ചി​ന്തി​ക്കാം, കോ​വി​ഡാ​ന​ന്ത​ര കേ​ര​ള​ത്തെ​ക്കു​റി​ച്ചും

കോവിഡാനന്തര കേരളത്തെയും അതി​െൻറ ഭാവിയെയും ആസൂത്രിത പുരോഗതിയെയും ചിന്തിക്കേണ്ട സമയമായിരിക്കുന്നു. കോവിഡ് നേരിടുന്നതിൽ കേരളം കാട്ടിയ പ്രായോഗികമാതൃക ലോകത്താകെ ചർച്ചചെയ്യപ്പെടുകയും പ്രശംസിക്കപ്പെടുകയും ചെയ്തിട്ടുണ്ട്. ഇക്കാര്യത്തിൽ മുഖ്യമന്ത്രി പിണറായി വിജയനും ആരോഗ്യമന്ത്രി കെ.കെ. ശൈലജയും പൊതുവിൽ സംസ്ഥാന ഭരണകൂടവും അഭിനന്ദനാർഹരാണ്​. രാഷ്​​ട്രീയമായി, പൊതുവിൽ, സംസ്​ഥാന സർക്കാർ കേന്ദ്രസർക്കാറിന്​ എതിരായ നിലപാടുകളാണ് സ്വീകരിക്കാറുള്ളതെങ്കിലും കോവിഡ്കാര്യത്തിൽ ഇരു സർക്കാറുകളും യോജിച്ച പ്രവർത്തനവും സഹകരണവും പ്രദർശിപ്പിച്ചു എന്നതും എടുത്തുപറയേണ്ടതുണ്ട്​​. എല്ലാ പ്രതിസന്ധികളിലും ഭാവിയുടെ വിജയസാധ്യത ഒളിഞ്ഞുകിടക്കുന്നു. എ​െൻറ അഭിപ്രായത്തിൽ കോവിഡാനന്തര ലോകത്ത്​ ഏറെ വികസനത്തിനും പുരോഗതിക്കും സാധ്യതയുള്ള നാടാണ്​ കേരളം. കേരളത്തി​െൻറ ഭാവിയെപ്പറ്റി എന്നും ശുഭപ്രതീക്ഷയും വിശ്വാസവും ​െവച്ചുപുലർത്തിയ ആളാണ്​ ഞാൻ. ഓരോ പ്രദേശത്തും, പ്രകൃതിയും ജീവിതസംസ്കാരവും ചേർന്ന് സൃഷ്​ടിച്ച തനതായ സാധ്യതകൾ പരമാവധി വികസിപ്പിക്കുകയെന്നതാണ്​ ഓരോ പ്രദേശത്തി​െൻറയും വിജയമന്ത്രം.

ഇൗ സാധ്യതകൾ തിരിച്ചറിയുകയും അത്തരം മേഖലകൾക്ക് ഊന്നൽ നൽകിയുള്ള പദ്ധതികൾ ആവിഷ്കരിച്ചുനടപ്പാക്കുകയുമാണ്​ വേണ്ടത്. ടൂറിസം, മെഡിക്കൽ ടൂറിസം, ആയുർവേദം, ഹോളിസ്​റ്റിക്​ ഹെൽത്ത്, മനുഷ്യശക്തിയുടെ വികസനവും ആഗോള വിന്യാസവും, വിവര സാ​േങ്കതികവിദ്യ, തെരഞ്ഞെടുക്കപ്പെട്ട വ്യവസായ മേഖലകൾ, ലോഹമണലുകളുടെ സംസ്കരണം തുടങ്ങിയവയാണ് നിലവിലെ സാഹചര്യത്തിൽ നമുക്ക്​ ഏറെ സാധ്യതയുള്ളത്. വൻകിട വ്യവസായങ്ങൾക്ക് ഇവിടെ പ്രസക്തിയില്ല എന്ന്​ ആദ്യമേ മനസ്സിലാക്കണം. നമ്മുടെ പരിശുദ്ധമായ പ്രകൃതിയെ കളങ്കപ്പെടുത്തി, മലിനീകരണം സൃഷ്​ടിക്കുന്ന രാസവ്യവസായങ്ങൾ കേരളത്തിന് ആവശ്യമില്ല. നമ്മുടെ പ്രകൃതിയും മനുഷ്യനും നൽകിയിട്ടുള്ള വിഭവങ്ങൾകൊണ്ടുതന്നെ ഐശ്വര്യപൂർണമായ കേരളം സൃഷ്​ടിക്കാൻ സാധിക്കും. പ്രകൃതിയുടെ നൈസർഗികതയാണ് നമ്മുടെ ഏറ്റവും മഹത്തായ പൈതൃകസമ്പത്ത്. 500 കിലോമീറ്റർ ദൈർഘ്യമുള്ള കടൽത്തീരവും കായലുകളുടെയും നദികളുടെയും ശൃംഖലയും സഹ്യപർവതവും സസ്യസമൃദ്ധമായ ഇടനാടുകളും എല്ലാം സന്തുലിതമായി നൽകിയ പരിസ്ഥിതി നാം കാത്തുസൂക്ഷിക്കേണ്ടതാണ്. ഇത്​ പരമാവധി പ്രയോജനപ്പെടുത്തി, സമഗ്രമായ ടൂറിസം പദ്ധതി തയാറാക്കണം. കോവിഡ്​കാലത്ത്​ നാം നേടിയ സൽപ്പേര്​ ഇതിനായി ഉപ​േയാഗപ്പെടുത്തണം.

