Begin typing your search above and press return to search.
exit_to_app
exit_to_app
Homechevron_rightOpinionchevron_rightArticleschevron_rightഹര്‍ത്താല്‍ നിയന്ത്രണ...

ഹര്‍ത്താല്‍ നിയന്ത്രണ ബില്‍ പുതുയുഗത്തിന്‍െറ നാന്ദി

text_fields
bookmark_border
ഹര്‍ത്താല്‍ നിയന്ത്രണ ബില്‍ പുതുയുഗത്തിന്‍െറ നാന്ദി
cancel

നമ്മുടെ നാട്ടില്‍ കുറെ വര്‍ഷങ്ങളായി നിരന്തരം അരങ്ങേറിക്കൊണ്ടിരിക്കുന്ന പ്രതിഭാസമാണ് ഹര്‍ത്താലുകള്‍. സംഘടിത രാഷ്ട്രീയ, സാമൂഹിക പ്രസ്ഥാനങ്ങള്‍ തൊട്ട് വലിയ ജനപിന്തുണയൊന്നും അവകാശപ്പെടാന്‍ കഴിയാത്ത സംഘടനകള്‍വരെ ആവശ്യത്തിനും അനാവശ്യത്തിനും ഹര്‍ത്താലുകള്‍ പ്രഖ്യാപിച്ച് ജനജീവിതം സ്തംഭിപ്പിക്കാറുണ്ട്. ഒരു മേശക്കുചുറ്റുമിരുന്ന് സംസാരിച്ചാല്‍ പരിഹരിക്കപ്പെടാവുന്ന പ്രശ്നങ്ങള്‍ പോലും പലപ്പോഴും ഹര്‍ത്താലിലേക്കത്തെിച്ച് ഒരു ദിവസത്തെ ജനജീവിതത്തെ സമ്പൂര്‍ണമായി നിശ്ചലമാക്കുന്ന അവസ്ഥാവിശേഷമാണിപ്പോഴുള്ളത്. ഭരണഘടന ഉറപ്പുനല്‍കുന്ന, സഞ്ചരിക്കാനും തൊഴിലെടുക്കാനുമുള്ള പൗരന്‍െറ അവകാശം ഇത്തരം ഹര്‍ത്താലുകളിലൂടെ നിഷേധിക്കപ്പെടുന്നു. ‘എന്‍െറ മൂക്ക് തുടങ്ങുന്നിടത്ത് നിങ്ങളുടെ സ്വാതന്ത്ര്യം അവസാനിക്കുന്നു’ (your freedom ends where my nose begun) എന്ന ഇംഗ്ളീഷ് പഴമൊഴി അഭിപ്രായ സ്വാതന്ത്ര്യത്തെ സംബന്ധിച്ച എക്കാലത്തെയും വലിയ നിര്‍വചനമായിട്ടാണ് വ്യാഖ്യാനിക്കപ്പെടുന്നത്. മറ്റൊരു വ്യക്തിയുടെ  സ്വാതന്ത്ര്യത്തെ ഇല്ലാതാക്കിയോ പരിമിതപ്പെടുത്തിയോ ഒരാള്‍ക്കും  പ്രതിഷേധിക്കാന്‍ അവകാശമില്ല. ഈ വസ്തുതകളെല്ലാം മുന്‍നിര്‍ത്തിയാണ് സംസ്ഥാന ആഭ്യന്തരവകുപ്പിന്‍െറ  നിര്‍ദേശപ്രകാരം ഹര്‍ത്താലുകള്‍ ജനങ്ങള്‍ക്ക് ഉണ്ടാക്കുന്ന ബുദ്ധിമുട്ടുകള്‍ ഒഴിവാക്കാനായി  കേരള  ഹര്‍ത്താല്‍ നിയന്ത്രണ ബില്‍ 2015ന്‍െറ കരട്  സര്‍ക്കാര്‍ തയാറാക്കുന്നത്. ബില്‍  ഉടന്‍തന്നെ മന്ത്രിസഭയുടെ പരിഗണനക്കത്തെും.
