ദുരന്തഭൂമിയിലെ മാലാഖമാരേ, നന്ദി!

ദുരന്തമുഖത്തെ ഹൃദയഭേദകമായ കാഴ്ചകൾ എത്ര ശ്രമിച്ചിട്ടും കൺമുന്നിൽ നിന്നും മാഞ്ഞുപോകുന്നില്ല. ഒരു നാടു തന്നെ കത്തിച്ചാമ്പലാക്കാൻ ഹേതുവാകുമായിരുന്ന വിമാനാപകടം!

കോവിഡ് ഭീതി നിലനിൽക്കുന്ന ക​െണ്ടയ്​ൻമെൻറ് സോൺ ആയിട്ടുപോലും കൈമെയ് മറന്ന് ജാതിയും മതവും നിറവും നോക്കാതെ അപകടസ്ഥലത്ത് പാഞ്ഞെത്തി രക്ഷാപ്രവർത്തനത്തിൽ പങ്കാളികളായ നാട്ടുകാരെയും സന്നദ്ധപ്രവർത്തകരെയും പൊലീസ്, അഗ്​നിശമനസേന അംഗങ്ങളെയും ആശുപത്രി ജീവനക്കാരെയും ഡോക്ടർമാരെയും ആരോഗ്യ വകുപ്പ് ജീവനക്കാരെയും ദുരന്തം നടന്നതു മുതൽ അവസാനത്തെ യാത്രക്കാരനെയും പുറത്തെടുക്കുന്നതുവരെ സത്യസന്ധമായി വാർത്തകൾ റിപ്പോർട്ടു ചെയ്യാനും ചിത്രങ്ങൾ പകർത്താനുമെത്തിയ മാധ്യമപ്രവർത്തകരെയും രാഷ്​ട്രീയ പ്രവർത്തകരെയും ജനപ്രതിനിധികളെയും ഈ അവസരത്തിൽ കൃതജ്ഞതയോടെ ഓർക്കുകയാണ്. ദുരന്തത്തിൽ മരണമടഞ്ഞവരുടെ നിത്യശാന്തിക്കു വേണ്ടി പ്രാർഥിക്കുന്നു.

ഈ നാട് ഇങ്ങനെയാണ്. ഈ ആധുനിക യുഗത്തിലും മനുഷ്യപ്പറ്റ് മരിച്ചിട്ടില്ലാത്തവരുടെ സ്വന്തം നാട്. പച്ചപ്പും ആർദ്രതയും പ്രകൃതിയിലെന്ന പോലെ മനുഷ്യ മനസ്സിലും ഇടം പിടിച്ചവരുടെ നാട്. സ്നേഹവും ഊഷ്മളതയും അളവില്ലാതെ കോരിക്കൊടുക്കുന്നവരുടെ ദേശം.

ഇവിടെ ജനിക്കാനായതിൽ ഞാൻ അഭിമാനിക്കുന്നു. ഈ മണ്ണി​െൻറ മണമറിയാൻ കഴിയുന്നതിൽ, ഈ പച്ചപ്പി​െൻറ തണലറിയാനാകുന്നതിൽ, ഇവിടത്തുകാരുടെ ജന പ്രതിനിധിയാകാൻ സാധിച്ചതിൽ ഞാൻ പുളകമണിയുന്നു.

കൊണ്ടോട്ടിയുടെ ഒരു ഭാഗത്ത് പ്രളയത്തി​െൻറ ദുരന്തങ്ങൾ നേരിൽ കണ്ട ശേഷം, പ്രളയത്തിൽ വേദനയും നഷ്​ടങ്ങളും സഹിച്ചവരെ ആശ്വസിപ്പിച്ച് മടങ്ങിയെത്തിയതേ ഉണ്ടായിരുന്നുള്ളൂ. അപ്പോഴാണ് ഇടിവെട്ടേറ്റവനെ പാമ്പുകടിച്ചു എന്ന ചൊല്ലിനെ അന്വർഥമാക്കും വിധം മറ്റൊരു ദുരന്തം വിമാനത്തി​െൻറ രൂപത്തിൽ പറന്നിറങ്ങിയത്.

ദുരന്തമുഖത്ത് നിന്നും അപകടത്തിൽ പെട്ടവരെയും ജീവൻ നിലച്ചവരെയും താങ്ങിയെടുത്ത് കിട്ടിയ വാഹനങ്ങളിൽ ആശുപത്രികളിലെത്തിക്കാനുള്ള ബദ്ധപ്പാടിൽ ആരും കൊറോണയെ ഭയപ്പെട്ടില്ല. അകലം പാലിച്ചില്ല. കണ്ടയ്​ൻമെൻറ് സോൺ എന്ന നിയമമോർത്തില്ല. സാനിറ്റൈസർ തിരഞ്ഞില്ല. വിലപ്പെട്ട ജീവ​െൻറ തുടിപ്പുകൾ തിരിച്ചു കിട്ടട്ടെയെന്ന ഒരൊറ്റ ചിന്തയിൽ കൈമെയ് മറന്ന് രംഗത്തിറങ്ങുകയായിരുന്നു.

കൊണ്ടോട്ടിയുടെ ഈ കരുതലിന്, മലപ്പുറത്തി​െൻറ ഈ കാരുണ്യപ്പെയ്ത്തിന് പ്രിയപ്പെട്ടവരേ, നിങ്ങളോടുള്ള നന്ദിയും കടപ്പാടും വാക്കുകളിൽ ഒതുങ്ങുന്നതല്ല. ഈ മനുഷ്യത്വം ലോകർക്ക് മാതൃകയാണ്. ഈ സ്നേഹവും കരുതലും എന്നും നിലനിൽക്കേണ്ടതും കാത്തുസൂക്ഷിക്കേണ്ടതുമാണ്.