പരീക്ഷകൾ മാറാം, സ്വപ്നങ്ങൾ മാറരുത്

‘‘വിദ്യാഭ്യാസം എന്നത് പുസ്തകത്തിലെ അറിവ് നേടുന്നതു മാത്രമല്ല, മറിച്ച് ജീവിതത്തിലെ വെല്ലുവിളികളെ നേരിടാൻ പഠിക്കുന്ന പ്രക്രിയ കൂടിയാണ്. അതുകൊണ്ടു തന്നെ കഴിഞ്ഞ വർഷം കുട്ടികൾക്ക് പഠിപ്പിച്ച ഏറ്റവും വലിയ പാഠം പ്രതിസന്ധികളെ അതിജീവിക്കാനുള്ള കരുത്തായിരുന്നു...’’

ഒമാനിലെ ഇന്ത്യൻ സ്കൂളുകളിൽ പുതിയ അധ്യയനവർഷത്തിന് തുടക്കമായിരിക്കുന്നു. കുട്ടികൾ വീണ്ടും ക്ലാസ് മുറികളിലേക്ക് മടങ്ങുമ്പോൾ, കഴിഞ്ഞ അധ്യയനവർഷം സമ്മാനിച്ച അനുഭവങ്ങൾ പലർക്കും ഇപ്പോഴും മറക്കാനാവാത്തതാണ്. പരീക്ഷകൾക്കായുള്ള തയാറെടുപ്പുകൾക്കിടയിൽ പശ്ചിമേഷ്യയിൽ രൂപപ്പെട്ട യുദ്ധ സാഹചര്യങ്ങളും അതുണ്ടാക്കിയ അനിശ്ചിതത്വവും, പത്താം ക്ലാസിന്റെയും പ്ലസ് ടുവിന്റെയും പരീക്ഷകൾ റദ്ദാക്കപ്പെട്ടതും പരീക്ഷ എഴുതാതെ മൂല്യനിർണയം നടത്തി ഫലം പ്രഖ്യാപിച്ചതും വിദ്യാർഥികളുടെയും രക്ഷിതാക്കളുടെയും അധ്യാപകരുടെയും മനസ്സിൽ നിരവധി ചോദ്യങ്ങൾ ബാക്കിയാക്കി. വിദ്യാഭ്യാസം എന്നത് പുസ്തകത്തിലെ അറിവ് നേടുന്നതു മാത്രമല്ല, മറിച്ച് ജീവിതത്തിലെ വെല്ലുവിളികളെ നേരിടാൻ പഠിക്കുന്ന പ്രക്രിയ കൂടിയാണ്. അതുകൊണ്ടു തന്നെ കഴിഞ്ഞ വർഷം കുട്ടികൾക്ക് പഠിപ്പിച്ച ഏറ്റവും വലിയ പാഠം പ്രതിസന്ധികളെ അതിജീവിക്കാനുള്ള കരുത്തായിരുന്നു.

പരീക്ഷകൾ റദ്ദാക്കപ്പെട്ടപ്പോൾ പല വിദ്യാർഥികൾക്കും ആശ്വാസമുണ്ടായെങ്കിലും മറ്റുചിലർക്ക് അത് വലിയ നിരാശയായിരുന്നു. വർഷം മുഴുവൻ കഠിനാധ്വാനം ചെയ്ത ശേഷം സ്വന്തം കഴിവ് പരീക്ഷയിലൂടെ തെളിയിക്കാനുള്ള അവസരം നഷ്ടപ്പെട്ടുവെന്ന തോന്നൽ പലരെയും അലട്ടിയിരുന്നു. അതേസമയം, ലഭിച്ച മാർക്ക് യഥാർഥ കഴിവിനെ പ്രതിഫലിപ്പിക്കുന്നുണ്ടോ എന്ന ആശങ്കയും ചിലരെ പിന്തുടർന്നു. പ്രത്യേകിച്ച് മെഡിസിൻ ഉൾപ്പെടെയുള്ള പ്രഫഷനൽ കോഴ്സുകൾ ലക്ഷ്യമിട്ടിരുന്ന വിദ്യാർഥികൾക്ക് മത്സര പരീക്ഷകളെക്കുറിച്ചുള്ള സമ്മർദം കൂടുതൽ ശക്തമായി അനുഭവപ്പെട്ടു.

