കൈകോർക്കണം, ഇന്ത്യ വീണ്ടെടുക്കണം

പൗരജനങ്ങൾക്ക്​ ഒട്ടും ആശ്വാസം നൽകാത്ത ഏറെ ആശങ്കകൾ നിറഞ്ഞ ഘട്ടത്തിലൂടെയാണ് രാജ്യം കടന്നു പോകുന്നത്. സർക്കാറിനെതിരെ ജനാധിപത്യ രീതിയിൽ പ്രതിഷേധിക്കുന്നവരുടെയും പ്രതികരിക്കുന്നവരുടെയും വായ മൂടിക്കെട്ടുന്ന അത്യന്ത്യം പ്രതിസന്ധി നിർഭരമായ ഇന്ത്യനവസ്​ഥയിലാണ്​ നമ്മൾ.

ഇക്കണോമിസ്റ്റ് ഇന്റലിജൻസ് യൂണിറ്റ് പുറത്തിറക്കിയ പുതിയ ജനാധിപത്യ സൂചികയിൽ പത്ത് പോയന്റ് കുത്തനെ ഇടിഞ്ഞ് 51ാം സ്ഥാനത്തേക്ക് പിന്തള്ളപ്പെട്ടിരിക്കുന്നു നരേന്ദ്ര മോദിയുടെ നേതൃത്വത്തിലുള്ള നവ ഇന്ത്യ. രാജ്യത്തെ പൗരസ്വാതന്ത്ര്യം നഷ്ടപ്പെട്ടതാണ്​ സൂചികയിൽ ഇന്ത്യ പിന്നാക്കം പോകാൻ കാരണമെന്ന്​ റിപ്പോർട്ട്​ വ്യക്​തമാക്കുന്നു.

ഫ്രീഡം ഹൗസി​െൻറ റിപ്പോർട്ടാക​ട്ടെ, നരേന്ദ്ര മോദി ഭരണത്തിനു കീഴിൽ ഒരു സ്വതന്ത്രരാജ്യം എന്ന പദവിയിൽ നിന്ന്​ ഭാഗിക സ്വതന്ത്ര രാജ്യമായി ഇന്ത്യ മാറി എന്നാണ് ചൂണ്ടിക്കാട്ടുന്നത്​. ആദ്യ മോദി സർക്കാർ ഭരണത്തിലേറിയപ്പോൾ തന്നെ ഇന്ത്യയിലെ പൗരാവകാശങ്ങളും ജനാധിപത്യവും അപകടാവസ്​ഥയിലായി, രണ്ടാമൂഴത്തിൽ പൗരസ്വാതന്ത്ര്യം പൂർണമായും അടിച്ചമർത്തപ്പെടുന്ന സാഹചര്യത്തിലെത്തി നിൽക്കുന്നു രാജ്യം.

ഭരണകൂടവും കോർപറേറ്റ് താൽപര്യങ്ങളും പരസ്പരം കൈകോർത്ത് മനുഷ്യാവകാശങ്ങൾക്ക്​ തടയിടുന്ന ഏറ്റവും ഭീകരമായ സാഹചര്യം. വസ്ത്ര സ്വാതന്ത്ര്യത്തിൻമേലുള്ള കടന്നുകയറ്റവും കശ്മീരിലെ രാഷ്ട്രീയ നടപടികളും അസമിൽ നടപ്പാക്കിയ ദേശീയ പൗരത്വ രജിസ്റ്ററുമെല്ലാം ചേർന്ന്​ ജനാധിപത്യ​െത്ത മാരകമാംവിധം ഞെരിച്ചുകൊണ്ടിരിക്കുന്നു.

ആത്മ വിമർശനത്തി​െൻറ വലിയ തലങ്ങൾ ഉൾക്കൊണ്ട രാജ്യമായിരുന്നു നമ്മുടേത്​. 'ദി മോഡേൺ റിവ്യൂ' മാഗസിനിൽ ചാണക്യ എന്ന പേരിൽ കടുത്ത ഭാഷയിൽ സ്വയം വിമർശനമെഴുതിയ ഇന്ത്യയുടെ പ്രഥമ പ്രധാനമന്ത്രി ജവഹർലാൽ നെഹ്റുവിന്റെ ഇന്ത്യയിൽ നിന്ന്​ എത്രയോ പിറകിലാണ് പുതിയ ഇന്ത്യ. രാജ്യത്തെ ബഹുസ്വരതയും ജനാധിപത്യവും നേരിടുന്ന വെല്ലുവിളികൾക്കെതിരെ മതേതര സമൂഹം ഒറ്റക്കെട്ടായി നിന്ന്​ പൊരുതി നമുക്ക് ഇന്ത്യയെ വീണ്ടെടുത്തേ മതിയാവൂ. ഈ വീണ്ടെടുപ്പിന്‍റെ പോരാട്ടത്തിന്​ ജനങ്ങളെ സജ്ജമാക്കാൻ 'ഹനിക്കപ്പെടുന്ന പൗരസ്വാതന്ത്ര്യം' എന്ന പേരിൽ മുസ്​ലിം യൂത്ത്​ലീഗ്​ ഇന്ന്​ കോഴിക്കോട്ട്​ സെമിനാർ സംഘടിപ്പിക്കുകയാണ്​.