ജനങ്ങള്‍ക്ക് ബുദ്ധിമുട്ടുണ്ടാകുന്ന തരത്തിലുള്ള ഹര്‍ത്താലുകളെക്കുറിച്ച് പല ഭാഗത്തുനിന്നും പരാതികള്‍ ഉയര്‍ന്നിരുന്നു.  ഇക്കാര്യങ്ങളെല്ലാം   പരിശോധിച്ചുകൊണ്ടാണ്  ഇത്തരത്തിലൊരു ബില്‍ അണിയറയില്‍ ഒരുങ്ങുന്നത്. ജനങ്ങള്‍ക്ക് ബുദ്ധിമുട്ടുണ്ടാകുന്ന  ഹര്‍ത്താലുകള്‍ നിയന്ത്രിക്കേണ്ടതിന്‍െറ ആവശ്യകത ഹൈകോടതിയും  സര്‍ക്കാറിന്‍െറ ശ്രദ്ധയില്‍പെടുത്തിയിരുന്നു.
ഹര്‍ത്താല്‍ എന്നാല്‍, ഒരു കാരണമോ,  പ്രചാരണപ്രവര്‍ത്തനമോ ഉയര്‍ത്തിക്കാട്ടുന്നതിനായി  പൊതുജനസമ്മര്‍ദം, സാമൂഹിക സംക്ഷോഭം, സാമ്പത്തിക ഭീഷണി, അക്രമം ഉണ്ടാകുമെന്ന ആശങ്ക  തുടങ്ങിയവ സൃഷ്ടിച്ച്  ഏതെങ്കിലും  ആളുകളുടെയോ സംഘടനയുടെയോ പ്രേരണമൂലം വ്യാപാരമോ  തൊഴിലോ മറ്റു പ്രവര്‍ത്തനങ്ങളോ നിര്‍ത്തിവെക്കല്‍  എന്നാണ് നിര്‍ദിഷ്ട ബില്ലുകൊണ്ട് വിവക്ഷിക്കപ്പെടുന്നത്. ഹര്‍ത്താലിന്‍െറ നിര്‍വചനത്തില്‍ ജീവനക്കാരുടെ സമരമോ, 1947ലെ വ്യവസായ തര്‍ക്ക ആക്ടിലോ 1926ലെ ട്രേഡ് യൂനിയന്‍ ആക്ടിലോ ഉള്‍പ്പെടുന്ന  ട്രേഡ് യൂനിയന്‍  പ്രവര്‍ത്തനത്തെയും  തൊഴിലാളികളുടെ അവകാശങ്ങളെയും നിയന്ത്രിക്കുന്ന മറ്റേതെങ്കിലും നിയമത്തിലെയോ വ്യവസ്ഥകള്‍ പാലിക്കുന്ന ഏതെങ്കിലും ട്രേഡ് യൂനിയനുകളോ  സംഘടനയോ സംഘടിപ്പിക്കുന്ന സമരമോ ഉള്‍പ്പെടുന്നില്ല. പൊതുജനാഭിപ്രായം സ്വരൂപിച്ചുകൊണ്ടും രാഷ്ട്രീയ, സാമൂഹിക, സാംസ്കാരിക മേഖലകളിലെ ഉന്നത വ്യക്തിത്വങ്ങളുമായി ആശയവിനമയം നടത്തി അവരുടെ നിര്‍ദേശങ്ങളും അഭിപ്രായങ്ങളും  കണക്കിലെടുത്തും മാത്രമായിരിക്കും ബില്ലിന് അന്തിമ രൂപം നല്‍കുക.