നീറ്റ് പരീക്ഷയെ ചുറ്റിപ്പറ്റിയ വിവാദങ്ങളും പരീക്ഷാ സംവിധാനത്തെക്കുറിച്ചുള്ള അനിശ്ചിതത്വങ്ങളും വിദ്യാർഥികളുടെ ആത്മ വിശ്വാസത്തെ ബാധിച്ചു. ‘കഠിനാധ്വാനം മാത്രം മതിയോ, സംവിധാനവും നീതിപൂർവ മാകേണ്ടതല്ലേ?’ എന്ന ചോദ്യം പല കുട്ടികളുടെയും മനസ്സിൽ ഉയർന്നു. പഠനത്തേക്കാൾ പരീക്ഷാ രീതികളെക്കുറിച്ചുള്ള ആശങ്കകൾ അവരുടെ മാനസികാരോഗ്യത്തെ ബാധിച്ചുവെന്നത് നിഷേധിക്കാനാവില്ല.

യുദ്ധത്തിന്റെ നിഴലും കുട്ടികളുടെ മനസ്സിൽ ചെറിയ മുറിവുകൾ സൃഷ്ടിച്ചു. ഗൾഫ് രാജ്യങ്ങളിൽ ജീവിക്കുന്ന കുടുംബങ്ങൾക്ക് വിമാന സർവിസുകൾ, സുരക്ഷ, ബന്ധുക്കളുടെ യാത്രകൾ, തൊഴിൽ സാഹചര്യങ്ങൾ തുടങ്ങിയ വിഷയങ്ങളിൽ ആശങ്കയുണ്ടായി. മുതിർന്നവർ നടത്തുന്ന ഇത്തരം ചർച്ചകൾ കുട്ടികളിലും അനിശ്ചിതത്വവും ഭയവും സൃഷ്ടിച്ചു. ലോകത്ത് നടക്കുന്ന സംഭവങ്ങൾ സ്വന്തം ജീവിതത്തെയും ബാധിക്കാമെന്ന തിരിച്ചറിവ് അവരുടെ ചിന്തകളെ കൂടുതൽ ഗൗരവമുള്ളതാക്കി.

എന്നാൽ, ഓരോ പ്രതിസന്ധിയും ഒരു പുതിയ തിരിച്ചറിവ് സമ്മാനിക്കാറുണ്ട്. മാർക്കിനേക്കാൾ കഴിവിന് വിലയുണ്ടെന്നും, പാഠപുസ്തകങ്ങൾക്കപ്പുറം ജീവിത നൈപുണ്യങ്ങൾക്കും പ്രാധാന്യമുണ്ടെന്നും കഴിഞ്ഞ വർഷം കുട്ടികൾ മനസ്സിലാക്കി. സാഹചര്യങ്ങൾ എപ്പോൾ വേണമെങ്കിലും മാറാമെന്നും അതിനനുസരിച്ച് സ്വയം മാറാൻ കഴിയുന്നവരാണ് വിജയിക്കുന്നതെന്നും അവർ പഠിച്ചു.

ഈ പുതിയ അധ്യയനവർഷം അതുകൊണ്ടുതന്നെ വെറും ഒരു അക്കാദമിക് തുടക്കം മാത്രം ആകാതിരിക്കട്ടെ. മറിച്ച് ആത്മവിശ്വാസം വീണ്ടെടുക്കാനുള്ള അവസരം കൂടിയാണ്. പഴയ നിരാശകളിൽ കുടുങ്ങിനിൽക്കാതെ പുതിയ ലക്ഷ്യങ്ങളിലേക്ക് മുന്നേറാൻ കുട്ടികൾ തയാറാകണം. മാർക്ക് എന്നത് വിജയത്തിന്റെ ഒരു ഘടകം മാത്രമാണെന്നും, യഥാർഥ വിജയം വ്യക്തിത്വ വികസനത്തിലും അറിവിന്റെ ആഴത്തിലുമാണെന്ന തിരിച്ചറിവ് അവർക്ക് ഉണ്ടാകണം.

