മുഖ്യമന്ത്രിയും ധനമന്ത്രിയും എന്തിനാണ്​ കൂട്ടമണി അടിക്കുന്നത്​?

അഭിപ്രായപ്രകടനസ്വാതന്ത്ര്യത്തെ വരിഞ്ഞുകെട്ടാനിറക്കിയ പൊലീസ്​ നിയമഭേദഗതി മുഖ്യമന്ത്രി പിണറായി വിജയൻ പിൻവലിച്ചത്​ ജനാധിപത്യത്തിനുവേണ്ടിയുള്ള പോരാട്ടത്തിൽ സാർവദേശീയ ശ്രദ്ധപോലും നേടി. അത്​ നീറ്റിൽവരച്ച വരപോലെയാക്കുന്ന നടപടിയാണ്​ അടുത്ത 24 മണിക്കൂറിനുള്ളിൽ പിണറായി സർക്കാറിനെ നയിക്കുന്ന ഇടതുമുന്നണി സംസ്​ഥാനത്ത്​ കാഴ്​ചവെച്ചത്.

ജനങ്ങളെ അണിനിരത്തി ഇന്ത്യൻഭരണഘടന പരസ്യമായി തെരുവിൽ ചവിട്ടിമെതിച്ചു,​ സി.എ.ജി (കംേട്രാളർ-ഓഡിറ്റർ ജനറൽ) എന്ന ഭരണഘടന സ്​ഥാപനം കേന്ദ്ര അന്വേഷണ ഏജൻസികളുമായി ചേർന്ന്​ പിണറായി സർക്കാറിനെ ഉപരോധിക്കുന്നു, തകർക്കാൻ ശ്രമിക്കുന്നു എന്ന്​ ആരോപിച്ചുകൊണ്ട്​.

ഇത്​ ധനമന്ത്രി തോമസ്​ ഐസക്​ നടത്തിയ നിയമസഭയുടെ അവകാശലംഘനം മാത്രമായി ഒതുങ്ങുന്നതല്ല. മുഖ്യമന്ത്രിയും ധനമന്ത്രിയും ഭരണഘടന അനുസരിച്ച്​ നടത്തിയ സത്യപ്രതിജ്ഞയുടെ ലംഘനം മാത്രമല്ല, തെരഞ്ഞെടുപ്പ്​ കമീഷൻ രാഷ്​ട്രീയപാർട്ടികളുടെ അംഗീകാരം സംബന്ധിച്ച്​ ഇടക്കാലത്ത്​ വരുത്തിയ ഭേദഗതി പ്രകാരം ഇന്ത്യൻ ഭരണഘടനയെ അംഗീകരിക്കുന്നു എന്ന്​ സി.പി.എം പാർട്ടി ഭരണഘടനയിൽ എഴുതിച്ചേർത്ത പ്രതിജ്ഞയുടെ ലംഘനം കൂടിയാണ്​.

കേരളത്തി​െൻറ വികസനപദ്ധതികളുടെ പ്രവർത്തനം പരിശോധിക്കേണ്ടത്​ കേന്ദ്ര അന്വേഷണ ഏജൻസികളല്ല, ഭരണഘടനാ സ്​ഥാപനമായ സി.എ.ജി ആണെന്ന ശരിയായ നിലപാട്​ മുഖ്യമന്ത്രിതന്നെ സ്വീകരിച്ചിരുന്നു. ഇപ്പോൾ മുഖ്യമന്ത്രിതന്നെയാണ്​ ധനമന്ത്രി ഐസക്കി​െൻറ ചുമലിലിരുന്ന്​ സി.എ.ജിക്കെതിരെ രാഷ്​ട്രീയ യുദ്ധപ്രഖ്യാപനം നടത്തുന്നത്​. നവംബർ 16നാണ്​ കേന്ദ്ര ഏജൻസികൾ സർക്കാറിനെ അട്ടിമറിക്കാൻ നീങ്ങുന്നു എന്നാരോപിച്ച്​, 25 ലക്ഷം എൽ.ഡി.എഫ്​ പ്രവർത്തകരെ ഇടതുമുന്നണിയെ പ്രതിരോധിക്കാനിറക്കിയത്​.