ഹര്‍ത്താലുകളുടെ നിയന്ത്രണം

ഏതെങ്കിലും വ്യക്തിക്കോ സംഘടനകള്‍ക്കോ നേരിട്ടോ അവര്‍ ഏര്‍പ്പെടുത്തുന്ന മറ്റു സംവിധാനങ്ങള്‍ വഴിയോ ഹര്‍ത്താലിന് ആഹ്വാനം ചെയ്യാവുന്നതാണെന്ന്  ബില്‍ വ്യവസ്ഥ ചെയ്യുന്നു. എന്നാല്‍, ചില നിയന്ത്രണങ്ങളുമുണ്ട്. അവയില്‍ പ്രധാനപ്പെട്ടത് ഇവയാണ്:

 1. ഈ ആക്ട് നിലവില്‍വന്നാല്‍ നിയമ പ്രകാരം അനുവദനീയമായ രീതിയിലല്ലാതെ   ഏതെങ്കിലും വ്യക്തിക്കോ സംഘത്തിനോ  സംഘടനക്കോ ഹര്‍ത്താല്‍ ആഹ്വാനം ചെയ്യാനോ നടത്താനോ ഉള്ള അവകാശം ഉണ്ടായിരിക്കുന്നതല്ല.

2. മാധ്യമങ്ങള്‍ മുഖേനയുള്ള മൂന്നു ദിവസത്തെ അറിയിപ്പ് കൂടാതെ ഹര്‍ത്താല്‍ പ്രഖ്യാപിക്കാനോ ഹര്‍ത്താലിന് പ്രേരിപ്പിക്കാനോ പാടില്ല.

3. ഹര്‍ത്താല്‍ സംഘടിപ്പിക്കുന്നവര്‍ ജീവനും സ്വത്തിനും  ഉണ്ടാകുന്ന വിനാശത്തിനോ നാശനഷ്ടത്തിനോ ഉള്ള നഷ്ടപരിഹാരം നല്‍കുന്നതിനുവേണ്ടി നിശ്ചയിക്കപ്പെടുന്ന  തുക ഈടായി നിക്ഷേപിക്കണം.

4. ബലംപ്രയോഗിച്ചോ ശാരീരികവും മാനസികവുമായി   ഭീഷണിപ്പെടുത്തിയോ ഹര്‍ത്താലുകള്‍ നടത്താന്‍ പാടില്ല.

5. ബലംപ്രയോഗിച്ചോ, ബലംപ്രയോഗിക്കുമെന്ന് ഭീഷണിപ്പെടുത്തിയോ മറ്റൊരാളുടെ  പ്രവര്‍ത്തനസ്വാതന്ത്ര്യത്തെ തടസ്സപ്പെടുത്തുകയോ    ഏതെങ്കിലും ആളുടെ  വ്യാപാരത്തെയോ വ്യവസായത്തെയോ അതിന്‍െറ സഹായഘടകങ്ങളുടെയോ പ്രവര്‍ത്തനത്തെ രാവിലെ ആറുമണിക്ക് മുമ്പോ വൈകീട്ട് ആറുമണിക്കുശേഷമോ നിര്‍ത്തലാക്കുകയോ നിയന്ത്രിക്കുകയോ ചെയ്യാന്‍ പാടില്ല.

6. വിദ്യാഭ്യാസ  സ്ഥാപനങ്ങളോ ധര്‍മസ്ഥാപനങ്ങളോ ഉള്‍പ്പെടെയുള്ള ഏതെങ്കിലും പൊതുസ്ഥാപനങ്ങളുടെ പ്രവര്‍ത്തനത്തെയോ പ്രയോജനകരമായ സേവനങ്ങളെയോ തടസ്സപ്പെടുത്താനോ നിര്‍ത്തലാക്കാനോ പാടുള്ളതല്ല.

7. വ്യാപാരം, കച്ചവടം,  സംരംഭം  അല്ളെങ്കില്‍ യാത്രാവാഹനത്തെയോ സൗകര്യത്തെയോ തടസ്സപ്പെടുത്തുന്നതിനോ ബലമോ ഭീഷണിയോ അക്രമമോ ഉപയോഗിക്കാനോ, അവ  പൂര്‍ണമായോ  ഭാഗികമായോ അടക്കുന്നതിനോ, അവ നിര്‍ത്തലാക്കാനോ  നിര്‍ബന്ധിക്കുന്നത് കുറ്റകരമാണ്.

8. ഏതൊരു പൗരന്‍െറയും ജീവനോ സ്വാതന്ത്ര്യത്തിനോ സ്വത്തിനോ  ഭീഷണിയും അപകടവും ആശങ്കയും വരുത്തിവെക്കുന്ന പ്രവൃത്തികളോ സര്‍ക്കാര്‍ വക വസ്തുവിന്‍െറ നാശത്തിന് കാരണമാകുന്ന പ്രവൃത്തികളോ പൊതുസമാധാനവും  ക്രമസമാധാനവും  അപകടപ്പെടുത്തുകയും ചെയ്യുകയോ  പൊതുജനങ്ങളുടെ മൗലികാവകാശങ്ങളെ  പ്രതികൂലമായി ബാധിക്കുകയോ ചെയ്യുന്ന പ്രവൃത്തികളും  കര്‍ശനമായി തടയും.


ഹര്‍ത്താലുകള്‍ നിരോധിക്കുന്നത്

ജനജീവിതത്തിന് ആവശ്യമായ  വ്യാപാരത്തെയോ പ്രവര്‍ത്തനത്തെയോ  ബാധിക്കുന്നതാണ് ഹര്‍ത്താലെങ്കില്‍ അത്   മൂന്നു ദിവസത്തെ നോട്ടീസ് നല്‍കിയിട്ടുള്ളതാണെങ്കില്‍പോലും  സര്‍ക്കാറിന്  ഹര്‍ത്താല്‍  നിരോധിക്കാം. ആശുപത്രികള്‍, ഹെല്‍ത്ത് ക്ളിനിക്കുകള്‍, മെഡിക്കല്‍ ഷോപ്പുകള്‍, ഫാര്‍മസി എന്നിവയും പാല്‍, പത്രം, മീന്‍,  ജലം, ആഹാരം എന്നിവയുടെ വിതരണവും ആംബുലന്‍സുകളുടെയും  ആശുപത്രി വാഹനങ്ങളുടെയും  ഗതാഗതം, ഇന്ധനവിതരണം,  അതത് സമയത്ത് സര്‍ക്കാറിന്  വിജ്ഞാപനം ചെയ്യാവുന്ന  മറ്റു  വ്യാപാരമോ പ്രവര്‍ത്തനമോ  തുടങ്ങിയവയാണ്  ജനജീവിതത്തിന് ആവശ്യമായ വ്യാപാരമോ പ്രവര്‍ത്തനമോ എന്നതുകൊണ്ട് അര്‍ഥമാക്കുന്നത്. വ്യക്തിയുടെയോ വ്യക്തികളുടെയോ നിയമപരമായ  അവകാശങ്ങള്‍  ആരെങ്കിലും ബലം പ്രയോഗിച്ച് തടയുകയോ അങ്ങനെ ചെയ്യുമെന്ന് ഭീഷണിപ്പെടുത്തുകയോ ചെയ്താല്‍ പൊലീസും മറ്റ് ക്രമസമാധാന അധികാര സ്ഥാനങ്ങളും പൗരന്മാരെ സഹായിക്കണമെന്നും നിയമം വ്യവസ്ഥചെയ്യുന്നു.

ആക്ടിന്  വിരുദ്ധമായുള്ള  ഹര്‍ത്താലുകള്‍

ഈ ബില്ലിലെ വ്യവസ്ഥകള്‍ക്ക് വിരുദ്ധമായി ഹര്‍ത്താല്‍ ആഹ്വാനംചെയ്യുകയോ നടത്തുകയോ ചെയ്യുകയും കുറ്റം തെളിയുകയും ചെയ്താല്‍ ആറുമാസം വരെയുള്ള തടവോ അല്ളെങ്കില്‍ 10,000 രൂപവരെയുള്ള പിഴയോ, രണ്ടും കൂടിയോ ലഭിക്കാനുള്ള വ്യവസ്ഥകളും ആക്ടിലുണ്ട്. ഹര്‍ത്താല്‍ ആണെന്ന കാരണത്താല്‍ ഒരു വ്യക്തിയെ അയാളുടെ ജോലിക്ക് ഹാജരാകുന്നതില്‍നിന്ന് വിലക്കുകയോ ആശുപത്രിയോ ഹോട്ടലോ വിദ്യാഭ്യാസ സ്ഥാപനങ്ങളോ ഇന്ധനം നല്‍കുന്ന കേന്ദ്രങ്ങളോ സന്ദര്‍ശിക്കുന്നതില്‍നിന്ന് ബലമായി തടയുകയോ  ചെയ്യുന്നവര്‍ക്കെതിരെ ശിക്ഷ ലഭിക്കുന്നതിനും ബില്ലില്‍ നിര്‍ദേശമുണ്ട്. ഹര്‍ത്താല്‍ സമയത്ത് പൗരന്മാര്‍ക്ക്  ആക്ടില്‍ വ്യവസ്ഥചെയ്യുന്ന സംരക്ഷണങ്ങള്‍ നല്‍കുന്നതില്‍ പൊലീസും മറ്റു ക്രമസമാധാന ഏജന്‍സികളും  വീഴ്ച വരുത്തിയാലും  ഉദ്യോഗസ്ഥര്‍ക്കുമേല്‍  കൃത്യവിലോപത്തിന് പിഴ ചുമത്താനും  നിയമമുണ്ട്.

