വി​ട​പ​റ​ഞ്ഞ​ത്​ ദാ​ർ​ശ​നി​ക പ്ര​തി​ഭ 

ഇ​സ്​​ലാ​മി​നെ എ​ല്ലാ മ​ത​ങ്ങ​ളു​ടെ​യും ത​​ത്ത്വ​ചി​ന്ത പ​ദ്ധ​തി​ക​ളു​ടെ​യും പ്ര​ത്യ​യ​ശാ​സ്​​ത്ര​ങ്ങ​ളു​ടെ​യും സ​ത്തും സാ​ര​വു​മാ​യി ദ​ർ​ശി​ക്കു​ക​യും ഉ​ൾ​ക്കൊ​ള്ളു​ക​യും ചെ​യ്​​ത പ​ണ്ഡി​ത​പ്ര​തി​ഭ​യാ​ണ്​ ക​ഴി​ഞ്ഞ ദി​വ​സം വി​ട​പ​റ​ഞ്ഞ ​പ്ര​ഫ. അ​ഹ്​​മ​ദ്​​കു​ട്ടി ശി​വ​പു​രം. മാ​ന​വി​ക​ത​യു​ടെ വി​മോ​ച​ന ദ​ർ​ശ​ന​മാ​യാ​ണ്​ മ​ത​ത്തെ അ​ദ്ദേ​ഹം വാ​യി​ച്ച​തും അ​വ​ത​രി​പ്പി​ച്ച​തും. അ​ബ്ര​ഹാ​മി​െ​ൻ​റ ഏ​ക​ത്വ ദ​ർ​ശ​ന​ത്തി​ൽ നി​ന്നാ​രം​ഭി​ക്കു​ക​യും ഉ​പ​നി​ഷ​ദ്​ ദ​ർ​ശ​ന​ങ്ങ​ളി​ലൂ​ടെ പ​ട​ർ​ന്നൊ​ഴു​ക​യും മു​ഹ​മ്മ​ദ്​ ന​ബി​യു​ടെ ആ​ധ്യാ​ത്​​മി​ക, ഭൗ​തി​ക ഭാ​വ​ങ്ങ​ളാ​ൽ സാ​ക്ഷാ​ത്​​ക​രി​ക്ക​പ്പെ​ടു​ക​യും മാ​ർ​ക്​​സി​ൽ പു​ന​രു​ജ്ജീ​വ​നം നേ​ടു​ക​യും ചെ​യ്യു​ന്ന വ​ഴി​യും വ​ഴി​യ​ട​യാ​ള​വു​മാ​യി​രു​ന്നു അ​ദ്ദേ​ഹ​ത്തി​ന്​ മ​തം. ഇ​സ്​​ലാ​മി​െ​ൻ​റ വി​മോ​ച​ന പാ​ര​മ്പ​ര്യ​ത്തി​െ​ൻ​റ തു​ട​ർ​ച്ച​യാ​യി​രു​ന്നു അ​ദ്ദേ​ഹ​ത്തി​െ​ൻ​റ കാ​ഴ്​​ച​യി​ൽ മാ​ർ​ക്​​സ്. നാ​രാ​യ​ണ ഗു​രു​വും അ​യ്യ​ങ്കാ​ളി​യും ടാ​ഗോ​റും ഗാ​ന്ധി​യും അ​ദ്ദേ​ഹ​ത്തി​ന്​ അ​ന്യ​രാ​യി​രു​ന്നി​ല്ല. ദ​ർ​ശ​ന​ങ്ങ​ളു​ടെ സ​മ​ഗ്ര​ത​യി​ലും അ​വി​ഭാ​ജ്യ​ത​യി​ലും അ​ദ്ദേ​ഹം വി​ശ്വാ​സ​മ​ർ​പ്പി​ച്ചു.