അതി​െൻറ എട്ടാം നാൾ 'കേരളത്തെ രക്ഷിക്കാൻ' മ​റ്റൊരു പ്രതിരോധസമരം. സി.എ.ജിയെ വെല്ലുവിളിക്കാൻ 'രാഷ്​ട്രീയ യജമാന'നുവേണ്ടി സി.എ.ജി എന്ന വേട്ടപ്പട്ടിയെ തുടലഴിച്ചുവിട്ടിരിക്കുകയാണെന്ന മുദ്രാവാക്യങ്ങൾ ധനമന്ത്രി ഐസക്കാണ്​ ഈ പ്രതി​േരാധത്തിന്​ എറിഞ്ഞുകൊടുത്തത്​. ത​െൻറ വകു​പ്പിൽ സി.എ.ജി എത്തിച്ച മുഖ്യമന്ത്രി, ഗവർണർ എന്നിവരിലൂടെ നിയമസഭയുടെ മേശപ്പുറത്തുവെച്ച്​ അംഗങ്ങൾക്ക്​ ലഭ്യമാക്കേണ്ടിയിരുന്ന, സി.എ.ജി റിപ്പോർട്ടി​െൻറ രഹസ്യ ഉള്ളടക്കം പുറത്തുവിട്ടതും ധനമന്ത്രിതന്നെ. അവകാശലംഘനമോ, സഭയിൽ നോക്കിക്കോളാം എന്ന ഔദ്ധത്യത്തോടെ.

ഇടതുഗവൺമെൻറിനെയും സംസ്​ഥാനത്തെ വികസനത്തെയും തകർക്കാനുള്ള നീക്കമാണ്​ സി.എ.ജിയുടേതെങ്കിൽ, ഭരണഘടനാപരമായി സഭ വിളിച്ചുചേർത്ത്​ ആ രാഷ്​ട്രീയ ഗൂഢാലോചന തുറന്നുകാട്ടാമായിരുന്നു. കിഫ്​ബിയുമായി ബന്ധപ്പെട്ട ഹൈകോടതിയിലെ കേസിൽ ശരിയായ നിലപാടെടുത്ത്​ കേരളത്തിനെതിരായ നീക്കം പരാജയപ്പെടുത്താമായിരുന്നു. എന്നാൽ സി.എ.ജിയെ ആക്രമിച്ച്​ രാഷ്​ട്രീയ കൊള്ള നടത്തുകയാണ്​ ധനമന്ത്രി ചെയ്​തത്​. ജനങ്ങളെ തെറ്റിദ്ധരിപ്പിച്ചും അവരുടെ വികാരങ്ങൾ ചൂഷണം ചെയ്​തും സി.എ.ജിയെ തദ്ദേശ തെരഞ്ഞെടുപ്പ്​ പ്രചാരണവേദിയിൽ കെട്ടിത്തൂക്കി വോ​ട്ടെടുപ്പിന്​ ആയുധമാക്കുകയും ചെയ്യുന്നു.

മുഖ്യമന്ത്രിയുടെ പ്രിൻസിപ്പൽ സെക്രട്ടറി ശിവശങ്കറിനെ സ്വർണക്കടത്തു കേസിൽ പ്രതിയാക്കി അറസ്​റ്റ്​ ചെയ്​തു. മുഖ്യമന്ത്രിയുടെ പേഴ്​സനൽ സ്​റ്റാഫ്​ അംഗങ്ങളിലേക്കുകൂടി കേന്ദ്ര അന്വേഷണ ഏജൻസികളുടെ കൈ നീളാൻ തുടങ്ങി. കള്ളപ്പണം വെളുപ്പിക്കൽ, ലഹരിമരുന്ന്​ കടത്ത്​ കേസുകളിൽ സംസ്​ഥാന സെക്രട്ടറിയുടെ മകൻ അറസ്​റ്റിലായതും ഈ സമയത്താണ്​. സെക്രട്ടറിയുടെ വീട്​ ​െറയ്​ഡ്​ ചെയ്യുന്നതിലേക്കും കണ്ടുകെട്ടുന്നതിലേക്കും കാര്യങ്ങളെത്തി. അന്വേഷണ ഏജൻസികളുടെ കൈയിൽ എന്തൊക്കെ രേഖകളുണ്ടെന്നറിയാതെ പ്രതികരിക്കാനാവില്ലെന്ന്​ മുഖ്യമന്ത്രിക്കുതന്നെ പറയേണ്ടിവന്നു. സി.പി.എമ്മിനെയും ഇടതുമുന്നണിയെ ആകെയും തനിക്ക്​ സുരക്ഷാവലയം തീർക്കാൻ മുഖ്യമന്ത്രി ഒരുക്കിയത്​ പിന്നീടാണ്​.