ജാമ്യം അനുവദിക്കുന്നതിനുള്ള ഉപാധികള്‍

ഹര്‍ത്താലിനിടെ ഏതെങ്കിലും വ്യക്തി പൊതുമുതല്‍ നശിപ്പിക്കുന്ന കൃത്യത്തില്‍ ഏര്‍പ്പെട്ടാല്‍  കോടതി മുമ്പാകെ റിപ്പോര്‍ട്ട് ചെയ്യുന്ന ഉദ്യോഗസ്ഥന്‍  തിട്ടപ്പെടുത്തിയ മൂല്യത്തിന്‍െറ അടിസ്ഥാനത്തില്‍ കോടതി താല്‍ക്കാലികമായി നിര്‍ണയിക്കുന്ന വസ്തുവിന്‍െറ മൂല്യം കോടതിയില്‍ നിക്ഷേപിച്ചാല്‍ മാത്രമേ അയാള്‍ക്ക് ജാമ്യം അനുവദിക്കുകയുള്ളൂ. ഹര്‍ത്താലുമായി ബന്ധപ്പെട്ട കുറ്റങ്ങളില്‍ പ്രതി നിരപരാധിയെന്ന് കോടതിക്ക് ബോധ്യപ്പെട്ടാല്‍ നിക്ഷേപിക്കപ്പെട്ട സംഖ്യ പ്രതിക്ക് തിരിച്ചുനല്‍കും. അപരാധിയെന്ന് ബോധ്യപ്പെട്ടാല്‍  നാശനഷ്ടത്തിന്‍െറ മൂല്യം കണക്കാക്കി നിക്ഷേപത്തുകയില്‍നിന്ന് അത് ഈടാക്കും. തൊഴിലെടുക്കാനും സഞ്ചരിക്കാനും   വ്യാപാര വ്യവസായങ്ങള്‍ നടത്തിക്കൊണ്ടുപോകാനും മറ്റു സേവനങ്ങള്‍ ലഭ്യമാക്കാനും ജനങ്ങള്‍ക്ക് നമ്മുടെ ഭരണഘടന നല്‍കുന്ന അവകാശത്തെ പൂര്‍ണമായി സംരക്ഷിക്കാനും നിലനിര്‍ത്താനുംവേണ്ടിയാണ് സര്‍ക്കാര്‍ ഇത്തരത്തിലൊരു ബില്‍ നിയമമാക്കാന്‍ ഉദ്ദേശിക്കുന്നത്. തുടക്കത്തില്‍ സൂചിപ്പിച്ചപോലെ പൊതുജനാഭിപ്രായ  രൂപവത്കരണത്തിനും  ജനപ്രതിനിധികള്‍ അടക്കമുള്ള രാഷ്ട്രീയ നേതാക്കളുമായി ചര്‍ച്ച  ചെയ്ത് അഭിപ്രായ സമന്വയം സൃഷ്ടിച്ചതിനുശേഷം മാത്രമേ ഇത്തരത്തിലൊരു ബില്‍ നിയമമാക്കാന്‍ സര്‍ക്കാര്‍ ഉദ്ദേശിക്കുന്നുള്ളൂ. ഇക്കാര്യത്തില്‍  മുന്‍വിധികളോ പിടിവാശികളോ സര്‍ക്കാറിനില്ല. ജനങ്ങളുടെ  ക്ഷേമവും ഐശ്വര്യവും മാത്രം ലക്ഷ്യമിട്ടാണ് ഇത്തരത്തിലൊരു നിയമനിര്‍മാണത്തിന് സര്‍ക്കാര്‍ ഒരുങ്ങുന്നത്. വിയോജിപ്പുകള്‍ക്കും എതിരഭിപ്രായങ്ങള്‍ക്കും മുഖംതിരിഞ്ഞ് നിന്നുകൊണ്ടാകില്ല  സര്‍ക്കാര്‍  ഇത്തരത്തിലൊരു നിയമനിര്‍മാണം നടപ്പില്‍ വരുത്തുക.

Show Full Article
TAGS:
Next Story