Begin typing your search above and press return to search.
exit_to_app
exit_to_app
Homechevron_rightOpinionchevron_rightArticleschevron_rightഹമാസിനെ വിചാരണ...

ഹമാസിനെ വിചാരണ ചെയ്യു​േമ്പാൾ

text_fields
bookmark_border
palestine
cancel

ഫലസ്​തീൻ ജനത നമ്മെ പഠിപ്പിച്ചുകൊണ്ടേ ഇരിക്കുകയാണ്​. നമ്മൾ വഴിതെറ്റി, സത്യത്തിൽനിന്ന്​ വഴുതിവീഴു​േമ്പാഴും ഫലസ്​തീൻ ദിശാസൂചിയായി നിലനിൽക്കുന്നു. ഇസ്രായേല്യർക്ക്​ സ്വന്തം വീടുവിറ്റവർ എന്ന്​ ചാപ്പകുത്തപ്പെടു​േമ്പാഴും സ്വന്തം മണ്ണിനോടും രക്​തത്തോടും ഏറ്റവുമധികം ആസക്​തരെന്ന്​ ഫലസ്​തീനികൾ തെളിയിച്ചുകൊണ്ടിരിക്കുന്നു. അധിനിവേശ ശക്​തിയെ സ്വന്തം നാട്ടിൽനിന്ന്​ പുറന്തള്ളാനുള്ള ശ്രമത്തിൽ ജീവൻതന്നെ വിലയായി നൽകുകയാണവർ. ഈയിടെ ശൈഖ്​ ജർറാഹ്​ കോളനിയിൽ നടന്ന സംഭവങ്ങൾ തന്നെ അതി​ന്‍റെ ഏറ്റവും വലിയ തെളിവ്​.

കൊന്നും അധിനിവേശം ചെയ്​തും സ്വന്തം ദേശത്തുനിന്ന്​ ആട്ടിപ്പായിക്കാൻ പറ്റിയ ജനത എന്നതിൽനിന്ന്​ കുടിയേറ്റത്തെ ചെറുക്കാൻ കെൽപുറ്റ ജനതയായി മാറിക്കൊണ്ട്​ ഫലസ്​തീനിലെ ചുണക്കുട്ടികൾക്ക്​ സമവാക്യങ്ങൾ മാറ്റിമറിക്കാൻ സാധിച്ചിരിക്കുന്നു. ഈ മണ്ണി​ന്‍റെ അവകാശികൾ തങ്ങളാണെന്നും അധിനിവേശ ശക്​തി തങ്ങളിൽനിന്നത്​ കവരുകയാണെന്നുമുള്ള യാഥാർഥ്യം ലോകത്തിന്​ മുന്നിൽ സ്​ഥാപിക്കുന്നതിൽ അവർ വിജയിച്ചിരിക്കുന്നു. ലോകത്തിന്​ ഈ സത്യം അറിയാഞ്ഞിട്ടല്ല. അവർ കണ്ണടച്ച്​ ഇരുട്ടാക്കാൻ ശ്രമിക്കുന്നു എന്നേയുള്ളൂ. വഴങ്ങാത്ത ഈ ജനതക്കെതിരെ ഇസ്രായേൽ നടത്തുന്ന ഭീകരതയുടെ നഗ്​നമായ വഷളത്തം തുറന്നുകാട്ടാൻ അവർക്ക്​ സാധിച്ചിരിക്കയാണ്​. വടക്ക്​ ഹൈഫ തൊട്ട്​ തെക്ക്​ ഉസ്​ദൂദ്​ വരെയും മധ്യേ തെൽഅവീവിലുമുള്ള ഓരോ പിടിച്ചുപറിക്കാരനോടും അവർ ഉറക്കെ പറയുകയാണ്​ -ഞങ്ങളുടെ ഈ ഭൂമി ഒരിക്കലും നിങ്ങൾക്ക്​ വിട്ടുതരാൻ പോകുന്നില്ല. നിങ്ങൾ യുദ്ധം തുടങ്ങുകയാണെങ്കിൽ നിങ്ങൾക്കെതിരെ വിജയം നാട്ടി ഞങ്ങളത്​ പൂർണതയിലെത്തിക്കും. അധിനിവിഷ്​ട പ്രദേശങ്ങളിലെങ്ങും മുഴങ്ങുകയാണ്​ ഈ മുന്നറിയിപ്പ്​ ശബ്​ദം.