കേന്ദ്ര ഏജൻസികളുടെ ലക്ഷ്യം മുഖ്യമന്ത്രിയാണെന്നു​ പറഞ്ഞ്​ അവർക്കെതിരെ ഇടതുമുന്നണി പ്രവർത്തകരെ പിറകെ അണിനിരത്തി. മുഖ്യമന്ത്രിയും സി.പി.എമ്മും ചരിത്രത്തിലില്ലാത്തവിധം ദേശവിരുദ്ധ കുറ്റകൃത്യങ്ങൾ ആരോപിക്കപ്പെട്ട്​ ജനങ്ങളുടെ അവിശ്വാസത്തിന്​ പാത്രമായി. ഈ ഘട്ടത്തിലാണ്​ കഴിഞ്ഞ വർഷത്തെ 2018-2019ലെ കേരളത്തി​െൻറ വാർഷിക ഓഡിറ്റ്​ റിപ്പോർട്ട്​ സി.എ.ജി ധനമന്ത്രിയുടെ ഓഫിസിൽ എത്തിക്കുന്നത്​. സംസ്​ഥാന സർക്കാറി​െൻറ സൃഷ്​ടിയായ 'കിഫ്​ബി'യിലൂടെ മസാലബോണ്ട്​ ഇറക്കിയതും വിദേശത്തുനിന്ന്​ ധനസമാഹരണം നടത്തിയതും അതിൽ ചോദ്യം ചെയ്​തിരുന്നു. കേന്ദ്രസർക്കാറിനും ചില കേന്ദ്ര പൊതുമേഖല സംവിധാനങ്ങൾക്കും മാത്രം അനുവാദമുള്ള ഈ വ്യവസ്​ഥ സംസ്​ഥാന സർക്കാർ രൂപവത്​കരിച്ച കോർപറേറ്റ്​ സ്​ഥാപനമായ 'കിഫ്​ബി'ക്ക്​ ലഭ്യമാക്കിയതി​െൻറ കാര്യത്തിൽ സി.എ.ജി വിശദീകരണം തേടി. ധനമന്ത്രി ഐസക്കി​െൻറ വെളിപ്പെടുത്തലിൽനിന്ന്​ അതാണ്​ മനസ്സിലാവുന്നത്​.

ധനമന്ത്രിയുടെ ലേഖനങ്ങളും അഭിമുഖങ്ങളും വ്യക്തമാക്കുന്നത്​ മറ്റൊന്നാണ്. മുഖ്യമന്ത്രിയെ കിഫ്​ബിയിൽ നോക്കുകുത്തിയായി ഇരുത്തുകയും ലണ്ടൻ സ്​റ്റോക്ക്​ എക്​സ്​ചേഞ്ചിൽ മണിയടിപ്പിച്ച്​ പ്രസാദിപ്പിക്കുകയും ചെയ്​തു. എന്നാൽ ആ മസാലാ ബോണ്ട്​ കമ്യൂണിസ്​റ്റ്​ മുഖ്യമന്ത്രിക്കും തനിക്കും മറ്റൊരു ലാവ​ലിൻ കേസായി മാറാൻ പോകുന്നു. ഒരു സ്വകാര്യബാങ്ക്​ മുഖേന റിസർവ്​ ബാങ്കിൽനിന്ന്​ എൻ.ഒ.സി സംഘടിപ്പിച്ചത്​, കിഫ്​ബിയെ കോർപറേറ്റ്​ സ്​ഥാപനമാക്കി ധനസമാഹരണ ഉപകരണമാക്കിയത്​ -ഇതെല്ലാം സി.ഐ.ജിയുടെ ആഴത്തിലുള്ള പരിശോധനകൾക്ക്​ വിധേയമാണ്​. 2017-2018 ഓഡിറ്റ്​ റിപ്പോർട്ടിൽതന്നെ സി.എ.ജി ഈ കാര്യം സൂചിപ്പിച്ചിരുന്നു. അതി​െൻറ തുടർച്ചമാത്രമാണ്​ ഡൽഹിയിൽനിന്ന്​ കൂട്ടിച്ചേർത്ത നാലുപേജ്​ റിപ്പോർട്ട്​ എന്നുകൂടി വ്യക്തമാണ്​.

