​ക്ഷ​മാ​യി സാ​മ്പ​ത്തി​ക സം​വ​ര​ണ​ത്തെ ശ​രി​വെ​ക്കു​ന്നു​. 'യോ​ഗ്യ​ത'​യെ​ക്കു​റി​ച്ച്​ പ​റ​യു​ന്നി​ട​ത്ത്​ സാ​മൂ​ഹി​കം, സാം​സ്കാ​രി​കം തു​ട​ങ്ങി​യ ഘ​ട​ക​ങ്ങ​ൾ​ക്കൊ​പ്പം 'സാ​മ്പ​ത്തി​ക' മാ​ന​ദ​ണ്ഡ​ങ്ങ​ൾ​കൂ​ടി ചേ​ർ​ത്താ​ണ്​ വി​ധി​ന്യാ​യ​ത്തി​ലെ പ​രാ​മ​ർ​ശ​ങ്ങ​ളെ​ല്ലാം എ​ന്ന​ത്​ ഒ​ട്ടും യാ​ദൃ​ച്ഛി​ക​മ​ല്ല. സാ​മൂ​ഹി​ക​വും ജാ​തീ​യ​വു​മാ​യ കാ​ര​ണ​ങ്ങ​ളാ​ൽ ഏ​തെ​ങ്കി​ലു​മൊ​രു വി​ഭാ​ഗ​ത്തി​ന്​ സം​വ​ര​ണം ഏ​ർ​പ്പെ​ടു​ത്തു​ന്ന​തു​പോ​ലെ സാ​മ്പ​ത്തി​ക​മാ​യി പി​ന്നാ​ക്കം പോ​യ​വ​രെ​യും ആ ​ഗ​ണ​ത്തി​ൽ​പെ​ടു​ത്തു​ന്ന​ത്​ അ​ടി​സ്ഥാ​ന​പ​ര​മാ​യി യു​ക്തി​ര​ഹി​ത​മായ സ​മീ​പ​ന​മാ​ണ്. ഭ​ര​ണ​ഘ​ട​ന വി​ഭാ​വ​നം ചെ​യ്യു​ന്ന സം​വ​ര​ണ​ കാ​ഴ്ച​പ്പാ​ടു​ക​ൾ​ക്ക്​ എ​തി​രു​മാ​ണ​ത്. എ​ന്നാ​ൽ, ഈ ​കാ​ഴ​്​​ച​പ്പാ​ടി​ൽ വെ​ള്ളം ചേ​ർ​ത്താ​ണ്​ 2019 ജ​നു​വ​രി​യി​ൽ പാ​ർ​ല​മെ​ന്‍റി​ൽ നി​യ​മം പാ​സാ​ക്കി​ രാ​ജ്യ​ത്ത്​ സാ​മ്പ​ത്തി​ക സം​വ​ര​ണം ന​ട​പ്പി​ലാ​ക്കി​യ​ത്. മു​ന്നാ​ക്ക​ക്കാ​രി​ൽ സാ​മ്പ​ത്തി​ക​മാ​യി പി​ന്നാ​ക്കം നി​ൽ​ക്കു​ന്ന​വ​ർ​ക്ക്​ വി​ദ്യാ​ഭ്യാ​സ, തൊ​ഴി​ൽ മേ​ഖ​ല​ക​ളി​ൽ പ​ത്ത്​ ശ​ത​മാ​നം സം​വ​ര​ണം അ​നു​വ​ദി​ക്കു​ന്ന ബി​ല്ലാ​യി​രു​ന്നു അ​ത്. മു​ന്നാ​ക്ക​ക്കാ​ര​ൻ പു​റന്ത​ള്ള​പ്പെ​ടു​ന്ന വ്യാ​ജ ആ​ഖ്യാ​ന​ങ്ങ​ളു​ടെ മ​റ​പ​റ്റി​യു​ള്ള ഒ​രു നി​യ​മ​നി​ർ​മാ​ണ​മാ​യി​രു​ന്നു അ​ത്. മ​റ്റൊ​ര​ർ​ഥ​ത്തി​ൽ, അ​തു​വ​ഴി സം​ഭ​വി​ച്ച​ത്​ സം​വ​ര​ണ അ​ട്ടി​മ​റിത​ന്നെ​യാ​ണ്. സ​വ​ർ​ണ​ർ​ക്കാ​യു​ള്ള ഈ ​സം​വ​ര​ണ​ത്തെ​യും മേ​ൽ​സൂ​ചി​പ്പി​ച്ച വി​ധി​ന്യാ​യ​ത്തി​ൽ കോ​ട​തി ശ​രി​വെ​ക്കു​ക​യാ​ണ്. ഒ​രു​വ​ശ​ത്ത്​ മെ​റി​റ്റ്​ വാ​ദ​ത്തെ പൊ​ളി​ച്ച​ട​ുക്കു​ക​യും മ​റു​വ​ശ​ത്ത്​ 'സ​വ​ർ​ണ സം​വ​ര​ണ'​ത്തെ അം​ഗീ​ക​രി​ക്കു​ക​യും ചെ​യ്യു​ന്ന​തി​ലെ വൈ​രു​ധ്യം കാ​ണാ​തി​രു​ന്നു​കൂ​ടാ. ഈ ​വി​ധി​ന്യാ​യ​ത്തി​ലെ വ​ലി​യൊ​രു പോ​രാ​യ്മ​യാ​യി​ത്ത​ന്നെ അ​ത്​ വി​ല​യി​രു​ത്ത​പ്പെ​ടും. ഒ​രു ​പക്ഷേ, സം​വ​ര​ണ​ത്തി​നാ​യു​ള്ള ജ​നാ​ധി​പ​ത്യ​വാ​ദി​ക​ളു​ടെ നി​യ​മ​പോ​രാ​ട്ട​ങ്ങ​ൾ​ക്ക്​ തു​ര​ങ്കം​വെ​ക്കു​ന്ന​തി​നും പ​ര​​മോ​ന്ന​ത​ നീ​തി​പീ​ഠ​ത്തി​ന്‍റെ ഈ '​സ​വ​ർ​ണ സം​വ​ര​ണ' വാ​ദം കാ​ര​ണ​മാ​യേ​ക്കും. സ​വ​ർ​ണ​ർ​ക്കാ​യു​ള്ള പ​ത്തു ശ​ത​മാ​നം ശ​രി​വെ​ക്കാ​ൻ ​വേ​ണ്ടി​യാ​ണോ കോ​ട​തി ഒ.​ബി.​സി വി​ഭാ​ഗ​ങ്ങ​ൾ​ക്കു​ള്ള സം​വ​ര​ണ​ത്തി​നും അ​നു​മ​തി ന​ൽ​കി​യ​തെ​ന്ന്​ സം​ശ​യിക്കുന്നവ​രെ കു​റ്റ​പ്പെ​ടു​ത്താ​ൻ ക​ഴി​യി​ല്ല.

Show Full Article
TAGS:reservation editorial madhyamam editorial 
News Summary - jan 22nd editorial about reservation remarks by supreme court
Next Story