പ്രശ്​നത്തെ ​ദ്രവീകരിച്ച്​ വർഷങ്ങളായി ഇ​സ്രായേലും ചില അറബ്​ രാഷ്​ട്രങ്ങളും കൂടി ഫലസ്​തീൻ സ്വത്വത്തെ തേച്ചുമായ്​ച്ചുകളയാനുള്ള ശ്രമത്തിലാണ്​. കഴിഞ്ഞ റമദാൻ ഒടുവിൽ കണ്ണീർ വാതകവും റബർ ബുള്ളറ്റുകളും ഉപയോഗിച്ച്​ അൽഅഖ്​സ മസ്​ജിദ്​ അങ്കണത്തിൽ ഇരച്ചുകയറിയ അധിനിവേശപ്പടയുടെ കാട്ടിക്കൂട്ടലുകൾ അതാണ്​ തെളിയിക്കുന്നത്​. ശൈഖ്​ ജർറാഹ്​ കോളനിയിലും ബാബുൽ ആമൂദിലും അഖ്​സ മസ്​ജിദിന്​ ചുറ്റുമുള്ള ചില പ്രദേശങ്ങളിലുമുള്ള നിവാസികൾക്കെതിരെ കടന്നാക്രമണം നടത്തിക്കൊണ്ട്​ അധിനിവേശ സേനയും ജൂത കുടിയേറ്റക്കാരും റമദാൻ ആദ്യം മുതൽക്കേ തുടങ്ങിയതാണ്​ ഈ കുത്സിതവൃത്തി. 'എബ്രായ യരുശലേം ദിനം' എന്ന്​ അവർ വിശേഷിപ്പിക്കുന്ന റമദാൻ 28ന്​ അത്​ മൂർധന്യത്തിലെത്തി എന്നുമാത്രം. 1967ൽ അന്നാണ്​ ഇസ്രായേൽ കിഴക്കൻ ജറൂസലം അധീനത്തിലാക്കിയത്​.

ഒരു സംക്ഷിപ്​ത പ്രസ്​താവന ഇറക്കിക്കൊണ്ട്​ ഗസ്സ രംഗത്തിറങ്ങി. ശക്​തമായിരുന്നു പ്രസ്​താവനയുടെ ശൈലി: 'അഖ്​സ മസ്​ജിദിൽ ഭജനമിരിക്കുന്നവർക്കെതിരെയുള്ള ഉപരോധം രണ്ടു മണിക്കൂറിനകം ഇസ്രായേൽ അവസാനിപ്പിക്കാത്തപക്ഷം ഞങ്ങളുടെ തിരിച്ചടി അവർ കാത്തിരുന്നു കൊള്ള​ട്ടെ.'

സമയപരിധി കഴിഞ്ഞതും ഇസ്രായേലിനു​നേരെ ഹമാസ്​ മിസൈൽ മഴ വർഷിച്ചു. 150 ഓളം മിസൈലുകൾ ജറൂസലം, അസ്​ഖലാൻ, സദീറൂത്ത്​ തുടങ്ങിയ അധിനിവിഷ്​ട നഗരങ്ങളിൽ ചെന്ന്​ പതിച്ചു. മാത്രമല്ല, ഇസ്രായേലി​ന്‍റെ ഇരുമ്പു കവചങ്ങൾ (Iron domes) ഭേദിച്ചു ചില മിസൈലുകൾ തെൽഅവീവിലും ചെന്നുപതിച്ചു. ഇസ്രായേലി​ന്‍റെ സുഭദ്ര രക്ഷാകവചമെന്ന്​ മുമ്പ്​ അറബികൾ തെറ്റിദ്ധരിച്ച​ ബാർലേവ്​ ലൈനി​ന്‍റെ അതേ ദയനീയാവസ്​ഥയാണ്​ അയേൺ ഡോമുകൾക്കുമുണ്ടായത്​. സാദാത്തി​ന്‍റെ കാലത്ത്​ ഈജിപ്​ഷ്യൻ സേന ബാർലേവ്​ ലൈൻ മുറിച്ചുകടന്നപോലെ ഖസ്സാം മിസൈലുകൾ 'അയേൺ ഡോമുകളും' ഭേദിച്ചു.

ചാനലുകളും -അവയുടെ മുൻപന്തിയിൽതന്നെ അൽ ജസീറയുമുണ്ട്​ -ഫലസ്​തീനി ആക്​ടിവിസ്​റ്റുകളും സംഭവങ്ങൾ മുഴുവൻ ലോകത്തി​ന്‍റെയും മുന്നിലെത്തിച്ചു. ചിത്രം എല്ലാവർക്കും വ്യക്​തമായിരുന്നു. എന്നാൽ, അദ്​ഭുതം അതല്ല. ഫലസ്​തീൻ ജനതക്കെതിരെ ഇസ്രായേലിനെ സഹായിക്കാൻ ചില അറബികളുമുണ്ടായി എന്നതാണ്​ ഞെട്ടിക്കുന്ന വസ്​തുത. ഹമാസ്​ വിരോധമായിരുന്നു അവരുടെ ന്യായം. എന്നാൽ, ഒട്ടനവധി ഇസ്രായേലി ചരിത്രകാരന്മാർ ഇസ്രായേലി നടപടിയെ അപലപിക്കാൻ മുന്നോട്ടുവരുകയുണ്ടായി. എത്രത്തോളമെന്നാൽ ഇസ്രായേലി കോമഡി നടി നാദാം ശോസ്​റ്റർ ഇത്രത്തോളം പറഞ്ഞു: ഞാനൊരു ഇസ്രായേലി ജൂതയാണ്​. എന്നാൽ, എ​ന്‍റെ ഹൃദയം ശൈഖ്​ ജർറാഹിനോടും ഗസ്സാ നിവാസികളോടുമൊപ്പമാണ്​. കാടൻ അധിനിവേശം ഉപേക്ഷിക്കുക എന്നതു​ മാത്രമാണ്​ ഏക പരിഹാരം.'