കേരളത്തി​െൻറ വിസ്തീർണം ഇന്ത്യയുടെ രണ്ടര ശതമാനവും ജനസംഖ്യ മൂന്നു ശതമാനവുമാണ്. എന്നാൽ, രാജ്യത്തി​െൻറ ആരോഗ്യപരിപാലന ചികിത്സകേന്ദ്രങ്ങളുടെ 30 ശതമാനത്തോളം ഇവിടെയാണ്. ഈ ശൃംഖല ലോകത്തിലെതന്നെ ഒരു പ്രധാന ആരോഗ്യസംരക്ഷണ ചികിത്സമേഖലയായി കേരളത്തെ വികസിപ്പിച്ചെടുക്കാൻ പര്യാപ്തമാണ്. അതിനാൽ, മെഡിക്കൽ ടൂറിസം മേഖലയിൽ അപാരമായ സാധ്യതയാണ്​ നമുക്കുള്ളത്​. അതുപോലെതന്നെ നമ്മുടെ പാരമ്പര്യചികിത്സ സമ്പ്രദായമായ ആയുർവേദത്തെയും ഹോളിസ്​റ്റിക് ചികിത്സയെയും ലോകം ഉറ്റുനോക്കുന്നു. ആഗോളജനത അലോപ്പതി ചികിത്സയിൽനിന്ന് പരമ്പരാഗത ഹോളിസ്​റ്റിക് ചികിത്സാരീതികളിലേക്ക് ക്രമേണ മാറിക്കൊണ്ടിരിക്കുകയാണ്. ആയുർവേദ ചികിത്സ ശാസ്ത്രീയമായി സംഘടിപ്പിക്കുന്നതിനും ലോകാന്തരങ്ങളിൽ കേരള ആയുർവേദകേന്ദ്രങ്ങൾ സംഘടിപ്പിക്കുന്നതിനുമായി 'കേരള ആയുർവേദ ഗ്ലോബൽ വിഷൻ' സംഘടിപ്പിക്കണം.

