മോദീ, നിങ്ങൾ ഇറങ്ങിപ്പോയേ പറ്റൂ

നമുക്കൊരു സർക്കാർ വേണം. അതീവ ഹതാശരായിരിക്കുന്നു. നമുക്കൊരു സർക്കാർ ഇല്ല. നമ്മുടെ വായുശേഖരം കുറഞ്ഞു വരുന്നു, നമ്മൾ മരിച്ചുകൊണ്ടിരിക്കുന്നു. ലഭിച്ച സഹായങ്ങൾ കൈവശമുണ്ടായിട്ടുപോലും അവ എന്തുചെയ്യണം എന്നറിയാനുള്ള ഒരു സംവിധാനം നമുക്കില്ല. നമുക്ക്​ എന്താണ്​ ഇപ്പോൾ ഈ നിമിഷം ചെയ്യാനാവുക?

2024വരെയൊന്നും നമുക്കിനി കാത്തിരിക്കാനാവില്ല. ഞാനുൾപ്പെടെയുള്ള ആളുകൾ പ്രധാനമന്ത്രി നരേന്ദ്ര മോദിയോട്​ ഒരു കാര്യത്തിനുവേണ്ടി അപേക്ഷിക്കേണ്ടിവരുന്ന ഒരുദിവസം വന്നേക്കുമെന്ന്​ സങ്കൽപിച്ചിട്ടുപോലുമില്ല. അങ്ങനെ ചെയ്യുന്നതിലും ഭേദം ജയിലിലേക്ക്​ പോകാനാണ്​ വ്യക്​തിപരമായി എനിക്ക്​ താൽപര്യം. പക്ഷേ ഇ​ന്ന്​ ഇപ്പോൾ നമ്മൾ വീടുകളിലും തെരുവുകളിലും ആശുപത്രികളുടെ വരാന്തകളിലും വൻ നഗരങ്ങളിലും ഗ്രാമങ്ങളിലും കാടുകളിലും വയലുകളിലുമെല്ലാം മരിച്ചുവീഴു​േമ്പാൾ ഒരു സാധാരണ പൗരയെന്ന നിലയിൽ, എ​ന്‍റെ എല്ലാ അഭിമാനബോധവും വിഴുങ്ങിക്കൊണ്ട്​ ദശലക്ഷക്കണക്കായ സഹപൗരജനങ്ങൾക്കൊപ്പം ചേർന്ന്​ അഭ്യർഥിക്കുന്നു; സർ, ദയവായി രാജിവെച്ചിറങ്ങൂ. ഞാൻ താങ്കളോട്​ കെഞ്ചുകയാണ്​, ഇപ്പോഴെങ്കിലും ഒന്ന്​ ഒഴിഞ്ഞുപോകൂ.

ഇത്​ നിങ്ങൾ വരുത്തിവെച്ച പ്രതിസന്ധിയാണ്​, കൂടുതൽ വഷളാക്കാനല്ലാതെ പരിഹരിക്കാൻ നിങ്ങൾക്കൊട്ട്​ കഴിയുകയുമില്ല. ഈ വൈറസ്​ പുഷ്​ടിപ്പെടുന്നത്​ ഭീതിയുടെയും വിദ്വേഷത്തി​ന്‍റെയും വിവരക്കേടി​ന്‍റെയും അന്തരീക്ഷത്തിലാണ്​. കാര്യങ്ങൾ വെട്ടിത്തുറന്ന്​ പറയുന്നവരെ നിങ്ങൾ അടിച്ചൊതുക്കുന്ന സാഹചര്യത്തിലാണ്​. യഥാർഥ സത്യങ്ങളറിയാൻ അന്താരാഷ്​ട്ര മാധ്യമങ്ങളെ ആശ്രയിക്കേണ്ടിവരുന്ന തരത്തിലേക്ക്​ ഇന്ത്യൻ മാധ്യമങ്ങളെ നിങ്ങൾ നിയന്ത്രിച്ചു നിർത്തുന്ന അവസ്​ഥയിലാണ്​. ത​ന്‍റെ ഭരണകാലത്തൊരിക്കൽപോലും, ഭീതിയുടെ ഈ മരവിച്ച കാലത്തും ഒരു വാർത്തസമ്മേളനത്തെ അഭിമുഖീകരിക്കാനോ ചോദ്യങ്ങളെ നേരി​ടാനോ കെൽപില്ലാത്ത ഒരു പ്രധാനമന്ത്രിയുള്ള സന്ദർഭത്തിലാണ്​.

