എൻജിനീയറിംഗ്​ വിദ്യാർഥി കോവിഡ് ബാധിച്ച് മരിച്ചു

തിരുവനന്തപുരം: എ.പി.ജെ അബ്​ദുൽ കലാം സാങ്കേതിക സർവകലാശാല വിദ്യാർത്ഥി സൂരജ് കൃഷ്​ണ (21) കോവിഡ് ബാധിച്ച് മരിച്ചു. കൊല്ലം ടി.കെ.എം കോളജ് ഓഫ് എൻജിനീയറിംഗിൽ ബി.ടെക് കമ്പ്യൂട്ടർ സയൻസിൽ മൂന്നാം വർഷ വിദ്യാർഥിയായിരുന്നു.

യൂനിവേഴ്സിറ്റി ക്ലാസുകൾ ഓൺലൈനായി നടത്തുന്നതിനാൽ തിരുവനന്തപുരത്തെ വിളപ്പിലുള്ള വീട്ടിലായിരുന്നു സൂരജ്. താൽക്കാലികമായി ഓൺലൈൻ ക്ലാസുകൾ നിർത്തിയശേഷം മൂന്ന് ദിവസം മുമ്പ്​ മഴയത്ത് സുഹൃത്തുക്കളുമായി ഫുട്​ബാൾ കളിച്ചതിനെ തുടർന്ന് പനി പിടിച്ചിരുന്നു. ആൻറിജൻ പരിശോധനയിൽ നെഗറ്റീവ് ആയിരുന്നെങ്കിലും ഞായറാഴ്ച രാവിലെയോടെ കോവിഡി​െൻറ ലക്ഷണങ്ങൾ പ്രകടിപ്പിച്ചതിനാൽ വിളപ്പിൽ പ്രാഥമികാരോഗ്യ കേന്ദ്രത്തിൽ പ്രവേശിപ്പിച്ചു.

രക്തത്തിൽ ഓക്സിജൻ കുറഞ്ഞ്​ ആരോഗ്യനിലയിൽ വ്യത്യാസമുണ്ടായതിനെ തുടർന്ന് മെഡിക്കൽ കോളജ് ആശുപത്രിയിൽ പ്രവേശിപ്പിച്ചെങ്കിലും വൈകുന്നേരം ആറോടെ മരിക്കുകയായിരുന്നു. ശ്വാസകോശത്തിൽ ന്യൂമോണിയ ബാധിച്ചതാണ്​ സ്ഥിതി കൂടുതൽ വഷളാക്കിയത്​.

വട്ടിയൂർക്കാവ് വിളപ്പിൽ പഞ്ചായത്തിൽ 'നീലാംബരി'യിൽ ഡ്രൈവറായ കെ. സുരേഷ് കുമാറി​െൻറയും വീട്ടമ്മയായ മഞ്ജുഷയുടെയും മകനാണ് സൂരജ്. സഹോദരി: ആര്യ കൃഷ്ണ.

മികച്ച എൻ.സി.സി കേഡറ്റായിരുന്ന സൂരജ് ഡൽഹിയിൽ നടന്ന റിപ്പബ്ലിക് ദിന പരേഡിൽ കേരളത്തെ പ്രതിനിധീകരിച്ചിരുന്നു. സൂരജി​െൻറ മരണത്തിൽ വൈസ് ചാൻസലർ ഡോ. എം.എസ്. രാജശ്രീ അനുശോചനം രേഖപ്പെടുത്തി.