കോ​ഴി​ക്കോ​ട്​​ജി​ല്ല​യി​ലെ ശി​വ​പു​ര​ത്ത്​ ക​ണ്ടി​യോ​ത്ത്​ പ​ക്ക​ർ ഹാ​ജി​യു​ടെ​യും പു​തു​ക്കു​ടി ഖ​ദീ​ജ​യു​ടെ​യും മ​ക​നാ​യി 1947 ജ​നു​വ​രി ഒ​ന്നി​ന്​ ജ​നി​ച്ച അ​ഹ്​​മ​ദ്​​കു​ട്ടി പ​ന​ങ്ങാ​ട്, ബാ​ലു​ശ്ശേ​രി, കൊ​യി​ലാ​ണ്ടി സ്​​കൂ​ളു​ക​ളി​ൽ പ​ഠി​ച്ച​തി​നു​ശേ​ഷം ഫാ​റൂ​ഖ്​ കോ​ള​ജി​ൽ​നി​ന്ന്​ ഇം​ഗ്ലീ​ഷ്​ സാ​ഹി​ത്യ​ത്തി​ൽ ബി​രു​ദ​വും അ​റ​ബി സാ​ഹി​ത്യ​ത്തി​ൽ ബി​രു​ദാ​ന​ന്ത​ര ബി​രു​ദ​വും നേ​ടി. 1973ൽ ​കാ​ലി​ക്ക​റ്റ്​ യൂ​നി​വേ​ഴ്​​സി​റ്റി​യി​ൽ​നി​ന്ന്​ ഒ​ന്നാം റാ​േ​ങ്കാ​ടെ​യാ​ണ്​ എം.​എ പാ​സാ​യ​ത്. വി​വി​ധ ഗ​വ​ൺ​മെ​ൻ​റ്​ കോ​ള​ജു​ക​ളി​ൽ അ​റ​ബി പ്ര​ഫ​സ​റാ​യി ജോ​ലി​ചെ​യ്​​തു. 2003 മാ​ർ​ച്ചി​ൽ കോ​ഴി​ക്കോ​ട്​ ഗ​വ. ആ​ർ​ട്​​സ്​ ആ​ൻ​ഡ്​ സ​യ​ൻ​സ്​ കോ​ള​ജി​ൽ​നി​ന്നാ​ണ്​ വി​ര​മി​ച്ച​ത്.

അ​ധ്യാ​പ​ന​ത്തോ​ടൊ​പ്പം വാ​യ​ന​യും എ​ഴു​ത്തും പ്ര​ഫ. അ​ഹ്​​മ​ദ്​​കു​ട്ടി ശി​വ​പു​രം ജീ​വി​ത​വ്ര​ത​മാ​യി കൊ​ണ്ടു​ന​ട​ന്നു. വ​രു​മാ​ന​ത്തി​​​െൻറ സിം​ഹ​ഭാ​ഗ​വും അ​ദ്ദേ​ഹം ചെ​ല​വ​ഴി​ച്ച​ത്​ നാ​നാ​വി​ഷ​യ​ങ്ങ​ളി​ൽ ഇ​റ​ങ്ങു​ന്ന പു​തി​യ പു​സ്​​ത​ക​ങ്ങ​ൾ വാ​ങ്ങി​ക്കൂ​ട്ടു​ന്ന​തി​നാ​യി​രു​ന്നു. വീ​ട്​ അ​റ്റ​കു​റ്റ​പ്പ​ണി​ക്കു​വെ​ച്ച പ​ണം മു​ഴു​വ​ൻ കോ​ഴി​ക്കോ​ട്​ അ​ന്താ​രാ​ഷ്​​ട്ര പു​സ്​​ത​ക​മേ​ള ന​ട​ന്ന​പ്പോ​ൾ പു​സ്​​ത​കം വാ​ങ്ങി തീ​ർ​ന്നു​പോ​യ ക​ഥ അ​ദ്ദേ​ഹം ഇൗ ​ലേ​ഖ​ക​നോ​ട്​ പ​റ​ഞ്ഞി​ട്ടു​ണ്ട്. വാ​ങ്ങു​ന്ന പു​സ്​​ത​ക​ങ്ങ​ളെ അ​ദ്ദേ​ഹം സ്​​നേ​ഹി​ച്ചു. ഭം​ഗി​യാ​യി പൊ​തി​ഞ്ഞ്​ ഭ​ദ്ര​മാ​യി സൂ​ക്ഷി​ക്കു​ക മാ​​ത്ര​മ​ല്ല, വ​രി​വി​ടാ​തെ ആ​വ​ർ​ത്തി​ച്ചു​വാ​യി​ക്കു​ക​യും ഇ​ഷ്​​ട​പ്പെ​ട്ട ഭാ​ഗ​ങ്ങ​ൾ നി​റ​മു​ള്ള മ​ഷി​കൊ​ണ്ട്​ അ​ട​യാ​ള​പ്പെ​ടു​ത്തു​ക​യും ചെ​യ്​​തു. ദൈ​വ​ശാ​സ്​​ത്ര​വും സൂ​ഫി​സ​വും വേ​ദാ​ന്ത​വും ക്രൈ​സ്​​ത​വ ദ​ർ​ശ​ന​വും മാ​ർ​ക്​​സി​സ​വും ഒ​രേ ഗൗ​ര​വ​ത്തോ​ടെ അ​ദ്ദേ​ഹം വാ​യി​ച്ചു. വാ​യി​ച്ച​വ​യെ​ല്ലാം സ്വാം​ശീ​ക​രി​ക്കു​ക​യും അ​വ​യെ​ല്ലാം സ​മ​ന്വ​യി​പ്പി​ച്ച്​ പു​തി​യ ചി​ന്ത​ക​ൾ വി​ക​സി​പ്പി​ക്കു​ക​യും ചെ​യ്​​തു. അ​ദ്ദേ​ഹം ഒ​രേ​സ​മ​യം സ​ല​ഫി​യും സൂ​ഫി​യും സു​ന്നി​യും മാ​ർ​ക്​​സി​സ്​​റ്റും വേ​ദാ​ന്തി​യു​മാ​യി​രു​ന്നു. ആ​ധ്യാ​ത്​​മി​ക​ത​യെ​യാ​ണ്​ അ​ദ്ദേ​ഹം ചി​ന്ത​ക​ളു​ടെ പ്ര​ഭ​വ​മാ​യി ക​ണ്ട​ത്. ഇ​ബ്​​​നു അ​റ​ബി​ക്കും ഹ​ല്ലാ​ജി​നും റൂ​മി​ക്കും അ​ത്താ​റി​നും ഗ​സ്സാ​ലി​ക്കും അ​നു​വ​ദി​ച്ച അ​തേ ഇ​ടം​ത​ന്നെ ചി​ന്ത​യി​ൽ അ​ദ്ദേ​ഹം ഇ​ബ്​​നു തൈ​മി​യ​ക്കും സ​ർ​ഹി​ന്ദി​ക്കും ഇ​ഖ്​​ബാ​ലി​നും അ​ലി ശ​രീ​അ​ത്തി​ക്കും ന​ൽ​കി. ഉ​ൽ​പ​തി​ഷ്​​ണു പാ​ര​മ്പ​ര്യ​ത്തി​ൽ​നി​ന്ന്​ സൂ​ഫി​സ​ത്തി​െ​ൻ​റ വി​ശാ​ല​ത​യി​ലേ​ക്ക്​ ന​ട​ന്ന​ടു​ക്കു​ക​യാ​യി​രു​ന്നു അ​ദ്ദേ​ഹം.