മുഖ്യമന്ത്രിയുടെയും ധനമന്ത്രിയുടെയും നിലപാടുകളിലെ വൈരുധ്യവും സംശയകരമാണ്. സംഘ്​പരിവാറും കോൺഗ്രസും സി.​എ.ജിയും ചേർന്ന ഗൂഢാലോചനയെന്നാണ്​ കഴിഞ്ഞ ദിവസങ്ങളിൽ ഐസക്കും പാർട്ടിവക്താക്കളും അടിച്ചുകയറ്റാൻ ശ്രമിച്ചത്​. മുഖ്യമന്ത്രിയാക​ട്ടെ, പ്രധാനമന്ത്രിയെയോ സംഘ്​പരിവാറിനെയോ കുറ്റപ്പെടുത്താൻ തയാറായിട്ടില്ല. മസാലബോണ്ടിന്​ 9.77 ശതമാനം പലിശ നൽകുന്നു. അത്​ അതിലും കുറഞ്ഞ പലിശക്ക്​ സ്വകാര്യ ഇന്ത്യൻ ബാങ്കുകളിൽ നിക്ഷേപിക്കുന്നു. അങ്ങനെ നിക്ഷേപിച്ച ഒരു സ്വകാര്യബാങ്ക്​ പ്രതിസന്ധിയിൽ തകരുമെന്നായപ്പോൾ നിക്ഷേപം പിൻവലിക്കുന്നു. ഇതെല്ലാം കേന്ദ്ര അ​​ന്വേഷണ ഏജൻസികൾക്ക്​ പുതിയ അന്വേഷണ വഴികൾ തുറന്നുകൊടുത്തിട്ടുണ്ട്​.

മുഖ്യമന്ത്രി പിണറായി വിജയന്​ ഈയിടെ സംസ്​ഥാന ഇൻറലിജൻസ്​ സമർപ്പിച്ച ഒരു റിപ്പോർട്ടിലെ വെളിപ്പെടുത്തൽ മുഖ്യമന്ത്രിയുടെയും ധനമന്ത്രിയുടെയും വാദങ്ങൾ പൊളിക്കുന്നതാണ്. തിരുവനന്തപുരത്തെ ഒരു വ്യവസായിയുടെ ഫ്ലാറ്റിൽ രാത്രി സമ്മേളിക്കാറുള്ള മുതിർന്ന ഐ.എ.എസ്​ ഓഫിസർമാരാണ്​ സ്വർണക്കടത്തു വിവരങ്ങൾ ആദ്യമായി ചോർത്തിയത്​. ആ സംഗമത്തിൽ പ​ങ്കെടുക്കാറുള്ള ഒരു കേന്ദ്ര ഇൻറലിജൻസ്​ ഉദ്യോഗസ്​ഥനാണ്​ വിവരം കേന്ദ്രത്തിനും കസ്​റ്റംസി​നും കൈമാറിയത്​. ലൈഫ്​ മിഷൻ പദ്ധതിയിൽ കോഴകൊടുത്ത വിവരം ചാനലിൽ വെളിപ്പെടുത്തിയത്​ മുഖ്യമന്ത്രിയുടെ മാധ്യമ ഉപദേഷ്​ടാവാണ്​. സ്​ഥിരീകരിച്ചത്​ ധനമന്ത്രി ​ഐസക്കും.

ചുരുക്കത്തിൽ, അധോലോക ക്രിമിനലുകളും രാജ്യ​ദ്രോഹശക്തികളും മറ്റും ഉൾ​പ്പെട്ട വലിയൊരു സംഘമാണ്​ സർക്കാർ സംവിധാനം ദുരുപയോഗപ്പെടുത്തിയത്​. മുഖ്യമന്ത്രിയുടെ ഓഫിസിലിരുന്ന്​ പ്രിൻസിപ്പൽ സെക്രട്ടറി ഈ സംഘത്തി​െൻറ ഭാഗമായി പ്രവർത്തിച്ചെന്നാണ്​​ വെളിപ്പെടുന്നത്​. ജനങ്ങൾ അന്വേഷണങ്ങളെ പ്രതിരോധിക്കണമെന്ന്​ പറയുന്നത്​ തെറ്റാണ്​. സംസ്​ഥാന ഗവൺമെൻറിനെയും അതി​െൻറ വിശ്വാസ്യതയെയും വിഴുങ്ങിയ രാജ്യ​ദ്രോഹികൾ പിടികൂടപ്പെടണം. അവരുടെ രാഷ്​ട്രീയം എന്തുതന്നെയായാലും സർക്കാറി​െൻറ വിശ്വാസ്യത വീണ്ടെടുക്കാൻ അതുകൂടിയേ തീരൂ.