മി. ഭാഗവത്​, അവകാശം മുസ്​ലിംസ്​ത്രീക്ക്​ മതിയോ?

ബഹു. മോഹൻ ഭാഗവത്​ജീ,
നാഗ്​പൂരിൽ വിജയദശമി ദിനത്തിൽ നടത്തിയ പ്രഭാഷണത്തിൽ ശബരിമല അമ്പലത്തിൽ സ്​​ത്രീക്ക്​ സ്വതന്ത്രമായി പ്രവേശിക്കാൻ അവകാശമു​ണ്ടോ എന്ന വിഷയം സംസാരിച്ചുകണ്ടു. നൂറ്റാണ്ടുകളായി കോടിക്കണക്കിന്​ വിശ്വാസികൾ അനുശീലിച്ച പൈതൃകവും വിശ്വാസവുമാണ്​ സുപ്രീംകോടതി അവഗണിച്ചതെന്നും നിയമങ്ങൾക്കു മ​ാത്രം സൗഹൃദപൂർണമായ ഒരു സമൂഹ നിർമിതി സാധ്യമല്ലെന്നും പ്രഭാഷണത്തിൽ താങ്കൾ ഒാർമിപ്പിച്ചു. ക്ഷമാപൂർവമായ പ്രവർത്തനങ്ങൾ വഴി സമൂഹ മനസ്സ്​ പരിവർത്തിപ്പിക്കാതെയുള്ള വിശ്വാസപരമായ വിഷയങ്ങളിലെ കോടതിവിധികൾ പുതിയ സമൂഹക്രമം സൃഷ്​ടിക്കില്ലെന്നു മാത്രമല്ല, ആചാരമായി സ്വീകരിക്കപ്പെടില്ലെന്നുമായിരുന്നു പ്രഭാഷണത്തി​​​െൻറ കാതൽ.

സത്യത്തിൽ അങ്ങനെയാണോ? എ​ങ്കിൽ, മുത്തലാഖ്​ വിഷയത്തിൽ പുതിയ വിധി എടുത്തുകളയാൻ താങ്കൾ നരേന്ദ്ര മോദിയോട്​ ആവശ്യപ്പെടണം. നൂറ്റാണ്ടുകളായി കോടിക്കണക്കിന്​ വിശ്വാസികളുടെ പൈതൃകവും വിശ്വാസവും കുടികൊള്ളുന്ന വിഷയമായിരുന്നു മുത്തലാഖ്​. എന്നിട്ടും സുപ്രീംകോടതി അത്​ അവഗണിച്ചു. എന്നുവെച്ച്​, മുത്തലാഖ്​ വിഷയത്തിൽ സുപ്രീംകോടതി വിധി നിയമമാകില്ലെന്നോ പുതിയ സമൂഹക്രമം സൃഷ്​ടിക്കില്ലെന്നോ താങ്കൾ കരുതുന്നുണ്ടോ?

മുത്തലാഖ്​ എടുത്തുകളയുക വഴി സ്​ത്രീശാക്​തീകരണം സാധ്യമാക്കാൻ ബി.ജെ.പി നടത്തിയ വലിയ നീക്കമായാണ്​ പുതിയ വിധിയെ താങ്കളുടെ പാർട്ടി വിശേഷിപ്പിക്കുന്നത്​. ജ്​ഞാനംകൊണ്ട്​ ദീപ്​തമായ 21ാം നൂറ്റാണ്ടിൽ മുസ്​ലിം ആചാരങ്ങൾക്കുമേൽ ഭരണഘടന വിഭാവന ചെയ്യുന്ന വനിതകളുടെ മൗലികാവകാശങ്ങൾ ജയിക്കണമെന്നും അങ്ങ്​ പറയുന്നു. 100 ശതമാനവും അതിനോട്​ ഞാൻ യോജിക്കുന്നു. എങ്കിൽ തീർച്ചയായും ഹിന്ദു സ്​ത്രീകള​ുടെ മൗലികാവകാശങ്ങളും ശബരിമലയിൽ വിജയം കാണണം.

അതല്ല, മുസ്​ലിംസ്​ത്രീകൾക്ക്​ മാത്രമേ മൗലികാവകാശങ്ങളുള്ളൂവെന്നും ഹിന്ദുസ്​ത്രീകൾക്കില്ലെന്നും താങ്കൾ ചിന്തിക്കുന്നുണ്ടോ? ആണെങ്കിൽ വിശദീകരണം വേണം​. ലിംഗ വിഷയങ്ങളിൽ ഹിന്ദു, മുസ്​ലിം വിഭാഗങ്ങളെ വ്യത്യസ്​തമായി പരിഗണിക്കാമെന്നാണെങ്കിൽ, ലൈംഗിക പീഡന വിഷയങ്ങളിൽ നിയമം എം.ജെ. അക്​ബറിന്​ ബാധകവും ആർ.കെ. പച്ചൗരിക്ക്​ അല്ലെന്നുമാണോ? പുതുതായി കൊണ്ടുവരുന്ന നിയമങ്ങൾ പാരമ്പര്യ വിശ്വാസങ്ങളെയും ആചാരങ്ങളെയും പെ​െട്ടന്ന്​ മാറ്റില്ലെന്ന്​ താങ്കൾ പറഞ്ഞത്​ ശരിയാണ്​. എന്നാലും, ഇത്തരം നിയമങ്ങൾ അടിയന്തരമായി സൃഷ്​ടിക്കുന്ന ചില സ്വാധീനതകളുണ്ട്​. സമൂഹം നേർവഴിയിൽ സഞ്ചരിക്കാൻ അതു നിമിത്തവുമാകുന്നു.