ഫലസ്​തീൻ പ്രശ്​നം കൈയൊഴിച്ചവർ എന്താണ്​ ഭാവം? ഹമാസ്​ എന്തു ചെയ്യണമെന്നാണ്​ അവർ പറയുന്നത്​. ഫലസ്​തീനെ കട്ടുകൊണ്ടുപോകു​േമ്പാൾ കൈയും കെട്ടി നോക്കിനിൽക്കണമെന്നോ, ഫലസ്​തീൻ ജനതയെ അവിടെനിന്ന്​ ആട്ടി ഓടിക്കുകയും അഖ്​സ മസ്​ജിദ്​ ഉപരോധിക്കുകയും മസ്​ജിദിനകത്തുള്ളവർ കൊല്ലപ്പെടുകയും ചെയ്യു​േമ്പാൾ ഹമാസ്​ മൗനം പാലിക്കണമെന്നോ?

ഹമാസിന്​ എവിടന്ന്​ കിട്ടാനാണ്​ ആയുധങ്ങൾ? ഗസ്സ ഉപരോധത്തിലാണ്​. ബലാൽക്കാരം അധിനിവേശം ചെയ്​തവരെ ചെറുക്കാൻ മിസൈലുകളും സൈനിക കോപ്പുകളും സ്വയം നിർമിക്കുകയായിരുന്നു ഹമാസ്​. ഫലസ്​തീനി ചെറുത്തുനിൽപ്​ പ്രസ്​ഥാനമാണ്​ ഹമാസ്​. ഇതര രാജ്യങ്ങളെയും അവരുടെ രാഷ്​ട്രീയ ഭിന്നതകളെയും പരിഗണിക്കാൻ അതൊരു രാഷ്​ട്രമൊന്നുമല്ല. എന്നാൽ, പിന്നെ എന്തുകൊണ്ട്​ യുദ്ധമൊന്ന്​ കഴിയുംവരെ കാത്തിരുന്നുകൂടാ? എന്നിട്ട്​ പോരെ ഹമാസിനെ വിചാരണ ചെയ്​ത്​ തൂക്കിലേറ്റുന്നത്​? മണ്ണ്​ കവരാൻ വന്ന അധിനിവേശക്കാരനെ ചെറുത്തുനിന്നതാണല്ലോ അവർ ചെയ്​ത കുറ്റം! കടുത്ത ഏകാധിപതിയായിരുന്നു ജമാൽ അബ്​ദുന്നാസിർ. എന്നാൽ, ഈജിപ്​ഷ്യൻ സേന യുദ്ധമുഖത്തേക്ക്​ തിരിയേണ്ടിവന്നപ്പോൾ അദ്ദേഹമുയർത്തിയ മുദ്രാവാക്യം 'യുദ്ധകാഹളത്തിന്​ മുകളിൽ മറ്റൊരു ശബ്​ദവും ഉയർന്നു പോകരുത്​' എന്നായിരുന്നു. യുദ്ധം കഴിയാൻ ഇവർക്കും കാത്തിരിക്കാമായിരുന്നില്ലേ? ഹമാസ്​ വിചാരണ അതിന്​ ശേഷമാവാമല്ലോ? ഫലസ്​തീനി രക്​തം ചിന്തപ്പെടുകയും രക്​തസാക്ഷികളുടെ എണ്ണം പെരുകിക്കൊണ്ടിരിക്കുകയും ചെയ്യുേമ്പാൾ ഇസ്രായേലിനെ പിന്തുണച്ച്​ സഹായിക്കുന്നതിനു പകരം മൗനം ദീക്ഷിക്കുകയെങ്കിലും ചെയ്യാമായിരുന്നില്ലേ ഇക്കൂട്ടർക്ക്​?

(ഈജിപ്​ഷ്യൻ കോളമിസ്​റ്റാണ്​ ലേഖകൻ)
മൊഴിമാറ്റം: വി.എ. കബീർ

Show Full Article
TAGS:hamas Israel palestine attack 
News Summary - When prosecuting Hamas
Next Story