ഏറ്റവുമധികം, ശ്രദ്ധിക്കേണ്ട കേരളത്തി​െൻറ തനതായ വൈദഗ്ധ്യമേഖലയാണ്​ നഴ്​സിങ്​​ വിദ്യാഭ്യാസം. രാജ്യത്ത്​ ബഹുഭൂരിപക്ഷം നഴ്​സിങ്​ വിദ്യാർഥികളെയും പരിശീലിപ്പിച്ചെടുക്കുന്നത് കേരളമാണ്. ലോകത്ത്​, ലക്ഷക്കണക്കിന് പരിശീലനം ലഭിച്ച നഴ്സുമാരെ ആവശ്യമുണ്ട്. ജാപ്പനീസ്​ ഭാഷ പഠിച്ച ഒരു നഴ്സിന്​ സാധാരണ നഴ്സിനെക്കാൾ മൂന്നിരട്ടി ശമ്പളം നൽകാൻ ജപ്പാൻ ഗവൺമെൻറ്​ തയാറാണ്. അതുപോലെതന്നെ, മുതിർന്ന പൗരന്മാരുടെ ശതമാനം കൂടിവരുകയാണ്. ഇവരെ പരിചരിക്കാൻ ലക്ഷക്കണക്കിന് പാരാമെഡിക്കൽ ​ൈവദഗ്​ധ്യമുള്ളവരെയും ഫിസിയോ തെറപ്പിസ്​റ്റുകളെയും ജറിയാട്രിക്​ നഴ്സുമാരെയും ആവശ്യമുണ്ട്. നഴ്​സുമാരെയും പാരാമെഡിക്കൽ സ്​റ്റാഫിനെയും പരിശീലിപ്പിക്കുന്ന ഇൻസ്​റ്റിറ്റ്യൂട്ടുകളുടെ ശൃംഖലതന്നെ സ്ഥാപിക്കാവുന്നതാണ്​. ഇതിനായി, കേന്ദ്ര-സംസ്ഥാന ഗവൺമെൻറുകളുടെ സംയുക്ത സംരംഭമായി, ഒരു അന്തർദേശീയ നഴ്സിങ് യൂനിവേഴ്സിറ്റി സ്ഥാപിക്കണം. നമ്മുടെ മറ്റൊരനുഗ്രഹമാണ് വിദ്യാസമ്പന്നമായ മനുഷ്യശക്തി. കേരളീയർ ഇതരസംസ്ഥാനങ്ങളിലും ലോകാന്തരങ്ങളിലും വിശിഷ്​ടസേവനമാണ്​ നൽകുന്നത്​. ഗൾഫ് രാജ്യങ്ങളിലേക്കുള്ള നമ്മുടെ മനുഷ്യശക്തിയുടെ വിന്യാസം സംസ്​ഥാനത്തി​െൻറ സാമൂഹിക, സാമ്പത്തിക വളർച്ചയുടെ സുപ്രധാനഘടകമാണ്. നിലവിലെ സാഹചര്യങ്ങളിൽ ഗൾഫിലെ തൊഴിൽസാധ്യതകളിൽ കുറവുണ്ടെങ്കിലും ഭാവിയിൽ സാങ്കേതിക മുൻതൂക്കമുള്ള തൊഴിലവസരങ്ങൾ ഉണ്ടാവും.

ലോകത്താകെയുള്ള തൊഴിൽസാധ്യതകളിലേക്ക്​ ചെന്നെത്തത്തക്കവിധം മനുഷ്യശക്തിയെ ശാസ്ത്രീയമായി വികസിപ്പിക്കുകയും വിന്യസിക്കുകയും ചെയ്യണം. 'നോർക്ക' പോലുള്ള സംവിധാനങ്ങൾ കുറെയൊക്കെ ഇക്കാര്യത്തിൽ വിജയിച്ചിട്ടുണ്ട്. എങ്കിലും ഈ സാധ്യതയെ ഒരു മഹാപ്രസ്ഥാനമായി സർക്കാറും മറ്റ്​ ഏജൻസികളും വളർത്തിയെടുത്താൽ, ലക്ഷക്കണക്കിനാളുകൾക്ക്​ പുതിയതായി അന്തസ്സാർന്ന തൊഴിലിടങ്ങൾ ലഭിക്കും. മറ്റു രാജ്യങ്ങളിൽനിന്ന്​ തിരികെയെത്തുന്നവരുടെ ജീവിതം സുഗമമാക്കുന്നതിന് ബൃഹത്തായ പദ്ധതി സർക്കാറിനും സേവന‌സംഘടനകൾക്കും ഏറ്റെടുക്കാനാവും. ഓരോ പ്രവാസിയുടെയും കഴിവുകളുടെയും അനുഭവസമ്പത്തി​െൻറയും അടിസ്ഥാനത്തിൽ ആരംഭിക്കാവുന്ന സംരംഭങ്ങളുടെ രൂപരേഖ തയാറാക്കണം. ഇതിനായി ഗൾഫ് മലയാളികളെ കോർത്തിണക്കി, പൊതു-സ്വകാര്യ പങ്കാളിത്തത്തി​​െൻറ അടിസ്ഥാനത്തിൽ, സർക്കാറിന്​ ഉപയോഗപ്പെടുത്താൻ കഴിയാത്ത ആസ്തികൾ ലാഭകരമായി ഉപയോഗിക്കാനാവുന്ന പദ്ധതികളുടെ പരമ്പരതന്നെ സൃഷ്​ടിക്കാനാവും. ഉദാഹരണമായി, ഒരു പഞ്ചായത്തിൽ ഒരു പഴയ വില്ലേജ് ഓഫിസ് 40 സെൻറ് സ്ഥലത്ത് സ്ഥിതിചെയ്യുന്നു എന്നിരിക്കട്ടെ. ആ സ്ഥലം സർക്കാറിൽതന്നെ എന്നെന്നേക്കുമായി നിലനിർത്തി, ഗൾഫ് മലയാളിക്ക് അവിടെ ഒരു ഷോപ്പിങ്​ സെ​ൻററോ മെഡിക്കൽ സെൻററോ ആരംഭിക്കാം. അതി​െൻറ ഭാഗമായി വില്ലേജ് ഓഫിസ് പുനർനിർമിച്ച്​ ജനങ്ങൾക്കും ഉദ്യോഗസ്ഥന്മാർക്കും കൂടുതൽ സൗകര്യപ്രദമാക്കാനുമാവും. ഇങ്ങനെ ഓരോ പഞ്ചായത്തിലും 10 സംരംഭങ്ങൾ വീതം ആരംഭിക്കുകയാണെങ്കിൽ ആയിരം പഞ്ചായത്തുകളിലായി പതിനായിരം സംരംഭങ്ങൾ എല്ലാവർക്കും പ്രയോജനംകിട്ടുന്ന രീതിയിൽ സർക്കാറിന്​ മുതൽമുടക്കില്ലാതെ ആരംഭിക്കാനാവും. സംരംഭകരെ ശാസ്ത്രീയമായി ഒരുക്കിയെടുക്കുന്ന 'കേരള യൂനിവേഴ്സിറ്റി ഓഫ് എൻട്രപ്രണർഷിപ്പും' സ്​ഥാപിക്കണം. സ്ത്രീ-പുരുഷ സമത്വത്തിൽ കേരളത്തിന് അഭിമാനകരമായ സ്ഥാനമാണുള്ളത്.

