സ്വപ്​നങ്ങൾ വളര​ട്ടെ ആകാശം മു​ട്ടെ

മലപ്പുറം ജില്ലയിലെ മഞ്ചേരിക്കടുത്ത ആമയൂർ എന്ന നാട്ടിൻപുറത്തുകാരിയാണ്​ ഞാൻ. മൂന്നു വർഷം മുമ്പ്​​ യു.കെയിൽ ജനിച്ചു വളർന്ന ഒരു സുഹൃത്തിനോട്​ സോഷ്യൽ മീഡിയയിൽ സംസാരിക്കവെ നാടുകളുടെ വിശേഷങ്ങളും പങ്കുവെച്ചിരുന്നു. യു.കെയിലെ മലകളെക്കുറിച്ചും നദികളെക്കുറിച്ചും വിഖ്യാതമായ തെരുവുകളെക്കുറിച്ചും ആ സുഹൃത്ത്​ പറയു​േമ്പാൾ എന്നെങ്കിലുമൊരിക്കൽ അതൊക്കെ ചെന്ന്​ കാണണം എന്ന്​ സ്വപ്​നം കാണാൻപോലും ധൈര്യമില്ലായിരുന്നു. സാമ്പത്തികമായും ഭൂമിശാസ്​ത്രപരമായും അത്രയേറെ അകലമുണ്ടായിരുന്നു എനിക്ക്​.

പക്ഷേ, ഇപ്പോൾ ഈ കുറിപ്പെഴുതുന്നത്​ രണ്ടു വർഷമായി താമസിക്കുന്ന ഇംഗ്ലണ്ടിലെ പ്രസ്​റ്റൺ നഗരത്തിലിരുന്നാണ്​. ഇവിടെയുള്ള യൂനിവേഴ്​സിറ്റി ഓഫ്​ സെൻട്രൽ ലാങ്ക്വഷറിൽ ഇൻറർ കൾച്ചറൽ ബിസിനസ്​ കമ്യൂണിക്കേഷനിൽ മാസ്​റ്റർ ബിരുദം വിജയകരമായി പൂർത്തിയാക്കി, അതിനോടനുബന്ധിച്ച്​ ഒരു മനോഹരമായ ജോലിയിലും പ്രവേശിച്ചു.

ഇവിടേക്കുള്ള യാത്ര ഒട്ടും തന്നെ എളുപ്പമായിരുന്നില്ല. ഒരു സ്​കോളർഷിപ്പ്​ പരീക്ഷയെഴുതാൻ ഒരു ദിവസം ക്ലാസിപോകാതിരുന്നാൽ നിന്നെയിപ്പോൾ ക്ലാസിലേക്ക്​ കാണുന്നേയില്ലല്ലോ എന്ന്​ പറഞ്ഞിരുന്ന അധ്യാപകരും അപേക്ഷ നൽകാനും പാഠ്യേതര പ്രവർത്തനങ്ങൾക്കുമായി കോഴിക്കോ​ട്ടോ കൊച്ചി​യിലേക്കോ പോകുന്നതു കണ്ടാൽ മകൾ അഴിഞ്ഞാടി നടക്കുകയാണല്ലോ എന്ന്​ വീട്ടുകാരെ വിളിച്ച്​ ആവലാതി പറയുന്ന ആളുകളുമുൾപ്പെടെ ഒരുപാട്​ മുള്ളുകളുണ്ടായിരുന്നു ഈ വഴിയിൽ.