നിങ്ങൾ മാറാത്തപക്ഷം ഞങ്ങൾക്കിടയിൽനിന്ന്​ ആയിരക്കണക്കിനാളുകൾ അകാരണമായി മരണത്തിന്​ കീഴടങ്ങേണ്ടിവരും.അ​തുകൊണ്ട്​ സഞ്ചിയുമെടുത്ത്​ നിങ്ങൾ ഇറങ്ങിപ്പോവുക. നിങ്ങളുടെ എല്ലാ അന്തസ്സും ഉറപ്പിച്ചു​െകാണ്ട്​. ധ്യാനവും ഏകാന്തതയും നിറഞ്ഞ നല്ലൊരു ജീവിതം നിങ്ങൾക്കുണ്ടാകും. അതൊക്കെയാണ്​ ​ആഗ്രഹങ്ങളെന്ന്​ നിങ്ങൾതന്നെ പറഞ്ഞിട്ടുള്ളതാണ്​. ഈ കൂട്ടമരണം തുടരാൻ അനുവദിച്ചാൽ അതൊന്നുംപിന്നെ സാധ്യമായില്ലെന്നു​വരും.

നിങ്ങൾക്കു​ പകരമായി ഇരുത്താൻ പറ്റിയ ആളുകൾ നിങ്ങളുടെ പാർട്ടിയിൽതന്നെയുണ്ട്​. രാഷ്​ട്രീയ എതിരഭിപ്രായങ്ങളുണ്ടെങ്കിൽപോലും ഈ പ്രതിസന്ധിഘട്ടത്തിൽ അറിവുള്ളവർ ആ സ്​ഥാനത്ത്​ വരണം. രാഷ്​ട്രീയ സ്വയം സേവക സംഘത്തി​ന്‍റെ അനുമതിയോടെതന്നെ അവർക്ക്​ രാജ്യത്തെയും പ്രശ്​നപരിഹാര സമിതിയെയും നയിക്കാനാവും.

സംസ്​ഥാന മുഖ്യമന്ത്രിമാർക്ക്​ ഏതാനും പ്രതിനിധികളെ തെരഞ്ഞെടുത്തയക്കാം, അപ്പോൾ ഏവർക്കും പ്രാതിനിധ്യം ഉറപ്പാകും. ഒരു ദേശീയ പാർട്ടി എന്നനിലയിൽ കോൺഗ്രസിനെയും സമിതിയിൽ ഉൾക്കൊള്ളിക്കാം. ശാ​സ്​ത്രജ്​ഞർ, പൊതുജനാരോഗ്യ വിദഗ്​ധർ, പരിചയസമ്പന്നരായ ഉദ്യോഗസ്​ഥർ തുടങ്ങിയവരെയും ചേർക്കാം. നിങ്ങൾക്ക്​ ഒരുപക്ഷേ ഇതൊന്നും മനസ്സിലായിക്കൊള്ളണമെന്നില്ല. പക്ഷേ, ഇതിനെയാണ്​ ജനാധിപത്യം എന്നു പറയുന്നത്​. പ്രതിപക്ഷമുക്​ത ജനാധിപത്യം ഒരിക്കലും സാധ്യമല്ല. അതിനെ സ്വേച്ഛാധിപത്യം എന്നാണ്​ പറയുക. വൈറസിന് വല്ലാത്ത ഇഷ്​ടമാണതിനോട്​.​

ഇപ്പോൾ നിങ്ങളിത്​ ചെയ്​തില്ലെങ്കിൽ ഈ ദുരന്താവസ്​ഥ ലോകത്തിനൊട്ടുക്ക്​ ഭീഷണിയായ ഒരു അന്താരാഷ്​ട്ര പ്രശ്​നമായി വിലയിരുത്തപ്പെടും. മറ്റു രാജ്യങ്ങൾക്ക്​ നമ്മുടെ കാര്യങ്ങളിൽ കയറി ഇടപെടാനും നിയന്ത്രിക്കാനും ന്യായമായ സാധുത ലഭിക്കാൻ നിങ്ങളുടെ കഴിവുകേട്​ വഴിയൊരുക്കും. ഏറെ പൊരുതി നേടിയ നമ്മുടെ പരമാധികാരം അടിയറവെക്കാൻ അത്​ കാരണ​മായേക്കും. നമ്മൾ വീണ്ടുമൊരു കോളനി രാജ്യമായി മാറിയേക്കും. ഗുരുതരമായ ഒരു സാധ്യതയാണത്​. അത്​ കാണാതെ പോകരുത്​.

അതുകൊണ്ട്​ ദയവായി ഒന്ന്​ ഇറങ്ങിപ്പോകൂ. നിങ്ങളിൽ നിന്നുണ്ടാകേണ്ട ഏറ്റവും ഉത്തരവാദിത്തപൂർണമായ പ്രവൃത്തിയാകുമത്. ഞങ്ങളുടെ പ്രധാനമന്ത്രിയായി തുടരാനുള്ള എല്ലാവിധ ധാർമിക അവകാശങ്ങളും നിങ്ങൾ തുലച്ചുകളഞ്ഞിരിക്കുന്നു.