ഓൺലൈൻ തട്ടിപ്പ്​ വീണ്ടും; ബഹ്​റൈനിൽ രണ്ട്​ മലയാളികൾക്ക്​ 3.13 ലക്ഷം നഷ്​ടമായി

മനാമ: ബഹ്​റൈനിൽ ഒാൺലൈൻ സാമ്പത്തിക തട്ടിപ്പുകൾ വീണ്ടും. രണ്ട്​ മലയാളികൾക്ക്​ 1590 ദിനാർ (3,13,912 രൂപ) ആണ്​ കഴിഞ്ഞ ദിവസം നഷ്​ടമായത്​.

ബഹ്​റൈനിലെ പ്രമുഖ കമ്പനിയിൽ ജീവനക്കാരാണ്​ രണ്ടുപേരും. ഒരാളുടെ മൊബൈൽ ഫോണിലേക്ക്​ വന്ന ഒ.ടി.പി നമ്പർ ചോദിച്ച്​ അജ്​ഞാത നമ്പറിൽനിന്ന്​ കോൾ വരികയായിരുന്നു. പണം ട്രാൻസ്​ഫർ ചെയ്യു​േമ്പാൾ അബദ്ധത്തിൽ മൊബൈൽ നമ്പർ മാറിയതാണെന്നാണ്​ വിളിച്ചയാൾ പറഞ്ഞത്​. ഇതു വിശ്വസിച്ച്​ അദ്ദേഹം ഒ.ടി.പി നമ്പർ കൈമാറി. തൊട്ടുപിന്നാലെ, അക്കൗണ്ടിൽ നിന്ന്​ 1297 ദിനാർ പിൻവലിച്ചുവെന്ന സന്ദേശം ലഭിച്ചപ്പോഴാണ്​ തട്ടിപ്പ്​ ബോധ്യമായത്​.

രണ്ടാമത്തെയാൾക്ക്​ ബുധനാഴ്​ച രാവിലെയാണ്​ ശമ്പളം അക്കൗണ്ടിൽ എത്തിയത്​. ഒരു മണിക്കൂർ കഴിഞ്ഞപ്പോൾ 293 ദിനാർ ​ഒരു മൊബൈൽ നമ്പർ വഴി ട്രാൻസ്​ഫർ ചെയ്​തതായി സന്ദേശം വന്നു. അതിന്​ മുമ്പ്​ ഇദ്ദേഹത്തി​െൻറ മൊബൈലിലേക്ക്​ കോളോ സന്ദേശമോ വന്നിരുന്നില്ല. ഉടൻതന്നെ ബാങ്കിൽ വിവരം അറിയിച്ചു. ഒാൺലൈൻ തട്ടിപ്പുകൾ അന്വേഷിക്കുന്ന അഴിമതി വിരുദ്ധ, സാമ്പത്തിക, ഇലക്​ട്രോണിക്​ സുരക്ഷാ വിഭാഗത്തി​െൻറ 992 എന്ന നമ്പറിൽ വിളിച്ച്​ പരാതി നൽകുകയും ചെയ്​തിട്ടുണ്ട്​. സന്ദേശത്തിൽ കണ്ട നമ്പറിലേക്ക്​ വിളിച്ചപ്പോൾ 'നിങ്ങൾക്ക്​ കഴിയുന്നത്​ ചെയ്യൂ' എന്ന മറുപടിയാണത്രേ ലഭിച്ചത്​. ഹിന്ദി കലർന്ന ഇംഗ്ലീഷിലായിരുന്നു സംസാരം.

വിഷയം ബഹ്‌റൈൻ അധികാരികളുടെയും ഇന്ത്യൻ എംബസിയുടെയും ശ്രദ്ധയിൽപെടുത്തുമെന്ന്​ സാമൂഹിക പ്രവർത്തകനായ കെ.ടി സലീം പറഞ്ഞു.

ആളുകൾ പരമാവധി ജാഗ്രത പുലർത്തണമെന്നാണ്​ ഇൗ തട്ടിപ്പുകൾ ഒാർമിപ്പിക്കുന്നത്​. സമീപകാലത്ത്​ നിരവധി പേർക്ക്​ ഒാൺലൈൻ തട്ടിപ്പിലൂടെ പണം നഷ്​ടമായിട്ടുണ്ട്​.