ജാതി, മതം, ലിംഗം എന്നിവ അടിസ്​ഥാനമാക്കിയുള്ള വിവേചനം 1951ൽ ഭരണഘടന വിലക്കി. ഹിന്ദു, മുസ്​ലിം, ക്രിസ്​ത്യൻ വിശ്വാസികളിൽ നിലനിന്ന നിരവധി പാരമ്പര്യങ്ങളെയും ആചാരങ്ങളെയും എതിർക്കുന്നതായി അത്​. പിന്നീട്​ ബി​.ജെ.പിയായി രൂപമെടുത്ത ജനസംഘ് പ്രസ്​ഥാനത്തി​​​െൻറ​ സ്​ഥാപകൻ ശ്യാമപ്രസാദ്​ മുഖർജി ഉൾപ്പെടെ ഭരണഘടന ശിൽപികളിൽ ആരെയും ഇതൊന്നും അലട്ടിയതേയില്ല. മതവികാരങ്ങളെ വ്രണപ്പെടുത്തിയാലും മൗലികമായ മാറ്റങ്ങളാണ്​ സാമൂഹിക പരിവർത്തനത്തിന്​ വേണ്ടതെന്ന്​ അദ്ദേഹം താങ്കളോട്​ പറഞ്ഞുതരുമായിരുന്നു. മുത്തലാഖിലും ശബരിമലയിലും ഒരുപോലെ ഇൗ യുക്​തി സാധുവാണ്​.

എല്ലാതരം വിവേചനങ്ങളും ഉച്ചാടനം ചെയ്യുന്നതിൽ ഭരണഘടന വിജയം വരിച്ചിട്ട​ുണ്ടോ? ഒരിക്കലുമില്ല, ഇത്തരം തിന്മകൾ ഇപ്പോഴും സർവവ്യാപിയാണ്​. പക്ഷേ, സാമൂഹിക മനസ്സ്​ പരിവർത്തിപ്പിക്കുന്നതിൽ ഭരണഘടന വലിയ പങ്കു​ വഹിച്ചിട്ടുണ്ട്​. 1951നു ശേഷം ദലിതുകൾ, താഴ്​ന്ന ജാതിക്കാർ, ഗോത്രവർഗക്കാർ, വനിതകൾ എന്നിവരുടെ സാഹചര്യം ​ഏറെ മെച്ചപ്പെട്ടിട്ടുമുണ്ട്​. നിയമനിർമാണ സഭകൾ, പഞ്ചായത്തുകൾ, സർക്കാർ തൊഴിലുകൾ, വിദ്യാഭ്യാസ സ്​ഥാപനങ്ങൾ എന്നിവിടങ്ങളിൽ ദലിതുകൾ, ആദിവാസികൾ, താഴ്​ന്ന ജാതിക്കാർ എന്നിവർക്ക്​ സീറ്റ്​ സംവരണം ഹിന്ദു ആചാരങ്ങൾക്കെതിരാണ്​. പക്ഷേ, ഉന്നത ജാതിക്കാരുടെ അധികാരക്കുത്തക തകർക്കുന്നതിൽ വലിയ ദൗത്യമാണ്​ അത്​ നിർവഹിച്ചത്​. ഇനിയുമേറെ ചെയ്യാൻ ബാക്കിയുണ്ടെങ്കിലും വിവേചനം അവസാനിപ്പിക്കുന്നതിൽ ഏറെദൂരം പോകാനുമായി. പാരമ്പര്യ മതാചാരങ്ങൾക്കുമേൽ ഭരണഘടന ചട്ടങ്ങളെ ഉയർത്തിപ്പിടിക്കുന്ന സുപ്രീംകോടതി വിധികളെ ഇത്​ സാധൂകരിക്കുന്നു.