ഈ യാത്രയിൽ രക്ഷിതാക്കളുടെ പങ്ക് അതീവ പ്രധാനമാണ്. എല്ലാ കുട്ടികളെയും ഒരേ അളവുകോൽ ഉപയോഗിച്ച് വിലയിരുത്തരുത്. മറ്റുള്ളവരുമായി താരതമ്യം ചെയ്യുന്നതിനുപകരം സ്വന്തം മകന്റെയോ മകളുടെയോ വളർച്ചയെ തിരിച്ചറിയാനും പ്രോത്സാഹിപ്പിക്കാനുമാണ് മാതാപിതാക്കൾ ശ്രദ്ധിക്കേണ്ടത്. മാർക്ക് കുറഞ്ഞാൽ ജീവിതം അവസാനിക്കുന്നില്ലെന്നും, ഓരോ പരാജയവും പുതിയ വിജയത്തിലേക്കുള്ള ഒരു പടിയാണെന്നും കുട്ടികളെ ബോധ്യപ്പെടുത്തണം.

അധ്യാപകരും മാറുന്ന കാലത്തിനനുസരിച്ച് പുതിയ ഉത്തരവാദിത്തങ്ങൾ ഏറ്റെടുക്കേണ്ടതുണ്ട്. പാഠങ്ങൾ പഠിപ്പിക്കുന്നതിനൊപ്പം കുട്ടികളുടെ മാനസികാവസ്ഥ മനസ്സിലാക്കാനും, അവരെ കേൾക്കാനും, ആത്മവിശ്വാസം പകരാനും അവർക്ക് കഴിയണം. പഠനം ഭയത്തിന്റെ വിഷയമല്ല, ആസ്വാദനത്തിന്റെ അനുഭവമാക്കാൻ ക്ലാസ് മുറികളിൽ കൂടുതൽ സംവേദനാത്മകമായ സമീപനങ്ങൾ ആവശ്യമാണ്.

പുതിയ കാലഘട്ടത്തിൽ കൃത്രിമബുദ്ധി, ഡിജിറ്റൽ സാങ്കേതികവിദ്യ, ആശയ വിനിമയശേഷി, പ്രശ്ന പരിഹാരശേഷി, സൃഷ്ടിപരമായ ചിന്ത എന്നിവയും വിദ്യാഭ്യാസത്തിന്റെ ഭാഗമാണ്. പരീക്ഷക്കുവേണ്ടി മാത്രം പഠിക്കുന്ന സമീപനത്തിൽ നിന്ന് ജീവിതത്തിനുവേണ്ടി പഠിക്കുന്ന സംസ്കാരത്തിലേക്ക് കുട്ടികൾ വളരേണ്ട സമയമാണിത്.

അതുകൊണ്ടുതന്നെ ഈ പുതിയ അധ്യയനവർഷം ഓരോ കുടുംബത്തിനും പുതിയ പ്രതീക്ഷകളുടെ തുടക്കമാകട്ടെ. ഈ വർഷം നമ്മുടെ കുട്ടികൾക്ക് കൂടുതൽ അറിവും ആത്മവിശ്വാസവും മാനസികാരോഗ്യവും ജീവിത മൂല്യങ്ങളും സമ്മാനിക്കുന്ന വർഷമാകട്ടെ. ഓരോ പുതിയ അധ്യയന വർഷവും ഒരു പുതിയ പാഠപുസ്തകം മാത്രമല്ല തുറക്കുന്നത്, അനന്ത സാധ്യതകളിലേക്കുള്ള ഒരു പുതിയ ജീവിത വാതിൽകൂടിയാണ് തുറക്കുന്നത്.