ചുറ്റുപാടും നെഗറ്റീവ്​ എനർജിയുടെ കടുത്ത വലയമായിരുന്നു, അതിൽ കുരുങ്ങരുതെന്ന്​ തീരുമാനിച്ചുറപ്പിച്ചു. ആ കുത്തുവാക്കുകൾ കേട്ട്​ തളർന്നിരുന്നെങ്കിൽ, എ​െൻറ കുടുംബം വിലക്കിയിരുന്നെങ്കിൽ ഒരുപക്ഷേ ഈ അന്താരാഷ്​ട്ര അനുഭവം ഉണ്ടാവുമായിരുന്നില്ല. ഒരു വിദേശ സർവകലാശാലയിൽനിന്നുള്ള ബിരുദവും ജോലിയും ലക്ഷ്യങ്ങളുടെ പരകോടിയാണെന്ന വിശ്വാസമൊന്നുമില്ല,

എല്ലാ പ്രതിസന്ധികളെയും തരണംചെയ്​തു എന്ന്​ കരുതുന്നുമില്ല. പക്ഷേ, ഇനി ജീവിതവഴിയിൽ വന്നു ചേരുന്ന പ്രതിസന്ധികളെ നേരിടുവാനുള്ള കരുത്ത്​ പകർന്നു തന്നിരിക്കുന്നു ഞാൻ നടന്ന മുള്ളുപാതകൾ. അതെ​െൻറ കാലുകളെ ശക്​തിപ്പെടുത്തി, ദൈവ കാരുണ്യത്തിലും പൊരുതാനുള്ള എ​െൻറ കരുത്തിലും വിശ്വാസം വർധിപ്പിക്കുകയും ചെയ്​തിരിക്കുന്നു.

കഴിഞ്ഞ മാസം ബിരുദ സർട്ടിഫിക്കറ്റ്​ വാങ്ങാൻ സ്​റ്റേജിലേക്ക്​ നടന്നു കയറവെ എ​െൻറ മനസ്സ്​ ഓർമപ്പെടുത്തി -മൂന്നു വർഷം മുമ്പ്​​ തീർത്തും അചിന്ത്യവും അപ്രാപ്യവുമായിരുന്ന ഒരു ലക്ഷ്യമിപ്പോൾ ഒരു കൈപ്പാട്​ അകലത്തിലെത്തിയിരിക്കുന്നുവെന്ന്​.

സ്വപ്​നം കാണാൻ ഭയപ്പെട്ട ഒരു നേട്ടമാണ്​ സ്വന്തമായിരിക്കുന്നത്​. ഇനി സ്വപ്​നം കാണാൻ ഭയമില്ല. ഒരാൾക്കു മുന്നിലും അടിയറവ്​ പറയില്ല എന്ന ഉറപ്പിന്​ കൂടുതൽ തിടം വെച്ചിരിക്കുന്നു. എ​െൻറ നാട്ടിലെ ഗ്രാമ്യമലയാളത്തിൽ വർത്തമാനം പറഞ്ഞ്​ കടന്നുപോകുന്ന കൂടുതൽ കുട്ടികളെക്കൊണ്ട്​ ഇവിടത്തെയും മറ്റ്​ ലോക സർവകലാശാലകളുടെയും കാമ്പസുകൾ നിറയുമെന്ന്​ മനസ്സ്​ പറയുന്നു.

ഈ കുറിപ്പ്​ വായിക്കുന്ന ഓരോരുത്തരോടും, പ്രത്യേകിച്ച്​ പെൺകുട്ടികളോടും യുവജനങ്ങളോടും ഒരേ ഒരു കാര്യമേ ഈ പുതുവർഷ ദിനത്തിൽ ഓർമിപ്പിക്കാനുള്ളൂ–അസാധ്യമെന്ന്​ കരുതി നിങ്ങൾ സ്വപ്​നങ്ങളെ കുഴിച്ചുമൂടരുതെന്ന്​; മറ്റുള്ളവർ നമുക്കായി നിശ്ചയിച്ചു വെച്ചിരിക്കുന്ന വരകളിലൂടെ നടക്കരുതെന്ന്​.

യു.കെയിലെ സ്റ്റാൻലി ഹൗസിൽ സോഷ്യൽ മീഡിയ മാർക്കറ്റിങ് എക്‌സിക്യൂട്ടിവാണ് ലേഖിക