1985ൽ ​ആ​ദ്യ പ​തി​പ്പാ​യി​റ​ങ്ങി​യ ‘ബി​ലാ​ലി​െ​ൻ​റ ഒാ​ർ​മ​ക​ളാ’​ണ്​ ശി​വ​പു​ര​ത്തി​െ​ൻ​റ പ്ര​ഥ​മ പു​സ്​​ത​കം. അ​പൂ​ർ​വ ചാ​രു​ത​യാ​ർ​ന്ന ആ​ഖ്യാ​ന​ശൈ​ലി​യും ഉ​ള്ള​ട​ക്ക​ത്തി​ലെ വി​മോ​ച​ന​ദ​ർ​ശ​ന​വും ആ ​പു​സ്​​ത​ക​ത്തെ ജ​ന​പ്രി​യ​മാ​ക്കി. ‘സം​സം ക​ഥ പ​റ​യു​ന്നു’, ‘അ​തി​രു​ക​ൾ അ​റി​യാ​ത്ത പ​ക്ഷി’, ‘മ​ക്ക​യി​ൽ​നി​ന്നു വ​ന്ന​വ​ർ’, ‘ക​അ്​​ബ​യു​ടെ വി​ളി’, ‘ഒ​ന്നി​െ​ൻ​റ ലോ​ക​ത്തേ​ക്ക്​’, ‘അ​റ​ഫ പ്ര​ഭാ​ഷ​ണം’, ‘വ​ച​ന​പ്പൊ​രു​ൾ’, ‘വി​ദ്യാ​രം​ഭം’, ‘ഒ​രു ക​ല്ലി​െ​ൻ​റ ക​ണ്ണീ​ർ’, ‘അ​ബ്ര​ഹാ​മി​കം’ (ക​വി​ത​ക​ൾ), ‘മു​ഹ​മ്മ​ദ്​ ന​ബി പാ​ഠ​വും പാ​ഠ​മു​ദ്ര​യും’ എ​ന്നി​വ​യാ​ണ്​ ശി​വ​പു​ര​ത്തി​െ​ൻ​റ മ​ല​യാ​ള ര​ച​ന​ക​ൾ. ക്ലാ​സി​ക്ക​ൽ മ​ല​യാ​ള​ത്തി​െ​ൻ​റ ത​നി​മ​യു​ള്ള​താ​ണ്​ അ​ദ്ദേ​ഹ​ത്തി​െ​ൻ​റ ഭാ​ഷ. ത​നി മ​ല​യാ​ള​ത്തി​ലു​ള്ള ഇ​സ്​​ലാ​മെ​ഴു​ത്ത്​ ശി​വ​പു​ര​ത്തി​െ​ൻ​റ ​പ്ര​ത്യേ​ക​ത​യാ​ണ്. പ​ല​പ്പോ​ഴും അ​ദ്ദേ​ഹം ഇ​ക്കാ​ര​ണ​ത്താ​ൽ വി​മ​ർ​ശി​ക്ക​പ്പെ​ട്ടി​ട്ടു​മു​ണ്ട്.

മ​ല​യാ​ള​മെ​ന്ന​പോ​ലെ ഇം​ഗ്ലീ​ഷും അ​നാ​യാ​സം വ​ഴ​ങ്ങു​മാ​യി​രു​ന്നു. ഇം​ഗ്ലീ​ഷി​ലു​ള്ള കൃ​തി​ക​ളാ​ണ്​‘​ദ കാ​ൾ ഒാ​ഫ്​ അ​ബ്ര​ഹാം’, ‘ഹാ​ഗ​ർ: ദ ​മാ​ട്രി​ക്​​സ്​ മാ​ട്രി​യാ​ർ​ക്ക്​ ആ​ൻ​ഡ്​ പാ​ര​ഡൈം’, ‘ദ ​സാ​ഗാ ഒാ​ഫ്​ സം​സം’, ‘ആ​സ്​ ടോ​ൾ​ഡ്​ ബൈ ​എ ലി​റ്റി​ൽ ബേ​ർ​ഡ്’​​​എ​ന്നി​വ. ഇ​സ്​​ലാ​മി​െ​ൻ​റ ക്രി​സ്​​തു ദ​ർ​ശ​നം (ഇ​സ്​​ലാ​മി​ക്​ ക്രി​സ്​​റ്റോ​ള​ജി) എ​ന്ന പു​സ്​​ത​കം എ​ഴു​താ​നു​ള്ള ഒ​രു​ക്ക​ത്തി​ലാ​യി​രു​ന്നു അ​ദ്ദേ​ഹം. നൂ​ത​ന​മാ​യ ചി​ന്ത​യു​ടെ ആ ​അ​ധ്യാ​യ​മാ​ണ്​ പ​ര​ശ്ശ​തം പേ​ർ ഗു​രു​തു​ല്യ​നാ​യി ആ​ദ​രി​ക്കു​ന്ന ആ ​മ​ഹാ​പ്ര​തി​ഭ​യു​ടെ വി​യോ​ഗം ന​മു​ക്ക്​ ന​ഷ്​​ട​പ്പെ​ടു​ത്തി​യ​ത്.