ഒാരോ മതത്തിനുമുണ്ട്​ നല്ലതും മോശവുമായ ആചാരങ്ങൾ. മോശം ആചാരങ്ങൾ ഉച്ചാടനം ചെയ്യുന്നത്​ മതവിശ്വാസത്തിനു മേലുള്ള ആക്രമണമായല്ല, നവീകരണമായാണ്​ കാണേണ്ടത്​. കാലങ്ങൾക്കിടെ വിവിധ കാരണങ്ങളുടെ പേരിൽ മതപരമായ ആചാരങ്ങളിൽ വലിയ മാറ്റങ്ങൾ സംഭവിച്ചുകൊണ്ടിരിക്കുന്നു. രാമായണം പറയുന്നുവെന്ന്​ കരുതി, സ്​ത്രീയുടെ ചാരിത്ര്യം ഉറപ്പാക്കാൻ അഗ്​നിപരീക്ഷ ജയിക്കണ​െമന്ന്​ ഇന്നാരും പറയാറില്ല. മഹാഭാരതത്തിൽ ഉദാഹരണമുണ്ടെങ്കിലും, മുതിർന്ന സഹോദരൻ അനുജന്മാരെയും ഭാര്യയെയും ചൂതാടി അടിമകളാക്കി മാറ്റാറുമില്ല. ഇത്​ ഹിന്ദുത്വത്തിൽ വെള്ളം ചേർക്കലല്ല, നവീകരണമാണ്​.

ഭാഗവത്​ജീ, ആർ.എസ്​.എസിൽ ചിലർ മതമൗലിക വാദം ആരോപിക്കുന്നുണ്ട്. പക്ഷേ, ആര്യസമാജ്​, ബ്രഹ്​മസമാജ്​ എന്നിവയെ അപേക്ഷിച്ച്​ കളങ്കിതമാണെങ്കിലും ഹിന്ദുത്വത്തെ നവീകരിക്കുന്ന പ്രസ്​ഥാനമായാണ്​ അതിനെ ഞാൻ കാണുന്നത്​. പഴയ സനാതന ധർമം അനുശാസിക്കുന്നത്​ വർണാശ്രമം മൗലികമാണെന്ന നിലക്കാണ്​. ദലിതുകളെ അവർണരായും ആദിവാസികളെ ​േമ്ലച്ഛന്മാരും ഹിന്ദുസമൂഹത്തിന്​ പുറത്തുള്ളവരുമായാണ്​ അത്​ കണ്ടത്​.

ഇത്തരം പാരമ്പര്യവിശ്വാസങ്ങൾ ആർ.എസ്​.എസ്​ ഉപേക്ഷിച്ചിട്ടുണ്ട്​. ഇൗ ഭിന്നതകളാണ്​ ഹിന്ദുക്കളെ ദുർബലപ്പെടുത്തിയതെന്ന്​ പ്രസ്​ഥാനം വിശ്വസിക്കുന്നു. ശക്​തമായ ഒരു ഹിന്ദു സമാജത്തിനായി ഏതുതരം വിവേചനവും ഉപേക്ഷിക്കാനും ആർ.എസ്​.എസ്​ ആഹ്വാനം ചെയ്യുന്നു. അക​ത്ത്​ എതിർപ്പുകളുണ്ടായിട്ടും ദലിതുകൾക്കും മറ്റു സമാന ജാതികൾക്കും തുല്യ പദവി വേണമെന്നും ആവശ്യപ്പെടുന്നു. ഭിന്നതകൾ മാറ്റിനിർത്തി സ്​ത്രീകളെയും തുല്യപദവിയിൽ കാണുന്നു. ആദിവാസികളെ ​േമ്ലച്ഛന്മാരായി കാണുന്ന സങ്കൽപം തള്ളിക്കളഞ്ഞ്​ അവരെക്കൂടി ഹിന്ദു സമുദായത്തി​​​െൻറ ഭാഗമാക്കാനും ശ്രമം നടത്തുന്നു. ഇതൊക്കെയല്ലേ പുരോഗമനം​?

ഭാഗവത്​ജീ, എല്ലാ മതക്കാർക്കും വേണ്ടി രാജ്യത്ത്​ ഏക സിവിൽകോഡ്​ വേണമെന്ന്​ ഏറെയായി താങ്കളുടെ പാർട്ടി ആവശ്യം ഉന്നയിക്കുന്നു. ഒരിക്കൽകൂടി: 100 ശതമാനവും ഞാൻ താങ്കൾക്കൊപ്പമാണ്​. ഇതുപക്ഷേ, മതങ്ങളുടെ ചില പാരമ്പര്യ ആചാരങ്ങളുടെ ഉന്മൂലനവും അതുവഴി പൊതുചട്ടങ്ങളുടെ രൂപവത്​കരണവും കൂടി ആവശ്യപ്പെടുന്നുണ്ട്​. പാരമ്പര്യവാദികളെ തീർച്ചയായും ഇത്​ അലോസരപ്പെടുത്തും. അത്​ എന്തിന്​ വിഷയമാക്കണം? അവരെ നമുക്ക്​ മാറ്റിനിർത്താം. മുത്തലാഖിനും സ്​ത്രീ അമ്പലപ്രവേശനത്തിനും അപ്പുറത്തെ വിഷയങ്ങളിലേക്ക്​ കടക്കാം.

(ഇക്കണോമിക്​ ടൈംസിൽ കൺസൽട്ടിങ്​ എഡിറ്ററാണ്​ ലേഖകൻ)