കുടുംബശ്രീ തുടങ്ങിയ പദ്ധതികളിലൂടെയും തദ്ദേശസ്​ഥാപനങ്ങളിലെ സംവരണം മൂലവും ഇക്കാര്യത്തിൽ നാം മുന്നോട്ടുപോയിട്ടുണ്ട്. നമ്മുടെ വനിതാശക്തി പരമാവധി വികസിപ്പിക്കുന്നതിന് സമഗ്ര പദ്ധതി ആവിഷ്കരിക്കണം. രാജ്യത്ത്​ സാമൂഹികമായും സാമ്പത്തികമായും ഉച്ചനീചത്വം ഏറ്റവും കുറഞ്ഞ സംസ്ഥാനമാണ് കേരളം. പൊതുവിൽ ജനത ഒരു വലിയ മധ്യവർഗമാണ്. രൂക്ഷമായ ദാരിദ്ര്യവും കേരളത്തിലില്ല. അഞ്ചോ പത്തോ വർഷത്തെ കേന്ദ്രീകൃതമായ പ്രയത്നത്തിൽകൂടി ദാരിദ്ര്യനിർമാർജനം സമ്പൂർണമാക്കാനാവും. ലോഹമണലുകളുടെ ശാസ്​ത്രീയ വിനിയോഗം, ഗതാഗതം ഉൾപ്പെടെയുള്ള അടിസ്ഥാന സംവിധാനങ്ങൾ ലോകോത്തരമാക്കൽ, സമഗ്രമായ ജലഗതാഗത സംവിധാനം തുടങ്ങിയ എല്ലാം സമ്പൽസമൃദ്ധമായ കേരളത്തിന് സുസാധ്യമാണ്. ഇവിടെ, ഊർജസ്വലരായ സാമൂഹികപ്രവർത്തകരും സംഘടനകളും ഉണ്ട്. അത്തരം സംഘടനകളെയെല്ലാം കോർത്തിണക്കി നവകേരള സൃഷ്​ടിക്കായി അണിനിരത്തണം. കേരള ജനത അർഹിക്കുന്ന ഐശ്വര്യപൂർണമായ ഭാവി പടുത്തുയർത്തുന്നതിന് കേരളത്തെ സ്നേഹിക്കുന്ന എല്ലാവരും ഒത്തൊരുമിക്കണം.

(മുൻ കേന്ദ്രമന്ത്രിയാണ്​ ലേഖകൻ)